1-2. (a) Uga Setan nipu manusia? (b) Kai si man bahasenta bas artikel enda?

SETAN, “bapak kalak si perbual,” nggo nipu manusia mulai jaman Adam ras Hawa. (Joh. 8:44) Piga-piga bualna eme ajaren si salah kerna keadan kalak mate bage pe kerna lit tendi kalak si nggo mate. Melala adat ras kebiasan si gundari, lit perban ajaren-ajaren si salah e. Dungna, lit piga-piga turang seninata si arus ‘mperjuangken kinitekenna’ sanga mate keluargana ntah pe kalak bas sada kutana.​—Jud. 3.

² Enggo itehndu ajaren Pustaka kerna kalak mate. Emaka, sanga ipaksa kam ngikuti kebiasan si salah, uga carana gelah tetap kam setia? (Ep. 6:11) Kai si banci ilakokenndu guna ngapuli ras mpegegehi turang seninata si banci jadi ipaksa guna ngikuti adat si la ngena ate Dibata? Bas artikel enda sibahas kari petunjuk si ibereken Jahwe guna nampati kita. Si pertama, mari sibahas kai nina Pustaka kerna kalak mate.

3. Kai nge akibat bual Setan si pertama?

³ Labo sura-sura Dibata manusia mate. Tapi gelah banci nggeluh si rasa lalap, manusia arus patuh man Jahwe. Enggo iberekenNa perentah si menukah enda man Adam ras Hawa, “Kerina buah batang kayu si lit i bas peken enda banci ipanndu, seakatan buah batang kayu si mereken pemeteh kerna si bujur ras si jahat. Buah batang kayu e la banci ipanndu; adi ipanndu, la banci lang mate kam i bas wari e.” (Kej. 2:16, 17) Kenca si e, iban Setan me masalah. Nina man Hawa erkelangken nipe, “Labo tuhu e, labo kam mate.” Tek Hawa man bual e janah ipanna buah  ndai. Kenca si e, perbulangenna pe ikut manca. (Kej. 3:4, 6) Dungna, kerina manusia erdosa janah mate.​—Rom. 5:12.

4-5. Uga cara Setan terus nipu manusia?

⁴ Mate me Adam ras Hawa bagi si nggo ikataken Dibata. Tapi Setan terus erbual kerna kematen. Janah ibanna ka bual si deban. Salah sadana eme ajaren maka kenca sekalak jelma mate, tendina nggeluh denga janah jadi begu. Kerina bual si bage rupana nggo erban nterem kel jelma tertipu seh asa gundari.​—1 Tim. 4:1.

⁵ Engkai maka banci bage? Iteh Setan uga perasanta nandangi kematen, emaka igunakenna perasanta e guna nipu kita. Perban kita iciptaken guna nggeluh si rasa lalap, emaka la kita nggit mate. (Peng. 3:11) Kematen eme musuhta.​—1 Kor. 15:26.

6-7. (a) Berhasil nge Setan mbuniken kebenaren kerna kalak mate? Jelasken. (b) Engkai maka kebenaren Pustaka erban kita lanai mbiar man kalak mate?

⁶ Amin gia erusaha kel Setan nipu manusia, tapi kebenaren kerna kematen la terbuniken. Gundari, nterem kel kalak si nggo meteh janah mberitaken ajaren Pustaka kerna keadan ras arapen man kalak mate. (Peng. 9:5, 10; Perb. 24:15) Kebenaren e ngapuli kita janah erban kita lanai mbiar ras sangsi kerna uga keadan kalak mate. Misalna, la kita mbiar man kalak mate, janah la kita mbiar terjadi kai si la mehuli man kalak si ikelengi kita si nggo mate. Siteh maka kalak e lanai lit i japa pe emaka la banci gangguna ise pe. Kalak e bali bagi kalak si ntabeh kel perpedemna. (Joh. 11:11-14) Siteh ka maka kalak mate la itehna asa kai dekahna ia nggo mate. Emaka sanga kalak e ipekeke, aminna pe nggo ratusen tahun ia mate, tempa edenga kel akapna ia mate.

⁷ Pasti setuju kam maka kebenaren kerna keadan kalak mate e jelas, sederhana, ras masuk akal. Enda beda kel ras bual Setan si erban kita bingung! Selain erban kalak tertipu, bual e pe ncedai gelar Dibata. Gelah lebih siangkai akibat arah bual Setan, mari sibahas penungkunen enda: Uga maka banci bual Setan ncedai gelar Jahwe? Uga bual e erban kalak erpengakap maka labo lit gunana tek man korban tebusen Kristus? Uga bual e erban kalak reh sedihna janah reh susahna?

8. Menurut Jeremia 19:5, ngkai maka bual Setan kerna kalak mate ncedai gelar Jahwe?

⁸ Bual Setan kerna kalak mate ncedai gelar Jahwe. Si termasuk i bas bual e eme ajaren si salah si ngataken maka isiksa Dibata kalak mate i bas api neraka. Ajaren e tuhu-tuhu ncedai gelar Dibata! Engkai? Perban ajaren e, tek kalak maka Dibata si perkeleng seri kejamna ras Iblis. (1 Joh. 4:8) Uga perasanndu kerna si e? Si terpentingen, uga perasan Jahwe? Pasti la Jahwe senang perban segat ateNa kerina perbahanen si kejam.​—Baca Jeremia 19:5.

9. Perban bual Setan, uga nge pengakap kalak kerna korban tebusen Kristus si icatat bas Johanes 3:16 ras 15:13?

⁹ Bual Setan kerna kematen erban kalak erpengakap maka labo lit gunana tek man korban tebusen Kristus. (Mat. 20:28) Bual Setan si deban eme lit tendi kalak mate. Adi tuhu kin bage, kerina manusia banci nggeluh rasa lalap janah la perlu Kristus mate guna nebus kita. Ingetlah maka korban tebusen Kristus eme bukti kekelengen si mbelinna man manusia. (Baca Johanes 3:16; 15:13.) Cuba bayangken uga perasan Jahwe ras Jesus nandangi ajaren si erban pemere si meherga e lanai lit gunana!

10. Engkai maka bual Setan kerna kematen erban kalak reh sedihna janah reh susahna?

¹⁰ Bual Setan erban kalak reh sedihna janah reh susahna. Sanga lit orang tua si erceda ate perban mate anakna, banci saja lit si ngataken maka nggo idilo Dibata anakna e guna jadi malekat i surga. Terapuli nge kalak e ntah reh sedihna iakapna? Ajaren salah si deban eme api neraka, janah ajaren e iban jadi alasen maka labo salah niksa kalak. Misalna, lit kalak si itutung bas tiang perban itentangna ajaren gereja. Menurut sada buku kerna Inkuisisi Spanyol, eme dewan pengadilen Katolik, kalak si ngelakoken perbahanen si kejam e tek maka adi kalak si nentang e itutung, banci “itehna uga kin nanamna itutung rasa lalap bas api neraka.” Ate kalak e ertobat min ia sope ia mate gelah la masuk ku api neraka. Bas piga-piga negeri, lit kalak si erpengakap maka arus isembahna nini-bulangna si nggo mate, ihormatina, ntah pe ipindona pasu-pasu arah kalak e. Lit ka si mereken pangan ntah si debanna gelah tenang kalak si nggo mate e. Tapi sayangna, kalak si tek man bual Setan e labo tuhu-tuhu terapuli, malahen jadi kuatir ntah pe mbiar.

11. Kai nge si banci saja ilakoken keluarga ntah pe temanta guna maksa kita gelah la ngikutken Kata Dibata?

¹¹ Adi keleng ateta Dibata bage pe Pustaka, banci kita tetap patuh man Jahwe amin gia lit keluarga ntah pe temanta si mehuli nge ukurna maksa kita ngelakoken kebiasan kerna kalak mate si la sue ras Pustaka. Banci saja ipermelakenna kita, ikatakenna maka la keleng ateta ntah pe la siergai kalak si nggo mate e. Entah pe ikatakenna maka perbahanenta e banci erban kalak si mate e ngganggu kalak si nggeluh denga. Uga kita banci mbela kebenaren si lit bas Pustaka? Mari sibahas uga carana ndalanken patoken Pustaka enda.

12. Kebiasan kai saja nge si lit hubungenna ras kalak mate si la sue ras Pustaka?

¹² ‘Pisahkenlah dirindu’ arah ajaren ras adat si la sue ras Pustaka. (2 Kor. 6:17) Bas sada negeri i Karibia, nterem  si tek maka kenca sekalak jelma mate, “begu”-na nggeluh denga janah iukumna kalak si pernah jahat man bana. Menurut sada referensi, “begu” e pe banci “erban masalah man jelma si nterem.” Bas Afrika, lit kebiasan nutupi kerina curmin si lit i rumah kalak si nggo mate janah mbalikken potona ku dingding. Engkai? Menurut kalak e gelah ula inen kalak si nggo mate e dirina! Selaku umat Jahwe, pasti la kita tek man cerita si bage rupana janah la kita nggit ikut bas kebiasan si ndukung bual Setan!​—1 Kor. 10:21, 22.

13. Adi sangsi kam kerna adat tertentu, kai nge si arus ilakokenndu bagi si ikataken bas Jakup 1:5?

¹³ Adi sangsi kam kerna adat ntah pe kebiasan tertentu, ertotolah man Jahwe janah pindolah kepentaren. (Baca Jakup 1:5.) Kenca si e risetlah kam. Adi perlu, sungkunlah pertua bas runggunndu. Labo ikatakenna kai si arus ilakokenndu, tapi banci sampatina kam ndarami patoken Pustaka si cocok, bagi si ibahas i jenda. Adi ilakokenndu e, terlatih me ‘kengasupen rukurndu’ janah e banci nampati kam “mbedaken kai si benar ras kai si salah.”​—Heb. 5:14.

14. Kai saja carana gelah ula siban kalak tertuktuk?

¹⁴ ‘Lakokenlah kai pe guna kemulian Dibata. Ula sempat kena bali bagi batu si erban kalak tertuktuk.’ (1 Kor. 10:31, 32) Sanga erban keputusen ateta kerna ikut ntah lang bas adat ntah pe kebiasan tertentu, arus ka siukuri kai pengaruh keputusenta e nandangi pusuh peraten kalak si deban, khususna turang seninata si sada kiniteken. Pasti la kita nggit erban kalak tertuktuk! (Mrk. 9:42) Selain si e, la kita nggit erban kitik ukur kalak si la sada kiniteken ras kita. Perban keleng ateta kalak e, mehamat kita ngerana man bana gelah Jahwe imuliaken. Tentu la kita nggit sitahanen ras kalak e janah la sipandangi adatna. Ingetlah, kekelengen e mbelin kel pengaruhna! Adi sikelengi, siperdiateken janah mehamat kita man kalak si nentang kita, banci saja erkusur me dungna ukurna.

15-16. (a) Engkai maka mehuli adi jelaskenndu kinitekenndu man kalak si deban? Ceritaken contohna. (b) Uga carata ndalanken kata-kata Paulus bas Roma 1:16?

¹⁵ Petandakenlah man kalak maka kam sekalak Saksi Jahwe. (Jes. 43:10) Sanga  lit keluargandu si mate, banci saja merawa kel keluarga ras kade-kadendu adi la kam ikut bas adat tertentu. Tapi adi mbarenda nari nggo tehna kerna kinitekenndu, reh nukahna me kapndu ngadapi situasi si bage. Francisco, si tading i Mozambik, ngataken, “Sanga aku ras ndeharaku, Carolina, erlajar Pustaka, ikataken kami man keluarga kami maka kami lanai nembah kalak mate. Tapi sanga mate kakak Carolina, enda jadi tantangen man kami. Bas adat i daerah kami, lit upacara mperidiken mayat. Kenca si e keluarga si ndeherna kel arus medem telu wari dekahna bas ingan lau peridin e iamburken. Tujunna gelah tendi kalak si nggo mate e jadi tenang. Iarapken keluarga Carolina gelah medem ia bas ingan e.”

¹⁶ Kai si ilakoken Francisco ras ndeharana? Nina Francisco, “Perban keleng ate kami Jahwe janah ate kami erban meriah ukurNa, la kami nggit ngelakokenca. Emaka merawa kel keluarga Carolina. Ikataken kalak e maka la iergai kami kakak kami e. Janah ikataken kalak e maka lanai kalak e nggit nampati ras ndahi kami. Perban nggo pernah ijelasken kami kiniteken kami, lanai perlu ibahas kami kerna si e sanga kalak e merawa. Lit ka kade-kade si mbela kami, ikatakenna maka nggom pernah ijelasken kami kerna si e. Dungna lanai merawa keluarga Carolina janah meriah ka kami mulihi. Lit ka si reh ku rumah kami mindo buku-bukuta.” Mbera ula pernah kita mela mbela kinitekenta kerna kematen.​—Baca Roma 1:16.

17. Kai si banci nampati kita gelah jadi teman sanga lit turang seninata si erceda ate?

¹⁷ Sanga lit turang seninata si erceda ate, arus kita erusaha gelah jadi ‘teman si ikut bas nggejapken kiniseran.’ (Kua. 17:17) Uga carana jadi “teman” si bage, khususna adi turang seninata si erceda ate e ipaksa ngelakoken kebiasan si la sue ras Pustaka? Mari sibahas dua pedah Pustaka si banci nampati kita ngapuli kalak si erceda ate.

18. Engkai maka tangis Jesus, janah kai pelajarenna man banta?

 ¹⁸ “Tangislah ras kalak si tangis.” (Rom. 12:15) Banci saja la siteh kai si man katanken man kalak si sangana erceda ate. Tapi adi tangis kita, itehna me maka ermediate kita man bana. Sanga mate teman Jesus eme Lasarus, tangis me Maria, Marta ras kalak si debanna perban turang ras teman si ikelengi kalak e nggo lanai lit. Empat wari kenca si e reh me Jesus, janah “tangis” ia, amin gia itehna nandangi ipekekena nge Lasarus. (Joh. 11:17, 33-35) Perban tangis Jesus, banci siteh maka Jahwe pe sedih nge kapNa sanga mate Lasarus. Banci ka iteh keluarga e maka keleng kel ate Jesus kalak e sanga idahna Jesus tangis. Pasti terapuli kel Maria ras Marta. Bage ka pe, sanga igejapken turang seninata kekelengenta, itehna me maka labo ia sisada tapi lit teman-temanna si mperdiateken ras ndukung ia.

19. Uga carata ndalanken Pengerana 3:7 sanga ngapuli turang seninata si erceda ate?

¹⁹ “Paksa sinik bage pe paksa ngerana.” (Peng. 3:7) Cara si deban guna ngapuli turang seninata si sangana erceda ate eme alu nggit megiken ia. Begikenlah sanga iturikenna uga perasanna, janah ula kitik ukurta adi lit rananna si la iukurina lebe. (Jop 6:1-3) Banci saja stres kel ia perban itentang keluargana si la Saksi. Raslah kena ertoto. Pindolah man “Si Megiken pertoton” gelah ipegegehiNa ia janah ipetenangNa pusuhna. (Msm. 65:3) Adi banci, raslah kena mbaca Pustaka, ntah pe mbaca artikel si cocok arah buku-bukuta, misalna artikel pengalamen nggeluh si banci mpegegehi ia.

20. Kai si man bahasenta bas artikel seterusna?

²⁰ Ngata bujur kel kita perban siteh kebenaren kerna kalak mate ras arapen si luar biasa man kalak si lit bas kuburen! (Joh. 5:28, 29) Emaka, arah ranan bage pe perbahanenta, panglah kita mbela kebenaren Pustaka ras nceritakenca tiap lit kesempaten si cocok. Bas artikel seterusna, sibahas kari cara si deban si igunaken Setan gelah la iteh kalak kebenaren, eme alu spiritisme. Sibahas ka ngkai maka arus sipedauh kebiasan ras hiburen si lit hubungenna ras jerat Setan e.