• “Bagi mulih-ulih kuakap selingkuh perbulangenku.”

• “Mela kel kuakap, la kuakap merga bangku, janah lanai kuakap jadi atena ngidah aku.”

• “La banci kuceritaken man ise pe. Latih kuakap ngukurisa sisada.”

• “Tempa-tempa la kuakap ermediate Jahwe man bangku.”

Kata-kata i datas ndai ncidahken uga cedana ukur sekalak ndehara adi perbulangenna nonton pornografi. Selain si e, adi erbuni-buni perbulangenna ngelakoken si e sedekah erbulan-bulan ntah pe ertahun-tahun, ndeharana banci saja lanai tek man bana. Bagenda nina sekalak ndehara, “Tempa-tempa lanai kuakap kutandai perbulangenku. Nina ukurku, ‘Rahasia kai nari nge si ibunikenna?’”

Artikel enda itulis guna ndehara-ndehara si perbulangenna candu nonton pornografi. a Prinsip-prinsip Pustaka si ibahas i jenda banci ngapuli kalak e, mpetetap ukur kalak e maka pasti sampati Jahwe kalak e, janah nampati kalak e gelah ndatken terbuen kedamen ras tetap rembak ras Jahwe. b

Memang, labo banci kendalikenndu kerina si ilakoken perbulangenndu, tapi lit piga-piga si banci lakokenndu gelah reh tenangna akapndu ras la kapndu sedihsa. Cuba perdiateken piga-piga saran enda.

Ula salahken bandu. Sekalak ndehara banci saja erpengakap perban salahna maka perbulangenna nonton pornografi. Alice c erpengakap kurang mehuli ia man perbulangenna. Iakapna e me si erban pangen akap perbulangenna ngenen diberu-diberu si deban. Piga-piga ndehara salah kapna bana perban carana ngadapi situasi e, janah e akapna si erban situasina reh parahna. Bagenda nina Danielle, “Stres kel aku janah rusur merawa-rawa. Kuakap enggo ceda kuban perjabunku perban rawaku e.”

Adi bage si igejapkenndu, ingetlah kai si ikataken Jakup 1:14: “Tiap kalak icubai sanga itarik  janah igoda alu sura-surana.” (Rom. 14:12; Pil. 2:12) Emaka, labo isalahken Jahwe kam perban perbahanen perbulangenndu, tapi iergai Jahwe kesetianndu man baNa.​—2 Kro. 16:9.

Perlu ka angkandu maka adi perbulangenndu nonton pornografi labo ertina kam ndehara si la mehuli. Ahli-ahli ngataken maka pornografi banci erban turah sura-sura si la masuk akal janah la banci ipuasken diberu si apai pe.

Ula kuatirsa. Ikataken Catherine maka tiap wari lalap ia kuatir perban kebiasan perbulangenna si nggit nonton pornografi, janah lanai banci ukurina si deban. Ikataken Frances, “Lalap aku gelisah adi la kuteh i ja perbulangenku. Sitik pe la aku banci tenang.” Lit ka si ngataken maka mela kel kapna sanga ras turang senina si banci saja tehna kerna masalah perbulangenna. Si debanna ngataken maka la kapna lit si ngangkai situasina, janah arus adapina sisada.

Perasan si bage wajar. Tapi adi lalap ukurindu, reh kuatirna kam. Emaka, teruslah ukuri hubungenndu ras Jahwe. Si e banci erban kam reh gegehna.​—Ms. 62:2; Ep. 6:10.

Cubalah baca ras ukuri kejadin-kejadin si lit bas Pustaka kerna diberu-diberu si latih ukurna tapi datna pengapul perban ertoto man Jahwe. Amin pe labo lalap imasapken Jahwe masalahna, ibereNa kalak e kedamen. Contohna Hanna, pernah la tanggung “sedakna” kapna perban situasi si adapina. Tapi, kenca “ndekah kel Hanna ertoto man Jahwe,” tenang kapna amin pe lenga tehna kai si nandangi terjadi.​—1 Sam. 1:10, 12, 18; 2 Kor. 1:3, 4.

Pindolah penampat pertua-pertua. Kalak e banci bagi “ingan cicio arah angin si meter, bagi ingan erlindung arah udan badai.” (Jes. 32:2) Selain si e, banci kataken kalak e turang senina si apai si banci ajakndu ngerana ras ngapuli kam.​—Kua. 17:17.

Banci nge sampatindu perbulangenndu mpengadi kebiasan nonton pornografi? Banci saja. Ikataken Pustaka maka guna ndungi masalah ntah pe guna naluken musuh si megegeh “ulin dua kalak asangken sekalak.” (Peng. 4:9-12) Selain si e, menurut penelitin biasana masalah candu nonton pornografi banci iatasi, janah perbulangen ras ndehara banci mulihi siteken adi ras-ras kalak e erjuang.

 Memang, kerina e bergantung man serius ntah lang perbulangenndu mpengadi kebiasanna nonton pornografi, janah tuhu-tuhu usahakenna guna robah. Enggo nge ia ertoto mindo gegeh man Jahwe, ras mindo penampat man pertua-pertua? (2 Kor. 4:7; Jak. 5:14, 15) Enggo nge banna rencana si banci nampati ia mpedauh godan? Contohna, alu mbatasi waktu guna make perangkat elektronik ras mpedauh situasi-situasi si banci erban bahaya. (Kua. 27:12) Nggit nge ia ngaloken penampatndu, jujur ras terus terang man bandu? Adi ue, banci saja, banci sampatindu ia.

Uga carana? Cuba perdiateken contoh enda. Felicia erjabu ras Ethan, si candu nonton pornografi sanga ia kitik denga. Iusahaken Felicia gelah nggit Ethan ngerana man bana sanga merhat ka ia nonton pornografi. Bagenda nina Ethan, “Jujur ras terus terang aku ngerana man diberuku. Alu perkeleng sampatina aku mpedauh godan janah rusur sungkunna keadanku. Isampatina ka aku guna mbatasi waktuku bas nggunaken Internet.” Memang, sakit hati nge Felicia perban Ethan nggit nonton pornografi. Tapi bagenda nina Felicia, “Amin pe nembeh ateku janah sakit hati aku, tapi si e labo nampati ia mpengadi kebiasanna si la mehuli. Kenca ibahas kami masalahna, ertekad ia nampati aku gelah lanai aku sakit hati.”

Pembahasen si bage banci nampati sekalak perbulangen gelah lanai nonton pornografi. Si e pe banci nampati ndeharana gelah tek mulihi man bana. Adi perbulangen terus terang kerna kelemahenna, kegiatenna tiap wari, ras ku ja ia lawes, banci gejapken ndeharana maka lanai lit si irahasiaken arah ia nari.

Menurutndu, pembahasen si bage banci nge nampati perbulangenndu? Adi ue, banci baca kena ras bahas kena artikel enda ras-ras. Tujun perbulangenndu eme guna ngadi nonton pornografi ras erban kam tek mulihi man bana. Perlu usahakenna ngangkai kai akibat kebiasanna si la mehuli e man kena. Ula min nembeh atena perban ibahas kena ate kena masalah e. Tujunndu eme guna ndukung usahana ras mereken kesempaten man bana guna erban kam tek mulihi man bana. Perlu teh kena kai si erban sekalak jelma tergoda nonton pornografi ras uga cara nulak godan e. d

Adi mbiar kena rubati sanga mbahas kerna si e, banci ajak kena sekalak pertua ikut bas pembahasen  kena bas piga-piga waktu. Pilihlah sekalak pertua si cocok akap kena. Ingetlah, amin pe enggo berhasil perbulangenndu mpengadi kebiasanna nonton pornografi, banci saja perlu waktu terdekahen man bandu gelah tek mulihi man bana. Emaka, sabarlah janah ula nyerah. Teruslah ukuri kai si enggo berhasil lakoken kena amin pe sitik ngenca. Teruslah erpengarapen maka dungna pagi perjabun kena banci paguh mulihi.​—Peng. 7:8; 1 Kor. 13:4.

Uga adi mulihi ka perbulangenndu nonton pornografi kenca piga-piga waktu ia ngadi, payo nge e ertina la ia robah janah lanai lit arapen? Lenga tentu. Adi enggo sempat ia candu, banci saja arus bas segedang geluhna ia ngelawan kebiasan si la mehuli e. Kebiasan si la mehuli e banci kumat mulihi amin pe enggo ipengadina piga-piga tahun dekahna. Gelah si e la terjadi mulihi, perlu ipebelinna tekadna guna robah, banci saja arus terus ikutkenna rencana si enggo ibanna mbarenda amin pe gundari tempa-tempa enggo berhasil ia mpengadi kebiasanna si la mehuli. (Kua. 28:14; Mat. 5:29; 1 Kor. 10:12) Perlu usahakenna gelah lit bas ia ‘cara rukur’ si mbaru janah ‘segat atena kai si jahat’ eme pornografi ras kerina kebiasan si najis si lit hubungenna ras si e, termasuk masturbasi. (Ep. 4:23; Ms. 97:10; Rom. 12:9) Nggit nge perbulangenndu ngelakoken si e? Adi nggit, e ertina banci denga pengadina kebiasan si la mehuli e. e

Tapi, uga adi perbulangenndu la nggit mpengadi kebiasan si la mehuli e? Wajar nge adi ihianati kapndu bandu, kecewa, janah merawa atendu. Benterkenlah masalahndu e man Jahwe gelah banci dame akapndu. (1 Pet. 5:7) Teruslah reh rembakna ras Jahwe alu mbaca Pustaka, ngukurisa, ras ertoto. Adi lakokenndu si e, Jahwe pe pasti reh rembakna ras kam. Bali bagi si ikataken Jesaya 57:15, Ia tading ras kalak si “ceda pusuhna” guna erban kalak e semangat mulihi. Usahakenlah asa ngasupndu guna jadi kalak Kristen si mehuli. Pindolah penampat arah pertua-pertua. Teruslah erpengarapen maka bas sada paksa pagi nggit perbulangenndu robah.​—Rom. 2:4; 2 Pet. 3:9.