MERHAT nge kam lit tanggung jawapndu bas runggun tapi lenga banci datndu gundari? Banci saja tanggung jawap e sangana kalak si deban si ndalankenca. Ntah pe banci saja kam si mbarenda ngelakokenca. Tapi gundari, banci saja lanai mbue si banci ilakokenndu perban kam nggo metua, sakit, ngadapi masalah ekonomi, ntah pe lit tanggung jawap keluarga. Ntah, banci saja perban lit perubahen bas organisasi, lanai banci ilakokenndu tanggung jawap si sedekah enda idalankenndu. Kai pe alasenna, lanai kapndu bagi si mbarenda buena si banci ilakokenndu bas pelayanen. Adi bage si iadapindu, wajar adi mon-mon kecewa kam. Amin gia bage, kai nge si banci ilakokenndu gelah ula kitik ukurndu, putus asa, ntah pe kecewa? Uga carana gelah banci terus kam ermeriah ukur?

Banci kita erlajar arah Johanes Peridiken. Lit piga-piga tanggung jawap Johanes si luar biasa. Tapi banci saja la iarapna mberat kepe tentangen si arus iadapina. Banci saja la pernah terbayangkenna maka dekahen ia bas penjara asangken bas pelayanen. Tapi, terus Johanes ermeriah ukur janah iusahakenna gelah la bene keriahen ukurna e. Engkai maka banci ia tetap ermeriah ukur? Janah, kai si banci silakoken gelah tetap kita ermeriah ukur amin gia lit si erban kita kecewa?

Kira-kira bulan April tahun 29 M, mulai me ilakoken Johanes tugas si ibereken Jahwe man bana. Isampatina kalak gelah ersikap ngalo-ngalo Mesias si nandangi reh. Nina man kalak e, “Ertobatlah, erkiteken Kerajan surga nggo ndeher.” (Mat. 3:2; Luk. 1:12-17) Enterem si megikenca. Janah arah kuta si ndauh nari pe, nterem si reh megiken berita Johanes, ertobat kalak e janah iperidiken. Pang ka Johanes mpersingeti peminpin-peminpin agama si seh kel tualna, ikatakenna maka adi la kalak e robah pasti nge pagi iukum. (Mat. 3:5-12) Kira-kira bas bulan Oktober tahun 29 M, ilakoken Johanes me tugas si seh kel pentingna bas pelayanenna, eme mperidiken Jesus. Mulai je nari, iiahken Johanes nterem jelma gelah jadi pengikut Jesus, Mesias si ijanjiken e.​—Joh. 1:32-37.

 Ikataken Jesus kerna tugas Johanes si istimewa, nina, “Johanes Peridiken kap si mbelinna i bas kerina si lahir i bas diberu nari.” (Mat. 11:11) Pasti meriah kel ukur Johanes perban melala pasu-pasu si idatna. Bali bagi Johanes, nterem turang senina si nggejapken melala pasu-pasu. Salah sada contohna eme turang seninanta Terry. Enggo lebih 50 tahun ia ras ndeharana eme Sandra ngelayani sepenuh waktu. Nina Terry, “Melala kel tanggung jawap si pernah kudalanken. Pernah aku jadi perintis, anggota Betel, perintis istimewa, pertua keliling, pengawas distrik, janah gundari ngulihi ka jadi perintis istimewa.” Pasti meriah kel ukurta adi lit tanggung jawapta bas organisasi. Tapi, bagi si nandangi sipelajari arah contoh Johanes, perlu terus siusahaken gelah ula bene keriahen ukurta sanga lit perubahen bas geluhta.

Si erbanca Johanes Peridiken tetap ermeriah ukur eme perban lalap iergaina tugasna. Perdiateken contohna. Kenca Jesus iperidiken, reh kurangna pengikut Johanes tapi pengikut Jesus reh buena. Ngidah si e, kuatir murid-murid Johanes janah ikataken kalak e, “Gundari iperidikenna ka kalak janah kerina kalak ndahi ia.” (Joh. 3:26) Ijawap Johanes, “Penganten si dilaki kap mpuna penganten si diberu. Meriah me ukur teman penganten si dilaki paksa cinder i deher penganten si dilaki janah ibegina sorana. Bage me aku, keriahen ukurku la kurang kai pe.” (Joh. 3:29) Labo iakap Johanes Jesus e saingenna, janah labo iakapna lasam kerina si nggo ilakokenna sedekah enda perban belinen tanggung jawap Jesus. Tapi, tetap Johanes ermeriah ukur perban meherga iakapna tugasna selaku “teman penganten si dilaki.”

Perukuren Johanes me si erbanca tetap ia ermeriah ukur amin gia mberat tugas si arus idalankenna. Misalna, perban tubuhna nari Johanes nggo jadi sekalak Nasir, la ia banci minem anggur. (Luk. 1:15) Pernah ikataken Jesus, “Johanes reh, la ia man ntah pe minem.” Emaka sederhana kel pergeluh Johanes, tapi pergeluh Jesus ras murid-muridna bali bagi pergeluh jelma si nterem, labo bagi kalak Nasir. (Mat. 11:18, 19) Selain si e, Johanes la pernah erban mukjizat. Tapi itehna maka murid-murid Jesus, termasuk ka si pernah jadi murid Johanes, lit kuasana erban mukjizat. (Mat. 10:1; Joh. 10:41) Amin pe bage, labo pernah jadi masalah iakap Johanes kerina e. Tetap ia semangat ndalanken tugas si ibereken Jahwe man bana.

Adi meherga siakap tugasta si gundari, pasti banci tetap kita ermeriah ukur. Nina Terry si nggo iceritaken ndai, “Tutus ateku ndalanken kerina tugas si ibereken man bangku.” Sanga ingetna mulihi pengalamenna bas dinas sepenuh waktu, nina, “Sitik pe la pernah aku erkadiola. Si meriahna ngenca si lit bas ingetenku.”

Seh kel istimewana kerina tugas ntah pe tanggung jawapta bas organisasi. Engkai maka bage? Perban sada kehamaten siakap banci jadi “teman erdahin Dibata.” (1 Kor. 3:9) Adi siukuri e, reh riahna siakap ngelayani Jahwe. Keriahen ukurta banci iandingken ras sada barang si meherga. Adi sikap banndu ngerawat barang e, pasti tetap ia mejile. Bage ka pe, adi tetap siinget maka ngelayani Dibata e sada kehamaten, banci tetap meriah ukurta. La ateta sibandingken kai si nggo silakoken ras kai si ilakoken kalak si deban. Ula ka kurang meherga siakap tugasta ibandingken ras tugas si ibereken Jahwe man kalak si deban.​—Gal. 6:4.

Banci saja iteh Johanes maka labo ia ndekah ngelayani, tapi labo isangkana bage terna e terjadi. (Joh. 3:30) Bas tahun 30 M, kira-kira enem bulan kenca iperidikenna Jesus, ipenjaraken Raja Herodes me Johanes. Tapi, asa bancina tetap iusahaken Johanes mberitaken kai si benar. (Mrk. 6:17-20) Engkai maka banci ia tetap ermeriah ukur amin gia melala perubahen si iadapina? Perban terus iusahakenna ngelayani Jahwe.

Sanga Johanes bas penjara, ibegina maka nggo reh buena si ilakoken Jesus bas pelayanenna. (Mat. 11:2; Luk. 7:18) Tek Johanes maka Jesus e Mesias. Tapi banci saja tersungkun-sungkun ka ia kai nge si ilakoken Jesus gelah terjadi kerina nubuat Pustaka kerna Mesias. Misalna, iteh Johanes  maka Mesias pagi jadi raja. Emaka banci saja tersungkun-sungkun ia, ndekah denga nge Jesus merentah? Banci saja tersungkun-sungkun ka Johanes, kenca Jesus pagi jadi raja, ibebaskenna nge ia arah penjara? Perban iteh Johanes atena kai si nandangi ilakoken Jesus, isuruhna dua muridna nungkun man Jesus, “Kam kin kalak si nandangi reh e, ntah itimai kami denga kalak si deban?” (Luk. 7:19) Sanga mulihken dua murid ndai ndahi Johanes, pasti tutus kel ate Johanes megiken kai si ikataken kalak e. Ikataken kalak e maka nterem kalak sakit si ipepalem Jesus alu mukjizat. Isuruh Jesus ka gelah ikataken kalak e man Johanes, “Kalak pentang gundari erpengidah, si lumpuh erdalan, si sakit kusta ipepalem, si pasek erpemegi, si mate ipekeke, janah berita si meriah iberitaken man kalak mesera.”​—Luk. 7:20-22.

Pasti terpegegehi kel Johanes megi kai si ikataken murid-muridna. Kai si ipeseh kalak e mbuktiken maka nubuat-nubuat kerna Mesias sangana igenapi Jesus. Amin gia la ibebasken Jesus Johanes arah penjara, tapi iteh Johanes maka pelayanenna labo sia-sia. Amin pe sangana ia bas penjara, tetap ia ermeriah ukur.

Adi terus sipepaguh kinitekenta, banci terus silayani Jahwe alu sabar ras ermeriah ukur bagi Johanes. (Kol. 1:9-11) Banci silakoken e adi sibaca Pustaka janah siukuri alu mbages. Alu bage, tek kita maka kerina si nggo silakoken man Dibata labo sia-sia. (1 Kor. 15:58) Nina Sandra, “Perban kubaca Pustaka sada pasal tiap wari, reh deherna aku ras Jahwe. Lanai kel kuukuri kerna diriku, tapi si kuukuri kerna Jahwe.” Selain si e, perlu ka siukuri hasil pelayanen turang seninanta man Jahwe. Alu bage, banci siukuri kai saja si nggo ilakoken Jahwe, labo dirinta saja ngenca si lalap siukuri. Nina Sandra ka, “Perban lit acara JW Broadcasting^® tiap bulan, reh deherna akap kami ras organisasi janah banci kami tetap ermeriah ukur ndalanken tugas kami.”

Amin gia kentisik ngenca Johanes Peridiken ngelayani, tapi icidahkenna “semangat ras kuasa si bali bagi Elia.” Janah bali bagi Elia, ‘seri nge perasan Johanes ras kita.’ (Luk. 1:17; Jak. 5:17) Mari siusih Johanes si meherga iakapna tugasna janah terus iusahakenna ngelayani Jahwe. Hasilna, banci kita tetap ermeriah ukur ngelayani Jahwe la soal kai pe si terjadi bas geluhta.