ARTIKEL PELAJAREN 31
LAGU 12 Jahwe, Dibata Si Madakuasa
Iselamatken Jahwe Manusia si Erdosa
“Keleng kel ate Dibata doni enda, emaka berekenNa AnakNa si tonggal.”—JOH. 3:16.
INTINA
Mbarenda nari enggo sampati Jahwe manusia ngelawan dosa. Bapakta Jahwe enggo mbuka dalan gelah banci kita nggeluh seh rasa lalap alu ermeriah ukur janah lanai erdosa.
1-2. (a) Kai kin dosa e, janah uga kita banci menang ngelawansa? (Nen ka “Penjelasen Tambahen.”) (b) Kai si man bahasenta bas artikel enda ras artikel seterusna bas majalah enda? (Nen ka “Man Si Mbaca” bas majalah enda.)
UGA nge belinna kekelengen Dibata Jahwe man bandu? Guna meteh jawapenna, pelajarilah kai saja si enggo ilakoken Jahwe guna nelamatken kam arah dosa ras kematen nari. Dosa a eme musuh si seh kel gegehna, labo kam ngasup ngelawansa sisada. Tiap wari kerina kita ngelakoken dosa, janah dosa me si erban kita mate. (Rom. 5:12) Tapi lit berita si meriah: Alu penampat Jahwe, banci sitaluken dosa janah pasti kita menang!
2 Kira-kira 6.000 tahun dekahna, isampati Jahwe manusia guna ngelawan dosa. Si e ilakokenNa perban keleng ateNa kita. Tangtangna nari pe enggo keleng ate Jahwe manusia, janah mbelin kel pengorbanenNa guna nampati kalak e. Iteh Jahwe maka dosa banci erban kita mate, tapi la ate Jahwe kita mate. AteNa nggeluh min kita seh rasa lalap. (Rom. 6:23) Bas artikel enda, sibahas kari telu penungkunen: (1) Arapen kai si bereken Jahwe man manusia si erdosa? (2) Uga manusia si erdosa bas jaman Pustaka banci erban meriah ukur Jahwe? (3) Uga Jesus nelamatken manusia si erdosa?
ARAPEN KAI SI BEREKEN JAHWE MAN MANUSIA SI ERDOSA?
3. Uga orang tuata si pertama dungna erdosa?
3 Sanga iciptaken Jahwe dilaki ras diberu si pertama, ateNa kalak e ermeriah ukur. Ibereken Jahwe man kalak e ingan tading si mejile, hadiah eme perjabun, bage pe tugas si erban meriah ukur. IsuruhNa kalak e ndemi doni alu keturunen kalak e. IsuruhNa ka kalak e erban kerina doni enda jadi Pardis, bali bagi Taman Eden. Sada ngenca larangen si bereken Jahwe janah labo mberat. Selain si e, iingetken Jahwe kalak e adi sengaja kalak e ngelanggar larangen e, banci kalak e mate perban dosa kalak e. Kai si terjadi selanjutna? Lit sada malekat si nggoda kalak e guna ngelakoken dosa. La keleng ate malekat e Dibata bage pe manusia. Si sedihna, nggit Adam ras Hawa ipengaruhi malekat e. La kalak e tek man Bapakna si perkeleng. Mberontak kalak e janah dungna erdosa. Mulai wari e, arus itanggung kalak e akibat perbahanenna, bali bagi si ikataken Jahwe. Metua me kalak e janah dungna mate.—Kej. 1:28, 29; 2:8, 9, 16-18; 3:1-6, 17-19, 24; 5:5.
4. Engkai maka segat ate Jahwe dosa janah sampatiNa kita ngelawansa? (Roma 8:20, 21)
4 Ipastiken Jahwe gelah kejadin e icatat bas Pustaka. Alu bage, banci siteh engkai maka segat kel ate Jahwe dosa. Dosa erban ceda hubungenta ras Jahwe, janah banci erban kita mate. (Jes. 59:2) Segat kel ate Setan man Jahwe bage pe man manusia. Emaka mbarenda igodana Adam ras Hawa gelah erdosa. Seh asa gundari terus denga igoda Setan manusia. Sanga Adam ras Hawa mberontak, banci saja akap Setan enggo berhasil ia naluken Jahwe. Tapi la arapna maka Jahwe tuhu-tuhu perkeleng. La iubah Jahwe sura-suraNa man keturunen Adam ras Hawa. Keleng kel ate Jahwe man manusia janah mis berekenNa arapen man kalak e. (Baca Roma 8:20, 21.) Iteh Jahwe maka pasti lit keturunen Adam ras Hawa si engkelengi Ia ras ngandalken Ia guna ngelawan dosa. Selaku Bapak ras Pencipta kalak e, ilakoken Jahwe kai pe gelah kalak e banci ibebasken arah dosa janah rembak ras Ia. Kai si lakoken Jahwe?
5. Ndigan nge mulai ibereken Jahwe arapen man manusia si erdosa? Jelasken. (Kejadin 3:15)
5 Baca Kejadin 3:15. Kenca Adam ras Hawa mberontak, mis bereken Jahwe arapen. Inubuatken Jahwe maka ikernepken pagi Setan. Ikataken Jahwe maka lit pagi “keturunen” si nelamatken manusia. “Keturunen” e me pagi si engkernepken Setan ras ndungi kerina masalah si tangtangna lit i Taman Eden. (1 Joh. 3:8) Tapi sope si e terjadi, rate mesui pagi keturunen e. Ibunuh Setan pagi ia, janah si e erban getem kel pusuh Jahwe. Tapi, la akap Jahwe dalih gelah manusia banci selamat arah dosa ras kematen.
UGA MANUSIA SI ERDOSA BAS JAMAN PUSTAKA BANCI ERBAN MERIAH UKUR JAHWE?
6. Kai si ilakoken Abil, Nuah, bage pe kalak si erkiniteken si debanna guna rembak ras Jahwe?
6 Ratusen tahun kenca si e, alu manjar-anjar reh jelasna iban Jahwe kerna uga kin carana manusia si erdosa banci rembak ras Ia. Abil eme anak Adam ras Hawa si peduaken. Ia me manusia si pertama si tek man Jahwe kenca terjadi pemberontaken i Eden. Keleng kel ate Abil man Jahwe. Atena erban meriah ukur Jahwe janah rembak ras Ia. Abil eme sekalak permakan. Emaka persembahkenna piga-piga biri-birina si nguda denga jadi korban man Jahwe. Uga tanggapen Jahwe? “Ngena ate Jahwe ngidah Abil bage pe persembahenna.” (Kej. 4:4) Bas pudi wari, ngena ka ate Jahwe ngidah korban si ipersembahken Nuah ras kalak si erkiniteken si debanna si engkelengi Ia. (Kej. 8:20, 21) Alu ngaloken korban-korban e, icidahken Jahwe maka manusia si erdosa pe banci erban meriah ukurNa janah rembak ras Ia. b
7. Kai si banci sipelajari arah Abraham si nggit ngorbanken anakna?
7 Paguh kel kiniteken Abraham man Jahwe. Ipindo Jahwe ia ngelakoken sada hal si mesera kel. Isuruh Jahwe korbanken Abraham anakna sendiri, Isak. Pasti sedih kel Abraham, tapi nggit ia ngelakokenca. Sanga nandangi ibunuh Abraham anakna, la ipediat Jahwe. Arah kejadin e kerina kalak si erkiniteken banci erlajar kerna sada kebenaren si penting eme: Nggit Jahwe ngorbanken AnakNa si keleng ateNa. Keleng kel ate Jahwe manusia.—Kej. 22:1-18.
8. Kai si banci siteh arah pengaturen korban si itetapken bas Undang-Undang Musa? (Imamat 4:27-29; 17:11)
8 Ratusen tahun kenca si e, ibereken Jahwe Undang-Undang Musa man bangsa Israel. Menurut Undang-Undang e, umat Dibata arus mpersembahken melala korban binatang gelah dosa kalak e banci iampuni. (Baca Imamat 4:27-29; 17:11.) Arah pengaturen e, banci siteh maka nandangi isikapken Jahwe sada korban si ndauh ergan, si banci tuhu-tuhu nelamatken manusia arah dosa. Igunaken Jahwe nabi-nabiNa guna njelasken maka keturunen si ijanjiken e, rate mesui pagi janah ibunuh. Kepeken keturunen e Anak Dibata si istimewa. Ia bali pagi bagi biri-biri si ikorbanken. (Jes. 53:1-12) Bayangkenlah, iban Jahwe pengaturen gelah Anak si ikelengiNa jadi korban guna nelamatken manusia, termasuk kam, arah dosa ras kematen!
UGA JESUS NELAMATKEN MANUSIA SI ERDOSA?
9. Kai si ikataken Johanes Peridiken kerna Jesus? (Heber 9:22; 10:1-4, 12)
9 Bas abad pertama, itegu-tegu kesah si badia Johanes Peridiken guna nuriken kerna Jesus arah Nasaret, nina, “Nenlah, ia me Anak Biri-Biri Dibata si nasapken dosa doni!” (Joh. 1:29) Arah kata-kata e, teridah maka Jesus me keturunen si enggo ndekah inubuatken e. Bali bagi si enggo ijanjiken Jahwe, ikorbanken Jesus geluhna guna manusia. Dungna, reh jelasna me arapen manusia guna bebas arah dosa!—Baca Heber 9:22; 10:1-4, 12.
10. Ja nari siteh maka fokus Jesus “ndilo” kalak si erdosa?
10 Sanga i doni, usahaken Jesus nampati kalak si latih ukurna perban dosa. Undang Jesus kalak e jadi pengikutna. Iteh Jesus maka dosa me si erban manusia susah. Emaka usahakenna nampati kalak e. Nina, “Kalak si sehat labo perlu dokter, kalak si sakit nge perlu. . . . Aku reh labo ndilo kalak si benar, tapi ndilo kalak perdosa.” (Mat. 9:12, 13) E me si ilakoken Jesus. Sanga lit sekalak diberu si cucina nahe Jesus alu iluhna, alu lembut ikataken Jesus maka dosana enggo iampuni. (Luk. 7:37-50) Ajarken Jesus ka kebenaren si penting man sekalak diberu Samaria si lit i deher sumur, amin pe teh Jesus diberu e tading ras dilaki si labo perbulangenna. (Joh. 4:7, 17-19, 25, 26) Dat Jesus ka kuasa arah Dibata guna naluken kematen, eme akibat si parahna kel arah dosa. Ipekeke Jesus enterem jelma, la soal dilaki, diberu, anak-anak ras kalak si enggo dewasa.—Mat. 11:5.
11. Engkai maka kalak si erdosa nyaman kapna ndeher ras Jesus?
11 Engkai maka kalak si perbahanenna la mehuli la mbiar ndeheri Jesus janah nyaman kapna ras Jesus? Perban angkai Jesus perasan kalak e janah mehuli Jesus man kalak e. (Luk. 15:1, 2) Ipuji Jesus ka kalak e perban kalak e erkiniteken man Jesus. (Luk. 19:1-10) Iusih Jesus perkuah ate Bapakna alu sempurna. (Joh. 14:9) Arah kata-kata ras perbahanen Jesus, cidahkenna maka keleng ate Bapakna man manusia janah nggit Ia nampati tiap kalak guna menang ngelawan dosa. Usahaken Jesus ka erban kalak si erdosa teriahken guna robah ras jadi pengikutna.—Luk. 5:27, 28.
12. Kai si banci sipelajari arah kematen Jesus?
12 Iteh Jesus kai si nandangi terjadi man bana. Piga-piga kali katakenna man pengikutna maka ihianati pagi ia janah ibunuh bas tiang. (Mat. 17:22; 20:18, 19) Iteh Jesus maka pengorbanenna nasapken dosa doni sesuai ras kai si kataken Johanes bage pe nubuat nabi-nabi. Iajarken Jesus maka kenca korbankenna geluhna, ‘itarikna manusia arah erbage bangsa nari.’ (Joh. 12:32) Manusia si erdosa banci erban meriah ukur Jahwe adi akuina maka Jesus kap Tuanna janah ikutkenna Jesus. Adi lakokenna e, dungna banci ia “ibebasken bas budak dosa nari.” (Rom. 6:14, 18, 22; Joh. 8:32) Emaka guna nelamatken kita, nggit Jesus ngadapi kiniseran janah dungna mate.—Joh. 10:17, 18.
13. Kai saja si inanami Jesus sope ia mate, janah arah je nari kai si banci sipelajari kerna Dibata Jahwe? (Nen ka gambar.)
13 Jesus ihianati, itangkap, itokoh-tokohi, ipitnah, ikataken ersalah, janah isiksa. Jenari, ibaba prajurit ia ku inganna ihukum mate, janah ipakuken ku sada tiang. Nggit Jesus ngenanami kerina si mesui e janah tetap ia setia. Tapi paksa si e, situhuna lit si pusuhna suin asangken Jesus, eme Dibata Jahwe. Keleng kel ateNa Jesus, janah situhuna banci nge pakeNa gegehNa si la erbatas guna ngelindungi Jesus, AnakNa. Tapi la lakoken Jahwe e perban keleng kel ateNa manusia. Nina Jesus, “Keleng kel ate Dibata doni enda, emaka berekenNa AnakNa si tonggal, gelah ise pe si erkiniteken man bana la ikernepken tapi ndatken kegeluhen si rasa lalap.”—Joh. 3:16.
Ipediat Jahwe AnakNa ihukum mate, la kap Jahwe dalih getem kel pusuhNa gelah bebas kita arah dosa ras kematen (Nen paragrap 13)
14. Pengorbanen Jesus mbuktiken kai?
14 Pengorbanen Jesus eme bukti si mbelinna maka keleng kel ate Jahwe keturunen Adam ras Hawa. Jelas me, keleng kel ate Jahwe kam. Enggo banNa pengorbanen si mbelin. Nggit Ia ngenanami ceda ate si la terbayangken guna nelamatken kam arah dosa ras kematen. (1 Joh. 4:9, 10) AteNa nampati tiap kalak gelah ngasup ngelawan dosa janah menang!
15. Kai si arus silakoken gelah sidat manpaat arah korban tebusen Jesus?
15 Enggo ibereken Jahwe AnakNa si tonggal jadi tebusen. Alu bage, dosa-dosata banci iampuni. Tapi gelah banci iampuni, kai si arus silakoken? Jawapenna enggo ituriken Johanes Peridiken, janah bas pudi wari Jesus Kristus pe turikenna ka. Nina, “Ertobatlah, perban Kerajan surga enggo ndeher.” (Mat. 3:1, 2; 4:17) Emaka, arus kita ertobat gelah berhasil kita ngelawan dosa janah rembak ras Bapakta si perkeleng. Kai maksudna ertobat, janah engkai maka ertobat banci nampati kita erban meriah ukur Jahwe amin pe kita erdosa? Jawapenna lit bas artikel pelajaren seterusna.
LAGU 18 Ngata Bujur kerna Tebusen
a PENJELASEN TAMBAHEN: Bas Pustaka, kata “dosa” banci maksudna perbahanen si salah ntah lagu langkah si la sesuai ras patoken Jahwe. Tapi “dosa” banci ka maksudna keadanta si erdosa ntah la sempurna si iwarisken Adam. Dosa warisen e me si erban kita kerina mate.
