Itulis Rasul Paulus man kalak Kristen i Tesalonika bagenda, “Adi lit kalak si la patuh man petunjuk si lit bas surat enda, banlah tanda man kalak si bage.” (2 Tes. 3:​14, bage pe cataten i teruh.) Bas pengangkanta sedekah enda, pertua me si erban tanda man kalak si bage. Adi lit kalak si la nggit ndalanken prinsip Pustaka amin pe enggo mulih-ulih ipersingeti, banci saja iban pertua khotbah guna mpersingeti runggun. Kenca si e, perberita bas runggun lanai nggit ergaul ras kalak si bage.

Tapi, pengangkanta e perlu isesuaiken. Situhuna, nasehat Paulus e iberekenna man tiap kalak Kristen. Emaka pertua labo perlu mpeseh khotbah guna mpersingeti runggun. Engkai maka pengangkanta e perlu isesuaiken? Cuba siperdiateken konteks arah nasehat Paulus e.

Iperdiateken Paulus maka piga-piga turang senina bas runggun e “la tertip.” La kalak e nggit ndalanken nasehat si rehna arah Dibata. Bas kunjungen Paulus sebelumna, ikatakenna man kalak e, “Ise pe si la nggit erdahin, ula ia man.” Tapi, piga-piga arah kalak e tetap la nggit erdahin padahal banci nge ia erdahin. Kalak e pe ikut campur bas urusen kalak si deban. Uga nge arusna perbahanen kalak Kristen man kalak si la tertip e?—2 Tes. 3:​6, 10-12.

Nina Paulus, “Banlah tanda man kalak si bage.” Menurut kata Junanina, e ertina arus siteh ise kalak si bage janah siteh maka banci berekenna pengaruh si la mehuli man banta. Petunjuk e ibereken Paulus man kerina turang senina bas runggun, labo man pertua saja. (2 Tes. 1:1; 3:6) Emaka, adi lit kalak si la tertip janah la nggit ndalanken nasehat arah Kata Dibata, tiap kalak Kristen si metehsa pilihna me guna ‘lanai erteman’ ras ia.

Seri nge perbahanenta man bana ras man kalak si ipedarat arah runggun? Lang, perban nina Paulus, “Teruslah persingeti ia selaku turang senina.” Emaka, banci denga kita ergaul ras ia bas perpulungen bage pe bas pelayanen. Tapi, tiap kalak banci erban keputusen guna lanai ergaul ras ia bas kesempaten si deban si sipatna sosial. Engkai? Gelah “mela kapna,” nina Paulus. Perban bage ia iperlakoken, turang senina si la tertip e banci dungna mela janah robah.—2 Tes. 3:​14, 15.

Gundari, uga carata ndalanken nasehat Paulus e? Perlu sipastiken maka perbahanenna memang tuhu-tuhu “la tertip,” bagi si ikataken Paulus. Kalak si imaksud Paulus i jenda labo kalak si la seri pusuh peratenna ntah pe selerana ras kita. Si imaksud Paulus pe labo kalak si erban kitik ukurta. Tapi, maksud Paulus eme kalak si sengaja la nggit ndalanken nasehat arah Kata Dibata.

Emaka, adi siteh lit turang seninata si lalap la nggit ndalanken nasehat bas Kata Dibata, a banci siban keputusen pribadi guna lanai ergaul ras ia bas kesempaten si sipatna sosial. Perban enda keputusen pribadi, emaka la perlu sibahas ras kalak si deban selain keluargata. Kita pe tetap denga ergaul ras ia sanga perpulungen bage pe sanga pelayanen. Janah, adi enggo robah ia, ergaul ka kita bagi biasa ras ia.