BAS jaman Paulus, biasana la lit kapal man penumpang. Gelah banci lawes ku sada ingan alu kapal, arus idarami sekalak jelma lit ntah lang kapal barang si lawes ku ingan si atena idahina e janah isungkunna nggit ntah lang kapal e maba penumpang. (Perb. 21:2, 3) Amin gia lit kapal si la lawes ku ingan si atena idahina e, banci ka nge ia naik kapal e janah nusur ia bas salah sada pelabuhen si isinggahi kapal e. I je, banci daramina kapal si deban si lawes ku ingan si atena idahina.​—Perb. 27:1-6.

Biasana kapal-kapal erlayar bas bulan-bulan tertentu, janah la lit jadwalna si pasti. Banci saja, itunda pelaut-pelaut perdalanenna adi cuaca la mejile ntah pe perban takhayul. Misalna, adi lit idah kalak e bangke kapal si karam i pantai ntah ibegina sora burung gagak si cinep i nali layar, iakap kalak e lit kari terjadi kai si la mehuli. Pelaut-pelaut e pe ngandalken angin, emaka biasana itimai kalak e angin si cocok gelah banci erlayar. Kenca idat sekalak jelma kapal si nggit maba ia, lawes me ia ku pelabuhen, babana barang-barangna, janah timaina pengumumen ndigan kapal e berkat.

Nina sekalak ahli sejarah si gelarna Lionel Casson, “I Roma, la perlu latih kel akap kalak erdalan ku jah ku je i pelabuhen guna ndarami kapal. Pelabuhenna lit i muara Lau Tiber. Bas kota Ostia si la ndauh je nari, lit taneh lapang si ikelilingi kantor-kantor. Melala arah kantor e eme perusahan kargo ntah pe barang i bas erbage pelabuhen nari, misalna arah Narbonne [gundari Prancis], Kartago [gundari Tunisia], . . . ras si debanna. Kalak si atena lawes naik kapal, banci isungkunna saja kantor-kantor e lit ntah lang kapal si lawes ku ingan si atena idahina.”

La melala keri waktu adi naik kapal, tapi lit resikona. I bas perdalanenna selaku utusen injil, piga-piga kali karam kapal si inangkihi Paulus.​—2 Kor. 11:25.