1. Kai nge sura-sura Jahwe man kerina kalak?

 IBEREKEN Jahwe man banta kebebasen guna erban pilihen. Tiap wari, sigunaken kebebasen e guna erban keputusen. Keputusen si pentingna eme mbaktiken diri man Jahwe ras jadi bagin keluargaNa. Ate Jahwe, kerina jelma min bage keputusenna. Engkai? Perban keleng ateNa kita janah ateNa sidat min si mehulina. Ate Jahwe rembak kita ras Ia janah nggeluh kita seh rasa lalap.—Ul. 30:​19, 20; Gal. 6:​7, 8.

2. Uga perasan Jahwe kerna kalak si ngelakoken dosa serius tapi lenga ertobat? (1 Johanes 2:1)

² Tapi, labo ipaksa Jahwe ise pe ngelayani Ia. Ipediat Jahwe tiap kalak erban keputusen masing-masing. Uga adi lit kalak Kristen si enggo iperidiken si ngelakoken dosa si serius? Adi la ia ertobat, arus ia ipedarat arah runggun. (1 Kor. 5:13) Amin gia bage, merhat kel Jahwe gelah kalak si ngelakoken dosa e mulihken ngelayani Ia. Situhuna, salah sada alasen si pentingna nggit Jahwe mereken tebusen eme gelah kalak si erdosa banci iampuni adi nggit ia ertobat. (Baca 1 Johanes 2:1.) Jahwe Dibata si perkeleng ngiahken kalak si ngelakoken dosa gelah ertobat.—Sak. 1:3; Rom. 2:4; Jak. 4:8.

3. Kai si nandangi sibahas bas artikel enda?

 ³ Ate Jahwe seri min cara rukurta ras Ia kerna dosa bage pe kerna kalak si ngelakoken dosa. Uga carana? Sibahas kari kerna si e bas artikel enda. Cuba siperdiateken (1) uga masalah kerna dosa serius idungi bas runggun i Korinti abad pertama, (2) petunjuk kai si ibereken Rasul Paulus kenca kalak si ngelakoken dosa e ertobat, ras (3) kai si banci sipelajari arah kejadin e kerna cara rukur Jahwe man kalak si ngelakoken dosa serius.

UGA MASALAH DOSA SERIUS IDUNGI BAS ABAD PERTAMA?

4. Kai si terjadi bas runggun i Korinti bas abad pertama? (1 Korinti 5:​1, 2)

⁴ Baca 1 Korinti 5:​1, 2. Bas perdalanen utusen injil Paulus si peteluken, sengget Paulus megi berita arah runggun si mbaru ibentuk i Korinti. Bas runggun e lit sekalak turang senina si dilaki si erhubungen seks ras mamak tirina. Perbahanen si bage “la pernah ilakoken i tengah-tengah bangsa si deban”! Tapi runggun e pediatna kalak si ngelakoken perbahanen e janah banci saja bangga kalak e. Banci saja lit arah kalak e si erpengakap maka sangana kalak e ngusih sipat Jahwe si perkuah ras erpengangka. Tapi la meriah ukur Jahwe adi perbahanen si salah ipediat i tengah-tengah umatNa. Dilaki si ngelakoken perbahanen si la meteh mela e erban umat Jahwe ipandangi kalak. Selain si e, banci ka ia jadi pengaruh si la mehuli man turang senina si ergaul ras ia. Emaka, petunjuk kai si bereken Paulus man runggun e?

5. Kai si ikataken Paulus man runggun i Korinti, janah engkai? (1 Korinti 5:13) (Nen ka gambar.)

⁵ Baca 1 Korinti 5:13. Itegu-tegu Jahwe me Paulus guna nulis surat man runggun i Korinti. Bas surat e, ijelaskenna maka kalak si la ertobat e arus ipedarat arah runggun. Uga nge arusna perbahanen kalak Kristen si setia man kalak si ngelakoken dosa e? Isuruh Paulus turang senina e ‘gelah lanai erteman’ ras kalak si ngelakoken dosa e. Selain si e, ikataken Paulus ka man kalak bas runggun e gelah ‘man pe ula ras kalak e.’ (1 Kor. 5:11) Engkai? Perban adi ras kalak e man, banci dungna la gejapna enggo ngerana-ngerana kalak e ras si ngelakoken dosa ndai. Kai gunana adi turang senina bas runggun e la ergaul ras kalak si ngelakoken dosa e? Kalak e la kena pengaruhna si la mehuli. (1 Kor. 5:​5-7) Kalak si  ngelakoken dosa e pe banci dungna sadar maka enggo lanai ia bas dalan Jahwe, emaka banci ia menyesal ras ertobat.

6. Kai pengaruh surat Paulus man runggun i Korinti ras man kalak si ngelakoken dosa e?

⁶ Kenca ikirim Paulus suratna man turang senina i Korinti, merhat Paulus meteh uga nge tanggapen kalak e. Bas pudi wari, begi Paulus berita si erban meriah ukurna arah Titus. Kepeken, mehuli tanggapen runggun e man surat Paulus. (2 Kor. 7:​6, 7) Nggit kalak e megiken petunjuk si bereken Paulus. Selain si e, piga-piga bulan kenca ikirim Paulus suratna, kalak si ngelakoken dosa e enggo ertobat. Ubahna perukurenna bage pe perbahanenna janah mulai ikutkenna patoken Jahwe si benar. (2 Kor. 7:​8-11) Petunjuk kai si ibereken Paulus man runggun e?

 UGA PERBAHANEN RUNGGUN I KORINTI MAN KALAK SI ERTOBAT?

7. Kai hasilna kenca kalak si ngelakoken dosa e ipedarat arah runggun? (2 Korinti 2:​5-8)

⁷ Baca 2 Korinti 2:​5-8. Ikataken Paulus maka “teremen bas kena enggo mere persinget man bana, janah si e enggo bias.” Enda ertina, persinget si ibereken enggo nampati kalak si ngelakoken dosa e ertobat.—Heb. 12:11.

8. Petunjuk kai ka si ibereken Paulus?

⁸ Ibereken Paulus ka petunjuk enda man runggun i Korinti, nina, “Alu mehuli ampuni ia janah apuli . . . Banlah ia tek maka tuhu-tuhu kelengi kena ia.” Ate Paulus nggit turang senina ngaloken kalak si ertobat e mulihken ku runggun. Tapi, labo e saja, isuruh Paulus ka gelah icidahken kalak e arah ranan, carana erurusen, ras perbahanenna maka tuhu-tuhu enggo ampunina ras kelengina kalak si ertobat e. Alu bage banci cidahken kalak e alu jelas maka meriah ukur kalak e perban enggo mulihken ia ku runggun.

9. Engkai maka lit kalak si mesera kapna ngaloken mulihi kalak si ertobat e?

⁹ Lit nge turang senina bas runggun i Korinti si mesera kapna ngaloken mulihi kalak si ertobat e? La lit ituriken kerna si e bas Pustaka. Tapi e banci saja terjadi. Kalak si enggo ertobat e enggo erban masalah bas runggun janah banci saja mela banna piga-piga turang senina bas runggun. Selain si e, lit turang senina si erjuang gelah tetap bersih lagu langkahna. Emaka, banci saja la kapna adil adi kalak si enggo ertobat e banci mulihi ialoken bas runggun. (Bandingken Lukas 15:​28-30.) Amin gia bage, arus icidahken runggun maka tuhu-tuhu kelengina kalak si enggo ertobat e. Engkai?

10-11. Kai si banci terjadi adi pertua la nggit ngampuni kalak si enggo ertobat e?

¹⁰ Bayangken uga perasan kalak si ertobat e adi la pediat pertua ia mulihken ku runggun, ntah adi turang senina bas runggun la nggit ncidahken kekelengen man bana kenca ia mulihken jadi umat Jahwe. Banci dungna “nyerah ia perban sedihsa kapna.” Banci dungna ia putus asa seh asa lanai ia nggit mpekena hubungenna ras Dibata.

¹¹ Si parahna ka, adi lit turang senina si la nggit ngaloken kalak si ertobat e, hubungen kalak e ras Jahwe banci dungna terancam. Engkai? Perban, la usihna sipat Jahwe si nggit ngampuni. Tapi, iusihna sipat Setan si kejam ras la perkuah. Nggit kalak e igunaken Setan erban kalak si ertobat ndai la semangat ngelayani Jahwe.—2 Kor. 2:​10, 11; Ep. 4:27.

12. Uga runggun i Korinti banci ngusih Jahwe?

¹² Uga runggun i Korinti banci ngusih Jahwe, labo ngusih Setan? Alu ngusih perbahanen Jahwe man kalak si ertobat. Cuba perdiateken kai si ikataken piga-piga penulis Pustaka kerna Jahwe. Nina Daud, “Mehuli kap Kam janah nggit ngampuni.” (Ms. 86:5) Nina Miha, “Lit kin Dibata si bagi Kam, si ngampuni kesalahen janah ngelupaken pelanggaren?” (Mi. 7:18) Jesaya pe ngataken, “Mbera-mbera kalak jahat robah arah perbahanenna bage pe arah perukurenna si jahat. Mbera-mbera mulihken kalak e ku Jahwe, si rate mekuah man bana, sebap tuhu-tuhu pagi ampuniNa kalak e.”—Jes. 55:7.

13. Engkai maka keputusen guna mis ngaloken kalak si ertobat eme keputusen si benar? (Nen kotak “ Ndigan nge Kalak si Ngelakoken Dosa Serius i Korinti e Ialoken Mulihi?”)

 ¹³ Bali bagi Jahwe, runggun i Korinti arus ngalo-ngalo kalak si ertobat e janah ipetetap kalak e ukurna maka keleng ate kalak e man bana. Ikataken Paulus maka adi bage ban kalak e, e buktina maka ‘patuh kalak e bas kerinana.’ (2 Kor. 2:9) Memang, kalak si ertobat e mbaru denga ipedarat arah runggun piga-piga bulan dekahna. Tapi, disiplin si alokenna enggo berhasil erban ia robah. Emaka labo lit gunana adi pertua-pertua tertaren-taren guna ngaloken kalak si ertobat e mulihken ku runggun.

NGUSIH SIPAT JAHWE SI ADIL RAS PERKUAH

14-15. Kai si banci sipelajari arah cara ndungi masalah bas runggun i Korinti? (2 Petrus 3:9) (Nen ka gambar.)

¹⁴ Cara ndungi masalah bas runggun i Korinti situhuna icatat bas Pustaka “guna ngajari kita.” (Rom. 15:4) Arah cataten e, erlajar kita maka la ipediat Jahwe lit kalak si ngelakoken dosa si serius i tengah-tengah umatNa. Banci saja lit si erpengakap maka perban Jahwe perkuah, labo kapNa dalih kalak si la ertobat e tetap bergaul ras umatNa si setia. Tapi situhuna, amin pe Dibata Jahwe perkuah, labo banci kita rate-ate, janah patokenNa  kerna kai si benar ras si salah la pernah berubah. (Jud. 4) Adi pediat Jahwe kalak si ngelakoken dosa e tetap bas runggun, situhuna labo Ia perkuah, perban e banci mbahayaken kerina umatNa si setia bas runggun e.—Kua. 13:20; 1 Kor. 15:33.

¹⁵ Arah cataten e, erlajar ka kita maka ate Jahwe ula min sekalak pe ikernepken. Ate Jahwe adina banci kerina min kalak selamat. Mekuah ate Jahwe man kalak si nggit ertobat ras mpekena mulihi hubungenna ras Ia. (Esek. 33:11; baca 2 Petrus 3:9.) Emaka sanga kalak bas runggun i Korinti e ertobat ras lanai ngelakoken dosana, ibereken Jahwe petunjuk arah Paulus maka turang senina bas runggun e arus nggit ngampuni ras ngaloken mulihi kalak si enggo ertobat e.

16. Uga nge perasanndu kenca sibahas kerna uga carana masalah bas runggun i Korinti idungi?

¹⁶ Kenca sibahas kerna carana masalah bas runggun i Korinti idungi, banci siteh maka Jahwe e perkeleng, benar, ras adil. (Ms. 33:5) Pasti teriahken kita guna muji Dibatata. Selaku manusia si erdosa, kerina kita perlu pengampunen arah Jahwe nari. Emaka ngata bujur kita perban bere Jahwe tebusen si erban dosata banci iampuni. Jelas me, keleng kel ate Jahwe kita janah ateNa mereken si mehulina man banta. Si e pasti erban kita terapuli ras terpegegehi.

17. Kai si nandangi sibahas bas artikel berikutna?

¹⁷ Uga masalah kerna dosa serius idungi bas jamanta gundari? Uga pertua ngusih Jahwe ras nampati kalak si ngelakoken dosa guna ertobat? Uga arusna tanggapen runggun sanga iputusken pertua mpedarat sekalak jelma arah runggun ntah pe ngaloken ia mulihi? Sibahas kari kerna si e bas artikel-artikel berikutna.