KINITEKEN banci erban kita tuhu-tuhu paguh. Contohna, amin gia iusahaken Setan kel gelah lanai kita ndeher ras Jahwe, ‘banci simateken kerina anak panah si gara i bas si jahat nari’ adi erkiniteken kita. (Ep. 6:16) Selain si e adi erkiniteken kita, banci siadapi erbage masalah si seh kel galangna si bali bagi deleng. Ikataken Jesus man murid-muridna, “Adi lit kin kiniteken kena asa biji sawi lah gia, banci ikataken kena man deleng enda, ‘Miser jenda nari ku jah,’ maka miser me ia.” (Mat. 17:20) Adi erkiniteken kita, reh deherna me kita ras Jahwe. Emaka, arus siukuri penungkunen enda: Kai kin kiniteken e? Adi siergai kebenaren, kai pengaruhna nandangi kinitekenta? Kai si banci silakoken gelah reh paguhna kinitekenta? Janah, man ise nge kita arus erkiniteken?​—Rom. 4:3.

Kiniteken labo terjeng tek nandangi kai si ikataken Pustaka, sebap “malekat-malekat jahat pe tek [maka Dibata e lit] janah nggirgir ia.” (Jak. 2:19) Adi bage, kai kin kiniteken e?

Menurut Pustaka, lit dua ertina kiniteken. Si pertama, “kiniteken eme tek kel maka kai si iarapken pasti terjadi.” (Heb. 11:1a) Adi erkiniteken kam, tuhu-tuhu kam tek maka kerina si ikataken Jahwe benar janah pasti terjadi. Nina Jahwe man kalak Israel, “Enggo Kubahan perpadanen ras suari bage pe berngi maka tetap ia reh i bas paksana. Janah ndigan pe perpadanen e la banci ceda. Bage ka nge Kubahan perpadanen ras suruh-suruhenKu Daud.” (Jer. 33:20, 21) Pernah nge kam mbiar lanai terbit matawari ntah pe terbenam, dungna lanai lit suari ras berngi? Pasti la pernah. Sebap tek kel kam maka doni enda pasti terus erputar bas porosna janah ikelilingina matawari sue ras hukum alam. Adi bage, pasti kam tek maka Si Nciptaken kerina hukum e lalap nepati janjiNa.​—Jes. 55:10, 11; Mat. 5:18.

Si peduaken, kiniteken eme “bukti si jelas maka kai si la teridah e tuhu-tuhu lit.” Kiniteken e “bukti si jelas” ntah pe bukti si mpetetap ukur maka kai si la banci siidah tuhu-tuhu lit. (Heb. 11:1b) Kai contohna? Misalna isungkun sekalak anak kam, ‘Kai buktina lit udara?’ Amin gia la pernah idahndu udara, banci ikatakenndu kai saja buktina maka udara e lit. Misalna banci kita erkesah, lit angin si rembus, ras si debanna. Arah bukti-bukti e, banci dungna iangkaina maka udara e tuhu-tuhu lit aminna pe la teridah. Bage ka pe, banci kita erkiniteken perban lit bukti-bukti si terteki.​—Rom. 1:20.

Banci kita erkiniteken perban lit bukti si terteki, emaka perlu kita “pemeteh si tepat kerna kebenaren.” (1 Tim. 2:4) Tapi e saja la bias. Nina Rasul Paulus, “Kiniteken i bas pusuh kena me si erban kena ikataken benar.” (Rom. 10:10) Emaka tek saja nandangi kebenaren labo bias, perlu ka siergai. Kenca siergai kebenaren e, banci dungna kita erkiniteken, maksudna arus sentudu perbahanenta ras kebenaren. (Jak. 2:20) Tapi adi la tuhu-tuhu iergai sekalak jelma kebenaren, labo banci ia tek amin gia lit bukti si banci iteki. Tetap  ipertahankenna kai si itekina sedekah enda ntah pe sura-surana saja si terus atena ilakokenna. (2 Pet. 3:3, 4; Jud. 18) E me si erbanca bas jaman Pustaka, la kerina kalak si ngidah mukjizat banci erkiniteken. (Bil. 14:11; Joh. 12:37) Kalak si ndarami kebenaren ngenca si banci erkiniteken, perban kalak si bage me si isampati kesah si badia.​—Gal. 5:22; 2 Tes. 2:10, 11.

Raja Daud me salah sada umat Dibata si paguh kel kinitekenna. (Heb. 11:32, 33) Tapi, la kerina anggota keluarga Daud si bagi ia kinitekenna. Contohna Eliap, abang Daud sintua. Pernah ikatakenna Daud e petua-tuaken sanga merawa Daud megi kata-kata Goliat. E me buktina Eliap la erkiniteken. (1 Sam. 17:26-28) Labo tubuhna nari kalak nggo erkiniteken ntah pe pasti naring ia erkiniteken adi orang tuana erkiniteken. Emaka banci Daud erkiniteken perban ndeher ia ras Dibata.

Bas Masmur 27, banci siteh ngkai maka paguh kiniteken Daud. (Ayat 1) Iukuri Daud kerina si nggo iadapina bage pe kai si ilakoken Jahwe nandangi kerina musuhna. (Ayat 2, 3) Iergaina kel rumah pertoton Jahwe. (Ayat 4) Terus isembah Daud Dibata bas rumah pertoton radu ras umat Dibata si debanna. (Ayat 6) Terus ia ertoto mindo penampat Jahwe. (Ayat 7, 8) Nggit ka Daud iajari kerna kai si ngena ate Dibata. (Ayat 11) Seh kel pentingna iakap Daud kiniteken e, emaka nungkun ia, “Ntah jadi kai nge aku adi la erkiniteken?”​—Ayat 13, Terjemahan Dunia Baru.

Banci paguh kinitekenta bagi Daud adi siusih perukuren ras kebiasanna bagi si ituriken bas Masmur 27. Banci kita erkiniteken adi lit pemetehta si tepat. Emaka adi reh rusurna sipelajari Pustaka bage pe publikasi si erpalasken Pustaka, banci reh paguhna kinitekenta, perban kiniteken e ihasilken kesah si badia Dibata. (Msm. 1:2, 3) Sanga erlajar, sibanlah waktunta ngukurisa alu mbages. Adi mbages siukuri, dungna ngata bujur kel kita man Jahwe. Adi ngata bujur kel kita, reh belinna sura-suranta mbuktiken kinitekenta. Carana, rehlah kita ku perpulungen guna nembah Dibata janah siceritaken arapenta man kalak si deban. (Heb. 10:23-25) Sibuktiken ka kita erkiniteken adi rusur kita “ertoto janah la nyerah.” (Luk. 18:1-8) Emaka, “teruslah ertoto” man Jahwe janah teklah maka ‘iperdiatekenNa kap kita.’ (1 Tes. 5:17; 1 Pet. 5:7) Adi erkiniteken kita, silakoken me kai si benar, janah adi silakoken si benar, reh paguhna kinitekenta.​—Jak. 2:22.

Bas berngi sope Jesus mate, ngerana ia man murid-muridna, nina, “Erkinitekenlah man Dibata, janah erkiniteken ka lah man bangku.” (Joh.  14:1) Emaka, selain erkiniteken man Jahwe, perlu ka kita erkiniteken man Jesus. Kai si banci silakoken guna mbuktiken maka erkiniteken kita man Jesus? Mari sibahas telu carana.

Si pertama, teklah kam maka tebusen e ibereken Dibata man banta sekalak-sekalak. Nina Rasul Paulus, “Kudalani geluhku si gundari e sue ras kiniteken man Anak Dibata, si ngkelengi aku janah si ngkorbanken dirina guna aku.” (Gal. 2:20) Teridah kam erkiniteken man Jesus adi tuhu-tuhu kam tek maka tebusen e erguna man bandu. Perban lit tebusen, dosandu banci iampuni, lit arapenndu guna nggeluh rasa lalap, janah enda jadi bukti si mbelinna kel maka keleng ate Dibata kam. (Rom. 8:32, 38, 39; Ep. 1:7) Adi tek kam tebusen e erguna man bandu, pasti terpegegehi kel kam janah lanai kitik ukurndu.​—2 Tes. 2:16, 17.

Si peduaken, ertotolah man Jahwe gelah reh deherna kita ras Ia. Erkiteken korban tebusen Jesus, banci kita ‘bebas ertoto man Jahwe. Alu bage sialoken perkuah ate ras lias ateNa si mbelin si nampati kita i bas waktu si tepat.’ (Heb. 4:15, 16; 10:19-22) Adi ertoto kita, banci kita la nyerah sanga igoda.​—Luk. 22:40.

Si peteluken, patuhlah man Jesus. Nina Rasul Johanes, “Ise pe si erkiniteken man Anak, ndatken kegeluhen si rasa lalap. Ise pe si la patuh man Anak, labo ndatken kegeluhen, tapi rawa Dibata lalap lit bas ia.” (Joh. 3:36) Bas ayat e, ibandingken Johanes kalak si erkiniteken ras kalak si la patuh man Jesus. Emaka, banci teridah kam erkiniteken man Jesus adi patuh kam man bana. Bukti kam patuh man Jesus adi idalankenndu “undang-undang Kristus,” eme kerina si iajarken ras si iperentahkenna. (Gal. 6:2) Selain si e, arus ka iikutkenndu petunjuk si ibereken Jesus arah “budak si setia janah pentar.” (Mat. 24:45) Adi patuh kam man Jesus, pasti ngasup kam ngadapi masalah si seh kel beratna si bali bagi badai.​—Mat. 7:24, 25.

Pernah ikataken sekalak dilaki man Jesus, “Erkiniteken nge aku! Sampati min aku gelah tambah kinitekenku!” (Mrk. 9:24) Amin gia nggo erkiniteken dilaki e ndai, itehna maka perlu denga ia isampati gelah tambah kinitekenna. Bagi dilaki e, mon-mon kita pe perlu kang isampati gelah tambah kinitekenta. Janah gundari nari, perlu sipepaguh kinitekenta. Bagi si nggo sibahas ndai, banci reh paguhna kinitekenta adi sipelajari Pustaka janah siukuri alu mbages, dungna ngata bujur kel kita man Jahwe. Kinitekenta pe banci reh paguhna adi terus kita reh ku perpulungen radu ras turang seninanta guna nembah Jahwe, siceritaken ka arapenta man kalak si deban, janah terus ertoto. Adi paguh kinitekenta, banci sidat pasu-pasu si seh kel belinna. Nina Pustaka, “O turang senina, bangunlah kiniteken kena si badia e . . . Alu bage, tetap kena i bas kekelengen Dibata.”​—Jud. 20, 21.