1. Kai si banci erban meriah siakap mpelajari nubuat bas Pustaka?

 BAGENDA nina sekalak anak muda si gelarna Ben, “Meriah kel kuakap mpelajari nubuat bas Pustaka.” Bage ka nge perasanndu? Ntah mesera kapndu mpelajari nubuat bas Pustaka janah bosan kam? Piga-piga kalak bage kang perasanna. Tapi, adi tehndu engkai maka pastiken Jahwe gelah nubuat-nubuatNa icatat bas Pustaka, banci saja merhat kam mpelajarisa.

2. Kai kari sibahas bas artikel enda?

² Bas artikel enda, sibahas kari engkai maka perlu sipelajari nubuat bas Pustaka ras uga carata mpelajarisa. Kenca si e, siperdiateken kari dua nubuat si itulis bas buku Daniel, ras kai gunana man banta gundari.

3. Kai si perlu silakoken gelah banci siangkai nubuat bas Pustaka?

³ Perlu kita penampat guna ngangkai nubuat bas Pustaka. Cuba perdiateken perumpaman enda. Bayangken lawes kam ku sada ingan si lenga pernah dahindu. Tapi, lit kalak si nemani kam situhu-tuhu enggo nandai ingan e. Itehna i ja kena sangana, janah tehna kerina dalan si lit i je. Pasti meriah kapndu perban nggit ia nemani kam. Bage ka pe, Jahwe bali bagi teman si nggit nampati, janah tehNa kai si terjadi bas masa depan. Emaka,  guna ngangkai nubuat bas Pustaka, arus sipindo penampat Jahwe alu meteruk ukur.​—Dan. 2:28; 2 Pet. 1:19, 20.

4. Engkai maka iatur Jahwe gelah nubuat-nubuatNa icatat bas Pustaka? (Jeremia 29:11) (Nen ka gambar.)

⁴ Bali bagi bapak si mehuli, ate Jahwe cerah min masa depan anak-anakNa. (Baca Jeremia 29:11.) Jahwe banci nubuatkenNa masa depan alu tepat, la bagi manusia. IaturNa gelah nubuat-nubuatNa icatat bas Pustaka gelah banci siteh kejadin penting kai si nandangi terjadi. (Jes. 46:10) Nubuat-nubuat bas Pustaka eme hadiah arah Bapakta si perkeleng si lit i surga. Tapi, uga carana gelah banci kita tek maka nubuat bas Pustaka pasti pagi terjadi?

5. Kai si banci ipelajari anak-anak muda arah pengalamen Max?

⁵ Bas melala ingan, anak-anak muda Saksi Jahwe enterem temanna si la tek man Pustaka. Ranan ras perbahanen kalak e banci erban anak muda Saksi ragu nandangi kinitekenna. Cuba perdiateken pengalamen Max. Bagenda nina, “Sanga aku remaja denga, mulai aku ragu benar ntah lang agama si ajarken orang tuaku man bangku, janah tuhu ntah lang Pustaka e rehna arah Dibata.” Kai si ilakoken orang tuana? Nina Max, “Amin pe kuatir kalak e, tenang kalak e ngadapisa.” Ijawap orang tua Max penungkunen-penungkunenna arah Pustaka. Tapi Max pe lit si ilakokenna. Nina, “Kupelajari nubuat bas Pustaka, janah kubahas kai si enggo kupelajari ras anak-anak muda si deban.” Kai hasilna? Nina Max, “Kenca si e, tek me aku maka Pustaka e rehna arah Dibata.”

6. Adi mulai kita ragu, kai si perlu silakoken ras engkai?

⁶ Anak muda, adi mulai kam ragu isi Pustaka e kebenaren ntah lang, ula salah kapndu bandu. Tapi, lit si perlu lakokenndu. Perasan ragu e bali bagi karat. Adi ipediat, reh dekahna banci ncedai barang-barangta si meherga. Gelah la lit karat bas kinitekenndu, perlu ukurindu penungkunen enda, ‘Tek nge aku man kai si ikataken Pustaka kerna masa depan?’ Adi lenga kam tek, perlu pelajarindu nubuat-nubuat Pustaka si enggo terjadi. Uga carana?

7. Uga Daniel jadi usihen si mehuli bas mpelajari nubuat? (Daniel 12:10) (Nen ka gambar.)

⁷ Daniel jadi usihen si mehuli bas mpelajari nubuat. Sanga ia erlajar benar tujunna, eme guna meteh kebenaren. Daniel pe meteruk ukur. Itehna maka ibere Jahwe pengangkan man kalak si nandai Ia ras ngikutken patokenNa. (Dan. 2:27, 28; baca Daniel 12:10.) Alu meteruk ukur iandalken Daniel Jahwe. (Dan. 2:18) Daniel pe tutus tena erlajar. Ipereksana bagin-bagin Kitap si Badia si lit  paksa si e. (Jer. 25:11, 12; Dan. 9:2) Uga carandu ngusih Daniel?

8. Piga-piga kalak mpelajari nubuat bas Pustaka alu tujun kai, tapi uga arusna tujunta?

⁸ Pereksalah tujunndu. Perban merhat nge kam meteh kebenaren maka pelajarindu nubuat bas Pustaka? Adi ue, pasti sampati Jahwe kam. (Joh. 4:23, 24; 14:16, 17) Tapi, piga-piga kalak mpelajari nubuat bas Pustaka alu tujun si salah. Buktiken kalak e atena maka Pustaka labo rehna arah Dibata. Ilakoken kalak e si e perban la ia nggit ngikutken patoken Dibata, janah ia tena si nentuken kai si benar ras si salah. Kita la bagi kalak e. Sipelajari nubuat alu tujun si benar. Selain si e, lit sada sipat penting si deban si iperluken gelah banci siangkai nubuat bas Pustaka.

9. Sipat kai si iperluken gelah banci siangkai nubuat bas Pustaka? Jelasken.

⁹ Meteruk ukurlah kam. Enggo erjanji Jahwe guna nampati kalak si meteruk ukur. (Jak. 4:6) Emaka, perlu kita ertoto gelah sampatiNa kita ngangkai nubuat bas Pustaka. Arus ka siakui maka perlu kita penampat arah budak si setia si igunaken Jahwe guna mereken pangan rohani bas waktu si tepat man banta. (Luk. 12:42) Jahwe eme Dibata si teratur. Emaka, masuk akal adi sada ngenca saluren si ipakeNa guna nampati kita ngangkai kebenaren si lit bas Pustaka.​—1 Kor. 14:33; Ep. 4:4-6.

10. Kai si ipelajarindu arah pengalamen Esther?

¹⁰ Tutuslah atendu erlajar. Benakenlah alu mpelajari sada nubuat si menarik akapndu. Bage me si ilakoken Esther. Merhat ia mpelajari nubuat-nubuat kerna kerehen Mesias. Bagenda nina, “Paksa umurku 15 tahun, mulai kudarami bukti-bukti si ncidahken maka nubuat-nubuat e memang itulis sope jaman Jesus.” Kenca si e, idatna informasi kerna gulungen Laut Mati, nina, “Piga-piga gulungen e itulis sope jaman Kristus, emaka nubuat-nubuat si lit i je pasti rehna arah Dibata.” Memang akui Esther maka arus mulih-ulih bacana penjelasen e gelah banci angkaina. Tapi, meriah ukurna perban enggo usahakenna ngelakoken si e. Kenca tutus atena mpelajari piga-piga nubuat bas Pustaka, bagenda nina, “Enggo kuidah alu jelas maka tuhu si ikataken Pustaka!”

11. Kai gunana adi tek kita maka isi Pustaka e tuhu?

¹¹ Sanga siteh maka piga-piga nubuat bas Pustaka enggo terjadi, banci kita tuhu-tuhu tek man Jahwe bage pe kerina petunjuk si berekenNa. Selain si e, nubuat bas Pustaka kerna masa depan pe banci nampati kita gelah tetap positip perukurenta, la soal tentangen kai si sangana siadapi. Mari sibahas dua nubuat si icatat Daniel si sangana terjadi gundari. Alu ngangkai nubuat e, banci siban keputusen si pentar.

12. Kai si igambarken nahe patung si iban arah ‘besi si icampur ras taneh liat e’? (Daniel 2:41-43)

¹² Baca Daniel 2:41-43. Bas nipi si ijelasken Daniel man Raja Nebukadnesar, idah raja maka nahe arah patung e iban arah ‘besi si icampur ras taneh liat.’ Adi sibandingken nubuat e ras nubuat-nubuat si deban si lit bas buku Daniel ras Ketangkasen, banci sisimpulken maka nahe e nggambarken kuasa doni si gundari eme Inggris-Amerika. Ikataken Daniel maka kuasa doni e “deba megegeh, deba la megegeh.” Engkai maka deba la megegeh? Perban rakyat bas pemerentahen e, si igambarken taneh liat, erban pemerentahen e la banci ertindak alu gegeh kalak e si bali bagi besi. b

13. Kebenaren penting kai saja si enggo sipelajari arah nubuat e?

¹³ Lit piga-piga kebenaren penting si banci sipelajari arah penjelasen Daniel kerna patung Nebukadnesar, terlebih bagin nahena. Si pertama, Inggris-Amerika enggo terbukti jadi kuasa doni si megegeh. Contohna, mbelin kel pengaruh kalak e bas kemenangen kalak e i Perang Doni I ras Perang Doni II. Tapi, kuasa doni e reh lemahna janah terus pagi reh lemahna perban perpecahen si iban rakyatna. Si peduaken, Inggris-Amerika pagi jadi kuasa doni terakhir si merentah sope kernepken Dibata kerina pemerentahen manusia. Amin pe mon-mon ilawan bangsa-bangsa si deban Inggris-Amerika, labo banci italuken kalak e ia. Banci sikataken bage perban “batu” si nggambarken Kerajan Dibata pagi si ngancurken bagin nahe arah patung e, si nggambarken Inggris-Amerika.​—Dan. 2:34, 35, 44, 45.

14. Uga nubuat kerna nahe patung e banci nampati kita erban keputusen si pentar?

¹⁴ Tek nge kam maka nubuat Daniel kerna nahe patung si iban arah besi ras taneh liat e tuhu? Adi tek, si e pasti lit pengaruhna man carandu ndalani geluhndu. Pasti lanai ayakindu kebayaken bas doni si ntisik nari ikernepken enda. (Luk. 12:16-21; 1 Joh. 2:15-17) Perban enggo angkaindu nubuat e, itehndu ka uga pentingna tugasta guna erberita ras ngajar. (Mat. 6:33; 28:18-20) Kenca sibahas nubuat e, cuba ukuri penungkunen enda, ‘Teridah nge arah keputusen-keputusenku maka tek aku kentisik nari ikernepken Kerajan Dibata kerina pemerentahen manusia?’

15. Ise nge “raja utara” ras “raja selatan” gundari? (Daniel 11:40)

¹⁵ Baca Daniel 11:40. Bas Daniel pasal 11, ikataken kerna dua raja ntah pe pemerentahen, si ersaing guna jadi penguasa doni. Adi sibandingken nubuat e ras nubuat-nubuat si deban bas Pustaka, banci siteh maka “raja utara” eme Rusia ras si ndukungsa, janah “raja selatan” eme Inggris-Amerika. c

16. Tentangen kai si iadapi umat Dibata si tading bas daerah “raja utara”?

¹⁶ Umat Dibata si tading bas daerah  “raja utara” sangana ngadapi penganiayan. Piga-piga Saksi Jahwe ipekpeki ras ipenjaraken perban kiniteken kalak e. Tapi perbahanen “raja utara” e erban reh paguhna kiniteken turang seninata. Engkai? Perban teh kalak e maka penganiayan man umat Dibata eme bukti maka tuhu si ikataken nubuat Daniel. d (Dan. 11:41) Pemeteh e pe banci nampati kita gelah la bene arapenta janah tetap setia man Jahwe.

17. Tentangen kai si adapi umat Dibata si lit bas pemerentahen “raja selatan”?

¹⁷ Mbarenda, “raja selatan” pe nyerang umat Jahwe. Contohna bas Perang Doni I ras Perang Doni II, enterem turang seninata ipenjaraken perban tetap netral janah piga-piga anak Saksi ipedarat arah sekolah perban alasen si seri. Tapi piga-piga tahun enda, kesetian  umat Jahwe si tading bas daerah “raja selatan” iuji alu cara-cara si deban. Contohna, sanga pemilihen umum, kalak Kristen banci saja tergoda ndukung salah sada partai politik ntah pe kalak si icalonken jadi peminpin. Amin pe la ipilihna langsung salah sada partai politik e, tapi banci saja bas pusuh ras perukurenna erpihak ia man salah sada partai politik e. Emaka, gelah tuhu-tuhu kita netral, arus sipastiken la sidukung pihak si apai pe, termasuk bas pusuh ras perukurenta!​—Joh. 15:18, 19; 18:36.

18. Uga tanggapenta sanga siidah “raja utara” ras “raja selatan” siserang-serangen? (Nen ka gambar.)

¹⁸ Kalak si la tek man nubuat Pustaka banci saja kuatir kel ia sanga idahna “raja selatan” ras “raja utara” “siserang-serangen.” (Dan. 11:40) Duana raja e mbue senjata nuklirna si banci engkernepken kegeluhen bas doni enda. Tapi siteh maka labo pediat Jahwe si e terjadi. (Jes. 45:18) Sanga siidah “raja utara” ras “raja selatan” siserang-serangen, la kita kuatir. Tapi, e erban reh paguhna kinitekenta, perban si e mbuktiken maka kedungen doni si jahat enda enggo ndeher.

19. Kai si perlu siinget kerna nubuat bas Pustaka?

¹⁹ La siteh uga pagi piga-piga nubuat bas Pustaka terjadi. Nabi Daniel pe labo tuhu-tuhu angkana kerina nubuat si itulisna. (Dan. 12:8, 9) Tapi ingetlah, si e labo ertina nubuat-nubuat e la pagi terjadi. Banci kita tuhu-tuhu tek maka ipebetehken Jahwe pagi man banta kai si perlu siteh bas waktu si tepat, bali bagi si ilakokenNa mbarenda.​—Amos 3:7.

20. Nubuat kai saja si kentisik nari siidah terjadi, janah kai si perlu terus silakoken?

²⁰ Lanai ndekah lit me pengumumen “dame ras aman.” (1 Tes. 5:3) Kenca si e, iserang pemerentahen doni enda pagi agama palsu janah hancurkenna. (Ket. 17:16, 17) Dung e, iserang kalak e umat Dibata. (Esek. 38:18, 19) Bas pendungi kerina kejadin e, terjadi me pagi perang Harmagedon. (Ket. 16:14, 16) Banci kita tek maka kentisik nari kerina e pasti terjadi. Emaka teruslah sicidahken pengerganta man Jahwe Bapakta si perkeleng si lit i surga, alu mperdiateken nubuat bas Pustaka ras nampati kalak si deban ngelakoken si seri.