1. Kai si ibereken Jahwe man umatNa sekalak-sekalak?

PERBAN keleng ate Jahwe umatNa si setia, iberekenNa tugas man kalak e sekalak-sekalak bas runggun. Aminna pe la seri kerina tugasta bas runggun, kerina kita meherga janah perlu kita sada ras si debanna. Isampati Rasul Paulus kita gelah siangkai pelajaren si penting enda. Uga carana?

2. Menurut Epesus 4:16, engkai maka perlu kita siergan janah nggit kerja sama?

² Menurut ayat tema si lit bas artikel enda, jelas ikataken Paulus maka la banci sikataken man umat Jahwe si debanna,“Aku la perlu kam.” (1 Kor. 12:21) Gelah dame bas runggun, arus kita siergan janah nggit kita kerja sama. (Baca Epesus 4:16.) Adi lit persadan bas runggun, banci sigejapken kekelengen janah runggun pe reh paguhna.

3. Kai kari sibahas bas artikel enda?

³ Kai saja si banci silakoken guna ngergai turang senina bas runggun? Bas artikel enda, sibahas kari uga cara pertua ngergai pertua-pertua si debanna. Kenca si e, sibahas kari uga kita banci ngergai turang senina si la erjabu. Janah si terakhir, sibahas kari uga kita banci ngergai kalak si banci saja kurang lancar ngerana bas bahasata.

4. Kai pedah Paulus si arus idalanken pertua-pertua si icatat bas Roma 12:10?

⁴ Kerina pertua bas runggun ilantik kesah si badia. Tapi  la seri kerina kengasupen kalak e sekalak-sekalak. (1 Kor. 12:17, 18) Piga-piga banci saja mbaru denga ilantik janah kurang pengalamenna. Si debanna banci saja lit keterbatasenna perban enggo metua ntah pe kurang kesehatenna. Aminna pe bage, kerina penting i lebe-lebe Jahwe. Emaka, sekalak pertua la banci erpengakap maka ia lebih erguna asangken pertua si deban. Sebalikna tiap pertua arus ndalanken pedah Paulus si icatat bas Roma 12:10.​—Baca.

5. Kai buktina pertua-pertua siergan, janah engkai enda penting?

⁵ Salah sada cara sekalak pertua ngergai pertua si debanna eme alu nggit megiken. Enda khususna penting sanga kalak e rapat guna mbahas masalah si serius. Engkai? Cuba perdiateken kai nina The Watchtower 1 Oktober 1988, “Isadari pertua-pertua, maka erkelangken kesah si badia banci igunaken Kristus pertua si apai pe guna mereken prinsip Pustaka si iperluken i bas ndungi sada masalah ntah pe erban keputusen si penting. (Perb. 15:6-15) Labo ngenca sekalak pertua si isampati kesah si badia, tapi kerina nge pertua isampatina.”

6. Kai si ilakoken pertua bukti ia sikeleng-kelengen janah siergan, janah kai gunana man runggun?

⁶ Adi sekalak pertua ngergai pertua si deban, labo ia si rusurna ngerana bas rapat pertua janah labo ka pendapatna si rusurna akapna benar. Tapi, meteruk ukur ia sanga mpeseh pendapatna. Tutus atena megiken pendapat pertua si deban. Si pentingna, semangat kel ia mbahas nasehat Pustaka janah ndalanken petunjuk si ibereken “budak si setia janah pentar.” (Mat. 24:45-47) Adi sikeleng-kelengen janah siergan pertua sanga rapat, erdahin me kesah si badia i tengah-tengah kalak e. Alu bage, banci ibuat kalak e keputusen si mpegegehi runggun.​—Jak. 3:17, 18.

7. Uga nge perukuren Jesus nandangi kalak si la erjabu?

⁷ Gundari bas runggun enterem kalak Kristen si enggo erjabu ntah pe enggo lit anakna. Tapi, lit ka piga-piga turang senina si la erjabu. Uga nge arusna perukurenta nandangi kalak si la erjabu e? Arus siusih perukuren Jesus nandangi kalak si la erjabu. Sanga ngelayani Jesus bas doni, ia la erjabu. Tetap ia sisada janah igunakenna kerina waktu ras gegehna guna pelayanen. Memang pernah ikatakenna maka lit piga-piga kalak Kristen si ipilihna la erjabu. (Mat. 19:11, 12) Tapi la pernah iajarken Jesus maka kalak Kristen arus erjabu ntah pe lang. Iergai Jesus kalak si la erjabu e. La pernah iakap Jesus ergan kalak si erjabu asangken si la erjabu.

8. Menurut 1 Korinti 7:7-9, iiahken Paulus kalak Kristen guna ngukuri kai?

⁸ I bas pelayanenna, Paulus pe bali bagi Jesus, ia la erjabu. La pernah iajarken Paulus maka salah adi kalak Kristen erjabu perban e keputusen pribadi. Tapi, iiahken Paulus kalak Kristen gelah iukuri kalak e banci nge ntah lang kalak e tetap la erjabu. (Baca 1 Korinti 7:7-9.) Pasti la pernah Paulus sepele man kalak si la erjabu. Buktina, ipilihna Timotius si nguda denga, sekalak turang senina si lenga erjabu guna ndalanken tugas si penting. * (Pil. 2:19-22) Jelas me, la soal sekalak turang senina enggo erjabu ntah pe lang, adi ia enggo ncukupi syarat, banci idatna tanggung jawap tambahen bas runggun.​—1 Kor. 7:32-35, 38.

9. Uga nge arusna perukurenta kerna kalak si erjabu ras si la erjabu?

⁹ La pernah iajarken Jesus bage pe Paulus maka kalak Kristen arus erjabu ntah pe arus tetap la erjabu. Adi bage, uga nge arusna perukurenta kerna erjabu bage pe la erjabu? Menurut Menara Pengawal 1 Oktober 2012, “Situhuna, erjabu ras la erjabu banci ikataken sada pemere ntah pe hadiah i bas Dibata nari. . . . Emaka, adi lit kalak la erjabu labo ianggap Dibata e sada keadan si man kemelanken ntah pe si erban kitik ukur.” Adi bage, arus siergai turang seninata si la erjabu.

10. Adi siergai turang seninata si la erjabu, kai nge si la silakoken?

 ¹⁰ Uga kita banci ngergai perasan ras keadan turang seninata si la erjabu? Arus siinget maka piga-piga turang seninata enggo iputuskenna gelah tetap la erjabu. Lit ka si erjabu atena tapi lenga ia jumpa ras kalak si cocok. Piga-piga banci saja enggo mate teman geluhna. Kai pe alasenna, la cocok adi sisungkun engkai kalak e lenga erjabu ntah pe sitawarken penampat guna nampati ia ndatken teman geluh. Memang, banci saja lit piga-piga turang senina si mindo penampat gelah idarami teman geluhna. Tapi adi la ipindona penampat, uga nge perasanna adi sitawarken penampat guna ndarami teman geluhna? (1 Tes. 4:11; 1 Tim. 5:13) Mari sibahas kai nina piga-piga turang seninata si setia si la erjabu.

11-12. Kai si banci saja erban kitik ukur kalak si la erjabu?

¹¹ Sekalak pertua keliling si la erjabu si semangat kel bas ngelakoken tugasna ngataken maka melala manpaat si idatna perban ia sisada denga. Tapi, ikatakenna maka mon-mon kitik ukurna sanga lit turang senina si bujur ukurna nungkun bagenda, “Engkai maka kam lenga erjabu?” Lit ka sekalak turang senina si la erjabu si ngelayani bas Betel, “Mon-mon adi kuperdiateken, mekuah ate piga-piga turang senina ngidah kalak si la erjabu. E erbanca la erjabu ianggap jadi sada masalah labo pemere.”

¹² Nina sekalak turang senina si la erjabu si ngelayani bas Betel, “Piga-piga perberita erpengakap maka kerina kalak si lenga erjabu sangana ndarami teman geluh. Selain si e, iakap kalak e ka maka adi ikut kalak si la erjabu bas acara-acara tertentu, pasti salah sada tujunna ndarami teman geluh. Sanga lawes aku ku bas sada daerah guna ndahinken tugas Betel, erberngi aku bas rumah sekalak turang senina. Aku reh bas wari perpulungen. Ikatakenna maka lit dua dilaki bas runggunna si sebaya ras aku. Ikatakenna maka labo atena ndarami teman geluh man bangku. Tapi sanga seh kenca kami bas Bale Kerajan, mis aku itarikna ku dua turang senina ndai. Mela kel kuakap janah turang senina ndai pe bage kang perasanna.”

13. Kai si erban sekalak turang senina si la erjabu terpegegehi?

¹³ Nina sekalak turang senina si la erjabu si deban si ngelayani bas Betel, “Kutandai piga-piga perintis si enggo ndekah ngelayani janah la erjabu. Kalak e pentar, tutus kel ngelayani, nggit nampati turang senina, janah lalap ermeriah ukur. Jadi penampat kel kalak e man runggun. Seimbang cara rukur kalak e kerna la erjabu. La iakapna maka ulin ia asangken kalak si deban perban ia la erjabu. Tetap kalak e ermeriah ukur aminna pe la erjabu ntah pe la lit anakna.” Meriah siakap bas runggun adi kerina kalak siergan. Siteh maka labo cian ate turang seninata kita, tapi labo ka iakapna kita kalak si perlu isampati perban la erjabu. Labo lebihsa ia muji-muji kita, tapi labo ka ia sepele man banta. Tek kita maka keleng kel ate kalak e kita.

14. Kai buktina siergai turang seninata si la erjabu?

¹⁴ Pasti meriah kel ukur turang seninata si la erjabu adi siergai kalak e erkiteken sipat-sipatna si mehuli, labo erkiteken ia enggo erjabu ntah lang. Asangken  mekuah ateta kalak e janah sisampati ateta ia ndarami teman geluhna, padin siergai kesetianna. Adi bage siban, pasti meherga kel iakapna bana janah iperluken iakapna ia. (1 Kor. 12:21) Itehna me maka tuhu-tuhu siergai ia.

15. Penyesuaien kai si iban piga-piga kalak gelah banci ilakokenna terbuen guna pelayanen?

¹⁵ Piga-piga tahun enda enterem perberita mpelajari bahasa si deban gelah banci erberita bas ingan si deban. Emaka melala perubahen si arus ilakoken kalak e. Itadingken kalak e runggunna si nggunaken bahasana sendiri gelah banci ngelayani bas runggun si nggunaken bahasa si deban si merluken terbuen perberita. (Perb. 16:9) Enda keputusen pribadi si iban kalak e gelah banci ilakokenna terbuen guna ngelayani Jahwe. Banci saja perlu waktu ertahun-tahun gelah lancar nggunaken bahasa si mbaru. Tapi, melala penampat si banci iberekenna man runggun. Sipat-sipatna si mehuli ras pengalamenna mpegegehi turang senina. Siergai kel turang senina si nggit erkorban e!

16. Kai si nentuken sekalak turang senina banci jadi pertua ntah pe sinampati runggun?

¹⁶ La banci iputusken pertua-pertua maka sekalak turang senina banci jadi pertua ntah pe sinampati runggun erkiteken kurang lancar ia nggunaken bahasa si ipake bas runggun e. Tapi si nentuken sekalak turang senina banci jadi pertua ntah pe sinampati runggun eme perban enggo icukupina kerina syarat si lit bas Pustaka.​—1 Tim. 3:1-10, 12, 13; Tit. 1:5-9.

17. Keputusen kai nge si arus iban orang tua adi keluargana pindah ku negara si deban?

¹⁷ Piga-piga keluarga Kristen pindah ku negara si deban perban mesera situasi bas negarana ntah pe perban ndarami dahin. I bas situasi si bage, banci saja anak-anakna isekolahken i bas sekolah si nggunaken bahasa negara e. Janah orang tua pe banci saja arus mpelajari bahasa si lit bas negara e gelah banci ndatken dahin. Uga adi i je lit runggun ntah pe kelompok si nggunaken bahasa si biasa ipakena? Ku runggun si apai nge keluarga e, ku runggun si nggunaken bahasana nge ntah bahasa si lit bas negara e?

18. Menurut Galati 6:5, kai buktina siergai keputusen kepala keluarga?

¹⁸ Arus iputusken kepala keluarga bas runggun si apai kalak e pulung. Arus iukurina kai si mehulina man keluargana. (Baca Galati 6:5.) Perban e keputusen pribadi, arus siergai keputusen kai pe si iban kepala keluarga e. Kai pe keputusenna, perlu sidukung keputusen e alu  ngalo-ngalo keluarga e janah sibuktiken maka keleng ateta kalak e.​—Rom. 15:7.

19. Kai si arus iukuri kepala keluarga?

¹⁹ Sanga pindah ku negara si deban, lit orang tua si milih runggun si nggunaken bahasa si biasa igunakenna. Tapi anak-anakna kurang lancar ngerana i bas bahasa e perban bas sekolah anak-anakna nggunaken bahasa nasional bas negara e labo bahasa orang tuana. Emaka mesera iakap anak-anak ngangkai acara perpulungen janah maju secara rohani. Adi e si terjadi, kepala keluarga perlu ertoto janah iukurina alu mbages carana nampati anak-anak gelah reh rembakna ras Jahwe bage pe ras umatNa. Perlu isampati orang tua anakna gelah lancar ngerana i bas bahasa si biasa igunakenna ntah pe pindah kalak e kerina ku runggun si nggunaken bahasa si iangkai anak-anakna. Kai pe keputusen kepala keluarga e, runggun si ilayanina arus ngergai ia ras keluargana.

20. Kai buktina siergai turang seninata si sangana mpelajari bahasa si mbaru?

²⁰ Bagi si enggo sibahas ndai, bas melala runggun enterem turang senina si sangana mpelajari bahasa si mbaru. Banci saja la kalak e lancar bas bahasa e. Tapi, adi labo ngenca carana ngerana sinen, sisadari me maka keleng kel atena Jahwe janah merhat kel ia ngelayani Jahwe. E erbanca siergai kel kalak e. Aminna pe la kalak e lancar ngerana i bas bahasa si ipake runggun, labo sianggap lebih erguna kita asangken kalak e.

21-22. Kai si ibereken Jahwe man banta?

²¹ Bujur kel sikataken man Jahwe perban iberekenNa man banta sekalak-sekalak sada tugas si meherga i bas runggunNa. La soal kita dilaki ntah pe diberu, lenga erjabu ntah pe enggo erjabu, si nguda denga ntah pe si enggo metua, lancar ngerana ntah lang i bas bahasa si deban, meherga kita kerina iakap Jahwe bage pe turang seninata.​—Rom. 12:4, 5; Kol. 3:10, 11.

²² Mbera terus sidalanken pelajaren-pelajaren si meherga si enggo sidat arah perumpaman Paulus kerna daging manusia. Enda banci nampati kita gelah siteh kai si banci silakoken guna mpegegehi turang seninata. Enda pe banci nampati kita gelah lalap engkelengi ras ngergai kalak e.