1. Kerina umat Dibata nggit ngelakoken kai, janah ngkai? (Nen gambar bas sampul majalah enda.)

IPERENTAHKEN Jesus Kristus pengikutna, “Laweslah, banlah kalak i bas kerina bangsa jadi murid-muridku.” (Mat. 28:19) Kerina umat Dibata si setia nggit ndalanken perentah e janah nggit mpelajari cara ‘ngelakoken pelayanenna alu tutus.’ (2 Tim. 4:5) Dahin e seh kel perluna janah pentingen asangken dahin si deban, lanai lit waktu tertaren-taren. Tapi, banci saja mesera siakap nggunaken melala waktu bas pelayanenta.

2. Kai saja tantangen i bas ngelakoken pelayanenta?

² Lit ka dahin si deban si penting, si merluken waktu ras gegehta. Banci saja arus erjam-jam kita erdahin bas sada wari gelah banci sicukupi keperlunta ras keluargata. Banci saja arus erusaha kita ngelakoken tanggung jawap si deban bas keluargata. Entah banci saja sakit kita, stres, ntah pe lit masalah kesehatenta perban kita nggo metua. Sanga siadapi keadan si bage, uga carana gelah banci silakoken pelayanenta alu tutus?

3. Kai si banci sipelajari arah kata-kata Jesus bas Matius 13:23?

³ Adi la banci melala waktuta i bas ngelayani Jahwe perban keadanta, ula min kitik ukurta. Iteh Jesus maka labo banci seri lalana ‘buah’ Kerajan si ihasilken tiap kalak. (Baca Matius 13:23.) Iergai Jahwe kel kerina usahata i bas ngelayani Ia adi silakoken si mehulina. (Heb. 6:10-12) Banci saja keadanta gundari erban kita nggo banci mereken terbuen bas pelayanen. Emaka bas artikel enda, mari sibahas uga carana gelah siban pelayanenta jadi si pentingna bas geluhta, uga carana  gelah kegeluhenta tetap sederhana, janah uga carana gelah reh beluhna kita bas erberita ras ngajar. Tapi sibahas lebe, kai maksudna ngelakoken pelayanenta alu tutus.

4. Kai nge ertina ngelakoken pelayanenta alu tutus?

⁴ Intina, ngelakoken pelayanenta alu tutus ertina arus kita erberita ras ngajar asa bancita. Tapi labo jumlah waktu saja si termasuk i je. Alasenta erberita pe penting iakap Jahwe. Perban keleng ateta Jahwe ras kalak si deban, meriah ukurta ngelakoken pelayanenta * asa gegehta. (Mrk. 12:30, 31; Kol. 3:23) Ngelayani Dibata asa gegehta maksudna meriah ukurta nggunaken kerina gegehta i bas ngelayani Ia. Adi siergai tugasta guna erberita, siusahaken kel mberitaken berita si meriah man nterem jelma asa bancita.

5-6. Ceritakenlah contoh uga sekalak jelma si terbatas waktuna banci erban dahin erberita jadi si pentingna bas geluhna.

⁵ Bayangkenlah sekalak anak perana si meriah kel iakapna main gitar. Main gitar saja atena lalap. Bas pudi wari, datna dahin guna main gitar i sada kafe bas akhir pekan. Tapi, sen si idatna la bias man belanjana. Emaka erdahin ia jadi kasir i sada toko bas wari Senin ngayak Jumat. Melala kel waktuna keri bas toko e, tapi tetap nge musik si meriahna kel iakapna. Tiap lit kenca kesempaten aminna pe kentisik, isempatkenna lalap main musik. Atena reh beluhna min ia gelah banci jadi pemain musik.

⁶ Bage ka pe, banci saja la melala waktundu guna erberita. Tapi dahin e me si meriahna iakapndu. Iusahakenndu gelah berita si meriah si ipesehndu kena ku pusuh kalak. Amin gia melala si man urusenndu, uga nge carana gelah dahin erberita jadi si pentingna bas geluhndu?

7-8. Uga carata ngusih Jesus bas pelayanen?

⁷ Jesus me contoh si luar biasa bas ngutamaken pelayanen. Si pentingna bas geluhna eme mberitaken kerna Kerajan Dibata. (Joh. 4:34, 35) Erdalan ia ratusen kilometer guna erberita man nterem jelma. Lalap idaramina kesempaten gelah banci erberita bas ingan si nterem jelma ntah pe arah rumah ku rumah. Pelayanen me si pentingna bas kegeluhen Jesus.

⁸ Siusih Kristus adi sidarami kesempaten guna erberita i japa pe ras ndigan pe. Nggit kita erkorban guna ndukung dahin erberita. (Mrk. 6:31-34; 1 Pet. 2:21) Bas runggun, piga-piga turang seninata ngelayani jadi perintis istimewa, perintis biasa, ntah pe perintis ekstra. Lit ka si mpelajari bahasa si deban ntah pe pindah ku ingan si merluken terbuen perberita. Tapi, teremen si ngelakoken dahin erberita eme perberita si la banci ngelakoken si e kerina, tapi iusahakenna asa ngasupna mereken si mehulina. La soal uga keadanta, labo ipindo Jahwe lebih asa si ngasup silakoken. AteNa meriah min siakap bas pelayanenta sanga siberitaken “berita si meriah si mulia si rehna i bas Dibata nari, eme Dibata si ermeriah ukur.”​—1 Tim. 1:11; Ul. 30:11.

9. (a) Uga Paulus erban dahin erberita jadi si pentingna aminna pe arus ia erdahin? (b) Menurut Perbahanen Rasul-Rasul 28:16, 30, 31, uga nge akap Paulus pelayanenna?

⁹ Rasul Paulus pe jadi contoh perban ibanna dahin erberita jadi si pentingna bas geluhna. Paksa ia i Korinti sanga perdalanen utusen injilna si peduaken, sitik ngenca senna janah arus ia erdahin erban kemah bas piga-piga waktu. Tapi dahin erban kemah e labo si pentingna iakap Paulus. Ilakokenna dahin e guna ndukung pelayanenna gelah banci ia erberita si meriah i Korinti “alu la iupahi.” (2 Kor. 11:7) Amin pe Paulus arus erdahin, tapi terus ibanna dahin erberita jadi si pentingna bas geluhna, janah erberita ia tiap wari Sabat. Kenca berubah keadanna, banci reh buena waktuna erberita. Paulus “mulai sibuk meritaken kata Dibata, ngerana ia man kalak Jahudi guna mbuktiken maka Jesus eme Kristus.” (Perb. 18:3-5; 2 Kor. 11:9) Kenca si e, sanga Paulus jadi tahanen rumah i Roma dua tahun dekahna, itulisna surat janah erberita ia man kalak si reh ndahi ia. (Baca Perbahanen Rasul-Rasul 28:16, 30, 31.) Iusahaken Paulus gelah la lit si terpentingen asa pelayanenna. Nina, “Ialoken kami pendahin pelayanen e . . . , emaka la kami nyerah.” (2 Kor. 4:1) Bagi Paulus, amin gia melala waktuta keri guna erdahin, tapi banci denga siban pelayanenta jadi si pentingna bas geluhta.

10-11. Uga carata ngelakoken pelayanenta alu tutus amin gia lit masalah kesehatenta?

¹⁰ Adi lanai banci rusur kita erberita arah rumah ku rumah perban nggo metua ntah pe lit masalah kesehatenta, banci kita erberita alu cara si deban. Kalak Kristen bas abad pertama erberita i japa pe lit jelma. Erberita kalak e ndigan pe ras i japa pe, arah rumah ku rumah ntah pe bas ingan si nterem jelma. (Perb. 17:17; 20:20) Adi la kita ngasup  ndauh erdalan, mungkin banci kita kundul bas ingan si nterem jelma janah erberita man kalak si mentas. Entah, banci saja kita erberita alu la resmi, nulis surat, ntah pe mere kesaksin arah telepon. Enterem perberita la ngasup rusur erberita arah rumah ku rumah perban masalah kesehaten ntah pe masalah si debanna. Amin gia bage, kalak e banci erberita alu cara si ndai janah ndatken keriahen ukur.

¹¹ Amin gia lit masalah kesehatenndu, tetap nge banci ilakokenndu pelayanenndu alu tutus. Perdiatekenlah mulihi contoh Rasul Paulus. Nina, “Ngasup aku ngadapi kai pe erkiteken gegeh si kualoken i bas Dibata nari.” (Pil. 4:13) Iperluken Paulus gegeh e sanga sakit ia bas salah sada perdalanen utusen injilna. Nina man kalak Galati, “Tangtangna kuberitaken berita si meriah man kena eme perban lit pinakitku.” (Gal. 4:13) Bage ka pe, banci saja perban sakit kam, dungna banci kam erberita man dokter, perawat, ntah pe kalak si deban. Biasana la kalak e i rumah sanga lit si erberita ku rumahna.

12. Kai maksudna njaga mata tetap “sederhana”?

¹² Nina Jesus, “Mata kap lampu man daging. Adi terang [ntah “sederhana,” ctt.] pengidahndu, kerina dagingndu pe terang.” (Mat. 6:22) Kai maksud Jesus? Maksudna arus tetap sederhana  geluhta ntah pe fokus man sada tujun janah la tersimpangken. Jesus jadi usihen man banta. Ibanna pelayanen jadi si pentingna bas geluhna, janah iajarina murid-muridna gelah terus ngelayani Jahwe ras mpelebe Kerajan Dibata. Siusih Jesus adi siutamaken dahin erberita bas geluhta janah ‘sipelebe Kerajan ras kai si benar menurut Dibata.’​—Mat. 6:33.

13. Kai si banci silakoken gelah banci siutamaken pelayanenta?

¹³ Salah sada cara ngutamaken pelayanen eme adi tetap sederhana geluhta. Alu bage, reh buena waktuta nampati kalak nandai ras ngkelengi Jahwe. * Misalna, banci nge sikurangi waktuta erdahin gelah reh buena waktuta bas pelayanen? Banci nge sikurangi waktuta gawah-gawah?

14. Kai si ilakoken Elias ras ndeharana gelah reh buena waktuna bas erberita?

¹⁴ Enda me si ilakoken sekalak pertua si gelarna Elias, bage pe ndeharana. Nina, “Memang labo banci mis kami merintis, tapi lit si banci ilakoken kami gelah reh buena waktu kami bas erberita. Emaka alu manjar-anjar iusahaken kami gelah reh buena waktu kami erberita. Misalna, ikurangi kami uang keluar kami, kurangi kami waktu kami gawah-gawah, janah pindoken kami man bos kami gelah iubahna jadwal kami erdahin. Hasilna, banci kami erberita bas karaben, reh buena kalak si erlajar Pustaka ras kami, janah ikut ka kami erberita bas tengah pekan dua kali sebulan. Meriah kel kap kami!”

15-16. Menurut 1 Timotius 4:13, 15, uga carana gelah reh beluhna kita erberita? (Nen ka kotak “ Cara gelah Kulakoken Pelayanen alu Tutus.”)

¹⁵ Cara si deban gelah banci silakoken pelayanenta alu tutus eme erlajar gelah reh beluhna kita erberita. Bas piga-piga dahin, kalak si erdahin i je arus terus ilatih gelah reh beluhna ngelakoken pendahinna e. Perberita Kerajan pe bage ka nge. Arus terus kita erlajar gelah reh beluhna kita bas pelayanenta.​—Kua. 1:5; baca 1 Timotius 4:13, 15.

¹⁶ Tapi, uga carana gelah terus kita reh beluhna bas pelayanenta? Arus siperdiateken ras siikutken petunjuk si ibereken man banta tiap minggu bas Perpulungen Pelayanen ras Kegeluhen Kristen. Bas perpulungen enda lit pelatihen si erguna si banci nampati kita gelah terus reh beluhna bas pelayanen. Contohna, sanga ibereken ketua perpulungen nasehat man turang seninata si ndatken tugas sekolah, banci ka kita erlajar je nari. Banci sidalanken nasehatna e sanga kita erberita. Banci sipindo penampat pengawas kelompok dinas lapangenta ntah erberita kita ras ia. Banci ka kita erberita ras perberita si nggo erpengalamen, perintis, ntah pe ras pertua keliling. Adi nggo reh beluhna kita nggunaken kerina Alat-Alat Pengajarenta, reh riahna me siakap erberita ras ngajar.

17. Kai nge pasu-pasuna adi ilakokenndu pelayanenndu alu tutus?

¹⁷ Luar biasa kel siakap perban banci kita jadi “teman erdahin” Jahwe! (1 Kor. 3:9) Adi ‘sipastiken kai si lebih penting’ janah siutamaken pelayanenta, banci ‘silayani Jahwe alu ukur meriah.’ (Pil. 1:10; Msm. 100:2, Terjemahan Dunia Baru) Selaku pelayan Dibata, tek kita maka pasti iberekenNa gegeh man banta gelah banci silakoken pelayanenta la soal kai pe si terjadi. (2 Kor. 4:1, 7; 6:4) Mbue ntah pe sitik si banci iberekenndu bas pelayanen, banci kam “ermeriah ukur” adi erberita kam asa gegehndu. (Gal. 6:4) Adi ilakokenndu pelayanenndu alu tutus, ibuktikenndu me maka keleng atendu Jahwe bage pe kalak si deban. “Alu bage iselamatkenndu dirindu bage pe kalak si megiken kam.”​—1 Tim. 4:16.