Turang Senina Winston, banci tolong ceritakenndu uga carana kam ndarami Dibata?

Aku ipebelin bas keluarga si la tutus erdibata. Keluarga kami tading bas sada peternaken si terpencil i Queensland, Australia. Emaka, jarang aku jumpa ras kalak si deban. Sanga umurku 12 tahun, mulai kudarami Dibata. Ertoto aku gelah sampati Dibata ngangkai kebenaren kerna Ia. Dungna lawes aku arah peternaken nari, janah erdahin i Adelaide, Australia Selatan. Sanga umurku 21 tahun, gawah-gawah aku ku Sydney. I je, sitandan aku ras Pam, janah iceritakenna man bangku kerna kelompok agama Inggris-Israel. Kelompok e tek maka kalak Inggris eme keturunen suku-suku Israel si nggo lanai lit iakap kalak. Ikataken kelompok e ka maka suku-suku e eme sepuluh suku arah kerajan utara si itaban bas abad si pewaluhken Sope Masehi. Emaka, sanga mulih aku ku Adelaide, kubahas kerna si e ras sekalak temanku erdahin si sangana erlajar Pustaka ras Saksi Jahwe. Piga-piga jam ngenca kami ercakap-cakap, khususna kerna kiniteken Saksi Jahwe. Tapi mis kusadari maka totoku sanga kitik mbarenda nggo terjawap. Kuteh me kebenaren kerna Pencipta ras KerajanNa! Kudat me “mutiara si seh kel ergana.”​—Mat. 13:45, 46.

Turang Senina Pam, sanga kam nguda denga pe nggo mulai daramindu mutiara e. Uga nge carandu ndatkenca?

Aku ipebelin bas keluarga si tutus erdibata i kota Coffs Harbour, New South Wales. Orang tuaku bage pe orang tua arah mamakku tek man ajaren kelompok Inggris-Israel. Kitik-kitik nari, aku, agiku si dilaki, kakakku, ras nterem turang seninaku sipemeren nggo iajari maka ngena ate Dibata man kalak keturunen Inggris. Tapi la aku setuju ras ajaren e janah la kuakap  ndeher aku ras Dibata. Sanga umurku 14 tahun, kudahi gereja-gereja si lit bas daerahku, termasuk Gereja Anglikan, Baptis, ras Adven Hari Ketujuh. Tapi lalap lenga kutandai Dibata.

Bas pudi wari, pindah keluargaku ku Sydney. I je, jumpa aku ras Winston si sangana gawah-gawah. Bagi si iceritakenna ndai, perban ibahas kami kerna agama, dungna erlajar ia ras Saksi Jahwe. Kenca si e, tiap ngirim surat ia bangku, pasti melala kel banna ayat! Jujur saja, tangtangna kuatir aku janah merawa teku. Tapi reh dekahna, sadar me aku maka si itulisna e eme kebenaren.

Tahun 1962, pindah aku ku Adelaide gelah reh deherna ras Winston. Iaturkenna gelah banci aku tading ras sepasang Saksi si gelarna Thomas ras Janice Sloman. Kalak e pernah ngelayani jadi utusen injil i Papua Nugini. Mehuli kel kalak e bangku. Sanga si e, umurku 18 tahun denga janah isampati kalak e aku nandai Jahwe. Emaka, aku pe mulai erlajar Pustaka, janah la ndekah kenca si e tek aku maka nggo kudat kebenaren. La ndekah kenca aku ras Winston erjabu, mulai kami ngelayani sepenuh waktu. Melala kel dat kami pasu-pasu arah pelayanen kami. Janah amin gia melala masalah si man adapen kami, pelayanen e erban lebih iergai kami “mutiara si seh kel ergana” si nggo idat kami.

Turang Senina Winston, banci tolong ceritakenndu kerna tahun-tahun pertama bas pelayanenndu?

La ndekah kenca kami erjabu, ibereken Jahwe man kami “kesempaten si mbelin” guna ngelayani terbuen. (1 Kor. 16:9) Kesempaten si pertama eme sanga runggun kami si kitik ikunjungi pertua keliling si gelarna Jack Porter. (Gundari ras-ras kami ngelayani jadi anggota Panitia Cabang Australasia.) Jack ras ndeharana, Roslyn, ngiahken kami guna jadi perintis biasa. Sempat kami 5 tahun dekahna merintis. Kenca si e, sanga umurku 29 tahun, ipindoken aku ngelayani jadi pertua keliling i Kepulauan Pasifik Selatan, si iawasi kantor cabang Fiji paksa si e. Si termasuk bas kepulauan e eme Kiribati, Nauru, Niue, Samoa Amerika ras Samoa, Tokelau, Tonga, Tuvalu, ras Vanuatu.

Sanga si e, bas piga-piga pulau si terpencil, curiga kalak ernin Saksi Jahwe, emaka arus kami hati-hati janah iusahaken kami gelah ula iperdiateken kalak kel kami. (Mat. 10:16) Runggun-runggun i je kitik, janah piga-piga runggun la banci nikapken ingan erberngi man kami. Emaka erberngi kami bas rumah anak kuta e, janah lalap kalak e mehuli man kami.

Menarik kel kapndu dahin penerjemahen me. Kai si erban kam tertarik?

Sanga mulai kami ngelayani i negara kepulauan Tonga, si lit bas turang seninata eme piga-piga risalah ngenca ras buku kecil bas bahasa Tonga, eme salah sada bahasa i Polinesia. Guna nampati kalak erlajar Pustaka, ipake kalak e buku Kebenaran yang Membimbing kepada Hidup yang Kekal bas bahasa Inggris. Emaka, sanga lit sekolah pertua si dekahna empat minggu, lit telu pertua i je si nggit nerjemahken buku e ku bahasa Tonga, amin gia labo iangkaina kel bahasa Inggris. Pam si ngetik terjemahenna, kenca si e ikirimken kami e ku kantor cabang Amerika Serikat guna icetak. Dung me proyek e kira-kira waluh minggu dekahna. Aminna pe hasil terjemahenna labo mejile kel, nterem kalak si make bahasa Tonga banci meteh kebenaren arah buku e. Pam ras aku labo penerjemah, tapi pengalamen e erban kami tertarik man dahin penerjemahen.

Turang Senina Pam, uga nge kapndu nanamna tading bas pulau? Beda nge i je ras Australia?

Seh kel bedana! Bas piga-piga ingan melas kel janah lembap, melala ka rengit ras menci. Selain si e, mon-mon sakit kami janah la bias pangan kami. Amin gia bage, tiap berngi, banci tatap kami pemandangen laut arah fale, eme rumah khas Polinesia bas bahasa Samoa, si ratapken jerami janah la lit dingdingna.  Mon-mon, sanga terang bulan, banci idah kami bayangen bulan i laut ras batang tualah. Nantang ngalah-ngalah kami ngidah pemandangen si mejile e. E pe ngiahken kami rukur janah ertoto. Dungna fokus kami man kai si positip, labo si negatip.

Ngena kel ate kami anak-anak i je. Kalak e lucu janah mamang atena ngidah kalak si mbentar bagi kami. Sanga reh kami ku Niue, lit sada anak dilaki si njemak bulu tan Winston janah nina, “Mejile kel bulundu.” Pasti lenga pernah idahna tan kalak si bage kel lalana buluna, emaka mamang atena!

Mekuah kel kap kami ngenen kalak i je perban mesera kel pergeluhna. Mejile kel daerah kalak e, tapi la lit ingan si banci nampati kalak e ngurus kesehatenna janah mesera ndatken lau inemen i je. Tapi, turang seninata la kuatir. Enggo biasa kap kalak e keadan si bage. Asal lit denga lah keluargana, ingan perpulungen, ras banci denga ipujina Jahwe, tetap kalak e ermeriah ukur. Usihen kalak e erban kami lalap ngutamaken kai si pentingna bas geluh kami janah nggeluh sederhana.

Turang Senina Pam, mon-mon arus ibuatndu sendiri lau janah isikapkenndu pangan alu cara si la nggo pernah ilakokenndu. Uga nge carandu ngelakokenca?

Ngata bujur kel aku perban nggo iajari bapakku aku piga-piga hal si erguna. Misalna, cara erban api unggun janah erdakan i je. Iajarina ka aku carana gelah tetap nggeluh aminna pe sitik ngenca barang-barang. Bas sada waktu, sanga ku Kiribati kami, tading kami bas sada rumah si kitik si ratapken jerami, dingdingna tepas, janah lantena iban arah batu-batu karang si kitik ras kersik. Gelah banci erdakan, arus kukurak lubang i lante guna erban api. Bahan bakarna eme sabut tualah. Adi muat lau ateku, arus aku antri i sumur ras diberu-diberu bas kuta e. Guna muat lau, ipake kalak e tongkat si gedangna kira-kira dua meter janah bas ujungna iiketken nali si menipes, bali bagi nali guna ngkawil. Tapi bas ujung nali e, labo kawit si ipasang kalak e, tapi kaleng. Pegancih kalak e mbenterken nalina ku bas sumur, janah igoyangkenna tanna bas waktu si tepat. Terbalik me kaleng e janah masuk me lau. Kuakap menukah ngelakokenca, tapi sanga kucubaken, mesera kepe. Kubenterken naliku piga-piga kali, tapi kaleng e lalap la terbalik! Itawai kalak e aku, tapi kenca si e lit sada diberu si nggit nampati aku. Mehuli kel kalak bas kuta e janah nggit nampati.

Pasti meriah kel iakap kena ndalanken tugas bas pulau-pulau e. Banci nge ceritaken kena piga-piga pengalamen si lalap inget kena?

Winston: Perlu waktu man kami gelah tuhu-tuhu iangkai kami budaya tertentu. Misalna, sanga iundang turang senina kami man, biasana ibereken kalak e kerina pangan si lit bas ia. Tangtangna, la iteh kami maka arusna la banci keriken kami kerina pangan e. Emaka ipan kami kerina! Tapi bas pudi wari, kenca iteh kami kebiasan i je, lanai keriken kami pangan e gelah lit man kalak e. Amin gia mon-mon la iangkai kami budaya kalak e, tapi labo masalah iakap turang seninata. Janah meriah kel ukur kalak e jumpa ras kami sanga reh kami selaku pertua keliling kira-kira enem bulan sekali. La pernah kalak e jumpa ras Saksi arah runggun si deban selain kami.

Kerehen kami pe jadi kesaksin si mehuli man kalak i je. Enterem anak kuta si erpengakap maka agama turang seninata e eme agama si iban kalak e sendiri. Tapi sanga idah anak kuta e kami, si reh luar negeri nari guna ndahi turang seninata, lanai kalak e salah paham janah luar biasa kel iakapna.

Pam: I Kiribati, lit sada pengalamen si lalap kuinget. I je, lit sada runggun si sitik ngenca turang seninata. Pertuana pe sada, eme Itinikai Matera. Erusaha kel ia ngurus kebutuhen kami. Bas sada wari, reh ia maba raga si isina sada telur. Nina, “Enda man kena.” Paksa si e, jarang kel dat kami telur manuk. Ngandung ate kami perban nggit ia mere amin gia sitik ngenca si banci iberekenna.

 Turang Senina Pam, piga-piga tahun kenca si e, ibegi kami keguguren kam. Uga nge carandu ngadapisa?

Tahun 1973, hamil aku. Paksa si e, aku ras Winston sangana i Pasifik Selatan. Iputusken kami mulih ku Australia. Empat bulan kenca si e, keguguren aku. Getem kel pusuh Winston perban mate bayi kami. Reh dekahna, lanai bagi si mbarenda kel kuakap sedihna. Tapi, tuhu-tuhu lanai sedih iakap kami sanga baca kami Menara Pengawal 15 April 2009. Bas artikel “Pertanyaan Pembaca” lit penungkunen enda: “Apakah ada harapan kebangkitan bagi bayi yang meninggal dalam kandungan ibunya?” Artikel e mpetetap ukur kami maka Jahwe nge pagi si mutuskenca janah pasti lalap ilakokenNa kai si benar. IpepalemNa me pagi kerina luka si inanami kita perban nggeluh bas doni si jahat enda. IsuruhNa ka AnakNa gelah “ngkernepken pendahin” Setan. (1 Joh. 3:8) Artikel e pe erban lebih iergai kami “mutiara si seh kel ergana” si lit bas kita selaku umat Jahwe! Adi la lit arapen arah Kerajan Dibata, pasti la kita ngasup ngadapi kerina masalahta.

Kenca mate bayi kami, mulai ka kami ngelayani sepenuh waktu. Ngelayani kami i Betel Australia piga-piga bulan dekahna, janah dungna Winston mulihken ka jadi pertua keliling. Tahun 1981, kenca empat tahun ngelayani bas kuta-kuta i New South Wales ras Sydney, iundang kami ngelayani bas kantor cabang Australia, si gundari gelarna kantor cabang Australasia. Terus kami ngelayani i je seh ngasa gundari.

Turang Senina Winston, lit nge gunana pengalamenndu i Kepulauan Pasifik Selatan bas dahinndu selaku anggota Panitia Cabang Australasia?

Melala kel gunana man bangku. Mbarenda, kantor cabang Australia ngawasi Samoa Amerika ras Samoa. Kenca si e, kantor cabang Selandia Baru igabungken ras kantor cabang Australia, janah igelari kantor cabang Australasia. Gundari, wilayah si iawasi cabang e termasuk Australia, Kepulauan Cook, Niue, Samoa Amerika ras Samoa, Selandia Baru, Timor-Leste, Tokelau, ras Tonga. Sada kehamaten man bangku ndahi melala pulau e selaku wakil cabang. Perban pernah aku kerja sama ras turang senina bas pulau-pulau e, banci kulayani kalak e arah kantor cabang alu cara si terulin.

Kesimpulenna, ateku ngataken maka mbarenda nari, Pam ras aku sadar maka labo kalak dewasa saja ngenca si ndarami Dibata. Lit ka anak-anak muda si ndarami “mutiara si seh kel ergana” aminna pe anggota keluargana la ermediate. (2 Raj. 5:2, 3; 2 Kro. 34:1-3) Jelas me, Jahwe e Dibata si perkeleng si ersura-sura gelah kerina jelma, si metua ras si nguda, nggeluh si rasa lalap!

Sanga Pam ras aku mulai ndarami Dibata lebih 50 tahun si nggo lewat, la isangka kami maka banci datken kami kerina enda. Kebenaren e tuhu-tuhu “mutiara si seh kel ergana”! Ate kami terus ncikep alu nteguh mutiara e janah la ngelepaskenca!