ARTIKEL PELAJAREN 34
LAGU 107 Usihlah Kekelengen Jahwe
Cidahken Kekelengen ras Perkuah Ate man Kalak si Ngelakoken Dosa
“Cidahken Dibata kiniulinNa guna nampati kena robah.”—ROM. 2:4.
INTINA
Cara pertua nampati turang senina si ngelakoken dosa si serius.
1. Kai nge si terjadi man sekalak jelma kenca ilakokenna dosa si serius?
BAS artikel sebelumna, enggo ituriken Rasul Paulus uga cara ndungi masalah dosa serius bas runggun i Korinti. Adi kalak si ngelakoken dosa e la nggit ertobat, arus ia ipedarat arah runggun. Tapi sesuai ras ayat tema artikel enda, piga-piga kalak si ngelakoken dosa si serius banci isampati gelah ertobat. (Rom. 2:4) Uga pertua banci nampati kalak e?
2-3. Kai si perlu silakoken adi siteh lit turang seninata si ngelakoken dosa si serius, janah engkai?
2 Adi la iteh pertua lit kalak si sangana ngelakoken dosa si serius, la banci isampati kalak e ia. Emaka, kai si perlu silakoken? Adi lit siteh turang seninata si ngelakoken dosa si serius, si banci erban ia ipedarat arah runggun, perlu sikataken man bana gelah pindona penampat pertua.—Jes. 1:18; Perb. 20:28; 1 Pet. 5:2.
3 Tapi uga adi turang senina e la nggit ngerana man pertua? Adi bage, kitalah si ngatakenca man pertua gelah banci datna penampat. Adi bage siban, e buktina kita perkeleng. La ateta bene turang seninata e. Adi lalap lakokenna dosa si serius, hubungenna ras Jahwe banci reh cedana. Runggun pe banci ipandangi kalak si la Saksi Jahwe. Emaka, perban keleng ateta Jahwe ras turang seninata e, arus pang kita ertindak.—Ms. 27:14.
CARA PERTUA NAMPATI KALAK SI NGELAKOKEN DOSA SI SERIUS
4. Kai nge tujun pertua njumpai kalak si ngelakoken dosa si serius?
4 Adi lit sekalak turang senina bas runggun ngelakoken dosa si serius, badan pertua milih telu pertua si memenuhi syarat guna mbentuk sada panitia. a Teluna pertua e arus meteh bana ras meteruk ukur. Amin pe merhat kel kalak e nampati kalak si ngelakoken dosa e gelah robah, arus kalak e sadar maka labo banci paksana sekalak jelma guna robah. (Ul. 30:19) Arus ka iteh pertua maka labo kerina kalak si ngelakoken dosa si serius bali bagi Raja Daud si nggit megiken nasehat. (2 Sam. 12:13) Banci saja, lit si sengaja la megiken nasehat Jahwe. (Kej. 4:6-8) Amin pe bage, tujun pertua eme nampati kalak si ngelakoken dosa e ertobat. Prinsip kai saja nge si perlu iikutken pertua sanga jumpa ras kalak si ngelakoken dosa e?
5. Prinsip kai saja si perlu inget pertua sanga jumpaina kalak si ngelakoken dosa e? (2 Timotius 2:24-26) (Nen ka gambar.)
5 Ianggap pertua kalak si ngelakoken dosa e bagi biri-biri si bene si seh kel ergana. (Luk. 15:4, 6) Emaka sanga ijumpai pertua kalak si ngelakoken dosa e, ula min kasar ranan ras perbahanenna. Tujun pertua erban perjumpan e labo saja guna meteh uga kin kejadin situhuna, tapi icidahken kalak e min sipat-sipat si ituriken bas 2 Timotius 2:24-26. (Baca.) Pertua e arus tetap lembut ras mehuli perban tujun kalak e eme nampati kalak si ngelakoken dosa e robah.
Bali bagi permakan bas jaman si mbarenda, pertua rusaha ndarami biri-biri si bene (Nen paragrap 5)
6. Uga pertua erban persikapen sope jumpa ras kalak si ngelakoken dosa e? (Roma 2:4)
6 Pertua arus erban persikapen guna meteh petunjuk Jahwe. Usahaken kalak e guna ngusih Jahwe sanga erurusen ras kalak si ngelakoken dosa e. Perlu inget kalak e kata-kata Paulus enda: “Cidahken Dibata kiniulinNa guna nampati kena robah.” (Baca Roma 2:4.) Pertua arus ingetna maka kalak e permakan si perlu ngikutken petunjuk Kristus. (Jes. 11:3, 4; Mat. 18:18-20) Sope jumpa pertua ras kalak si ngelakoken dosa e, pertua perlu ertoto ras ngukuri alu mehuli tujun kalak e, eme nampati kalak si ngelakoken dosa e ertobat. Arus kalak e riset arah ayat-ayat Pustaka ras publikasita. Arus ka kalak e ertoto gelah benar pengangkanna kerna kalak si ngelakoken dosa e ras situasina. Selain si e, perlu ka teh pertua latar belakangna si banci saja mpengaruhi perukuren ras perbahanen kalak si ngelakoken dosa e.—Kua. 20:5.
7-8. Uga pertua ngusih kesabaren Jahwe sanga njumpai kalak si ngelakoken dosa?
7 Pertua ngusih kesabaren Jahwe. Inget kalak e uga perbahanen Jahwe man kalak si ngelakoken dosa bas jaman si mbarenda. Contohna, sabar Jahwe ngerana man Kain. Ipersingeti Jahwe ka ia kai akibatna adi la ia robah janah pasu-pasu kai si banci datna adi patuh ia. (Kej. 4:6, 7) Pernah ka iutus Jahwe Nabi Natan guna mereken nasehat man Daud. Igunaken Natan perumpaman si kena ku pusuh Daud. (2 Sam. 12:1-7) Selain si e, ‘lalap iutus’ Jahwe nabi-nabiNa guna mpersingeti bangsa Israel si enggo salah perbahanenna. (Jer. 7:24, 25) Labo itimai Jahwe saja ngasa umatNa e ertobat. Tapi leben ibereken Jahwe penampat gelah umatNa ertobat amin pe umatNa e ngelakoken dosa denga.
8 Pertua-pertua ngusih Jahwe sanga usahaken kalak e nampati kalak si ngelakoken dosa si serius. Sesuai ras 2 Timotius 4:2, perbahanen pertua man kalak si ngelakoken dosa e arus “alu dem kesabaren.” E ertina arus lalap ikendaliken pertua dirina janah sabar nampati kalak si ngelakoken dosa e gelah tersuruh ukurna ngelakoken si benar. Adi merawa pertua e janah teridah kel ia kecewa, e banci erban kalak si ngelakoken dosa e la nggit megiken nasehatna ntah pe la nggit ertobat.
9-10. Uga pertua banci nampati sekalak jelma meteh maka ia enggo salah?
9 Iorati pertua kai kin situhuna si erban sekalak jelma dungna ngelakoken dosa. Contohna, kai nge si erban ia reh dauhna arah Jahwe? Lanai nge ia erlajar Pustaka ntah pe erberita? Jarang nge ia ertoto ntah totona bage-bage saja lalap? Lanai nge kendalikenna sura-surana si salah? Lanai nge mehuli temanna ergaul ntah pe hiburenna? Uga nge pengaruh pilihenna e man perukuren ras sura-surana? Sadar nge ia maka keputusen ras perbahanenna e erban Jahwe sedih?
10 Gelah iteh pertua isi pusuh kalak si ngelakoken dosa e, ibanna penungkunen-penungkunen si sipatna labo pribadisa, janah isampati kalak e ia ngukuri perbahanenna sedekah enda, si erban ia dungna ngelakoken dosa si serius. (Kua. 20:5) Selain si e, banci gunaken pertua perumpaman guna nampati kalak si ngelakoken dosa e rukur janah gelah sadarina kesalahenna, bali bagi si ilakoken Nabi Natan man Daud. Bas perjumpan si pertama pe banci saja kalak si ngelakoken dosa e menyesal. Banci saja ertobat ia paksa si e.
11. Uga perbahanen Jesus man kalak si ngelakoken dosa?
11 Iusahaken pertua guna ngusih Jesus. Isampati Jesus me Saul arah Tarsus alu mereken penungkunen, “Saul, Saul, engkai maka siksandu aku?” Alu bage, isampati Jesus ia sadar maka kai si ilakokenna sedekah enda salah. (Perb. 9:3-6) Selain si e, sanga icakapken Jesus kerna “diberu si bagi Isebel,” nina Jesus, “Enggo kubereken waktu man bana gelah ertobat.”—Ket. 2:20, 21.
12-13. Uga pertua banci mereken waktu man kalak si ersalah guna ertobat? (Nen ka gambar.)
12 Bagi Jesus, ula metersa iban pertua kesimpulen maka kalak si ngelakoken dosa e la nggit ertobat. Memang banci saja lit kalak si mis ertobat bas perjumpan si pertama denga. Tapi si deban, perlu denga terbuen waktu. Emaka pertua banci ngaturken waktu guna erban perjumpan ras ia lebih sada kali. Kenca perjumpan si pertama, banci saja enggo mulai iukurina kai si ipeseh pertua man bana. Banci saja ertoto ia man Jahwe alu meteruk ukur. (Ms. 32:5; 38:18) Kenca si e, bas perjumpan seterusna banci saja enggo beda reaksina.
13 Merhat kel pertua nampati kalak si ngelakoken dosa ertobat. Emaka sepenggejapen pertua janah mehuli kalak e man bana. Ngarap pertua ras ertoto kalak e man Jahwe gelah pasu-pasuNa usaha kalak e. Totoken kalak e ka gelah kalak si ngelakoken dosa e tehna dungna kesalahenna janah ertobat.—2 Tim. 2:25, 26.
Banci jumpai pertua kalak si ngelakoken dosa e lebih arah sada kali perban banci saja perlu denga ia waktu guna ertobat (Nen paragrap 12)
14. Sanga lit kalak si ertobat, ise nge si patut ndatken pengergan, ras engkai?
14 Pasti meriah kel ukurta sanga lit kalak si ngelakoken dosa dungna ertobat. (Luk. 15:7, 10) Perban si e, ise nge si patut ndatken pengergan? Pertua nge? Ingetlah kai si itulis Paulus, nina, “Banci saja pediat Dibata kalak si bage ertobat.” (2 Tim. 2:25) Emaka, Jahwe me si patut iergai bas ngubah cara rukur ras perbahanen kalak si ngelakoken dosa e, labo manusia. Jahwe me si nampati kalak Kristen si nilah e guna erban perubahen si mbelin. Kenca si e, ikataken Paulus maka piga-piga hasil arah pertobaten eme: Kalak si ngelakoken dosa e banci datna pemeteh si tepat kerna kebenaren, sadar ia, janah lepas arah siding Setan.—2 Tim. 2:26.
15. Kai si lakoken pertua gelah banci terus isampatina kalak si ertobat?
15 Sanga sekalak jelma ertobat, lalap idahi pertua ia guna nampatisa. Isampati pertua ia gelah paguh kinitekenna, gelah ngasup ia nulak godan Setan, ras ngasup ia ngelakoken kai si benar. (Heb. 12:12, 13) Memang labo ituriken badan pertua kerna perincian kesalahenna man ise pe. Tapi lit si mungkin perlu ituriken man runggun. Kai e?
“IPERSINGETI I LEBE-LEBE JELMA SI ENTEREM”
16. Kai maksud kata-kata Paulus bas 1 Timotius 5:20?
16 Baca 1 Timotius 5:20. Itulis Paulus man Timotius eme temanna si ngelayani selaku pertua maka “kalak si terus ngelakoken dosa” arus ipersingeti i lebe-lebe jelma si enterem. Kai maksudna? Arus nge ikataken man kerina anggota runggun kerna persinget e? Labo bage. “Jelma si enterem” si imaksudken Paulus eme piga-piga kalak si banci saja tehna kerna dosa e. Banci saja idahna langsung ntah tehna arah kalak si ngelakoken dosa e. Man kalak e saja ngenca perlu ikataken pertua maka masalahna enggo iurus ras kalak si ngelakoken dosa e enggo ipersingeti.
17. Bas situasi si uga nge pengumumen kerna kalak si ipersingeti arus ipeseh ku runggun, ras engkai?
17 Bas piga-piga situasi, banci saja dosa si ilakokenna enggo iteh enterem jelma bas runggun, ntah iteh kalak e pagi dungna. Adi bage, kerina kalak bas runggun perlu meteh kerna persinget e. Iaturken me sekalak pertua ngumumken ku runggun maka turang senina si ngelakoken dosa e enggo ipersingeti. Engkai? Ikataken Paulus gelah e “jadi persinget ka man kalak si deban” gelah ula ngelakoken dosa.
18. Kai si ilakoken pertua adi lit kalak Kristen si ngelakoken dosa si umurna lenga seh 18 tahun? (Nen ka gambar.)
18 Uga adi si ngelakoken dosa si serius e eme kalak Kristen si enggo iperidiken si umurna lenga seh 18 tahun? Iaturken badan pertua me gelah dua pertua njumpai anak e ras orang tuana si Saksi Jahwe. b Isungkuni pertua me kai saja si enggo ilakoken orang tuana guna nampati anakna e gelah ertobat. Adi nggit anak e megiken nasehat orang tuana janah nggit ia mperobahi perukurenna bage pe perbahanenna, banci saja iban dua pertua eme keputusen maka lanai perlu iban panitia guna njumpai anak e ras orang tuana. Lang pe orang tua nge si ibereken Dibata tanggung jawap guna mpersingeti anakna alu perkeleng. (Ul. 6:6, 7; Kua. 6:20; 22:6; Ep. 6:2-4) Kenca si e, ijumpai pertua me orang tuana piga-piga kali guna mastiken enggo idat anak e penampat si iperlukenna. Tapi uga adi anak e terus ngelakoken dosa janah la ertobat? Ibentuk me panitia si isina telu pertua. Ijumpai kalak e me kalak si ngelakoken dosa e ras orang tuana si Saksi Jahwe.
Adi lit anak si umurna lenga seh 18 tahun ngelakoken dosa serius, ijumpai dua pertua me ia ras orang tuana si Saksi Jahwe (Nen paragrap 18)
“LEMBUT KEL KEKELENGEN JAHWE RAS MBELIN PERKUAH ATENA”
19. Uga pertua ngusih perbahanen Jahwe man kalak si ngelakoken dosa?
19 Pertua si itugasken bas panitia e ertanggung jawap i lebe-lebe Jahwe guna njaga runggun tetap bersih. (1 Kor. 5:7) Iusahaken kalak e gelah tersuruh ukur kalak si ngelakoken dosa e guna ertobat. Emaka pertua perlu tetap positip perukurenna ras tetap arapkenna kalak si ngelakoken dosa e banci robah. Nggit kalak e ngusih Jahwe si ‘lembut kel kekelengenNa ras mbelin perkuah ateNa.’ (Jak. 5:11) Rasul Johanes si enggo metua pe bage penggejapenna. Nina, “O anak-anakku, si enda kutulis gelah ula kena ngelakoken dosa. Tapi adi lit si ngelakoken dosa, lit kap si nampati kita si tading ras Bapak, eme Jesus Kristus, si benar perbahanenna.”—1 Joh. 2:1.
20. Kai kari sibahas bas artikel seterusna?
20 Sayang kel, mon-mon lit kalak Kristen si la nggit ertobat si dungna arus ipedarat arah runggun. Kai si ilakoken pertua adi lit masalah si bage? Sibahas kari jawapenna bas artikel seterusna.
LAGU 103 Pertua Eme Pemere Jahwe
