1-2. (a) Uga nge perasan Jahwe ngidah kalak si ngelakoken dosa si la nggit ertobat? (b) Kai nge si arapken Jahwe arah kalak si ngelakoken dosa?

 RAS Jahwe labo banci rate-ate. Segat ateNa dosa. (Ms. 5:​4-6) Iarapken Jahwe gelah sipatuhi kerina perentahNa si icatat bas Pustaka. Tapi, labo iarapkenNa gelah sempurna kita i bas matuhi perentahNa e. (Ms. 130:​3, 4) Amin pe bage, labo meriah ukurNa ngidah kalak si ‘la mehamat man Dibata, si erban kiniulin Dibatata si luar biasa jadi alasen guna ngelakoken perbahanen si la meteh mela.’ (Jud. 4) Emaka, ikataken bas Pustaka “kalak si la hamatina Dibata ikernepken” pagi bas perang Harmagedon.—2 Pet. 3:7; Ket. 16:16.

² Tapi, labo ate Jahwe sekalak jelma pe ikernepken. Bagi si enggo sibahas bas piga-piga artikel sebelumna, jelas kel ikataken bas Pustaka maka ‘ate Jahwe gelah kerina min ertobat.’ (2 Pet. 3:9) Iusih pertua Jahwe sanga sabar kalak e rusaha nampati kalak si ngelakoken dosa guna ertobat janah mulihken ngelayani Jahwe. Tapi, labo kerina kalak si ngelakoken dosa e nggit ngaloken penampat e. (Jes. 6:9) Lit kalak si lalap lakokenna dosana amin pe enggo mulih-ulih isampati pertua ia guna ertobat. Adi bage si terjadi, kai si arus ilakoken pertua?

 “PEDARATLAH KALAK SI JAHAT E”

3. (a) Kai si kataken Pustaka kerna kalak si la nggit ertobat? (b) Engkai banci ikataken maka kalak si ngelakoken dosa e nge si milih guna ipedarat arah runggun?

³ Adi lit kalak si la nggit ertobat, lanai lit pilihen si deban man pertua selain ngikutken petunjuk si icatat bas 1 Korinti 5:13: “Pedaratlah kalak si jahat e arah tengah-tengah kena nari.” Situhuna, kalak si ngelakoken dosa e enggo tehna adi la ia ertobat, pasti ia ipedarat arah runggun. Emaka iperanina me kai si enggo isuanna. (Gal. 6:7) Engkai maka banci ikataken bage? Perban ia la nggit robah amin pe enggo mulih-ulih iusahaken pertua nampati ia guna ertobat. (2 Raj. 17:​12-15) Arah perbahanenna, teridah maka ia sendiri si milih la ngikutken petunjuk Jahwe.—Ul. 30:​19, 20.

4. Adi lit sekalak jelma si la ertobat janah arus ipedarat arah runggun, engkai maka perlu iumumken?

⁴ Adi lit sekalak jelma la ertobat janah arus ipedarat arah runggun, iban me pengumumen man runggun si ngataken maka ia lanai Saksi Jahwe. a Tujun pengumumen e labo gelah ia mela, tapi gelah runggun banci ngikutken petunjuk Pustaka guna ‘lanai erteman ras ia’ janah ‘man pe ula ras ia.’ (1 Kor. 5:​9-11) Engkai maka perlu ibereken petunjuk e? Itulis Rasul Paulus bagenda, “Sitik ragi banci erban tepung si enggo iaduk jadi kembang.” (1 Kor. 5:6) Adi kalak si la ertobat e ipediat tetap bas runggun, si e banci erban turang senina lanai semangat ngikutken patoken Jahwe si benar.—Kua. 13:20; 1 Kor. 15:33.

5. Adi lit turang seninata ipedarat arah runggun uga arusna tanggapenta, janah engkai?

⁵ Adi lit turang seninata ipedarat arah runggun uga arusna tanggapenta? Amin pe la kita ergaul ras ia, arus sianggap ia bagi biri-biri si bene, labo kalak si lanai lit arapenna. Biri-biri si enggo ndauh arah rarasen banci saja dungna mulih. Ingetlah, kalak si bage situhuna enggo mbaktiken diri man Jahwe. Tapi gundari sangana la tepatina janji pembaktinna janah si e bahaya. (Esek. 18:31) Amin pe bage, sanga nggit denga Jahwe ncidahken perkuah ateNa, lit denga arapen man bana guna mulihken ku runggun. Uga pertua banci nampati kalak si enggo ipedarat arah runggun gelah mulihken ku runggun?

CARA PERTUA NAMPATI KALAK SI IPEDARAT ARAH RUNGGUN

6. Kai saja si ilakoken pertua guna nampati kalak si ipedarat arah runggun?

⁶ Sanga sekalak turang senina ipedarat arah runggun, pertua lalap rusaha nampati ia gelah mulih ku Jahwe. Sanga iurus pertua masalahna e janah ikataken kalak e maka ipedarat me ia arah runggun, ijelasken kalak e ka man bana kai saja si perlu ilakokenna gelah banci ia mulihken ku runggun. Tapi labo e saja ngenca. Bas melala situasi, ikataken pertua e maka merhat kalak e jumpa mulihi ras ia kenca piga-piga bulan ku lebe guna meteh perubahen kai si enggo ibanna. Adi setuju kalak si ngelakoken dosa e, bas perjumpan berikutna, iiahken pertua me ia gelah ertobat ras mulihken ku runggun. Adi paksa si e pe lenga lit perubahen si ibanna, usahaken pertua lalap gelah banci ngubungi ia.

7. Sanga sekalak jelma ipedarat arah runggun, uga pertua ngusih perkuah ate Jahwe? (Jeremia 3:12)

 ⁷ Usahaken pertua ngusih perkuah ate Jahwe sanga lit sekalak jelma ipedarat arah runggun. Contohna, bas jaman Israel si mbarenda, sanga umat Jahwe nilah, Jahwe labo nimai saja seh ngasa umatNa ertobat. Tapi leben iberekenNa penampat amin pe lenga teridah sura-sura kalak e ertobat. Bali bagi si enggo sibahas bas artikel peduaken bas majalah enda, iajarken Jahwe kerna perkuah ateNa arah contoh Nabi Hosea. Isuruh Jahwe gelah leben iampuni Hosea diberuna amin pe diberuna e ngelakoken dosa denga. (Hos. 3:1; Mal. 3:7) Bali bagi Jahwe, pertua tuhu-tuhu merhat gelah kalak si ngelakoken dosa e mulihken janah labo ipersulit kalak e ia guna mulih ku runggun.—Baca Jeremia 3:12.

8. Arah perumpaman Jesus kerna anak si bene, kai si banci sipelajari kerna perkuah ate Jahwe? (Lukas 15:7)

⁸ Cuba siinget mulihi perumpaman kerna anak si bene, si ibahas bas artikel si peduaken bas majalah enda. Sanga idah bapakna anakna e mulih, “kiam bapakna e ngayakisa jenari dakepna anakna e janah emana alu lembut.” (Luk. 15:20) Labo timai bapakna anakna e mindo maap lebe. Tapi, leben ijumpaina anakna e perban keleng atena ia. Pertua pe usahakenna ngusih perbahanen e sanga lit turang senina si ndauh arah Jahwe. Ate kalak e gelah biri-biri si bene e banci mulihken ku Jahwe. (Luk. 15:​22-24, 32) Sanga lit sekalak jelma si ngelakoken dosa mulihken ku runggun, pasti mbelin kel keriahen ukur bas surga bage pe bas doni.—Baca Lukas 15:7.

9. Kai nge sura-sura Jahwe man kalak si ngelakoken dosa?

⁹ Enggo sibahas maka labo ipediat Jahwe kalak si ngelakoken dosa si la ertobat tetap bas runggun. AteNa gelah kalak e mulihken man baNa. Perasan Jahwe nandangi kalak si ngelakoken dosa si la ertobat, icatat bas Hosea 14:4: “Kupepalem pagi perbahanen kalak e si la setia. Kukelengi pagi kalak e arah ukurKu nari, perban lanai Aku merawa.” Perban enggo iteh pertua bage perasan Jahwe, iperdiateken pertua me perubahen kai pe si iban kalak si ngelakoken dosa e si ncidahken pertobaten. Selain si e, ayat e pe jadi jaminen man kalak si ngelakoken dosa e maka tetap denga keleng ate Jahwe kalak e janah ateNa gelah kalak e mis mulihken man baNa.

10-11. Uga usaha pertua nampati kalak si enggo ndekah ipedarat arah runggun?

¹⁰ Uga adi lit kalak si enggo ndekah ipedarat arah runggun, banci saja enggo ertahun-tahun dekahna? Mungkin lanai ilakokenna dosa si erban ia ipedarat arah runggun. Banci saja lit ka si lanai ingetna alasenna ia ipedarat arah runggun. Uga pe situasina, usahaken pertua guna ndarami kalak e ras ndahi kalak e. Sanga jumpa pertua ras kalak e, iajak pertua kalak e ertoto janah alu perkeleng iahkenna kalak e gelah mulihken ku runggun. Jelas me, adi lit sekalak jelma si enggo ertahun-tahun nadingken runggun, pasti lemah kel ia secara rohani. Emaka adi merhat ia mulihken ku runggun, banci iaturken pertua gelah lit si nampati ia erlajar Pustaka amin pe paksa si e lenga ia ialoken mulihi ku runggun. Bas kerina situasi, pertua me si erban pengaturen guna erlajar Pustaka ras ia.

 ¹¹ Bali bagi Jahwe si perkuah, pertua pe merhat ndarami kerina kalak si enggo ipedarat arah runggun. Isampati pertua atena kalak e gelah mulihken ku Jahwe. Sanga lit sekalak jelma si mbuktiken maka ia enggo ertobat janah lanai lakokenna dosana e, banci ia mis ialoken mulihi.—2 Kor. 2:​6-8.

12. (a) Bas situasi kai nge pertua arus hati-hati kel? (b) Engkai maka la banci sianggap kalak si enggo ngelakoken dosa tertentu la pantas ndatken perkuah ate Jahwe? (Nen ka cataten i teruh.)

¹² Bas situasi tertentu, pertua arus hati-hati kel sope mutusken maka sekalak jelma ialoken mulihi ku runggun. Contohna, adi pernah ilakokenna pelecehen ntah pe  penganiayan anak, murtad ia, ntah pe daramina cara gelah banci cerai ras teman geluhna, perlu ipastiken pertua maka enggo tuhu-tuhu ia ertobat. (Mal. 2:14; 2 Tim. 3:6) Arus lindungi pertua turang senina bas runggun. Tapi selain si e, perlu ka inget kalak e maka Jahwe ialokenNa mulihi ise pe si enggo tuhu-tuhu ertobat ras si enggo nadingken perbahanenna si la mehuli. Emaka amin pe pertua arus hati-hati sanga ngurus masalah kalak si licik perbahanenna, tapi la banci anggap kalak e maka kalak si ngelakoken dosa tertentu la pantas ndatken perkuah ate Jahwe. b—1 Pet. 2:10.

SI BANCI ILAKOKEN TURANG SENINA BAS RUNGGUN

13. Uga perbahanenta man kalak si ipersingeti, janah uga perbahanenta man kalak si ipedarat arah runggun?

¹³ Bagi si enggo sibahas bas artikel sebelumna, mon-mon lit pengumumen maka sekalak turang senina enggo ipersingeti. Adi e si terjadi, banci kita tetap ergaul ras ia. Engkai? Perban ia enggo ertobat janah lanai lakokenna perbahanenna si la mehuli. (1 Tim. 5:20) Ia anggota runggun denga janah perlu ia pergaulen si mehuli arah turang seninana. (Heb. 10:​24, 25) Tapi uga adi sekalak turang senina ipedarat arah runggun? ‘Ula nai kita erteman ras ia’ janah ‘man pe ula ras ia.’—1 Kor. 5:11.

14. Kerna perbahanenta man kalak si enggo ipedarat arah runggun, uga kita banci nggunaken pusuh peratenta si enggo ilatih Pustaka? (Nen ka gambar.)

¹⁴ Adi bage, la nge banci sitik pe kita ngerana ras kalak si enggo ipedarat arah runggun? Labo bage maksudna. Memang kita la ergaul ras ia. Tapi tiap kalak Kristen banci erban keputusen sesuai ras pusuh peratenna si ilatih Pustaka guna ngundang ia ku perpulungen. Banci saja ia anggota keluargata ntah pe mbarenda rembak kita ras ia. Uga adi reh ia ku perpulungen? Sedekah enda la siperkuanken kalak si enggo ipedarat  arah runggun. Tapi gundari tiap kalak Kristen perlu erban keputusen sendiri erpalasken pusuh peratenna si enggo ilatih Pustaka. Banci saja lit si la kapna dalih mperkuanken ntah pe ngalo-ngalo kalak si enggo ipedarat ndai bas perpulungen. Tapi labo kita ndekah ngerana ras ia ntah pe siban waktuta guna ngelakoken sada kegiaten ras ia.

15. Kalak si uga nge si imaksud bas 2 Johanes 9-11? (Nen ka kotak “ Seri nge Jenis Dosa si Icakapken Johanes ras Paulus?”)

¹⁵ Banci saja lit si rukur bagenda, ‘La kin 2 Johanes 9-11 (baca) ngataken maka kalak Kristen si mperkuanken kalak si bage ertina ndukung kejahatenna?’ Cuba siperdiateken konteks ayat-ayat e. Konteksna ncidahken maka petunjuk e berlaku man kalak si murtad bage pe man kalak si rusaha mpengaruhi kalak si deban ngelakoken kai si jahat. (Ket. 2:20) Kalak si bage labo idahi pertua. Memang lit kemungkinenna ertobat kalak e pagi. Tapi sope si e terjadi, la siperkuanken kalak e ntah pe siundang reh perpulungen.

NGUSIH PERKUAH ATE JAHWE

16-17. (a) Kai ate Jahwe ilakoken kalak si erdosa? (Esekiel 18:32) (b) Uga pertua banci jadi teman erdahin Jahwe?

¹⁶ Kai si enggo sipelajari arah lima artikel bas majalah enda? Ate Jahwe ula min sekalak pe ikernepken. (Baca Esekiel 18:32.) AteNa gelah kalak si ngelakoken dosa mpehuli hubungenna ras Ia. (2 Kor. 5:20) Perban si e, mbarenda nari lalap usahaken Jahwe nampati umatNa si nilah gelah mulihken man baNa, la soal umatNa e secara kelompok ntah pe sekalak-sekalak. Pertua ndatken kehamaten jadi teman erdahin Jahwe bas nampati kalak si ngelakoken dosa gelah ertobat.—Rom. 2:4; 1 Kor. 3:9.

¹⁷ Pasti dem keriahen bas surga sanga sekalak jelma ertobat. Bapakta Jahwe pe meriah ukurNa tiap lit sada biri-biriNa si bene mulihken ku runggun. Pasti reh kelengna ateta Jahwe sanga siukuri perkuah ateNa ras kiniulinNa si luar biasa.—Luk. 1:78.