1-3. Kai saja si erbanca arus itadingken pelayan sepenuh waktu tugasna?

NINA Robert ras Mary Jo, “Meriah kel akap kami sanga jadi utusen injil. Tapi kenca 21 tahun kami ngelayani, empatna orang tua kami nggo reh tuana janah reh lemahna. Situhuna labo mberat akap kami ngurus kalak e. Tapi, tetap denga nge megogo ate kami perban arus itadingken kami daerah tugas si nggo meriah akap kami je.”

² Nina William ras Terrie, “Ngandung kami sanga teh kami lanai kami banci mulih ku daerah tugas kami perban sakit. Situhuna mbarenda nari, ngelayani Jahwe ate kami bas negeri si deban. Tapi gundari nggo lanai banci.”

³ Nina Aleksey, “Teh kami nge itutup penentang bas negeri kami atena kantor cabang bas ingan kami ngelayani. Tapi sanga terjadi e janah arus itadingken kami Betel, tetap nge megogo ate kami.”

4. Penungkunen kai saja si man bahasenta bas artikel enda?

⁴ Selain pengalamen-pengalamen ndai, lit ribun anggota keluarga Betel bage pe pelayan sepenuh waktu si debanna si arus itadingkenna tugasna. * Banci saja mesera iakap turang seninanta si setia e ngadapi perubahen perban nggo meriah kel iakapna bas tugasna. Kai nge si banci ilakoken kalak e gelah reh nukahna akapna ngadapi perubahen? Kai si banci ilakokenndu guna nampatisa? Jawapen arah penungkunen-penungkunen e banci nampati kita kerina sanga ngadapi perubahen bas geluhta.

5. Kai saja pengaruhna adi lit perubahen tugas?

⁵ La soal kita ngelayani i Betel ntah pe bas dinas sepenuh waktu si debanna, pasti keleng kel ateta turang senina si radu ras kita ngelayani i je janah nggo meriah siakap ngelayani i je. Emaka pasti megogo kel ateta sanga arus sitadingken tugasta. Pasti tedeh kel ateta turang seninanta, janah siukuri ka kalak e, khususna adi arus kita lawes perban lit penganiayan bas daerah e. (Mat. 10:23; 2 Kor. 11:28, 29) Selain si e, adi pindah kita ku daerah si deban, banci saja arus sisesuaiken dirinta ras budaya si mbaru, janah e la menukah. Seumpama ku kutanta pe kita mulih, banci saja mesera kang siakap. Nina Robert ras Mary Jo, “Budaya kami sendiri pe nggo lanai biasa akap kami janah erberita bas bahasa kami pe nggo mesera akap kami. Bagi tempa kalak asing iakap kami bas negeri kami sendiri.” Lit ka turang seninanta si arus itutupina biaya si sedekah enda la perlu iukurina. Banci saja aru kel ate kalak e janah putus asa ia. Emaka, kai si banci ilakokenna?

6. Uga carana gelah banci kita rembak ras Jahwe?

⁶ Sirembakkenlah dirinta ras Jahwe. (Jak. 4:8) Uga carana? Teklah kita man Jahwe, “Si Megiken pertoton.” (Msm. 65:3) Nina Masmur 62:9, “Turiken isi pusuhndu man baNa.” Banci ‘ndauh buen si ilakoken Jahwe asangken kerina si nggo sipindo ntah pe siukuri.’ (Ep. 3:20) Labo si ipindo kita bas pertoton ngenca si ibereken Jahwe. Banci idungiNa masalahta alu cara si la sisangka-sangka.

7. (a) Uga carana gelah terus kita rembak ras Jahwe? (b) Menurut Heber 6:10-12, kai hasilna adi terus kita setia ngelayani Jahwe?

⁷ Gelah banci terus rembak ras Jahwe, bacalah Pustaka tiap wari janah ukuri alu mbages. Nina sekalak turang seninanta si pernah jadi utusen injil, “Perlu kel ratur siban kebaktin jabu bage pe persiapen guna perpulungen, bagi si biasana silakoken mbarenda bas daerah tugasta.” Arus ka kita rajin erberita ras turang seninanta bas runggun si mbaru. Labo ilupaken Jahwe kalak si terus setia ngelayani Ia, aminna pe gundari la bagi si mbarenda buena si banci ilakoken kalak e.​—Baca Heber 6:10-12.

8. Kai si ikataken 1 Johanes 2:15-17 si banci nampati kita gelah tetap sederhana geluhta?

⁸ Tetaplah sederhana geluhndu. Bas doni Setan enda, nterem kalak kuatir kerna  kegeluhenna. Tapi ula min perban si e lanai kam ngelayani Jahwe. (Mat. 13:22) Banci saja teman ras keluargandu, bage pe kalak si deban ngiahken kam ndarami melala sen gelah ntabeh geluhndu. Ula begikenndu kalak e. (Baca 1 Johanes 2:15-17.) Teklah man Jahwe. Pasti isampatiNa kita gelah tetap paguh kinitekenta, banci kita tetap tenang, janah pasti iberekenNa kerina keperlunta. Erjanji ia maka iberekenNa e kerina “i bas waktu si tepat.”​—Heb. 4:16; 13:5, 6.

9. Menurut Kuan-kuanen 22:3, 7, ngkai maka ula min kita rutang adi la perlu? Uga carana gelah banci siban keputusen si mehuli?

⁹ Ula rutang adi la perlu. (Baca Kuan-kuanen 22:3, 7.) Banci saja galang kel biayana adi pindah kita ku daerah si deban, emaka menukah kita rutang. Gelah ula sempat e terjadi, ula pinjamndu sen guna nukur barang-barang si la tuhu-tuhu iperlukenndu. Sanga mberat kel situasina, misalna sanga siurus keluarganta si sakit, banci saja mesera siakap nentukenca asa kai buena sen si perlu sipinjam. Adi bage keadanndu, ertotolah kam gelah banci ibanndu keputusen si mehuli. Pasti ijawap Jahwe pertotonndu janah iberekenNa kedamen man bandu si ‘ngarak-ngarak pusuh ras perukurenndu.’ Hasilna, banci iukurindu alu tenang kai si perlu ilakokenndu.​—Pil. 4:6, 7; 1 Pet. 5:7.

10. Uga carana gelah banci lit temanta bas runggun si mbaru?

¹⁰ Tetaplah ndeher ras turang senina bage pe keluarga. Banci iceritakenndu uga perasanndu bage pe masalahndu man teman-temanndu, khususna man si nggo pernah ngadapisa. Adi ilakokenndu e, banci saja reh nahangna kari iakapndu. (Peng. 4:9, 10) Banci kam terus erteman ras turang senina bas runggunndu si mbarenda. Tapi bas runggun si mbaru, perlu ka idaramindu teman-teman si mbaru. Gelah banci lit temanndu, kam pe arus jadi teman si mehuli. Uga carana? Banci iceritakenndu pengalamen-pengalamenndu sanga kam ngelayani Jahwe, gelah kalak si deban pe banci semangat. Banci saja piga-piga kalak bas runggun la iangkaina ngkai maka meriah kel iakapndu ngelayani sepenuh waktu. Tapi si debanna banci saja itehna atena kerna pengalamenndu janah merhat ia erteman ras kam. Tapi ula melalasa iceritakenndu kai si pernah ilakokenndu mbarenda, janah ula ka ceritaken kai si la bagi ukurndu.

11. Uga carana gelah tetap ermeriah ukur perjabunndu?

¹¹ Adi arus itadingkenndu tugasndu perban sakit teman geluhndu, ula salahkenndu ia. Janah adi kam si sakit, ula ka salahkenndu bandu ntah pe nggo ikecewakenndu akapndu teman geluhndu. Ingetlah maka kena nggo “sada daging” janah nggo erjanji kena i lebe-lebe Jahwe gelah terus sisampat-sampaten uga pe keadanna. (Mat.  19:5, 6) Adi arus itadingkenndu tugasndu perban la iarapndu hamil kam, arus ibuktikenndu man anakndu maka ndauh ia pentingen asangken tugasndu si mbarenda. Kataken man anakndu maka ia “pasu-pasu” bas Dibata nari. (Msm. 127:3-5) Janah banci ka iceritakenndu bana pengalamenndu sanga ngelayani sepenuh waktu. Alu bage, banci dungna turah sura-sura anakndu ngelayani Jahwe sepenuh waktu bagi kam mbarenda.

12. (a) Kai si banci silakoken guna nampati kalak si ngelayani sepenuh waktu gelah banci terus idalankenna tugasna? (b) Adi lit perubahen tugas, kai si banci silakoken gelah banci reh nukahna iakap kalak e ndalanisa?

¹² Melala runggun bage pe turang senina si nggit nampati kalak si ngelayani sepenuh waktu gelah banci idalanken kalak e tugasna. Kai saja si ilakoken kalak e? Banci saja ipegegehina kalak e gelah terus ngelayani. Ntah pe banci saja iberena sen ntah keperlun si debanna. Selain si e, adi kalak si ngelayani sepenuh waktu ndauh arah keluargana, turang senina si bas kutana banci nampati ngurus keluargana e. (Gal. 6:2) Adi lit si ngelayani sepenuh waktu ipindahken ku runggunndu perban lit perubahen tugas, ula iakapndu kurang ia beluhna bas tugasna ntah pe lit kesalahenna. * Tapi, sampatilah kalak e gelah menukah iakapna ndalani perubahen e. Alo-alolah kalak e janah puji ia kerna kai si nggo ilakokenna, amin pe lanai bagi si mbarenda buena si banci ilakokenna perban nggo kurang kesehatenna. Usahakenndulah ndeher ras kalak e. Erlajarlah kam arah kalak e perban nggo melala pemetehna, pengalamenna, bage pe pelatihen si idatna.

13. Kai si banci silakoken bas nampati kalak si ngelayani sepenuh waktu si ngadapi perubahen?

 ¹³ Banci saja kalak si ngelayani sepenuh waktu si ngadapi perubahen, tangtangna perlu sisampati ndarami rumah, kendaran, dahin, bage pe keperlun si debanna. Banci saja perlu ka sisampati ia uga carana nggalari listrik ntah pe nggalari lau. Tapi, si pentingna iakap kalak e sepenggejapen min kita. Banci saja erjuang kel kalak e ngadapi pinakitna ntah pe ngurus keluargana si sakit. Ntah pe banci saja sangana kel ceda ate kalak e perban mate kalak si keleng atena. * Janah banci saja megogo kel atena perban tedeh atena turang senina bas daerah tugasna si mbarenda, amin gia la teridahsa banna perasanna e. Banci saja la terturiken kalak e uga perasanna, janah biasana ndekah maka banci malem.

14. Kai si ilakoken turang senina bas runggun guna nampati sekalak turang senina gelah menukah iakapna ngadapi perubahen?

¹⁴ Adi siajak kalak e erberita janah sipegegehi arah perbahanenta, dungna menukah iakap kalak e ngadapi perubahen. Nina sekalak turang seninanta si nggo ertahun-tahun ngelayani i negeri si deban, “Bas daerah tugasku si mbarenda, tiap wari aku mandu PAR. Tapi gundari sanga erberita bas ingan si mbaru enda, mbacaken ayat Pustaka ntah mutarken video saja pe seh kel serana. Tapi iajak turang senina aku ndahi kunjungen ras PAR kalak e. Reh semangatna aku erberita bas daerah e perban kuidah turang senina si setia ras si semangat e banci mandu PAR. Enggo kupelajari uga carana mbenaken percakapen i jenda. Meriah kel kuakap mulihi.”

15. Uga carana gelah banci kam berhasil bas tugasndu si mbaru?

¹⁵ Banci kam berhasil bas tugasndu si mbaru. Ula akapndu lit kesalahenndu maka berubah tugasndu, janah ula la meherga iakapndu bandu. Cubalah ukurindu kai saja si ilakoken Jahwe gundari bandu, janah teruslah kam erberita. Usihlah kalak Kristen si  setia bas abad pertama. ‘Iberitakenna berita si meriah kerna kata Dibata ku belang-belang negeri e’ i japa pe ia. (Perb. 8:1, 4) Adi terus kam erberita, pasti mbue datndu hasilna. Misalna lit piga-piga perintis ipelawes arah sada negeri, emaka arus ia pindah ku negeri si deban. Kepeken lit i je kalak si seri bahasana ras bahasa si ipake perintis e, emaka tersampati kel kalak e perban lit perintis ndai i je. Piga-piga bulan kenca si e, nterem kalak ikut bas kelompok si nggunaken bahasa si ipake perintis e.

16. Uga carana gelah meriah iakapndu ndalanken tugas bas ingan si mbaru?

¹⁶ Nina Pustaka, ‘Keriahen si ibereken Jahwe man bandu erbahanca kam megegeh.’ (Neh. 8:10) Si erban meriah kel ukurta eme hubungenta si mehuli ras Jahwe, labo tugasta, amin gia seh kel riahna siakap bas tugasta e. Emaka, tetaplah ndeher ras Jahwe. Teruslah pindo gelah itegu-teguNa kam, isampatiNa, janah ibereNa kepentaren. Ingetlah, banci meriah kapndu ndalanken tugasndu mbarenda perban tutus atendu nampati kalak si i je. Emaka gundari, tutus ka lah atendu ndalanken tugasndu bas ingan si mbaru, janah gejapkenlah uga Jahwe nampati kam gelah banci ka meriah kapndu ndalanken tugasndu si mbaru e.​—Peng. 7:10.

17. Kai si arus siinget kerna tugasta si gundari?

¹⁷ Ingetlah maka tugasta si gundari sementara ngenca, tapi adi ngelayani Jahwe rasa lalap. Banci saja tugasta si gundari la seri ras tugasta pagi bas doni si mbaru. Nina Aleksey si ituriken bas awal artikel ndai, perubahen tugas si iadapina erban ia siap ngadapi perubahen bas wari si pepagi. Nina, “Mbarenda nari tek nge aku Jahwe e tuhu-tuhu lit, doni si mbaru pe pasti nge reh. Tapi gundari maka kugejapken rembak kel aku ras Jahwe janah tek aku doni si mbaru nggo seh kel deherna.” (Perb. 2:25) Kai pe tugasta, teruslah kita rembak ras Jahwe. La pernah itadingkenNa kita, janah pasti isampatiNa kita gelah terus meriah ukurta ngelayani Ia, la soal i ja pe inganna.​—Jes. 41:13.