1. Uga nge perasanta jadi bagin arah runggun Jahwe?

SADA kehamaten kel man banta banci jadi bagin bas runggun Jahwe! Sinanami kedamen ras keriahen ukur bas runggun sanga sisembah Jahwe radu ras turang senina. Kai nge tugasndu bas runggun?

2. Perumpaman kai si igunaken Rasul Paulus i bas piga-piga suratna?

² Arah perumpaman si igunaken Paulus bas piga-piga suratna, melala si banci sipelajari kerna tugasta bas runggun. I bas surat-suratna e, ipeseri Paulus runggun Kristen bali bagi daging manusia. Ipeserina ka kalak bas runggun bali bagi anggota-anggota daging.​—Rom. 12:4-8; 1 Kor. 12:12-27; Ep. 4:16.

3. Telu pelajaren kai kari sibahas bas artikel enda?

³ Bas artikel enda, sibahas kari telu pelajaren penting si banci sidat arah perumpaman Paulus. Si pertama, sipelajari kari maka lit tugasta * sekalak-sekalak bas runggun Jahwe. Si peduaken, sibahas kari kai si perlu silakoken adi siakap la lit tugasta bas runggun. Janah si peteluken, sibahas kari engkai maka perlu kita terus sibuk ndalanken tugas si ibereken Jahwe man banta bas runggunNa.

4. Kai si banci sipelajari arah Roma 12:4, 5?

⁴ Si pertama si banci sipelajari arah perumpaman Paulus eme lit tugasta sekalak-sekalak bas keluarga Jahwe janah tugasta e penting. Imulai Paulus perumpamanna alu ngataken, “Bali bagi sada daging si melala anggotana, janah  kerina anggota daging e la seri gunana, bage ka me kita. Amin enterem gia kita, kerina kita sada daging erkiteken ersada ras Kristus. Janah kerina kita sekalak-sekalak eme anggota si merluken sada ras si debanna.” (Rom. 12:4, 5) Kai si imaksud Paulus? La seri kerina tugasta bas runggun. Tapi kita kerina meherga.

5. Pemere kai si ibereken Jahwe man runggun?

⁵ Sanga iukurindu kerna kalak si lit tugasna bas runggun, banci saja si lit bas perukurenndu eme kalak si minpin bas organisasi. (1 Tes. 5:12; Heb. 13:17) Arah Kristus enggo ibereken Jahwe “pemere” man runggunNa. (Ep. 4:8) Si termasuk bas “pemere” e eme anggota Badan Pinpinen, si nampati Badan Pinpinen, anggota Panitia Cabang, pertua keliling, instruktur sekolah, pertua, ras sinampati runggun. Kerina turang senina e enggo ilantik alu kesah si badia guna ngurus biri-biri Jahwe si meherga ras mpegegehi runggun.​—1 Pet. 5:2, 3.

6. Menurut 1 Tesalonika 2:6-8, kai nge si ilakoken turang senina si ilantik kesah si badia?

⁶ Lit erbage-bage tanggung jawap bas runggun si idalanken kerina turang senina si ilantik kesah si badia. Lit erbage-bage anggota dagingta, contohna bagi tan ras nahe. Kerina si ilakoken anggota dagingta e erguna man kerina dagingta. Turang seninata si ilantik kesah si badia pe bage ka nge, kerja keras kalak e guna kepentingen kerina runggun. Labo idaramina kemulian man dirina. Tapi iusahakenna mpegegehi turang seninana. (Baca 1 Tesalonika 2:6-8.) Bujur kel sikataken man Jahwe perban iberekenNa turang senina si bage, si pentingen iakapna kalak si deban labo dirina.

7. Pasu-pasu kai si inanami kalak si ngelayani sepenuh waktu?

⁷ I bas runggun lit turang senina si ngelayani jadi utusen injil, perintis istimewa, ntah pe perintis biasa. Situhuna, enterem turang senina enggo iputuskenna ngelayani sepenuh waktu. Alu bage, banci isampati kalak e enterem kalak jadi murid Jesus Kristus. Aminna pe teremen arah kalak e la melala senna ntah pe ertana, tapi melala pasu-pasu ibereken Jahwe man kalak e. (Mrk. 10:29, 30) Keleng kel ateta kalak e, janah ngata bujur kita perban kalak e bagin arah runggunta.

8. Engkai maka meherga iakap Jahwe tiap perberita?

⁸ Turang senina si ilantik ras si ngelayani sepenuh waktu nge ngenca si lit tugasna bas runggun? Lang. Kerina perberita penting iakap Dibata bage pe iakap turang senina. (Rom. 10:15; 1 Kor. 3:6-9) Engkai? Perban salah sada tujun utama runggun eme erban kalak jadi murid Tuan Jesus Kristus. (Mat. 28:19, 20; 1 Tim. 2:4) Kerina perberita bas runggun la soal ia enggo iperidiken ntah pe lenga, iusahakenna gelah pendahin enda jadi si pentingna bas geluhna.​—Mat. 24:14.

9. Engkai maka siergai diberu-diberu bas runggun?

⁹ Iergai Jahwe diberu-diberu bas runggun alu mereken tugas si penting man kalak e. Keleng kel ateNa man ndehara-ndehara, pernanden, janda, bage pe diberu-diberu si lenga erjabu si ngelayani Ia alu setia. Bas Pustaka melala icatat kerna diberu-diberu si erban meriah ukur Jahwe. Kerina kalak e usihen si mehuli perban kalak e pentar, erkiniteken, semangat, perpang, nggit mere, janah  rusur ngelakoken perbahanen si mehuli. (Luk. 8:2, 3; Perb. 16:14, 15; Rom. 16:3, 6; Pil. 4:3; Heb. 11:11, 31, 35) Bujur kel sikataken man Jahwe perban bas runggunta lit diberu-diberu si bage sipat-sipatna.

10. Engkai maka meherga kel siakap turang seninata si enggo metua?

¹⁰ Kita pe meriah ukurta perban lit ka turang senina si enggo metua bas runggun. Bas piga-piga runggun, lit turang seninata si metua si enggo ngelayani Jahwe segedang geluhna. Lit ka si mbaru denga bas kebenaren. Enterem arah kalak e ngadapi masalah kesehaten. Banci saja e erban kalak e lanai banci mereken terbuen man runggun bage pe bas pelayanen. Aminna pe bage, iusahaken kalak e mereken si mehulina bas pelayanen. Iusahakenna ka asa ngasupna mpegegehi ras ngelatih kalak si deban. Melala manpaat si banci sidat arah kalak e. Meherga kel iakap Jahwe kalak e janah kita pe meherga siakap kalak e.​—Kua. 16:31.

11-12. Engkai kam banci terpegegehi ngidah anak muda si lit bas runggun?

¹¹ Ukuri ka kerna anak muda. Melala tentangen si iadapi kalak e perban kalak e nggeluh bas doni si ikuasai Setan bage pe si ipengaruhi ajaren-ajaren si sesat. (1 Joh. 5:19) Tapi terpegegehi kel kita kerina ngidah anak muda e mere komentar bas perpulungen, erberita, janah pang mbela kinitekenna. Jelas me, anak muda pe lit tugasna si penting bas runggun Jahwe.​—Msm. 8:3.

¹² Tapi lit piga-piga turang seninata si la iakapna ia erguna bas runggun. Adi bage perasanndu, kai si banci nampati kam gelah erguna iakapndu bandu bas runggun? Mari sibahas.

13-14. Engkai maka piga-piga kalak lanai akapna meherga i bas runggun?

¹³ I bas suratna si deban bagenda nina Paulus, “Adi nina nahe, ‘Erkiteken aku labo tan, aku labo anggota i bas daging  nari,’ si e labo erban nahe la jadi anggota i bas daging nari. Bage ka pe adi nina cuping, ‘Erkiteken aku labo mata, aku labo anggota i bas daging nari,’ si e labo erban cuping la jadi anggota i bas daging nari.” (1 Kor. 12:15, 16) Kata-kata Paulus enda ncidahken kai si igejapken enterem kalak Kristen si gundari. La ia tek maka lit nge ntah lang tugasna bas runggun. Emaka, kai pelajaren si peduaken si banci sidat arah perumpaman Paulus?

¹⁴ Adi ibandingkenndu dirindu ras turang senina bas runggun, banci saja mulai kam erpengakap maka la kam erguna. Banci saja i bas runggun lit piga-piga turang senina si beluh ngajar, beluh erban pengaturen, ntah pe beluh ngapuli ras mpegegehi kalak si deban. Banci saja iakapndu la kam banci bagi kalak e beluhna. Adi bage perasanndu, e tandana kam meteruk ukur. (Pil. 2:3) Tapi arus kam hati-hati. Adi terus ibandingkenndu dirindu ras kalak si beluhen asangken kam, banci kari kam kecewa. Janah dungna bagi si ikataken Paulus, lanai akapndu kam meherga bas runggun. Kai si banci nampati kam ngatasi perasan si bage?

15. Menurut 1 Korinti 12:4-11, kai si perlu sisadari?

¹⁵ Cuba ukuri enda: Bas abad pertama, ibereken Jahwe erbage-bage pemere man piga-piga kalak Kristen arah kesah si badia. Tapi, pemere si ialoken kalak e la seri. (Baca 1 Korinti 12:4-11.) Aminna pe bage, meherga nge iakap Jahwe kalak e kerina. Gundari, lanai sidat pemere si luar biasa alu cara mukjizat. Tapi prinsipna tetap seri. Banci saja labo seri kerina kengasupenta, tapi meherga kita kerina iakap Jahwe.

16. Nasehat kai arah Rasul Paulus si arus sidalanken?

¹⁶ Asangken sibandingken dirita ras turang senina si deban, padin sidalanken nasehat Rasul Paulus enda, “Tiap kalak arus iperiksana perbahanenna sendiri, janah ermeriah ukur me ia erkiteken dirina sendiri, labo perban ibandingkenna dirina ras kalak si deban.”​—Gal. 6:4.

17. Kai manpaatna adi sidalanken pedah Paulus?

 ¹⁷ Adi sidalanken nasehat Rasul Paulus enda, dungna banci saja siidah lit kepeken kengasupenta si la lit bas kalak si deban. Contohna, banci saja lit sekalak pertua si kurang beluhna erkhotbah, tapi seh kel ia beluhna erberita ras njadiken murid. Ntah, kurang ia beluhna erban pengaturen bas runggun la bagi pertua-pertua si deban, tapi seh kel ia ulina janah perkeleng. Emaka la segan-segan turang senina nungkun man bana kerna nasehat Pustaka. Ntah banci saja ia sekalak pertua si meriah iakapna rusur ngalo-ngalo kalak si deban. (Heb. 13:2, 16) Sanga enggo sisadari lit kengasupenta, dungna meherga siakap banta perban erguna kepe kita bas runggun. Janah lanai ateta cian turang seninata si la seri kengasupenna ras kita.

18. Uga carana gelah reh beluhna kita erberita?

¹⁸ La soal kai pe tugasta bas runggun, kita kerina arus erusaha gelah reh beluhna bas pelayanen. Gelah banci kita reh beluhna, isediaken Jahwe pelatihen si luar biasa arah organisasiNa. Contohna, bas perpulungen tengah pekan, sidat petunjuk kerna uga carana gelah reh beluhna kita erberita. Igunakenndu nge pelatihen si idatndu arah perpulungen e?

19. Kai si banci ilakokenndu gelah banci kam ikut Sekolah man Perberita Kerajan?

¹⁹ Program pelatihen si luar biasa si debanna eme Sekolah man Perberita Kerajan. Si banci ikut bas sekolah e eme turang senina si ngelayani sepenuh waktu janah umurna antara 23 seh 65 tahun. Banci saja la iakapndu mungkin kam ikut sekolah e. Tapi, asangken daramindu alasen-alasen si erbanca la kam banci ikut, padin daramindu alasen engkai maka merhat kam ikut bas sekolah e. Kenca si e, banlah rencana si banci nampati kam gelah ncukupi syarat. Adi terus kam erusaha janah ipindondu penampat Jahwe, kai si iakapndu la mungkin banci jadi mungkin.

20. Kai si banci sipelajari arah Roma 12:6-8?

²⁰ Pelajaren si peteluken si banci sipelajari arah perumpaman Paulus lit bas Roma 12:6-8. (Baca.) I je, ikataken Paulus ka maka beda-beda pemere si ialoken tiap kalak bas runggun. Tapi gundari ikataken Paulus maka la soal kai pe kengasupenta, teruslah sigunaken e mpegegehi runggun.

21-22. Pelajaren kai si banci sidat arah Robert ras Felice?

²¹ Cuba ukuri kai si terjadi man sekalak turang seninata si gelarna Robert. * Pernah ia ngelayani piga-piga waktu i negara si deban. Tapi bas pudi wari, itugasken ia guna ngelayani i Betel si lit i negarana. Ikataken turang senina man bana maka perubahen e terjadi labo perban lit kesalahenna. Aminna pe bage, tetap denga kitik ukurna. Nina, “Erbulan-bulan dekahna latih kuakap rukur perban gagal kuakap aku bas tugasku si mbarenda. Mon-mon reh ka ukurku gelah ngadi ngelayani i Betel.” Kai si erbanca gelah meriah ka ukurna mulihi? Iingetken pertua ia maka tugasna si sebelumna eme pelatihen si ibereken Jahwe gelah banci ia igunaken bas tugasna si gundari. Ikataken Robert maka lanai ukurina kai si  enggo lewat, tapi terus iukurina kai si banci ilakokenna gundari.

²² Turang Senina Felice Episcopo pe ngadapi tentangen si seri. Ia ras ndeharana lulus arah sekolah Gilead bas tahun 1956, kenca si e ngelayani jadi pertua keliling i Bolivia. Bas tahun 1964 lahir anak kalak e. Nina Felice, “Mesera kel iakap kami nadingken tugas kami perban meriah kel akap kami ngelakokenca. Lit setahun dekahna kitik kel ukurku. Alu penampat Jahwe, banci kuubah caraku rukur janah si terus kuukuri tanggung jawapku si mbaru selaku orang tua.” Pernah nge situasindu bagi Robert ras Felice? Kitik nge ukurndu perban lanai banci ilakokenndu tugasndu si mbarenda? Adi e si igejapkenndu, usahakenlah gelah lanai iukurindu tugasndu si mbarenda. Tapi ukurilah kai si banci ilakokenndu gundari guna ngelayani Jahwe bage pe turang senina. Tetaplah sibuk, gunakenlah pemere si lit bas kam bage pe kengasupenndu guna nampati kalak si deban ras mpegegehi runggun, alu bage banci kam ermeriah ukur.

23. Kai si arus siukuri, janah kai kari si bahas bas artikel seterusna?

²³ Meherga iakap Jahwe kita sekalak-sekalak. AteNa gelah kita jadi bagin keluargaNa. Adi siukuri kai si banci silakoken guna mpegegehi turang seninata janah siusahaken ngelakokenca, meherga me siakap banta bas runggun. Tapi uga arusna perukurenta ras perbahanenta man turang seninata bas runggun? Kai buktina maka siergai turang seninata? Bas artikel seterusna, sibahas kari kerna si e.