1. Ise saja si ikut mbentuk runggun i Pilipi?

SEH me Rasul Paulus, Silas, Lukas, bage pe Timotius i kota Pilipi. Enterem kalak i je meriah akapna megiken berita si meriah kerna Kerajan Dibata. Semangat kel empatna turang seninanta e erban runggun si mbaru, janah mulai me pulung murid-murid si mbaru, banci saja bas rumah Lidia, sekalak turang seninanta si meriah kel iakapna mere.​—Perb. 16:40.

2. Tentangen kai si iadapi runggun e la ndekah kenca si e?

² Tapi la ndekah kenca si e, iadapi kalak e me tentangen. Ipengaruhi Setan me kalak si la senang nandangi kebenaren guna nentang dahin erberita si ilakoken Paulus ras teman-temanna. Paulus ras Silas itangkap, ipekpeki alu tongkat, janah ipenjaraken. Kenca kalak e ibebasken arah penjara, idahi kalak e me murid-murid si mbaru janah ipegegehina. Kenca si e, lawes Paulus, Silas, bage pe Timotius nadingken kota e, tapi banci saja Lukas tetap i je. Kai nge si ilakoken turang seninanta bas runggun si mbaru e? Perban ibereken Jahwe kesahNa si badia man kalak e, terus kalak e semangat ngelayani Ia. (Pil. 2:12) Bangga kel Paulus ngidah kalak e!

3. Menurut Pilipi 1:9-11, kai saja si itotoken Paulus?

³ Kira-kira sepuluh tahun kenca si e, itulis Paulus me surat man runggun i Pilipi. Sanga ibacandu surat e, pasti banci igejapkenndu maka keleng kel ate Paulus turang seninana e. Nina, “Tedeh kel ateku kena kerina, sebap keleng ateku kena bali bagi Kristus Jesus ngkelengi kena.”  (Pil. 1:8) Ikataken Paulus ka maka terus itotokenna kalak e. Ipindona man Jahwe gelah ertambahna kekelengen kalak e, gelah banci ipastiken kalak e kai si lebih penting, gelah la erpandangen, la erban kalak tertuktuk, janah gelah terus ilakoken kalak e kai si benar. Gundari pe, mbue pelajaren si banci sidat arah surat Paulus e. Emaka mari sibaca surat Paulus man kalak Pilipi. (Baca Pilipi 1:9-11.) Kenca si e, sibahas kari kai saja si ikatakenna e, janah uga caranta ndalankenca.

4. (a) Menurut 1 Johanes 4:9, 10, kai buktina keleng kel ate Jahwe kita? (b) Uga nge arusna belinna kekelengenta man Dibata?

⁴ Keleng kel ate Jahwe kita. Emaka isuruhNa AnakNa ku doni, mate guna nebus dosanta. (Baca 1 Johanes 4:9, 10.) Kekelengen Dibata e ngiahken kita ngkelengi Ia. (Rom. 5:8) Uga nge arusna belinna kekelengenta man Dibata? Jawapenna lit bas kata-kata Jesus man sekalak Parisi, “Arus ikelengindu Jahwe Dibatandu alu kerina kegeluhenndu, pusuhndu, ras perukurenndu.” (Mat. 22:36, 37) Sikelengi ateta Dibata alu bulat ukur. Janah, reh belinna ateta kekelengenta man baNa tiap wari. Ikataken Paulus man kalak Pilipi maka arus “ertambahna” kekelengen kalak e. Uga carana gelah reh belinna kekelengenta man Dibata?

5. Uga carana gelah reh kelengna ateta Jahwe?

⁵ Gelah banci keleng ateta Dibata, arus sitandai Ia lebe. Nina Pustaka, “Ise pe si la lit kekelengenna, labo itandaina Dibata, perban Dibata kekelengen kap.” (1 Joh. 4:8) Ijelasken Rasul Paulus uga carana gelah reh kelengna ateta Dibata. Arus tuhu-tuhu sitandai Ia janah bagi Ia min caranta rukur. (Pil. 1:9) Sanga tangtangna kita erlajar Pustaka, mulai me keleng ateta Jahwe amin pe lenga mbue pemetehta kerna Ia. Emaka reh buena pemetehta kerna Jahwe reh kelengna ateta Ia. E me alasenna ngkai maka seh kel pentingna ratur mpelajari Pustaka janah ngukurisa alu mbages.​—Pil. 2:16.

6. Menurut 1 Johanes 4:11, 20, 21, ise si arus sikelengi selain Dibata?

⁶ Perban keleng kel ate Dibata kita, teriahken kita ngkelengi turang seninanta. (Baca 1 Johanes 4:11, 20, 21.) Banci saja menukah siakap ngkelengi turang seninanta, perban ras-ras kita ngelayani Jahwe janah siusih ateta sifat-sifatNa. Siusih ka ateta Jesus si keleng kel atena kita janah iberekenna geluhna banta. Amin pe bage, mon-mon mesera siakap ngkelengi turang seninanta. Mari sibahas contoh bas runggun Pilipi.

7. Kai si banci sipelajari arah persinget Paulus man Eiodia ras Sintike?

⁷ Eiodia ras Sintike kalak Kristen si seh kel semangatna janah radu ‘erjuang ia duana bas mberitaken berita si meriah’ ras Rasul Paulus. Tapi, banci saja lit si erban Eiodia ras Sintike la siangkan janah dungna la sicocoken. I bas surat Paulus man runggun Pilipi, khusus ipersingetina Eiodia ras Sintike “gelah seperukuren” ia duana. (Pil. 4:2, 3) Ikataken Paulus ka man kerina kalak bas runggun, “Teruslah lakoken kai pe alu la jungut-jungut janah la sijawapen.” (Pil. 2:14) Arah persinget Paulus e, tersampati kel Eiodia ras Sintike bage pe kerina turang senina bas runggun gelah lebih sikeleng-kelengen.

8. Engkai maka mesera kel siakap ngkelengi turang seninanta? Kai si perlu silakoken?

 ⁸ Bali bagi Eiodia ras Sintike, mon-mon mesera kel siakap ngkelengi turang seninanta perban siukuri lalap kesalahenna. Situhuna erban salah nge kita kerina tiap wari. Tapi, adi siinget-inget lalap kesalahen turang seninanta, reh serana siakap ngkelengisa. Contohna, adi lit sekalak turang senina si la isampatina kita mbersihken Bale Kerajan, banci saja palak kel kita ngenenca. Adi siinget-inget ka kerina kesalahenna, banci dungna segat ateta ia janah lanai keleng ateta ia. Adi sangana bage si iadapindu, cuba ukurindu enda: Iteh Jahwe kai saja kesalahenta bage pe kesalahen turang seninanta. Tapi tetap keleng ateNa kita kerina. Emaka, siusihlah Jahwe si perkeleng janah teruslah siukuri sifat-sifat mehuli turang seninanta. Adi siusahaken kel ngkelengi turang seninanta, banci kita tetap ersada.​—Pil. 2:1, 2.

9. Kai saja si termasuk “kai si lebih penting” si ituriken Paulus man kalak Kristen i Pilipi?

⁹ Isuruh Jahwe Paulus ngataken man kalak Kristen i Pilipi gelah ‘ipastiken kalak e kai si lebih penting.’ Kita pe arus kang bage. (Pil. 1:10) Si termasuk kai si lebih penting eme uga gelah gelar Jahwe ipebadiaken, uga janji-janjiNa pagi terjadi, bage pe uga gelah runggun dame ras ersada. (Mat. 6:9, 10; Joh. 13:35) Adi si e kerina siban jadi si pentingna i bas geluhta, sibuktiken me maka keleng ateta Jahwe.

10. Kai si arus silakoken gelah la kita erpandangen?

¹⁰ Ikataken Paulus ka maka arus kita “la erpandangen.” Tapi labo ertina arus kita sempurna. La kita banci la erpandangen bagi Dibata Jahwe, sebap sempurna la janah la erpandangen. Tapi, banci kita la erpandangen iakap Jahwe adi siusahaken kel mpebelin kekelengenta janah sipastiken kai si lebih penting. Sibuktiken keleng ateta turang seninanta adi siusahaken kel la erban kalak e tertuktuk.

11. Engkai maka ula min siban turang seninanta tertuktuk?

¹¹ Serius kel persinget kerna ula erban kalak tertuktuk. Uga carana gelah la siban kalak tertuktuk ntah pe bene siban kinitekenna? Banci siban kalak tertuktuk arah pilihenta kerna hiburen, peruis, bage pe pendahinta. Banci saja pilihenta e labo salah, tapi si salah adi pilihenta e ngganggu pusuh peraten kalak janah dungna tertuktuk ia. Nina Jesus adi tertuktuk siban turang seninanta, ulin igantungken sada batu penggilingen si galang ku kerahungta janah igedapken kita ku lawit!​—Mat. 18:6.

12. Kai si banci sipelajari arah turang seninanta si perintis ndai?

¹² Perdiateken kai si ilakoken sekalak perbulangen si merintis ras ndeharana guna ndalanken persinget Jesus e. Bas runggun kalak e, lit sekalak perbulangen ras ndeharana si mbaru denga iperidiken janah ipebelin bas keluarga si melala kel peraturenna. Menurut kalak e umat Jahwe la banci ku bioskop, aminna pe film si itonton labo salah. Sengget kel kalak e sanga itehna duana perintis e lawes ku bioskop. Erkiteken si e, perintis ndai lanai lawes ku bioskop ngasa nggo lebih terlatih pusuh peraten dua kalak si mbaru iperidiken ndai. (Heb. 5:14) Alu bage,  teridah me maka keleng ate perintis e turang seninana, labo bas cakap saja, tapi teridah ka arah perbahanen.​—Rom. 14:19-21; 1 Joh. 3:18.

13. Kai maksudna sipengaruhi turang seninanta erban dosa?

¹³ Siban ka kalak tertuktuk adi sipengaruhi ia erban dosa. Kai maksudna? Misalna, lit sekalak si erlajar Pustaka si nggo ndekah kel erjuang gelah lanai candu minem inemen si lit alkoholna. Dungna ibanna keputusen gelah lanai pernah inemna inemen si bage. Enggo robah kel ia janah dungna iperidiken. Bas pudi wari, iundang sekalak turang senina ia ku sada acara janah perban mehuli ukur turang senina e, itawarkenna inemen si lit alkoholna man bana. Nina, “Kam me nggo jadi Saksi, pasti nggo lit kesah si badia bas kam. Pasti nggo banci ikuasaindu dirindu. Bicara sitik saja pe inemndu labo dalih.” Sayang kel adi mulihken ka candu turang seninanta si mbaru ndai perban ibegikenna nasehat si salah!

14. Engkai maka adi reh kita ku perpulungen banci siteh uga carana ndalanken pedah bas Pilipi 1:10?

¹⁴ Bas perpulungen iajari kita uga carana ndalanken pedah bas Pilipi 1:10. Kai saja carana? Si pertama, banci siteh i je kai si pentingna iakap Jahwe. Si peduaken, sipelajari uga cara ndalanken kai si ipelajari kita gelah la kita erpandangen. Janah si peteluken, teriahken kita gelah sikeleng-kelengen bage pe ngelakoken kai si mehuli. (Heb. 10:24, 25) Sanga  ipegegehi turang seninanta kita, reh kelengna ateta Dibata bage pe turang seninanta. Adi tuhu-tuhu keleng ateta Dibata ras turang seninanta, pasti siusahaken kel asa ngasupta gelah la siban turang seninanta tertuktuk.

15. Kai maksudna ‘reh buena ngelakoken kai si benar’?

¹⁵ Itotoken Paulus kalak Pilipi gelah ‘reh buena ilakoken kalak e kai si benar.’ (Pil. 1:11) “Kai si benar” maksudna ngkelengi Jahwe ras turang senina. Enda pe termasuk ka nceritaken kerna kiniteken nandangi Jesus bage pe kerna arapen si luar biasa. Bas Pilipi 2:15 igunaken Paulus anding-andingen si deban, nina arus kita “ersinar jadi si nerangi doni.” Enda cocok perban igelari Jesus murid-muridna “terang doni.” (Mat. 5:14-16) Iperentahkenna ka pengikutna gelah ‘erban murid,’ janah ikatakenna maka kalak e ‘jadi saksina pagi seh ku ujung doni.’ (Mat. 28:18-20; Perb. 1:8) Silakoken “kai si benar” adi siusahaken kel ikut bas dahin si penting enda.

16. Menurut Pilipi 1:12-14, uga carana gelah banci kita ersinar la soal kai tantangenna? (Nen gambar bas sampul majalah enda.)

¹⁶ Uga pe keadanta, banci nge kita ersinar. Mon-mon, kai si ngambati kita erberita banci dungna berubah jadi kesempaten banta guna erberita. Contohna, Rasul Paulus. Itulisna surat man kalak Kristen i Pilipi sanga ia jadi tahanen rumah i Roma. Bage gia keadanna, tetap nge ia erberita man penjaga bage pe man kalak si reh ndahi ia. Tetap Paulus semangat erberita, hasilna reh tekna turang senina “mpeseh kata Dibata alu la mbiar.”​—Baca Pilipi 1:12-14; 4:22.

17. Kai si ilakoken piga-piga turang seninanta gelah banci terus erberita amin gia la menukah?

 ¹⁷ Enterem turang seninanta si perpang bagi Paulus. Kalak e tading bas negeri si la bebas erberita arah rumah ku rumah, emaka idarami kalak e cara si deban gelah banci erberita. (Mat. 10:16-20) Bas salah sada negeri e, ikataken pertua keliling gelah erberita turang senina man keluargana, tetanggana, teman sekolahna, temanna erdahin, bage pe kalak si itandaina. Dua tahun kenca si e, reh buena runggun i je. Bas negeri inganta tading, banci saja bebas kita erberita. Tapi banci kang kita erlajar arah turang seninanta e. Adi terus sidarami cara guna erberita, pasti isampati Jahwe kita amin gia la menukah.​—Pil. 2:13.

18. Kai si arus silakoken gundari?

¹⁸ Gundari me waktuna ndalanken pedah si lit bas surat Paulus man kalak Kristen i Pilipi. Emaka arus sipastiken kai si lebih penting, siusahaken gelah la erpandangen, la erban kalak tertuktuk, janah terus silakoken kai si benar. Alu bage reh belinna me kekelengenta janah simuliaken me Bapakta si perkeleng, Dibata Jahwe.