1. Engkai maka pejabat bas Babilon terkesan ngidah Nabi Daniel?

 SANGA nguda denga, Nabi Daniel itaban ku Babilon, sada negri si ndauh kel arah kutana. Tapi, amin pe ia nguda denga, pejabat-pejabat bas Babilon terkesan ngidah ia. Idah kalak e maka Daniel “la lit cacatna, ganteng” janah ia keturunen bangsawan. (1 Sam. 16:7) E me sebapna maka ilatih kalak e ia jadi pejabat istana.​—Dan. 1:3, 4, 6.

2. Uga perasan Jahwe ngidah Daniel? (Esekiel 14:14)

² Keleng ate Jahwe Daniel labo perban penampilenna ras jabatenna, tapi perban sipat-sipatna si mehuli. Selain si e, ianggap Jahwe ia bagi Nuah ras Jop. Padahal paksa si e umur Daniel kira-kira 20 tahun denga, tapi Nuah ras Jop enggo ndekah kel ngelayani Jahwe alu setia. (Kej. 5:32; 6:9, 10; Jop 42:16, 17; baca Esekiel 14:14.) Luar biasa kel kegeluhen Daniel janah ngasa ia metua lalap keleng ate Jahwe ia.​—Dan. 10:11, 19.

3. Kai kari sibahas bas artikel enda?

³ Bas artikel enda, sibahas kari dua sipat Daniel si erban keleng ate Jahwe ia. Si pertama, sibahas kari uga Daniel ncidahken sipat-sipat e. Kenca si e, sibahas kari uga ia mpebelin sipat-sipat e. Bas pendungi artikel enda, sibahas kari uga carata ngusih ia. Amin pe artikel enda iban man anak muda, tapi kerina kita banci erlajar arah usihen Daniel.

4. Uga Daniel ncidahken sipat si perpang?

⁴ Kalak si perpang banci saja pernah mbiar, tapi la ipediatna si e erban ia ngadi ngelakoken kai si benar.  Daniel sekalak anak muda si perpang kel. Cuba perdiateken dua buktina. Tangtangna, banci saja terjadi kira-kira dua tahun kenca Jerusalem ihancurken pasuken Babilon. Paksa si e, Raja Nebukadnesar ndatken nipi kerna sada patung si seh kel galangna, janah e erban ia mbiar. Ikatakenna maka ibunuhna kari kerina kalak si pentar, termasuk Daniel, adi la teh kalak e kai nipina ras ertina. (Dan. 2:3-5) Emaka, arus meter Daniel ertindak perban enterem kalak si terancam geluhna. Dungna “ngadap Daniel man raja janah mindo ia gelah ibereken kesempaten guna njelasken erti nipi raja.” (Dan. 2:16) Perlu kiniteken ras sipat si perpang guna ngelakoken si e, perban la lit cataten si ngataken maka pernah iertiken Daniel sada nipi. Dung e, ipindona man temanna Saderah, Mesah, ras Abednego gelah “ertoto kalak e man Dibata si erkuasa nandangi surga, guna mindo perkuah ateNa, gelah pebetehkenNa rahasia nipi e.” (Dan. 2:18) Ijawap Jahwe toto kalak e. Alu penampat Dibata, banci ijelasken Daniel erti nipi Nebukadnesar. Dungna, Daniel ras teman-temanna banci selamat.

5. Kejadin kai ka si nguji sipat Daniel si perpang?

⁵ La ndekah kenca si e, sipat Daniel si perpang iuji ka. Dat Nebukadnesar nipi si deban si erban ia mbiar. Bas nipi e, idahna sada batang kayu si seh kel galangna. Pang Daniel njelasken erti nipi e man Nebukadnesar, termasuk ngataken man bana maka adon pagi ia janah lanai jadi raja piga-piga waktu dekahna. (Dan. 4:25) Si e seh kel bahayana, perban banci saja ianggap Nebukadnesar ia mberontak ngelawan raja janah e banci erban ia ibunuh. Amin pe bage, tetap Daniel pang mpeseh erti nipi e.

6. Banci saja kai si nampati Daniel jadi kalak si perpang?

⁶ Kai si nampati Daniel jadi kalak si perpang bas segedang geluhna? Sanga ia nguda denga, pasti erlajar ia arah orang tuana. Orang tuana pasti patuh man petunjuk si ibere Jahwe man kerina orang tua bas Israel, janah ajarken kalak e undang-undang Dibata man anakna. (Ul. 6:6-9) Daniel labo terjeng meteh ajaren  dasar arah undang-undang e, misalna kerna Sepuluh Perentah Dibata. Tapi itehna ka kai si banci ras si la banci ipan kalak Israel. b (Im. 11:4-8; Dan. 1:8, 11-13) Ipelajarina ka sejarah umat Dibata janah itehna kai si terjadi man kalak e sanga la ikutken kalak e patoken Jahwe. (Dan. 9:10, 11) Selain si e, erbage kejadin bas geluhna erban ia tek maka Jahwe ras malekat-malekatNa si megegeh nampati ia.​—Dan. 2:19-24; 10:12, 18, 19.

7. Kai deba nari si nampati Daniel jadi kalak si perpang? (Nen ka gambar.)

⁷ Ipelajari Daniel ka tulisen arah nabi-nabi Dibata termasuk nubuat-nubuat Jeremia. Dungna, banci angkaina maka kalak Jahudi si itaban ku Babilon nandangi ibebasken. (Dan. 9:2) Perban idahna nubuat Pustaka terjadi, reh tekna Daniel man Jahwe janah e erban ia jadi kalak si perpang kel. (Bandingken Roma 8:31, 32, 37-39.) Si pentingna, rusur Daniel ertoto man Bapakna si i surga. (Dan. 6:10) Akuina dosana janah turikenna perasanna man Jahwe. Rusur ka ia ertoto guna mindo penampat. (Dan. 9:4, 5, 19) Daniel e manusia biasa, bali bagi kita. Labo ia kalak si perpang mulai lahir nari. Tapi, usahakenna jadi kalak si perpang alu mpelajari Kata Dibata, ertoto, ras ngandalken Jahwe.

8. Uga carana gelah banci kita jadi kalak si perpang?

⁸ Kai si perlu silakoken gelah banci jadi kalak si perpang? Banci saja orang tuata kalak si perpang janah merhat kalak e gelah kita pe perpang. Tapi, sipat si perpang labo banci iwarisken, perlu siusahaken guna ndatkenca. Si e banci ipeseri bagi mpelajari sada keahlin. Salah sada carata mpelajari sada keahlin eme alu mperdiateken kai si ilakoken kalak si ngajari kita janah siusih ia. Bage ka pe, gelah banci kita perpang, perlu siperdiateken kai si ilakoken kalak si perpang janah siusih kalak e. Emaka, kai si enggo sipelajari arah Daniel? Bali bagi Daniel, perlu tuhu-tuhu siangkai Kata Dibata. Perlu ka kita rusur ngerana man Jahwe gelah banci kita rembak ras Ia. Selain si e, perlu ka siandalken Jahwe janah tek kita maka lalap nge sampatiNa kita. Alu bage, sanga kinitekenta iuji, pang kita ngadapisa.

9. Kai gunana adi kita perpang?

⁹ Melala gunana adi kita jadi kalak si perpang. Cuba perdiateken pengalamen Ben arah Jerman. Bas sekolahna, kerina kalak tek man evolusi janah anggap kalak e cerita kerna penciptan si lit bas Pustaka e dongeng. Bas sada wari, ibereken kesempaten man Ben guna njelasken bas kelasna engkai maka ia tek kegeluhen e iciptaken Dibata. Pang ia njelasken kinitekenna. Kai hasilna? Nina Ben, “Tutus ate guruku megikenca. Ibuatna bahan si kupake guna ndukung penjelasenku janah bagikenna man tiap murid bas kelas.” Uga tanggapen teman-teman sekelas Ben? Nina Ben, “Enterem arah kalak e nggit megiken aku, janah ikataken kalak e maka salut ia ngidah aku.” Pengalamen Ben e ncidahken maka kalak si perpang biasana iergai kalak. Sipat si perpang pe banci  ka ngiahken kalak si bujur erlajar kerna Jahwe. Jelas me, mbue alasenta guna jadi kalak si perpang.

10. Kai kin kesetian e?

¹⁰ Bas Pustaka, kata Heber guna “kesetian,” ntah pe “kekelengen si setia” maksudna eme kekelengen si mbages si rusur ipake guna nggambarken kekelengen Dibata man umatNa. Kata e pe ipake guna nggambarken kekelengen si lit bas umat Dibata. (2 Sam. 9:6, 7) Selain si e, reh dekahna kesetianta e banci reh paguhna. Cuba sinen uga pengalamen Daniel mbuktiken si e.

11. Uga kesetian Daniel iuji sanga ia enggo metua? (Nen gambar sampul.)

¹¹ Bas segedang geluh Daniel, kesetianna man Jahwe rusur iuji. Salah sada ujin si mberatna terjadi sanga umurna 90-en. Paksa si e, Babilon enggo italuken kalak Media ras Persia janah Raja Darius si erkuasa. Pejabat-pejabat istana rate segat man Daniel janah la ergai kalak e Dibata si sembahna. Emaka, iban kalak e rencana jahat guna erban Daniel ihukum mate. Ipindo kalak e man raja gelah ibanna undang-undang si nguji Daniel guna meteh pangen kapna setia man Dibatana ntah man raja. Adi ngadi Daniel ertoto man Jahwe 30 wari dekahna, terbukti me maka pangen akapna setia man raja janah teridah maka ia la beda ras kalak si deban. Tapi, ipilih Daniel tetap setia man Jahwe, emaka ibenterken ia ku lubang singa. Tapi, pasu-pasu Jahwe kesetian Daniel janah lindungiNa ia arah singa-singa e. (Dan. 6:12-15, 20-22) Uga kita banci tetap setia man Jahwe, bali bagi Daniel?

12. Engkai maka Daniel banci tetap setia man Jahwe sanga iuji?

¹² Bagi si ikataken ndai, gelah banci kita setia man Jahwe, arus tuhu-tuhu keleng ateta Ia. Pasti rusur ukuri Daniel sipat-sipat Jahwe ras uga Jahwe ncidahken sipat-sipatNa e. (Dan. 9:4) Ingetna ras ergaina ka kerina si mehuli si enggo lakoken Jahwe man bana bage pe man umat Jahwe si debanna.​—Dan. 2:20-23; 9:15, 16.

13. (a) Ujin kai si iadapi anak muda Saksi Jahwe? Bereken contohna. (Nen ka gambar.) (b) Bagi si lit bas video, uga kita banci mereken jawapen sanga lit si nungkun nggit nge Saksi-Saksi Jahwe ndukung hubungen sesama jenis?

 ¹³ Bali bagi Daniel, enterem anak muda Saksi Jahwe arus ngadapi kalak si la ngergai Jahwe ras patokenNa. Kalak si bage banci saja segat atena ise pe si pendapat ntah pe kinitekenna la seri ras ia. Piga-piga anak muda Saksi Jahwe itokoh-tokohi gelah lanai setia man Jahwe. Contohna, cuba perdiateken tentangen si iadapi Gery, c si tading i Australia. Sanga ia SMA, isungkun guruna kerina murid bas kelas, adi lit teman kalak e si ngataken maka ngena atena sesama jenis, nggit nge kalak e ndukung ia? Kenca si e, isuruh guru e kerina si nggit ndukung gelah cinder bas sada ingan, tapi si la nggit ndukung, cinder bas ingan si debanna. Bagenda nina Gery, “Kerina murid cinder bas kelompok si ndukung e, kecuali aku ras sekalak Saksi si deban.” Tentangen si adapi Gery kenca si e tuhu-tuhu nguji kesetianna man Jahwe. Bagenda nina, “Seh ngasa dung kelas e, hampir sada jam dekahna, teman-teman ras guru kami nokoh-nokohi kami janah hina kalak e kami. Kuusahaken asa ngasupku mbela kinitekenku alu tenang ras mereken penjelasen si masuk akal, tapi la kalak e nggit megiken aku.” Uga perasan Gery sanga ngadapi ujin e? Nina, “Memang labo kuakap meriah sanga ihina, tapi meriah kel ukurku perban banci kubela kinitekenku ras tetap setia man Jahwe.” d

14. Uga carana gelah banci kita tetap setia man Jahwe sanga iuji?

¹⁴ Bali bagi Daniel, banci kita tetap setia man Jahwe sanga iuji adi keleng kel ateta Jahwe. Gelah banci reh kelengna ateta Jahwe, perlu sipelajari sipat-sipatNa. Contohna, banci kita erlajar arah ciptanNa. (Rom. 1:20) Anak muda, adi merhat kena mpebelin kekelengen ras pengergan kena man Jahwe, nenlah artikel-artikel singkat ntah pe video arah seri “Apakah Ini Dirancang?” Banci ka baca kena brosur Benarkah Kehidupan Diciptakan? ras Asal Mula Kehidupan—Lima Pertanyaan yang Patut Direnungkan. Bagenda nina Esther sekalak turang senina arah Denmark kerna brosur-brosur e, “Penjelasenna mejile kel. Labo ikataken bas brosur e kai si arus siteki. Si ibereken eme fakta-faktana. Alu bage, kita sendiri si erban kesimpulen.” Ben si enggo ituriken ndai ngataken, “Terpegegehi kel kinitekenku perban bahan e. Reh tekna aku maka kegeluhen memang iciptaken Dibata.” Kenca mpelajari bahan e, mbelin kemungkinenna setuju kena nandangi kai si ikataken Pustaka enda: “O Jahwe Dibata kami si erkuasa, Kam si metunggung ngaloken kemulian, ras kehamaten. Sebap Kam si nciptaken kerina si lit.”​—Ket. 4:11. e

15. Kai deba nari si banci silakoken guna mpepaguh hubungenta ras Jahwe?

¹⁵ Banci ka reh kelengna ateta Jahwe adi sipelajari alu tutus kegeluhen AnakNa eme Jesus. Bage me si ilakoken Samira, sekalak turang senina si nguda denga si tading i Jerman. Bagenda nina,  “Arah Jesus, banci reh ulina kutandai Jahwe.” Sanga kitik denga, mesera kap Samira ngangkai maka lit perasan Jahwe. Tapi, banci angkaina perasan Jesus. Bagenda nina, “Meriah kuakap mpelajari kerna Jesus perban ia mekacar janah keleng atena anak-anak.” Reh buena si pelajari Samira kerna Jesus, reh paguhna hubungenna ras Jahwe. Engkai? Bagenda nina, “Alu manjar-anjar kuangka maka usih Jesus Bapakna alu sempurna, mirip kel kalak e. Sadar aku maka e me salah sada alasenna iutus Jahwe Jesus ku doni. Ate Jahwe tuhu-tuhu itandai manusia min Ia.” (Joh. 14:9) Adi merhat kena mpepaguh hubungen kena ras Jahwe, banlah waktu kena guna mpelajari terbuen kerna Jesus. Alu bage, reh belinna me kekelengen ras kesetian kena man Jahwe.

16. Kai gunana adi kita jadi kalak si setia? (Masmur 18:25; Miha 6:8)

¹⁶ Adi setia kita man kalak si deban, biasana lit teman kompakta si setia man banta. (Rut 1:14-17) Selain si e, kalak si setia man Jahwe banci tenang ras dame akapna. Engkai? Perban enggo erjanji Jahwe maka setia Ia man kalak si setia man baNa. (Baca Masmur 18:25; Miha 6:8.) Cuba bayangken, Pencipta Si Madakuasa nggit rembak ras kita! Selain si e, la lit ujin ntah pe musuh si banci nirangken kita arah Jahwe. Kematen pe la banci nirangken kita arah kekelengenNa. (Dan. 12:13; Luk. 20:37, 38; Rom. 8:38, 39) Jelas me tuhu-tuhu perlu siusih Daniel janah tetap setia man Jahwe!

17-18. Kai deba nari si banci sipelajari arah Daniel?

¹⁷ Bas artikel enda, enggo sipelajari dua sipat Daniel. Tapi mbue denga si banci sipelajari arah ia. Contohna, ibere Jahwe Daniel piga-piga pengenehenen ras nipi. Ibere Jahwe ia kengasupen guna ngertiken piga-piga nubuat. Mbue arah nubuat e enggo terjadi. Selain si e, nubuat-nubuat si debanna njelasken kejadin bas masa depan si lit pengaruhna man kerina kalak i doni.

¹⁸ Bas artikel seterusna, sipelajari kari dua nubuat si itulis Daniel. Nubuat-nubuat e banci nampati kita la soal si enggo metua ntah pe si nguda denga gelah banci erban keputusen si pentar mulai gundari nari. Si e pe banci nampati kita reh pangna ras tetap setia. Alu bage, banci siadapi ujin si nandangi reh.