1. Kai nge si enggo pelajarindu kerna Pencipta?

 ADI Saksi Jahwe si mpebelin kam banci saja kitik-kitik nari enggo iajari kam kerna Jahwe. Enggo iajarken man bandu maka Jahwe kap Pencipta, sipat-sipatNa luar biasa, janah banNa ateNa doni enda jadi Pardis.​—Kej. 1:1; Perb. 17:24-27.

2. Kai nina piga-piga kalak kerna kalak si tek man Pencipta?

² Enterem kalak la tek lit Dibata janah la kalak e tek Dibata Si Nciptaken kerina. Menurut kalak e kegeluhen labo iciptaken, tapi terjadi bage-bage saja. Dung e alu manjar-anjar berubah jadi erbage-bage bentuk kegeluhen. Piga-piga kalak si meganjang sekolahna tek kerna si e. Kalak e erpengakap maka enggo buktiken ilmu pengetahuan Pustaka e salah. Ikataken kalak e ka maka kalak si la erpendidiken ntah pe si motu ngenca si tek lit Pencipta.

3. Engkai maka penting sipegegehi kinitekenta?

³ Banci nge pendapat kalak si meganjang sekolahna erban kita ragu maka Jahwe e Pencipta si perkeleng? Enda tergantung kai alasenta tek maka Jahwe e Pencipta. Perban iajari nge maka kita tek, ntah perban enggo sipelajari bukti-buktina? (1 Kor. 3:12-15) La soal enggo asa kai dekahna kita jadi Saksi Jahwe perlu terus sipegegehi kinitekenta. Adi bage siban la kita tertipu sanga lit si ngataken isi Pustaka e la tuhu. (Kol. 2:8; Heb. 11:6) Guna nampati kita, bas artikel enda ibahas kari (1) engkai maka enterem kalak la tek man Pencipta, (2) uga carata mpegegehi kinitekenta man Jahwe Si Nciptaken kita, janah (3) uga carana gelah tetap paguh kinitekenta.

4. Menurut Heber 11:1, kai nina Pustaka kerna kiniteken?

⁴ Menurut piga-piga kalak, erkiniteken ertina gelah enggo tek saja. Tapi menurut Pustaka, kiniteken arus lit buktina. (Baca Heber 11:1.) Amin pe Jahwe, Jesus, Kerajan Dibata la banci siidah, tapi tek kita si e kerina tuhu-tuhu lit perban banci siidah bukti si jelas. (Heb. 11:3) Sekalak ahli biokimia si enggo jadi Saksi ngataken, “Kiniteken Saksi Jahwe lit buktina. Labo ipersoken kalak e fakta-fakta bas ilmu pengetahuan.”

5. Engkai maka enterem kalak la tek Dibata Si Nciptaken kerina?

⁵ Banci saja rukur kita, ‘Engkai enterem kalak la tek maka Jahwe Si Nciptaken kerina amin pe mbue buktina?’ Perban situhuna piga-piga arah kalak e la pernah pelajarina bukti-buktina. Robert si gundari enggo jadi Saksi Jahwe ngataken, “Sanga aku sekolah denga, la pernah iajarken kerna ciptan, emaka labo aku tek man Pencipta. Kenca umurku 20-en, ngerana-ngerana aku ras Saksi Jahwe janah kupelajari arah Pustaka maka lit alasen si masuk akal si mbuktiken maka Dibata si nciptaken kerina.” *—Nen kotak “ Berita Penting man Orang Tua.”

6. Engkai maka lit kalak si ngataken labo lit Pencipta?

⁶ Piga-piga kalak la tek man Pencipta perban si idahna saja ngenca ia tek. Tapi situhuna tek nge kalak e man kai si la banci idahna. Contohna gravitasi, perban  banci idah kalak e buktina. Kiniteken si ituriken bas Pustaka pe bage. Situhuna lit buktina maka “kai si la teridah e tuhu-tuhu lit.” (Heb. 11:1) Perlu waktu ras usaha guna mpelajari bukti-bukti e, tapi enterem kalak si la nggit mpelajarisa. Kalak si la nggit mpelajarisa banci saja katakenna maka labo lit Dibata.

7. Kerina nge kalak si meganjang sekolahna la tek maka Dibata e Pencipta? Jelasken.

⁷ Piga-piga ilmuwan tek maka Dibata si nciptaken kerina kenca ipelajarina bukti-buktina. * Bali bagi Robert ndai, piga-piga kalak la tek man Pencipta perban la pernah iajarken kerna ciptan man bana  sanga ia sekolah denga. Tapi enggo enterem ilmuwan si nandai Jahwe janah keleng atena Ia. Bali bagi kalak e, arus sipepaguh kinitekenta la soal uga ganjangna sekolahta. La lit kalak si deban si banci ngelakoken si e man banta.

8-9. (a) Penungkunen kai kari sibahas? (b) Kai gunana man banta adi siperdiateken ciptan si lit i sekelilingta?

⁸ Uga carandu mpegegehi kinitekenndu man Pencipta? Mari sibahas empat carana.

⁹ Pelajarilah ciptan Jahwe. Banci reh paguhna kinitekenndu man Pencipta adi perdiatekenndu alu tutus binatang-binatang, sinuan-sinuan, ras bintang-bintang. (Ms. 19:1; Jes. 40:26) Reh buena si pelajarindu kerna si e, reh tekna kam maka Jahwe e Pencipta. Bas buku-bukuta pe melala artikel si mbahas kai si menarik arah ciptan. Bacalah artikel e amin pe mon-mon mesera kapndu ngangkaisa. Pelajarilah asa ngasupndu. Bas situs webta i jw.org lit ka video-video si mejile kerna ciptan si enggo itampilken bas pertemuan regional piga-piga tahun enda. Banci ka tontonndu mulihi video-video e.

10. Ban salah sada bukti arah ciptan si mbuktiken maka lit Pencipta. (Roma 1:20)

¹⁰ Sanga pelajarindu kai si lit i sekelilingndu, perdiatekenlah kai si banci pelajarindu kerna Pencipta. (Baca Roma 1:20.) Contohna, cahaya ras las matawari perlu man kerina si nggeluh bas doni enda. Tapi lit piga-piga cahaya si berbahaya arah matawari. Emaka manusia perlu perlindungen janah manusia enggo ilindungi. Uga carana? Lit lapisen gas i sekeliling doni si ngelindungi kita arah cahaya si berbahaya ndai. Adi cahaya si berbahaya e reh gegehna, gas si ngelindungi ndai pe reh kapalna. Emaka setuju nge kam lit Si Nciptaken si e kerina janah Ia beluh ras perkeleng ?

11. I ja banci nenndu fakta-fakta kerna ciptan si banci mpegegehi kinitekenndu? (Nen kotak “ Publikasi si Banci Mpegegehi Kiniteken.”)

¹¹ Banci nenndu melala fakta kerna ciptan si banci mpegegehi kinitekenndu bas Indeks Publikasi Menara Pengawal ntah pe riset kam bas jw.org. Banci benakenndu alu ngenen artikel-artikel ras video-video bas bagin “Apakah Ini Dirancang?” Bas bagin e lit piga-piga fakta si luar biasa kerna binatang-binatang ras sinuan-sinuan. Banci ka nenndu uga ilmuwan-ilmuwan ngusih kai si enggo iciptaken.

12. Sanga pelajarindu Pustaka kai saja nge si arus ukurindu?

¹² Pelajarilah Pustaka. Ahli biokimia si iceritaken ndai labo mis tek maka lit Pencipta. Tapi dungna tek ia maka lit Pencipta. Bagenda nina, “Si erban aku erkiniteken labo saja perban kupelajari ilmu pengetahuan tapi perban kupelajari ka Pustaka.” Banci saja enggo lit pemetehndu kerna Pustaka, tapi gelah reh paguhna kinitekenndu man Pencipta perlu terus pelajarindu Kata Dibata. (Jos. 1:8; Ms. 119:97) Ukurilah maka kai si terjadi mbarenda si itulis bas Pustaka tuhu-tuhu pernah terjadi. Ukuri ka kerina nubuat bas Pustaka si enggo terjadi bage pe kerna isi Pustaka si la ertentangen amin pe la seri si nulissa. Alu bage, reh paguhna me kinitekenndu man Dibata si pentar ras perkeleng Si Nciptaken kita, ras si  enggo mpeseh kataNa arah Pustaka man banta. *—2 Tim. 3:14; 2 Pet. 1:21.

13. Kai salah sada contoh nasehat si erguna arah Pustaka?

¹³ Sanga sipelajari Kata Dibata, perdiatekenlah uga nasehat si lit i je erguna man banta. Contohna, mbarenda nari enggo persingeti Pustaka kita maka kalak si merangap nandangi sen ndabuh me ku “erbage-bage kiniseran.” (1 Tim. 6:9, 10; Kua. 28:20; Mat. 6:24) Cocok denga nge nasehat e gundari? Lit sada buku si mbahas kerna cara rukur ras perbahanen kalak si gundari. Ikataken i je, “Biasana kalak si mata duiten, la meriah ukurna janah latih kapna rukur. Selain si e kalak si merhat ndarami terbuen sen, la meriah ukurna janah tambah penakitna.” Emaka tuhu-tuhu erguna kel persinget arah Pustaka gelah ula kita merangap nandangi sen. Lit nge tehndu nasehat si deban bas Pustaka si banci erguna man bandu? Adi siukuri kai gunana nasehat si mehuli si lit bas Pustaka, banci siidah maka keleng ate Pencipta kita janah tehNa kai si mehulina man banta. (Jak. 1:5) Alu bage, nggit kita ndalanken nasehat si bereNa janah reh riahna me ukurta.​—Jes. 48:17, 18.

14. Kai si banci pelajarindu arah Pustaka kerna Jahwe?

¹⁴ Banlah tujun si benar sanga mpelajari Pustaka eme guna nandai Jahwe terdeheren. (Joh. 17:3) Sanga pelajarindu Pustaka, banci idahndu sipat-sipat Jahwe si mehuli janah sipat-sipatNa e banci ka idahndu sanga pelajarindu ciptanNa. Alu mpelajari sipat-sipat Jahwe banci erban kam tek maka Ia tuhu-tuhu lit. (Kel. 34:6, 7; Ms. 145:8, 9) Adi reh bagesna tandaindu Jahwe, banci reh paguhna kinitekenndu man baNa, reh belinna ka kekelengenndu, janah reh rembakna kam ras Ia.

15. Kai gunana adi ceritakenndu kinitekenndu man kalak si deban?

¹⁵ Ceritakenlah kinitekenndu kerna Dibata man kalak si deban. Adi bage banndu, pasti reh paguhna kinitekenndu. Tapi uga adi sanga kam erberita, lit penungkunen arah kalak si la tek maka Dibata e lit janah la tehndu cara njawapsa? Guna njawap penungkunenna e daramilah ayat si cocok si lit bas buku-bukuta janah bahas kerna si e ras kalak e. (1 Pet. 3:15) Banci ka pindondu penampat arah turang senina si enggo mbue pengalamenna. La soal aloken kalak e ntah lang jawapen si berendu arah Pustaka, pasti melala datndu gunana perban enggo lakokenndu riset kerna si e. Kinitekenndu pasti reh paguhna. Selain si e, la kam nukah terpengaruh man kalak si ngataken maka la lit Pencipta, amin pe kalak e teridah pentar ras meganjang sekolahna.

16. Kai si banci terjadi adi la sijaga kinitekenta tetap paguh?

¹⁶ La soal enggo asa kai dekahna kita ngelayani Jahwe, arus terus sipepaguh kinitekenta. Engkai? Perban adi la kita hati-hati kinitekenta banci lemah. Bagi si enggo sibahas ndai, kinitekenta erpalasken bukti-bukti si jelas si la teridah. Tapi perban bukti-bukti e la teridah banci nukah kita lupa, dungna lemah me kinitekenta. Emaka ikataken Paulus kiniteken si lemah eme “dosa si nukah niding kita.”  (Heb. 12:1) Adi bage, uga carana gelah kinitekenta tetap paguh?​—2 Tes. 1:3.

17. Kai si banci nampati kita gelah tetap paguh kinitekenta?

¹⁷ Si pertama, rusurlah pindo kesah si badia man Jahwe. Engkai? Perban kiniteken eme salah sada sipat si ihasilken kesah si badia. (Gal. 5:22, 23) Adi la kin sampati kesah si badia, labo banci sipepaguh kinitekenta man Pencipta. Adi terus sipindo kesah si badia man Jahwe, pasti berekenNa. (Luk. 11:13) Banci ka kita ertoto, ninta, “Pegegehi min kiniteken kami.”​—Luk. 17:5.

18. Menurut Masmur 1:2, 3, kai pemere si meherga si enggo sialoken?

¹⁸ Si peduaken, pelajari Kata Dibata alu ratur. (Baca Masmur 1:2, 3.) Sanga Masmur 1 e itulis, salinen lengkap arah Undang-Undang Dibata enggo dung, janah enda lit bas raja, imam-imam, ras piga-piga kalak Israel ngenca. Pitu tahun sekali, kalak Israel “si dilaki, si diberu, anak-anak” ras kalak asing si tading bas Israel ipepulung guna megiken Undang-Undang Dibata ibacaken. (Ul. 31:10-12) Bas jaman Jesus, Kitap-Kitap si Badia e bas piga-piga kalak ngenca lit salinenna janah buen itama bas ingan pulung kalak Jahudi. Tapi adi gundari, kerina kalak banci bacana Pustaka si lengkap ntah pe si la lengkap. Kata Dibata e pemere si meherga man banta. Uga carata ngergai pemere e?

19. Kai si perlu silakoken guna njaga kinitekenta tetap paguh?

¹⁹ Sibuktiken maka siergai Pustaka adi sibaca alu ratur. Labo adi lit waktu saja maka sibaca, tapi siban jadwalta guna mbaca ras mpelajarisa. Adi ratur sibaca Pustaka banci sijaga kinitekenta tetap paguh.

20. Kai arusna tekadta?

²⁰ La bagi kalak si ianggap “pentar ras erpemeteh” si lit bas doni enda, kinitekenta erpalasken bukti-bukti si jelas arah Pustaka. (Mat. 11:25, 26) Perban enggo sipelajari Pustaka, enggo siteh engkai maka doni enda reh cedana ras kai pagi si lakoken Dibata. Emaka teruslah sipepaguh kinitekenta janah asa ngasupta sisampati kalak gelah tek man Pencipta. (1 Tim. 2:3, 4) Teruslah siinget kerna wari si pepagi paksa kerina kalak muji Jahwe bagi si ikataken bas Ketangkasen 4:11: ‘O Jahwe Dibata kami, Kam si metunggung ngaloken kemulian. Sebap Kam si nciptaken kerina si lit.’