1. Pengorbanen kai saja si iban turang seninata, janah engkai maka kalak e nggit ngelakokenca?

GUNDARI enterem umat Dibata erban pengorbanen. Enterem turang senina ipilihna la erjabu. Piga-piga kalak si enggo erjabu pe ipilihna ka gelah la mis lit anakna. Janah lit ka keluarga-keluarga si iusahakenna nggeluh sederhana. Nggit kalak e ngelakoken si e kerina perban iberekenna atena terbuen i bas ngelayani Jahwe. Meriah ukur kalak e ngelakokenca janah tek kalak e maka pasti ibereken Jahwe kerina si tuhu-tuhu iperlukenna. La pernah kalak e kecewa. Ja nari banci siteh? Salah sada alasenna perban mbarenda ibereken Jahwe kerina si iperluken umatNa. Contohna, ipasu-pasu Jahwe Abraham eme “bapak kerina kalak si erkiniteken.”​—Rom. 4:11.

2. (a) Menurut Heber 11:8-10, 16, engkai maka nggit Abraham nadingken kota Ur? (b) Kai si man bahasenta bas artikel enda?

² Nggit Abraham nadingken kota Ur amin pe i je entabeh pergeluhna. Engkai? Perban itimaina “kota si paguh pondasina.” (Baca Heber 11:8-10, 16.) “Kota” kai e? Tentangen kai saja si iadapi Abraham sanga itimaina kota e ibangun? Uga kita banci ngusih Abraham ras ngusih kalak bas jamanta si enggo ngusih Abraham?

3. Kota kai si itimai Abraham?

³ Kota si itimai Abraham eme Kerajan Dibata. Si merentah bas Kerajan e eme Jesus Kristus ras 144.000 kalak Kristen si ipilih ku surga. Igelari Paulus Kerajan e “kota Dibata si nggeluh, eme Jerusalem si lit i surga.” (Heb. 12:22; Ket. 5:8-10; 14:1) Jesus pe iajarina murid-muridna guna notoken gelah reh Kerajan e, alu bage terjadi me peraten Dibata i doni bali bagi i surga.​—Mat. 6:10.

4. Menurut Kejadin 17:1, 2, 6, kai saja si iteh Abraham kerna kota ntah pe Kerajan si ijanjiken Dibata?

 ⁴ Iteh Abraham nge kerinana kerna Kerajan Dibata e? Lang. Enggo ribun tahun dekahna enda jadi “rahasia si badia.” (Ep. 1:8-10; Kol. 1:26, 27) Tapi iteh Abraham maka piga-piga keturunenna jadi raja pagi perban si e enggo ijanjiken Jahwe man bana. (Baca Kejadin 17:1, 2, 6.) Paguh kel kiniteken Abraham man janji Dibata, tempa-tempa enggo idahna Mesias, si jadi Raja pagi bas Kerajan Dibata. Erkiteken si e me maka ikataken Jesus bagenda man kalak Jahudi bas jamanna, “Meriah kel iakap bapak kena Abraham perban banci kari idahna wari kerehenku. Kerehenku e nggo idahna janah meriah iakapna.” (Joh. 8:56) Jelas me, iteh Abraham maka piga-piga keturunenna jadi bagin arah Kerajan si iban Jahwe pagi. Sabar Abraham nimai terjadina janji Jahwe e.

5. Ja nari banci siteh maka itimai Abraham kota si iban Dibata?

⁵ Uga Abraham mbuktiken maka itimaina kota ntah pe Kerajan si iban Dibata? Abraham la jadi rakyat kerajan si apai pe si lit paksa si e. Lalap pindah-pindah inganna tading, janah la idukungna raja si apai pe. Selain si e, la pernah iban Abraham kerajanna sendiri. Tapi, terus ia patuh man Jahwe janah terus itimaina janji Jahwe e terjadi. Luar biasa kel kiniteken Abraham man Jahwe. Mari sibahas piga-piga tentangen si iadapina ras kai si banci sipelajari arah ia nari.

6. Uga nge keadan kota Ur e?

⁶ Kota Ur si itadingken Abraham eme kota si aman, maju, janah makmur. Kota e ikelilingi benteng si galang janah arah telu bagin benteng e ikelilingi parik si mbages. Rata-rata pendudukna bayak janah pentar. Melala ihasilken kalak e karya tulis janah beluh matematika. Banci saja kota e jadi pusat perdagangen perban melala surat-surat perdagangen si idat bas reruntuhen kota e. Rumah-rumah si lit i je iban arah batu bata nari, iplester ka, janah icet mbentar.  Piga-piga arah rumah e lit 13 ntah pe 14 kamarna janah kamar-kamar e lit i sekeliling halamen si lantena iban arah batu nari.

7. Engkai Abraham arus tek maka pasti ilindungi Jahwe ia bage pe keluargana?

⁷ Arus Abraham tek maka pasti ilindungi Jahwe ia bage pe keluargana. Engkai? Perban enggo itadingken Abraham ras Sarai rumahna si mejile janah aman bas kota Ur janah tading bas kemah-kemah i taneh mesawang Kanaan. Ia ras keluargana lanai ilindungi benteng si galang bage pe parik si mbages. Gundari menukah kel kalak e iserang musuh.

8. Bas sada paksa, kai nge si iadapi Abraham?

⁸ Amin pe terus ilakoken Abraham peraten Dibata, lit ka nge masalah si iadapina. Contohna, bas sada paksa, terjadi kelihen si mekelek i bas negeri e, emaka mesera iakapna mere man keluargana. Perban mekelek kel kelihen e, ia ras keluargana arus pindah kentisik ku Mesir. Penguasa Mesir eme Paro. Sanga seh Abraham ras keluargana i Mesir, ibuat Paro me ndehara Abraham. Cuba bayangken uga biarna Abraham paksa si e! Tapi dungna iban Jahwe gelah iulihken Paro Sarai man Abraham.​—Kej. 12:10-19.

9. Masalah kai si iadapi keluarga Abraham?

⁹ Lit ka masalah si mberat si iadapi keluarga Abraham. Sarai ndehara si ikelengina, lalap lenga lit anakna. Erkiteken si e, ertahun-tahun dekahna kitik kel ukur kalak e. Dungna, ibereken Sarai budakna si gelarna Hagar man Abraham gelah banci lit anak kalak e arah Hagar nari. Tapi sanga Hagar hamil, mulai ia sepele man Sarai. Masalah e reh beratna emaka dungna ipelawes Sarai me Hagar.​—Kej. 16:1-6.

10. Kejadin kai saja nge si nguji kiniteken Abraham man Jahwe?

¹⁰ Dungna hamil me Sarai janah lahir me sekalak anak dilaki si gelarna Isak. Keleng kel ate Abraham man duana anakna e, Ismael ras Isak. Tapi, perban la mehuli perbahanen Ismael man Isak, terpaksa me Abraham mpelawes Ismael ras Hagar. (Kej. 21:9-14) Ertahun-tahun kenca si e, isuruh Jahwe Abraham ngkorbanken Isak. (Kej. 22:1, 2; Heb. 11:17-19) Arah dua kejadin e, arus tek kel Abraham maka pasti itepati Jahwe janji-janjiNa kerna duana anakna e.

11. Engkai maka arus Abraham sabar nimai Jahwe?

¹¹ I bas masa-masa si e, arus Abraham sabar nimai Jahwe. Umur Abraham enggo lebih 70 tahun sanga ia ras keluargana nadingken kota Ur. (Kej. 11:31–12:4) Janah lebih kira-kira seratus tahun dekahna, tading ia bas kemah-kemah i belang-belang negeri Kanaan. Abraham mate sanga umurna 175 tahun. (Kej. 25:7) La sempat idah Abraham sanga itepati Jahwe janjiNa guna mereken negeri Kanaan man keturunenna. Janah la ka idahna kota ntah pe Kerajan Dibata ipajekken. Aminna pe bage, ikataken maka Abraham e mate i bas umur si ‘seh kel tuana janah puas geluhna.’ (Kej. 25:8, Terjemahan Dunia Baru) Aminna pe melala tentangen si iadapi Abraham, tetap paguh kinitekenna janah meriah ukurna nimai Jahwe. Engkai? Perban ilindungi Jahwe ia segedang geluhna, janah ianggap Jahwe ia temanNa.​—Kej. 15:1; Jes. 41:8; Jak. 2:22, 23.

12. Kai si sangana sitimai, janah kai si man bahasenta?

¹² Bali bagi Abraham, kita pe sangana  nimai kota si paguh pondasina. Tapi kita labo nimai kota e ibangun, perban kota e ntah pe Kerajan Dibata enggo pajek bas tahun 1914 janah enggo merentah bas surga. (Ket. 12:7-10) Tapi kita sangana nimai Kerajan e merentah bas doni. Sope e terjadi, melala keadan si banci saja siadapi si seri bagi Abraham ras Sarai. Gundari pe, enterem umat Jahwe si ngusih Abraham. Pengalamen-pengalamen geluh si lit bas Sora Ermomo mbuktiken maka bali bagi Abraham ras Sarai, gundari enterem umat Jahwe sabar nimai ras erkiniteken. Mari sibahas piga-piga arah pengalamen kalak e janah sinen kari kai si banci sipelajari.

13. Pelajaren kai nge si idatndu arah Turang Senina Walden?

¹³ Nggit erkorban guna Jahwe. Adi siban ateta Kerajan Dibata si pentingna bas geluhta, arus siusih Abraham si nggit erkorban guna erban Dibata senang. (Mat. 6:33; Mrk. 10:28-30) Perdiateken contoh turang seninata si gelarna Bill Walden. * Bas tahun 1942, sanga Bill nandangi tamat kuliah jurusen teknik arsitek arah universitas si lit i Amerika Serikat, mulai me ia erlajar ras Saksi-Saksi Jahwe. Iusahaken dosen Bill gelah mis Bill erdahin kenca tamat kuliah, tapi itulakna. Ijelaskenna man dosenna maka igunakenna atena geluhna guna ngelayani Jahwe, janah la ia nggit ngayaki pendahin si galang gajina. La ndekah kenca si e, isuruh pemerentah ia ikut dinas militer. Itulakna alu mehamat janah akibatna idenda ia 10.000 dolar AS ras iukum lima tahun penjara. Tapi telu tahun kenca si e bebas ia. Bas pudi wari, iundang ia ikut Sekolah Gilead janah jadi utusen injil ia i Afrika. Kenca si e, erjabu ia ras Eva janah ras-ras kalak e ngelayani i Afrika. Enda ertina arus iban kalak e  pengorbanen. Dungna mulih kalak e ku Amerika Serikat guna ngurus mamak Bill. Bas pendungi cerita pengalamen geluhna, bagenda nina Bill, “Ngelayani Jahwe lebih 70 tahun dekahna sada hak istimewa si luar biasa kel kuakap. Naktak rusur iluhku adi kuinget kenca kerna si e. Rusur kukataken bujur man Jahwe perban enggo isampatiNa aku nggunaken geluhku bas ngelayani Ia.” Banci nge kam ngelayani sepenuh waktu?

14-15. Kai si banci ipelajarindu arah Turang Senina Apostolidis bage pe ndeharana?

¹⁴ Ula iarapkenndu maka la lit masalah bas geluhndu. Arah contoh Abraham sipelajari maka aminna pe sibereken kerina geluhta man Jahwe tetap denga nge lit masalahta. (Jak. 1:2; 1 Pet. 5:9) Enda terbukti arah pengalamen Aristotelis Apostolidis. * Ia iperidiken i Junani tahun 1946. Bas tahun 1952, tunangen ia ras Eleni, janah ras-ras kalak e ngelayani sepenuh waktu. Tapi sakit Eleni, lit tumor bas otakna. Dungna iangkat me tumor e. Kenca si e erjabu kami, tapi la ndekah kenca kami erjabu, mulihken ka lit tumor e. Emaka ioperasi ka ia mulihi, tapi e erbanca lumpuh dagingna sembelah janah lanai ia jelas ngerana. Aminna pe ia sakit janah lit penganiayan arah pemerentah nari, tetap ia semangat erberita.

¹⁵ Lit 30 tahun dekahna Aristotelis ngurus ndeharana. Paksa si e ia sekalak pertua, panitia bas kebaktin, janah ikut ka ia nampati pembangunen Bale Kebaktin. Bas tahun 1987, kecelakan Eleni sanga ia erberita. Koma ia telu tahun dekahna, kenca si e mate me ia. Bas pendungi cerita pengalamen geluhna, bagenda nina Aristotelis, “Ertahun-tahun dekahna, melala masalah si kuadapi janah piga-piga rempet terjadi ras la iarap-arap. Emaka arus aku megenggeng gelah ngasup ngadapisa janah la kupediat kai pe erban aku lemah. Tapi, lalap aku ibereken Jahwe gegeh gelah banci kudungi  kerina masalah e.” (Msm. 94:18, 19) Keleng kel ate Jahwe kalak si nggit ngelakoken kai pe guna ngelayani Ia aminna pe ngadapi melala masalah.

16. Nasehat kai si ibereken Turang Senina Knorr man ndeharana?

¹⁶ Terus ukuri wari si pepagi. Terus iukuri Abraham pasu-pasu si ijanjiken Jahwe man bana. E nampati ia gelah ngasup ngadapi masalah kai pe. Bage me si ilakoken Turang Senina Audrey Hyde. Perbulangenna si pertama si gelarna Nathan H. Knorr mate perban kanker. Perbulangenna si peduaken si gelarna Glenn Hyde, sakit Alzheimer. Aminna pe bage, terus iusahakenna ngukuri arapen si lit bas wari si pepagi. * Ikatakenna maka terpegegehi kel ia perban kata-kata perbulangenna, Nathan H. Knorr, si ibelaskenna piga-piga minggu ope ia mate. Nina Audrey, “Iingetken Nathan aku, bagenda nina, ‘Kenca kematen lit arapen si pasti man banta, janah lanai pagi susah siakap.’ Iiahkenna ka aku, nina, ‘Tataplah ku lebe, sebap upahndu enggo nimai.’ . . . Selain si e, nina ka, ‘Teruslah kam sibuk, gunakenlah geluhndu guna nampati kalak si deban. Alu bage banci meriah ukurndu.’” Tuhu-tuhu erguna kel pedah e gelah banci tetap sibuk nampati kalak si deban janah ‘ermeriah ukur i bas arapen.’​—Rom. 12:12.

17. (a) Engkai maka lit alasenta ngukuri wari si pepagi? (b) Kai nasehat si lit bas Miha 7:7 si banci nampati kita ndatken pasu-pasu bas wari si pepagi?

¹⁷ Buen alasenta gundari ngukuri kerna wari si pepagi asangken mbarenda. Kai si terjadi bas doni enda ncidahken maka kita nggeluh i bas bagin pendungi arah wari-wari pendungi. Kentisik nari merentah me Kerajan Dibata bas doni enda. Melala kel kari pasu-pasu sidat i je, salah sadana ipekeke me kalak si keleng ateta. Paksa si e, iupahi Jahwe me kesabaren ras kiniteken Abraham alu mpekeke ia ras keluargana. Ikut nge kam kari ngalo-ngalo kalak e? Banci kam ikut adi bali kam bagi Abraham, nggit kam erban pengorbanen guna Kerajan Dibata, terus kam erkiniteken aminna lit masalah, janah terus kam sabar nimai Jahwe.​—Baca Miha 7:7.