Bas artikel e, sipelajari maka situhuna sada ngenca persoalen si pentingna man kerina malekat ras manusia eme mpebadia gelar Jahwe. Persoalen kerna hak Jahwe guna merentah ras kerna kesetian manusia man Dibata eme bagin arah persoalen si penting e.

Engkai maka gundari rusur sikataken maka persoalen si pentingna eme mpebadia gelar Jahwe? Mari sibahas telu alasenna.

Si pertama, ceda ban Setan gelar Jahwe bas Taman Eden. Penungkunen Setan si licik man Hawa tempa-tempa ncidahken maka itahan Jahwe kai si mehuli arah ciptanNa janah ibanNa aturen si la masuk akal. Dung e, iputarbalikken Setan kata-kata Jahwe, janah tempa-tempa ikatakenna Jahwe perbual. Alu bage, ceda banna gelar Jahwe si badia. Dungna, ia jadi “Iblis,” si ertina “tukang pitnah.” (Joh. 8:44) Tek Hawa man bual Setan e. Akibatna, la ia patuh man Dibata janah mberontak ngelawan pemerentahen Dibata. (Kej. 3:1-6) Seh asa gundari lalap icedai Setan gelar Jahwe si badia alu mpebelang bual kerna Ia. Kalak si tek man bual Setan, mbelin kemungkinenna la patuh man Jahwe. Emaka, kai si ilakoken Setan man gelar Jahwe si badia eme kejahaten si mbelinna akap umat Dibata. E me penyebap utama engkai maka terjadi kerina kesusahen ras kejahaten i doni enda.

Si peduaken, guna kepentingen kerina ciptan Jahwe, ibersihkenNa ateNa gelarNa arah kerina tuduhen. E me si pentingna man Jahwe. Bagenda nina, “Pasti Kupebadia gelarKu si mbelin.” (Esek. 36:23) Selain si e, icidahken Jesus alu jelas kai si pentingna si arus itotoken kerina umat Jahwe si setia, sanga nina, “Ipebadia min gelarNdu.” (Mat. 6:9) Bas Pustaka pe mulih-ulih ituriken kerna uga pentingna mpebadia gelar Jahwe. Cuba perdiateken piga-piga contoh enda: “Muliakenlah Jahwe perban gelarNa.” (1 Kro. 16:29; Ms. 96:8) “Endekenlah pujin man gelarNa si mulia.” (Ms. 66:2) “Kumuliaken gelarNdu seh rasa lalap.” (Ms. 86:12) Piga-piga kali ngenca Jahwe ngerana langsung arah surga janah salah sada terjadi i rumah pertoton bas Jerusalem. Paksa si e, ikataken Jesus, “O Bapak, muliakenlah gelarNdu.” Nina Jahwe ngaloisa, “Enggo Kumuliaken janah terus denga Kumuliaken.”​—Joh. 12:28. a

Si peteluken, peraten Jahwe lalap lit hubungenna ras gelarNa. Kenca ujin si terakhir, si terjadi kenca dung Pemerentahen Seribu Tahun Kristus, kai pagi si terjadi? Uga pagi perukuren kerina malekat ras manusia nandangi gelar Jahwe paksa si e? Guna meteh jawapenna, cuba siinget mulihi dua persoalen  si lit hubungenna ras mpebadia gelar Jahwe. E me persoalen kerna kesetian manusia ras kerna hak Jahwe guna merentah. Iuji denga nge pagi kesetian manusia si enggo terbukti setia? Lang. Paksa si e, kalak e enggo jadi sempurna janah tuhu-tuhu enggo teruji. Nggeluh pagi kalak e seh rasa lalap. Ipermasalahken denga nge pagi hak Jahwe guna merentah? Lang. Paksa si e, kerina si lit i surga ras i doni enggo ersada. Iakui kalak e maka Jahwe me si lit hakNa guna merentah janah caraNa merentah me si mehulina. Tapi, uga kerna gelar Jahwe?

Paksa si e, gelar Jahwe tuhu-tuhu pagi ipebadia ntah pe bersih arah kerina tuduhen. Tapi, gelar Jahwe terus pagi jadi si pentingna man umatNa i surga ras i doni. Engkai? Perban lalap pagi idah kalak e kai si luar biasa si ilakoken Jahwe. Bayangken, alu meteruk ukur ibereken Jesus pagi kerina kekuasan man Jahwe. Alu bage, Dibata “jadi Penguasa kerinana.” (1 Kor. 15:28) Kenca si e, kerina manusia si lit i doni banci nggejapken “kebebasen si mulia bagi si nanami anak-anak Dibata.” (Rom. 8:21) Selain si e, isehken Jahwe pagi sura-suraNa guna mpersada kerina umatNa si lit i surga ras i doni jadi sada keluarga.​—Ep. 1:10.

Kenca terjadi pagi si e kerina, uga nge perasan keluarga Jahwe si lit i surga ras i doni? Pasti reh merhatna pagi kita guna terus muji gelar Jahwe si mulia. Alu penegu-negu kesah si badia, itulis Daud bagenda bas buku Masmur: “Terpujilah Dibata Jahwe . . . Terpujilah gelarNa si mulia seh rasa lalap.” (Ms. 72:18, 19) Payo, lit pagi lalap alasenta guna muji Dibatata si luar biasa seh rasa lalap.

Gelar Jahwe nggambarken kerina si lit bas Ia. Si utamana, gelarNa erban kita nginget kekelengenNa. (1 Joh. 4:8) Lalap pagi siinget maka perban kekelengen iciptaken Jahwe kita, iberekenNa korban tebusen man banta, janah idalankenNa pemerentahenNa alu cara si benar. Tapi labo e saja, lalap pagi sigejapken kekelengenNa man banta. Alu bage, teriahken kita guna terus reh deherna man Bapakta si i surga ras ngendeken pujin man gelarNa si mulia seh rasa lalap.​—Ms. 73:28.