1. Kai ertina ertobat?

 SANGA silakoken kesalahen, arus kita ertobat. Menurut Pustaka, kalak si ertobat eme kalak si ubahna cara rukurna kerna kesalahenna, ngadi ia ngelakoken kesalahen e, janah ertekad ia lanai ngulihi kesalahen e.—Nen Kamus Pustaka si Badia, “Ertobat.”

2. Engkai maka kerina kita perlu erlajar kerna pertobaten? (Nehemia 8:​9-11)

² Kerina kita perlu erlajar kerna pertobaten. Engkai? Perban tiap wari kita ngelakoken dosa. Kita keturunen Adam ras Hawa, emaka kerina kita erdosa janah dungna mate. (Rom. 3:23; 5:12) La lit sada pe arah kita si la erdosa. Kalak si mbelin kinitekenna pe bagi Rasul Paulus, arus erjuang ngelawan dosa. (Rom. 7:​21-24) Tapi banci denga kita ermeriah ukur amin pe kita erdosa, perban Jahwe perkuah kel janah ateNa kita ermeriah ukur. Cuba perdiateken pengalamen kalak Jahudi bas jaman Nehemia. (Baca Nehemia 8:​9-11.) Ate Jahwe ula min lalap kalak e sedih perban dosana si mbarenda. Ate Jahwe ermeriah ukur min kalak e ngelayani Ia. Iteh Jahwe maka adi sekalak jelma ertobat, banci ia ermeriah ukur. Emaka ajariNa kita kerna pertobaten. Adi ertobat kita, tek kita maka pasti kita iampuni Bapakta si perkuah.

3. Kai kari sibahas bas artikel enda?

³ Mari sibahas terbuen kerna pertobaten. Bas artikel enda sibahas kari telu hal: (1) kai si iajarken Jahwe man kalak Israel kerna pertobaten, (2) kai si ilakoken Jahwe man kalak si erdosa gelah kalak e ertobat, (3) kai si ipelajari pengikut Jesus kerna pertobaten.

 SI IAJARKEN JAHWE MAN KALAK ISRAEL KERNA PERTOBATEN

4. Kai si ajarken Jahwe man kalak Israel kerna pertobaten?

⁴ Sanga iban Jahwe kalak Israel jadi sada bangsa, ibanNa perjanjin ras kalak e. Adi patuh kalak e man undang-undangNa, ilindungi Jahwe kalak e janah ipasu-pasuNa. Ipetetap Jahwe ukur kalak e, nina, ‘Perentah-perentah si Kupeseh bas wari enda labo meserasa ngangkaisa ras ndalankenca.’ (Ul. 30:​11, 16) Tapi adi mberontak kalak e, contohna isembahna berhala, la kalak e ipasu-pasu janah rate mesui me kalak e. Amin pe bage, banci denga kalak e ertobat. Banci ‘mulihken kalak e ku Jahwe Dibatana jenari begiken kalak e kataNa.’ (Ul. 30:​1-3, 17-20) Adi bage ban kalak e, nggit Jahwe ndeher ras kalak e janah ipasu-pasuNa ka kalak e.

5. Kai buktina sabar Jahwe man umatNa? (2 Raja-Raja 17:​13, 14)

⁵ Umat si ipilih Jahwe mulih-ulih mberontak man Jahwe. Isembah kalak e berhala janah lakoken kalak e perbahanen jahat si debanna. Akibatna, rate mesui kalak e. Amin pe bage, labo ilupaken Jahwe kalak e. Mulih-ulih isuruhNa nabi-nabiNa ngiahken kalak e ertobat janah mulihken man baNa.—Baca 2 Raja-Raja 17:​13, 14.

6. Uga Jahwe nggunaken nabi-nabiNa ngajari umatNa maka penting kel ertobat? (Nen ka gambar.)

⁶ Rusur igunaken Jahwe nabi-nabiNa ngingetken ras mpersingeti umatNa. Contohna, ikatakenNa arah Jeremia, “O Israel si mberontak, mulihlah, . . . Labo pagi Aku merawa man bandu sanga Kunen ku teruh, sebap Aku setia . . . Labo pagi lalap Aku nembeh man bandu. Tapi akuilah salahndu, sebap enggo mberontak kam man Jahwe.” (Jer. 3:​12, 13) Arah Joel, nina Jahwe, “Mulihlah man bangKu alu bulat ukur.” (Joel 2:​12, 13) IkatakenNa ka arah Jesaya, “Bersihken diri kena, pedauhlah kejahaten kena  arah lebe-lebeKu nari, ula nai lakoken si jahat.” (Jes. 1:​16-19) Janah erkelangken Esekiel, nungkun Jahwe, “Akapndu kin meriah Kuakap ngidah kalak jahat mate? . . . La kin riahen nge Kuakap ngidah kalak jahat robah janah tetap ia nggeluh? Labo meriah ukurKu ngidah ise pe si mate. Emaka robahlah gelah tetap kena nggeluh.” (Esek. 18:​23, 32) Jelas me, meriah ukur Jahwe adi sekalak jelma ertobat perban ateNa nggeluh min kalak e seh rasa lalap. Emaka labo kem saja Jahwe nimai kalak si ersalah e ertobat, tapi tawarkenNa penampat man kalak e. Mari sibahas contoh si deban kerna si enda.

7. Arah contoh Nabi Hosea ras diberuna, kai si ajarken Jahwe man umatNa?

⁷ Perdiateken kai si iajarken Jahwe man umatNa arah contoh nyata eme Nabi Hosea ras diberuna si gelarna Gomer. Erlua-lua Gomer ras dilaki-dilaki si deban janah tadingkenna Hosea. Kai si ilakoken Jahwe? Perban iteh Jahwe isi pusuh manusia, nina man Hosea, “Kelengi ka mulihi diberundu si erlua-lua e si ngena ate dilaki si deban, bagi Jahwe engkelengi Israel si nembah dibata-dibata si deban.” (Hos. 3:1; Kua. 16:2) Paksa si e diberu Hosea ngelakoken dosa si serius denga, tapi ipindo Jahwe gelah Hosea si leben ngampuni ia ras ngaloken ia mulihi jadi diberuna. a Bage ka pe, labo ilupaken Jahwe umatNa si keras kepala e. Amin pe kalak e ngelakoken dosa serius denga, tetap keleng ate Jahwe kalak e. Lalap isuruh Jahwe nabi-nabiNa guna nampati kalak e ertobat ras ngubah kegeluhenna. Contoh enda ncidahken maka Jahwe kap “si mereksa pusuh” sekalak jelma. Merhat Jahwe nampati ia ertobat amin pe ilakokenna denga dosa si serius. (Kua. 17:3) Uga cara Jahwe ngelakokenca?

SI ILAKOKEN JAHWE GELAH KALAK SI ERDOSA ERTOBAT

8. Uga Jahwe rusaha nampati Kain gelah ertobat? (Kejadin 4:​3-7) (Nen ka gambar.)

⁸ Kain eme anak pertama arah Adam ras Hawa. Enggo warisina dosa arah orang tuana. Bas Pustaka pe ikataken kerna Kain maka “perbahanenna enggo salah.” (1 Joh. 3:12) Banci saja perban si e me ‘la ngena ate Jahwe ngidah Kain ras persembahenna.’ Tapi Kain la berubah. Sebalikna, ‘merawa kel ia janah nembeh atena.’ (Baca Kejadin 4:​3-7.) Kai nge si ilakoken Jahwe? Alu mehuli ngerana Ia man Kain. Ibere Jahwe arapen man Kain janah ipersingetiNa ia gelah hati-hati nandangi dosa. Tapi sayang kel, la nggit Kain megiken Jahwe. La ergaina usaha Jahwe nampati ia ertobat. Amin pe la begiken Kain kata-kata Jahwe, si e labo erban Jahwe lanai nggit nampati kalak si deban guna ertobat.

9. Kai si ilakoken Jahwe guna nampati Daud ertobat?

⁹ Keleng kel ate Jahwe man Raja Daud. IkatakenNa maka Daud me “kalak si erban meriah ukurKu.” (Perb. 13:22) Tapi ilakoken Daud piga-piga dosa si serius termasuk erlua-lua ras munuh. Menurut Undang-Undang Musa, situhuna Daud patut ihukum mate. (Im. 20:10; Bil. 35:31) Amin pe bage, alu perkeleng isampati  Jahwe Daud guna ertobat. b IutusNa Nabi Natan njumpai Daud. Padahal paksa si e, lenga bo icidahken Daud maka ertobat atena. Igunaken Natan perumpaman si kena kel ku pusuh Daud. Sadar me Daud kerna kesalahenna e janah teriahken ia guna ertobat. (2 Sam. 12:​1-14) Itulis Daud masmur si ncidahken maka tuhu-tuhu ia ertobat. (Ms. 51, superskripsi) Enterem kalak si erdosa pe terapuli janah tersuruh ukurna ertobat sanga bacana masmur e. Pasti ngata bujur kel kita perban alu perkeleng isampati Jahwe gelah Daud ertobat.

10. Uga nge perasanndu perban tehndu Jahwe sabar janah nggit ngampuni?

¹⁰ Iteh Jahwe maka kerina kita erdosa janah segat ateNa kerina jenis dosa. (Ms. 5:​4, 5) Tapi perban keleng ateNa kita, nggit Ia nampati kita ngelawan dosa. Lalap usahakenNa nampati kalak si erdosa gelah ertobat janah rembak ras Ia, amin pe banci saja mbelin kel dosa kalak e. Si e pasti tuhu-tuhu ngapuli kita. Adi siukuri kesabaren Jahwe ras pengampunenNa, tersuruh ukurta tetap setia man baNa janah mis ertobat sanga silakoken dosa. Gundari, mari sibahas kai si ipelajari pengikut Jesus kerna pertobaten.

SI IPELAJARI PENGIKUT JESUS KERNA PERTOBATEN

11-12. Kai si ajarken Jesus kerna Bapakna si nggit ngampuni? (Nen gambar.)

¹¹ Bas abad pertama, reh me Mesias si inubuatken e. Bagi si enggo ituriken bas artikel sebelumna, igunaken Jahwe me Johanes Peridiken ras Jesus Kristus guna ngajarken kerna pentingna ertobat.—Mat. 3:​1, 2; 4:17.

¹² Sanga Jesus i doni, rusur ajarkenna maka Bapakna lalap nggit ngampuni. Contohna, iceritakenna sada perumpaman si kena kel ku pusuh kerna anak si bene. Anak muda e si milihsa lawes rumah nari janah la mehuli pergeluhna. Bas pudi wari, “tehna maka motu kel  perbahanenna” e janah mulih atena. Uga tanggapen bapakna? Nina Jesus sanga anakna e “ndauh denga, idah bapakna ia janah mekuah atena. Emaka kiam bapakna e ngayakisa jenari dakepna anakna e janah emana alu lembut.” Situhuna, ipindo anakna e man bapakna gelah ia iban jadi salah sada pelayan bas rumahna saja. Tapi igelari bapakna ia “anakku” janah alokenna ia mulihi. Nina bapakna, “Ia enggo bene janah dat mulihi.” (Luk. 15:​11-32) Sope Jesus ku doni, pasti rusur idahna cidahken Bapakna sipat perkuah ate si bage man kalak si erdosa si ertobat. Perumpaman enda kena kel ku pusuhta janah erban kita tek maka Jahwe eme Bapak si perkuah kel.

13-14. Kai si pelajari Rasul Petrus kerna pertobaten, janah kai si ajarkenna kerna pertobaten? (Nen ka gambar.)

¹³ Melala si pelajari Rasul Petrus kerna pertobaten ras pengampunen arah Jesus. Melala kesalahen Petrus, janah lalap ia iampuni Jesus. Contohna, sanga telu kali ipersoken Petrus maka tandaina Tuanna, getem kel pusuhna perban salah kapna bana. (Mat. 26:​34, 35, 69-75) Tapi kenca Jesus ipekeke, jumpaina Petrus, banci saja sanga Petrus sisada ngenca. (Luk. 24:​33, 34; 1 Kor. 15:​3-5) Iteh Jesus maka enggo ertobat rasulna e. Emaka paksa si e, pasti alu perkeleng ipetetapna ukur Petrus maka enggo ia iampuni.—Nen Markus 16:7 ras keterangen tambahen “dan Petrus” bas Kitab Suci Terjemahan Dunia Baru (Edisi Pelajaran).

¹⁴ Perban enggo lit pengalamen Petrus kerna pertobaten, banci ajarina kalak kerna pertobaten ras pengampunen. La ndekah kenca Perayan Pentakosta, ipesehna khotbah man enterem kalak Jahudi si lenga erkiniteken. Ijelaskenna maka  enggo ibunuh kalak e Mesias. Tapi alu perkeleng iahkenna kalak e, “Ertobatlah, janah mulihkenlah gelah dosa-dosa kena iampuni. Alu bage, bereken Jahwe kemalemen ate man kena.” (Perb. 3:​14, 15, 17, 19) Icidahken Petrus maka kalak si nggit ertobat arus ‘mulihken.’ E ertina arus ubah kalak e cara rukurna si salah, ngadi ngelakoken si la mehuli, janah mulai ngelakoken kai si erban meriah ukur Dibata. Ikataken Petrus ka maka imasapken Jahwe me dosa kalak e ntah pe tuhu-tuhu ihapusNa dosa kalak e. Puluhen tahun kenca si e, ipetetap Petrus ukur kalak Kristen, nina, “Sabar [Jahwe] man kena perban labo teNa sekalak pe ikernepken tapi gelah kerina min ertobat.” (2 Pet. 3:9) Kerina kalak Kristen pasti ngata bujur perban tehna amin pe dosa kalak e serius, banci nge iampuni!

15-16. (a) Kai si ipelajari Rasul Paulus kerna pengampunen? (1 Timotius 1:​12-15) (b) Kai si man bahasenta bas artikel seterusna?

¹⁵ Labo enterem kalak si ngelakoken kesalahen si mbelin bagi Saul arah Tarsus. Kejam kel ia nindas pengikut Kristus. Teremen arah kalak Kristen banci saja la kapna mungkin Saul ertobat. Tapi perukuren Jesus si enggo ipekeke ndauh kel bedana ras manusia si la sempurna. Jesus ras Bapakna ngidah sipat-sipat si mehuli bas Saul. Nina Jesus, “Enggo kupilih ia.” (Perb. 9:15) Iban Jesus ka mukjizat guna nampati Saul ertobat. (Perb. 7:58–8:3; 9:​1-9, 17-20) Kenca Saul jadi kalak Kristen, bas pudi wari itandai ia selaku Rasul Paulus. Rusur iturikenna pengatan bujurna kerna kiniulin ras perkuah ate si alokenna. (Baca 1 Timotius 1:​12-15.) Ajarkenna ka man turang seninana maka ‘cidahken Dibata kiniulinNa guna nampati kalak e robah.’—Rom. 2:4.

¹⁶ Sanga ibegi Paulus maka lit kalak Kristen bas runggun i Korinti si ngelakoken perbahanen seks si salah tapi tetap bas runggun, kai si ilakoken Paulus? Arah kata-kata Paulus, kai si banci sipelajari kerna disiplin Jahwe si perkeleng bage pe kerna pentingna sipat perkuah ate? Sibahas kari kerna si e bas artikel seterusna.