1. Menurut Epesus 6:10-13, kai nge salah sada cara Jahwe mbuktiken kekelengenNa banta? Jelasken.

IPERDIATEKEN Jahwe kel kita. Salah sada buktina eme isampatiNa kita ngelawan musuhta. Musuhta eme Setan ras malekat-malekat jahat. Enggo ipersingeti Jahwe kita kerna musuhta e, janah isampatiNa kita ngelawanca. (Baca Epesus 6:10-13.) Adi nggit kita isampati Jahwe janah tuhu-tuhu kita tek man baNa, banci kita berhasil ngelawan Iblis. Bagi Rasul Paulus, tek kita maka “adi Dibata ras kita, ise kin si banci ngelawan kita?”​—Rom. 8:31.

2. Kai si man bahasenta bas artikel enda?

² Selaku kalak Kristen situhu-tuhu, la kita merhat erlajar terbuen kerna Setan ras malekat-malekat jahat. Si pentingna bas kita eme erlajar kerna Jahwe ras ngelayani Ia. (Msm. 25:5) Tapi, arus siteh kai saja si ilakoken Setan. Engkai? Gelah la banci kita itipuna. (2 Kor. 2:11; ctt.) Bas artikel enda, sibahas kari cara utama Setan ras malekat-malekat jahat guna nipu manusia. Sibahas ka uga carana gelah berhasil kita ngelawanca.

3-4. (a) Kai kin spiritisme e? (b) Enterem nge kalak si tek man spiritisme?

³ Cara utama Setan ras malekat-malekat jahat guna nipu manusia eme alu spiritisme. Ikataken kalak si mpraktekken spiritisme maka banci itehna ntah pe ikendalikenna kai si la banci iteh ntah pe ikendaliken manusia. Misalna, lit si ngataken maka banci itehna kerna  masa depan arah ramalen bintang ntah pe ramalen si debanna. Lit ka si banci erban tempa-tempa ngerana ia ras kalak mate. Janah lit si ngguna-gunai kalak alu ilmu sihir ntah pe ilmu gaib. *

⁴ Enterem nge kalak si tek man spiritisme? Arah sada survei si ilakoken bas 18 negeri i Amerika Latin ras Kepulauan Karibia, kira-kira sada arah telu kalak si isurvei tek man ilmu gaib ras ilmu sihir. Selain si e, lit hampir sada arah telu kalak si isurvei tek maka banci kita ercakap-cakap ras tendi kalak mate ntah pe ras malekat jahat. Menurut survei si deban si ilakoken bas 18 negeri i Afrika, rata-rata lebih arah setengah kalak si isurvei tek man ilmu sihir. Tapi situhuna, iusahaken Setan “nipu kerina kalak si tading i doni.” (Ket. 12:9) Emaka la soal ja pe kita tading, arus kita hati-hati gelah la ipengaruhi spiritisme.

5. Uga perasan Jahwe kerna spiritisme?

⁵ Jahwe eme “Dibata kebenaren.” (Msm. 31:5, Terjemahan Dunia Baru) Emaka, uga perasan Jahwe kerna spiritisme? Segat kel ateNa! Nina man kalak Israel, “Ola persembahken anak-anakndu i bas api i babo batar-batar persembahenndu. Ola pelepas bangsandu ertendung, ngoge tanda-tanda, ntah mpergunaken mangmang, ntah make guna-guna, janah ola pediat ia nungkun man begu kalak si enggo mate. Nembeh ate [Jahwe] Dibatandu man kalak si ngelakoken perbahanen si mbau e.” (Ul. 18:10-12) Gundari, labo arus ikutken kalak Kristen Undang-Undang si ibereken Jahwe man kalak Israel. Tapi, siteh maka tetap denga segat ate Jahwe spiritisme.​—Mal. 3:6.

6. (a) Uga cara Setan nggunaken spiritisme i bas ncilakai manusia? (b) Menurut Pengerana 9:5, uga nge situhuna keadan kalak mate?

⁶ Ikataken Jahwe maka spiritisme e bahaya kel perban itehNa ipake Setan e guna ncilakai manusia. Ipake Setan spiritisme guna nipu manusia, misalna ikatakenna maka lit tendi kalak mate. (Baca Pengerana 9:5.) Ipake Setan ka spiritisme guna erban kalak mbiar janah ndauh arah Jahwe. Tujunna eme gelah tek kalak man malekat-malekat jahat, labo man Jahwe.

7. Kai si nggo ikataken Jahwe man banta?

⁷ Bagi si nggo sibahas, nggo ikataken Jahwe kai saja si perlu siteh gelah la banci kita itipu Setan ras malekat-malekat jahat. Mari sibahas kai saja si perlu silakoken gelah banci silawan Setan ras malekat-malekat jahat.

8. (a) Kai cara si pentingna gelah la kita tertipu malekat-malekat jahat? (b) Uga Masmur 146:4 mbuktiken maka erbual Setan kerna keadan kalak mate?

⁸ Baca ras ukurilah Kata Dibata. Enda me cara si pentingna gelah la kita tertipu malekat-malekat jahat. Kata Dibata bali bagi pedang si ntelap, si banci nampati kita meteh kai saja bual Setan. (Ep. 6:17) Misalna, arah Kata Dibata siteh maka kalak mate la banci ercakap-cakap  ras kalak si nggeluh denga. (Baca Masmur 146:4.) Arah Kata Dibata pe siteh maka Jahwe ngenca si banci nuriken kerna masa depan alu tepat. (Jes. 45:21; 46:10) Adi sibaca ras siukuri Kata Dibata alu ratur, dungna segat me ateta janah banci situlak bual si iban malekat-malekat jahat.

9. Perbahanen kai saja si arus situlak?

⁹ Tulaklah perbahanen kai pe si lit hubungenna ras spiritisme. Selaku umat Jahwe, la kita nggit ngelakoken kai pe si lit hubungenna ras spiritisme. Misalna, la kita nggit ndahi dukun ntah ngelakoken kai pe gelah banci ercakap-cakap ras kalak mate. Bagi si nggo sibahas bas artikel sebelumna, la kita nggit ngikuti kebiasan bas acara penguburen si lit hubungenna ras kepercayan maka lit denga tendi kalak mate. La ka kita nggit nggunaken ramalen bintang ntah pe ramalen si debanna guna meteh masa depan. (Jes. 8:19) Siteh maka kerina e seh kel bahayana janah banci erban kita ndeher ras Setan bage pe malekat-malekat jahat.

10-11. (a) Kai si ilakoken piga-piga kalak bas abad pertama kenca iteh kalak e kai si benar? (b) Menurut 1 Korinti 10:21, ngkai maka arus siusih kalak Kristen bas abad si pertama, janah uga carana?

¹⁰ Ambekkenlah kerina barang si lit hubungenna ras ilmu gaib. Bas abad si pertama, piga-piga kalak si tading i kota Epesus pernah mpraktekken spiritisme. Kenca iteh kalak e kai si benar, mis berubah kel perbahanenna. “Kalak si lit ilmu sihirna pe mpepulung buku-bukuna janah itutungna i lebe-lebe jelma si nterem.” (Perb. 19:19) Ilakoken kalak e asa bancina ngelawan malekat-malekat jahat. Amin gia merga kel buku-buku kerna ilmu gaib e, tapi la idayaken kalak e ntah pe iberekenna man kalak si deban.  Malahen ikernepken kalak e kerina. La iukurina uga ergana buku-buku e, perban si pentingna iakap kalak e eme erban Jahwe senang.

¹¹ Uga carata ngusih kalak Kristen bas abad pertama e? Mehuli kel adi siambekken kerina barang si lit hubungenna ras ilmu gaib. Barang e banci saja jimat ntah kai pe si ipake ntah isusun kalak guna ngelindungi dirina arah malekat-malekat jahat.​—Baca 1 Korinti 10:21.

12. Penungkunen kai saja si perlu siukuri kerna hiburen?

¹² Pereksalah hiburenndu. Sungkuni bandu: ‘Kubaca nge buku, majalah, ntah pe artikel bas Internet si lit hubungenna ras ilmu gaib? Uga kerna musik si kubegiken, film ras acara TV si kutonton, ntah pe video game si kumainken? Lit nge hubungenna e ras spiritisme? Lit nge i je vampir, begu-begu, ntah pe ilmu sihir? Bas hiburen e, ibanna nge ilmu gaib, mantra, ntah pe guna-guna tempa-tempa la bahaya janah meriah ngelakokenca?’ Memang, labo kerina hiburen kerna dongeng ntah pe khayalen lit hubungenna ras spiritisme. Sanga ipereksandu hiburenndu, pilihlah hiburen si nampati kam mpedauh kai si segat ate Jahwe. Siusahaken kel ‘gelah bersih pusuh peratenta’ i lebe-lebe Dibata.​—Perb. 24:16. *

13. Kai si la banci silakoken?

¹³ Ula ceritaken kerna malekat-malekat jahat. Arus siusih Jesus. (1 Pet. 2:21) Sope reh ku doni, Jesus tading i surga,  emaka melala si itehna kerna Setan ras malekat-malekat jahat. Tapi labo iceritakenna kerna kai si nggo ilakoken malekat-malekat jahat e. Ate Jesus ngajari kalak kerna Jahwe, labo kerna Setan. Banci siusih Jesus, la siceritaken kerna malekat-malekat jahat. Ateta sibuktiken arah rananta maka ‘pusuhta dem alu kata-kata si mejile,’ eme kebenaren.​—Msm. 45:2.

14-15. (a) Engkai maka la perlu kita mbiar man malekat-malekat jahat? (b) Kai buktina maka gundari ilindungi Jahwe umatNa?

¹⁴ Ula mbiar man malekat-malekat jahat. Bas doni si gundari enda, banci saja terjadi kai si la mehuli man banta. Misalna kecelakan, pinakit, ntah pe kematen banci rempet reh. Tapi, ula min siakap si e kerina pasti malekat jahat si erbanca. Nina Pustaka, “Kerina nge kalak banci kena sial.” (Peng. 9:11) Selain si e, nggo ibuktiken Jahwe maka ndauh Ia gegehen asangken malekat-malekat jahat. Misalna, la ijinken Jahwe ibunuh Setan Jop. (Jop 2:6) Bas jaman Musa, ibuktiken Jahwe maka kuasaNa ndauh belinen asangken tukang-tukang sihir i Mesir. (Kel. 8:18; 9:11) Sanga i surga, ibereken Jahwe man Jesus kuasa nandangi Setan ras malekat-malekat jahat, emaka banci isampetken Jesus ia kerina ku doni. Janah kentisik nari, ibenterken me Setan ras malekat-malekat jahat ku lubang si seh kel bagesna gelah la banci icilakaina ise pe.​—Ket. 12:9; 20:2, 3.

¹⁵ Enggo melala siidah bukti maka gundari ilindungi Jahwe umatNa. Ukurilah enda: Erberita kita janah siajarken kebenaren Pustaka i sebelang doni. (Mat. 28:19, 20) Hasilna, banci situriken uga jahatna pendahin Iblis. Adi memang kin banci, pasti nggo ipengadi Setan kerina kegiaten umat Dibata, tapi la ia banci. Emaka la kita perlu mbiar man malekat-malekat jahat. Siteh maka “iperdiateken [Jahwe] kerina doni enda, gelah iberekenNa gegeh man kalak si setia man baNa.” (2 Kro. 16:9) Adi tetap kita setia man Jahwe, labo banci kita susah seh rasa lalap iban malekat-malekat jahat.

16-17. Ceritaken contoh ngkai maka perlu sipat si perpang guna ngelawan malekat-malekat jahat.

¹⁶ Arus kita pang gelah banci silawan malekat-malekat jahat, khususna sanga kita itentang keluarga ntah temanta si mehuli nge ukurna man banta. Banci saja mbiar kalak e terjadi kai si la mehuli banta. Tapi adi tetap kita pang, pasti ipasu-pasu Jahwe kita. Perdiatekenlah pengalamen sekalak turang seninata si gelarna Erica, si tading i Ghana. Umurna 21 tahun sanga mulai ia erlajar Pustaka. Perban bapakna dukun, isuruh me ia ngikuti kebiasan si lit hubungenna ras ilmu gaib. Salah sadana, arus ipanna daging si ipersembahken bas upacara si iban man nini-bulang kalak e si nggo mate. Perban la nggit Erica ngelakokenca, iakap keluargana maka nggo ihinana nini-bulang kalak e. Tek keluargana maka pasti iukum nini-bulangna kalak e alu pinakit ntah pe ibanna kalak e jadi adon.

¹⁷ Terus ipaksa keluarga Erica ia ngikuti kebiasan e. Tapi tetap la ia nggit, amin gia arus ia lawes rumah nari. Lit piga-piga Saksi si ngajak ia tading i rumah kalak e. Ipasu-pasu Jahwe me Erica, ibereNa ia keluarga si mbaru eme turang senina si nggo bali bagi keluargana sendiri. (Mrk. 10:29, 30) Aminna pe lanai iakui keluarga Erica ia janah itutung kalak e ka barang-barangna, tetap ia setia man Jahwe. Kenca si e iperidiken ia janah gundari ngelayani jadi perintis biasa. La ia mbiar man malekat-malekat jahat. Ikataken Erica kerna keluargana, “Ertoto aku tiap wari gelah keluargaku pe banci nggejapken keriahen ukur perban nandai Jahwe, janah banci ndatken kebebasen perban ngelayani Dibata si perkeleng.”

18. Pasu-pasu kai saja si banci sidat adi tek kita man Jahwe?

¹⁸ Banci saja la siadapi tentangen si bage kel beratna. Tapi, kita kerina arus ngelawan malekat-malekat jahat janah tek man Jahwe. Adi silakoken e, melala sidat pasu-pasu janah la kita tertipu bual Setan. La ka kita nggit ngadi ngelayani Jahwe perban mbiar man malekat-malekat jahat. Si pentingna, hubungenta ras Jahwe banci reh rembakna. Nina Jakup, “Patuhlah man Dibata janah lawanlah Iblis, kiam me Iblis e i bas kena nari. Rembakkenlah diri kena ku Dibata, emaka irembakkenNa ka diriNa man kena.”​—Jak. 4:7, 8.