1. Menurut Heber 12:1, uga carana gelah banci kita menang bas perlumban guna ndatken kegeluhen?

 IPESERI Pustaka kegeluhen kalak Kristen bagi sada perlumban. Kalak si seh bas garis finis banci ndatken kegeluhen si rasa lalap. (2 Tim. 4:7, 8, cataten i teruh.) Arus siusahaken asa ngasupta gelah tetap kiam, terlebih ka perban garis finis e enggo seh kel deherna. Rasul Paulus enggo seh bas garis finis. Ikatakenna kai si banci nampati kita gelah menang bas perlumban e. Iahkenna kita gelah “siambekken kerina baban ras . . . tutuslah ateta kiam bas perlumban si itetapken man banta.”​—Baca Heber 12:1.

2. Kai maksudna “siambekken kerina baban”?

² Sanga itulis Paulus maka arus “siambekken kerina baban,” payo nge maksudna kalak Kristen la perlu maba kai pe? Lang, labo bage maksudna. Tapi maksudna, arus siambekken kerina baban si la perlu. Baban si la perlu e banci erban kita reh meletna kiam janah latih siakap. Gelah banci terus kiam, arus meter siteh ras siambekken baban kai pe si la perlu, si erban kita reh meletna. Tapi, ula min sitadingken baban si perlu sibaba. Sebap adi bage siban, banci kita ipedarat arah perlumban e. (2 Tim. 2:5) Kai kin baban si arus sibaba?

3. (a) Menurut Galati 6:5, kai si arus sibaba? (b) Kai kari sibahas bas artikel enda, janah engkai?

³ Baca Galati 6:5. Ikataken Paulus maka lit baban si arus sibaba. Itulisna maka “tiap kalak maba babanna masing-masing.”  Maksud Paulus i jenda eme tanggung jawapta sekalak-sekalak man Dibata. La banci kalak si deban si maba baban e guna kita. Bas artikel enda, sibahas kari kai saja si termasuk ‘babanta masing-masing’ janah uga carata mabasa. Selain si e, sipelajari kari baban kai si la perlu sibaba si banci saja enggo sibaba, janah uga carata ngambekkenca. Adi sibaba baban si man baban ras sitadingken si la man baban, banci kita terus kiam janah menang bas perlumban guna kegeluhen.

4. Engkai maka pembaktinta man Jahwe labo baban si mberat? (Nen ka gambar.)

⁴ Pembaktinta man Jahwe. Sanga sibaktiken dirita man Jahwe, erjanji kita guna ngelayani Ia ras ngelakoken peratenNa. Arus sitepati janjita e. Nggeluh sesuai ras pembaktinta memang tanggung jawap si mbelin. Tapi e labo baban si mberat. Engkai? Perban enggo ciptaken Jahwe kita ngasup ngelakoken peratenNa. (Ket. 4:11) IbanNa lit bas kita sura-sura guna nandai Ia ras nembah Ia,  janah ciptakenNa kita mirip ras Ia. Emaka, banci kita reh rembakNa ras Ia, janah meriah ukurta ngelakoken peratenNa. (Ms. 40:8) Selain si e, sanga silakoken peraten Dibata ras siikutken AnakNa, banci kita ‘terpegegehi.’​—Mat. 11:28-30.

5. Kai si banci nampati kam guna nggeluh sesuai ras pembaktinndu? (1 Johanes 5:3)

⁵ Uga carandu maba baban e? Lit dua cara si banci nampati kam. Si pertama, teruslah pebelin kekelengenndu man Jahwe. Banci lakokenndu si e adi ukurindu kerina si mehuli si enggo lakoken Jahwe man bandu bage pe pasu-pasu si enggo sikapkenNa man bandu. Reh kelengna atendu Dibata, reh nukahna akapndu patuh man baNa. (Baca 1 Johanes 5:3.) Si peduaken, usihlah Jesus. Jesus enggo berhasil ngelakoken peraten Dibata perban ertoto ia mindo penampat man Jahwe, janah lalap ingetna upahna. (Heb. 5:7; 12:2) Bali bagi Jesus, ertotolah mindo gegeh man Jahwe janah teruslah inget arapen kegeluhen si rasa lalap. Adi reh belinna kekelengenndu man Dibata janah usihndu AnakNa, kam pe banci nggeluh sesuai ras pembaktinndu man Jahwe.

6. Engkai maka arus sidalanken tanggung jawapta bas keluarga? (Nen ka gambar.)

⁶ Tanggung jawapta bas keluarga. Bas perlumban guna ndatken kegeluhen, arus kelengen ateta Jahwe ras Jesus asangken keluargata. (Mat. 10:37) Tapi, enda labo maksudna la perlu sidalanken tanggung jawapta bas keluarga janah sianggap e baban si mberat si ngambati kita erban meriah ukur Dibata ras Kristus. Situhuna, gelah pelayanenta ialoken Dibata ras Kristus, arus sidalanken tanggung jawapta bas keluarga. (1 Tim. 5:4, 8) Adi bage siban, reh riahna me ukurta. Engkai? Perban iteh Jahwe maka keluarga-keluarga pasti ermeriah ukur adi perbulangen ras ndehara sikeleng-kelengen ras siergan, orang tua engkelengi ras ngajari anakna, janah anak-anak patuh man orang tuana.​—Ep. 5:33; 6:1, 4.

7. Uga carandu ndalanken tanggung jawapndu bas keluarga?

⁷ Uga carandu maba baban e? Kai pe tanggung jawapndu bas keluarga, teklah man kepentaren si lit bas Pustaka, ula ikutkenndu perasanndu, kebiasan bas daerahndu, ntah pe pendapat kalak si ahli. (Kua. 24:3, 4) Gunakenlah alu mehuli publikasita si erpalasken Pustaka. I je melala nasehat si banci nampati kam ndalanken prinsip-prinsip Pustaka. Contohna, bas seri artikel “Penampat man Keluarga” lit i je ibahas kerna erbage masalah si adapi perbulangen ras ndehara, orang tua, bage pe anak muda. b Usahakenlah ndalanken kai si ikataken Pustaka amin pe keluargandu la ngelakokenca. Adi bage banndu, keluargandu pasti ndatken manpaatna janah kam pe datndu pasu-pasu arah Jahwe.​—1 Pet. 3:1, 2.

8. Uga keputusenta mpengaruhi kita?

⁸ Ertanggung jawap nandangi keputusenta. Ibereken Jahwe man banta kebebasen guna milih. AteNa meriah min ukurta perban siban keputusen si mehuli. Tapi adi siban keputusen si la mehuli, labo lindungiNa kita arah akibatna.  (Gal. 6:7, 8) E me sebapna arus sitanggung jawapi masalah si terjadi perban keputusenta si la mehuli, ranan si la siukuri, ras perbahanenta si salah. Banci saja silakoken kesalahen si erban terganggu pusuh peratenta. Tapi perban siteh arus kita ertanggung jawap nandangi keputusen si enggo siban, si e ngiahken kita nggit ngakui dosata, mpekena kesalahenta, janah lanai siulihi kesalahen e. Alu bage, banci kita terus ikut bas perlumban guna ndatken kegeluhen.

9. Kai si banci lakokenndu adi enggo banndu keputusen si salah? (Nen ka gambar.)

⁹ Uga carandu maba baban e? Adi enggo banndu keputusen si salah, kai si banci ilakokenndu? Labo banci ubahndu kai si enggo terjadi. Ula pekeri waktundu ras gegehndu guna mbuktiken maka kam benar ntah pe salahkenndu kalak si deban. Tapi akuilah kesalahenndu janah lakokenlah si mehulina si banci lakokenndu gundari. Adi salah kapndu bandu perban kai si enggo lakokenndu, ertotolah man Jahwe alu meteruk ukur. Akuilah salahndu janah pindolah pengampunenNa. (Ms. 25:11; 51:3, 4) Mindo maaplah kam man kalak si enggo sakitindu janah adi perlu pindolah penampat pertua-pertua. (Jak. 5:14, 15) Erlajarlah arah kesalahenndu janah usahaken gelah ula nai ulihindu kesalahen e. Adi lakokenndu si e, teklah kam maka pasti mekuah ate Jahwe kam janah berekenNa penampat si iperlukenndu.​—Ms. 103:8-13.

10. Engkai maka arapen si la masuk akal banci jadi baban si mberat man banta? (Galati 6:4)

¹⁰ Arapen si la masuk akal. Adi sibandingken dirita ras kalak si deban, banci dungna lanai masuk akal arapenta, janah e banci jadi baban si mberat man banta. (Baca Galati 6:4.) Adi lalap sibandingken dirita ras kalak si deban, banci dungna kita jadi kalak si percian ras nggit ersaing. (Gal. 5:26) Banci saja sipaksaken ngelakoken kai si la ngasup silakoken. Cuba ukuri enda: Nina Pustaka “arapen si la terjadi erban getem pusuh.” (Kua. 13:12) Emaka pasti reh getemna pusuhta adi siarapken kai si la mungkin sidat. Si e banci erban reh latihna siakap janah reh meletna kita bas perlumban guna ndatken kegeluhen.​—Kua. 24:10.

11. Uga carandu ngambekken arapen si la masuk akal?

¹¹ Uga carandu ngambekken baban e? Ula paksandu bandu ngelakoken kai si lebihen asangken si arapken Jahwe. Labo pernah pindo Jahwe kai si la banci lakokenndu. (2 Kor. 8:12) Teklah kam maka labo ibandingken Jahwe kai si ilakokenndu ras si ilakoken kalak si deban. (Mat. 25:20-23) Ergai Jahwe pelayanenndu si bulat ukur, kesetianndu, ras sipatndu si megenggeng. Meteruk ukurlah kam janah sadarilah maka banci saja lanai banci lakokenndu kerina bagi sura-surandu perban umurndu, masalah kesehatenndu, ntah pe keadanndu. Bali bagi Barsilai, tulaklah tugas si lanai terdalankenndu perban masalah kesehatenndu ntah pe perban enggo kam metua. (2 Sam. 19:35, 36) Bali bagi Musa, nggitlah kam ngaloken penampat ntah pe mereken piga-piga tugas man kalak si deban adi cocok. (Kel. 18:21, 22) Adi meteruk ukur kam, labo arapkenndu lebihen asangken si banci lakokenndu si erban latihsa akapndu bas perlumban guna ndatken kegeluhen.

12. Perlu nge salah siakap banta perban keputusen si salah si iban kalak? Jelasken.

 ¹² Salah siakap banta perban keputusen si salah si iban kalak. Labo banci siban keputusen man kalak si deban. Labo ka banci silindungi kalak e arah akibat keputusenna si salah. Contohna, sekalak anak banci saja lanai nggit ngelayani Jahwe. Keputusen e banci erban ceda kel ukur orang tuana. Lit orang tua si salahkenna bana perban keputusen si salah si iban anakna, janah e jadi baban si mberat man bana. Tapi, labo ate Jahwe ibaba kalak e baban e.​—Rom. 14:12.

13. Kai si perlu ilakoken orang tua sanga iban anakna keputusen si salah?

¹³ Uga carandu ngambekken baban e? Ingetlah maka ibereken Jahwe kebebasen guna milih man kerina jelma. IpediatNa tiap kalak erban keputusen sendiri, enda termasuk guna ngelayani Ia. Iteh Jahwe maka kam labo orang tua si sempurna. Si arapkenNa eme ilakokenndu si mehulina bas ngajari anakndu. Keputusen si iban anakndu eme tanggung jawapna, labo tanggung jawapndu. (Kua. 20:11) Tapi banci saja ingetndu lalap kesalahen si ibanndu selaku orang tua. Adi bage, turiken perasanndu man Jahwe janah pindolah pengampunenNa. ItehNa maka labo banci ubahndu kai si enggo terjadi. Selain si e, labo arapkenNa lindungindu anakndu arah akibat keputusenna. Ingetlah maka adi lit usaha anakndu guna mulihken ku Jahwe, pasti meriah ukur Jahwe ngalo-ngalo ia.​—Luk. 15:18-20.

14. Engkai maka perlu siambekken perasan lalap salah siakap banta?

¹⁴ Perasan lalap salah siakap banta. Sanga silakoken sada dosa, wajar nge adi salah siakap banta. Tapi, labo ate Jahwe lalap salah siakap banta. Perasan si bage arus siambekken. Uga adi lalap salah siakap banta? Adi siakui dosata, ertobat kita janah siusahaken lanai ngelakoken kesalahen e, tek kita enggo ampuni Jahwe  kita. (Perb. 3:19) Kenca silakoken si e kerina, labo ate Jahwe lalap salah siakap banta. TehNa maka perasan si bage la mehuli pengaruhna. (Ms. 31:10) Adi sedihsa kita, e banci erban kita nyerah bas perlumban guna ndatken kegeluhen.​—2 Kor. 2:7

15. Kai si banci nampati kam ngadapi perasan lalap salah kapndu bandu? (1 Johanes 3:19, 20) (Nen ka gambar.)

¹⁵ Uga carandu ngambekken baban e? Adi lalap salah kapndu bandu, ingetlah maka Dibata nggit ngampuni kam. (Ms. 130:4) Sanga ampuniNa kalak situhu-tuhu ertobat, erjanji Ia, nina, “Lanai pagi Kuinget dosa kalak e.” (Jer. 31:34) Enda ertina, labo ndigan pe ingetNa mulihi dosandu. Emaka, sanga adapindu masalah perban dosandu, ula anggapndu si e bukti maka lenga ampuni Jahwe kam. Kesalahen si ilakokenndu mbarenda banci saja erban kam la banci ngelakoken melala tugas bas ngelayani Jahwe, tapi ula min si e erban lalap salah kapndu bandu. Labo inget-inget Jahwe dosa si lakokenndu, emaka kam pe ula inget-ingetndu.​—Baca 1 Johanes 3:19, 20.

16. Selaku kalak si ikut bas perlumban, kai si arus siteh?

¹⁶ Sanga kita kiam bas perlumban guna ndatken kegeluhen, arus kita ‘kiam asa ngasupta gelah menang guna ndatken hadiah e.’ (1 Kor. 9:24) Emaka, perlu siteh baban kai si arus sibaba janah baban si apai si arus siambekken. Bas artikel enda, enggo sibahas piga-piga contohna. Tapi lit denga si deban si ikataken bas Pustaka. Ikataken Jesus maka banci kita “iberati alu mbuesa man, mbuesa minem, ras perasan kuatir kerna kegeluhen enda.” (Luk. 21:34) Ayat-ayat si bage banci nampati kita meteh penyesuaien kai si perlu siban gelah banci terus kiam seh ku garis finis.

17. Engkai maka banci kita tek pasti kita menang bas perlumban guna ndatken kegeluhen?

¹⁷ Banci kita tek maka pasti kita menang bas perlumban guna ndatken kegeluhen perban ibereken Jahwe kita gegeh si iperluken. (Jes. 40:29-31) Emaka, ula nyerah! Siusihlah Rasul Paulus, si enggo usahakenna asa ngasupna ndatken hadiah si enggo isikapken man bana. (Pil. 3:13, 14) Memang, labo ise pe si banci kiam guna kita bas perlumban e. Tapi, alu penampat Jahwe pasti banci kita berhasil. Isampati Jahwe kita maba baban si arus sibaba ras ngambekken baban si la perlu. (Ms. 68:19) Adi Jahwe ras kita, pasti banci kita terus kiam janah dungna menang!