Tapi sanga aku remaja, mulai reh dauhna aku arah Jahwe. Kuidah teman-teman sekolahku bebas ngelakoken kai pe. Aku pe merhat bage. Mberat kuakap ngikutken peraturen si iban orang tuaku, ngikutken patoken-patoken Dibata, ras ngelakoken kegiaten rohani. Amin pe tek aku maka Jahwe e lit, tapi la kuakap aku rembak ras Ia.

Amin pe aku erberita tapi gelah enggo saja. Sanga aku erberita pe la pernah kuban persiapen, emaka mesera kuakap mbenaken percakapen ntah pe nerusken percakapen. Akibatna, la lit kalak si banci kudahi mulihi, la lit si erlajar Pustaka ras aku, janah la kuakap meriah erberita. E me si erbanca maka lanai aku merhat erberita. Tersungkun-sungkun aku, ‘Engkai maka banci kalak terus erberita arah minggu ku minggu, arah bulan ku bulan?’

Sanga umurku 17 tahun, lanai ateku tading ras orang tuaku. Emaka kutama barang-barangku ku tas, lawes aku rumah nari, janah pindah aku ku Australia. Sedih orang tuaku sanga kutadingken  kalak e. Kuatir kalak e ngidah aku, tapi akap kalak e tetap nge kari kulayani Jahwe.

Bas Australia, reh sitikna si kulakoken i bas ngelayani Jahwe. Mulai aku jarang reh ku perpulungen. Bas perpulungen, riahen kuakap erteman ras anak muda si bali bagi aku, si kenca mulih perpulungen mis lawes minem-minem janah landek-landek bas diskotik. Adi kuinget kai si terjadi paksa si e, kuteh maka amin pe aku Saksi Jahwe, kuikutken denga doni enda. Emaka labo kudat keriahen ukur.

Kira-kira dua tahun kenca si e, jumpa aku ras sekalak turang senina si erban aku ngukuri dalan geluhku amin pe la itehna uga situasiku. Paksa si e, aku tading ras lima si nguda-nguda. Pernah undang kami pertua keliling ras ndeharana si gelarna Tamara tading bas rumah kami sada minggu dekahna. Sanga sibuk perbulangenna ngurus urusen runggun, Tamara tading i rumah. Nggit ia mereken waktuna man kami janah ras kami tawa-tawa. Meriah kuakap ngidah si e. Ia meteruk ukur janah meriah ngerana-ngerana ras ia. Amin pe sibuk ia ngelayani Jahwe, ibanna denga waktuna ras kami. Luar biasa kuakap ngidah si e.

Semangat kel kalakna Tamara e. Kekelengenna man kebenaren ras pelayanen erban merhat aku ngusih ia. Meriah ukurna perban berekenna si mehulina man Jahwe. Tapi aku la meriah ukurku perban la kubereken si mehulina. Sipat-sipatna si mehuli ras keriahen ukurna mbelin kel pengaruhna man bangku. Usihen si berekenna erban aku ngukuri kebenaren si penting enda: Ate Jahwe kerina min kita ngelayani Ia “alu ermeriah ukur” ras ‘ersurak meriah.’​—Ms. 100:2.

Merhat aku ermeriah ukur bagi Tamara. Tapi gelah kudat keriahen ukur si bage perlu kuban perubahen si mbelin. Perlu waktu kira-kira telu tahun gelah banci kuban perubahen. Kumulai arah perubahen si kitik. Mulai kuban persiapen guna erberita janah ratur aku merintis ekstra.  Enda erban aku lanai gugupsa erberita ras lebih percaya diri. Perban reh rusurna kupake Pustaka sanga erberita, reh riahna me kuakap erberita. La ndekah kenca si e, tiap bulan aku merintis ekstra.

Mulai kudarami teman-temanku si usahakenna mereken si mehulina man Jahwe ras meriah akapna ngelayani Jahwe, la soal si nguda denga ntah pe si enggo metua. Usihen kalak e erban aku ngukuri kai si pentingna bas geluhku janah mulai kubaca Pustaka tiap wari. Mulai reh riahna kuakap erberita janah dungna jadi perintis biasa aku. Bas tahun e me tangtangna mulai kuakap meriah ras aman bas runggun.

Setahun kenca si e, jumpa aku ras Alex, sekalak dilaki si mehuli ras bujur. Keleng atena Jahwe janah meriah akapna erberita. Ia ngelayani jadi sinampati runggun janah enggo enem tahun dekahna ia merintis. Alex pe pernah ngelayani piga-piga waktu dekahna bas daerah si merluken terbuen perberita i Malawi. I je erteman ia ras piga-piga utusen injil. Kalak e jadi usihen si mehuli man bana. Iahkenna Alex gelah terus ngutamaken Jahwe bas geluhna.

Bas tahun 2003, erjabu aku ras Alex. Terus kami ngelayani sepenuh waktu. Enggo melala pelajaren si meherga dat kami janah mbue kel pasu-pasu si bereken Jahwe man kami.

Bas tahun 2009, kami iundang jadi utusen injil bas Timor-Leste, sada negara si kitik bas kepulauan Indonesia. Meteh si e, sengget ras meriah ukur kami, tapi gugup ka kami. Lima bulan kenca si e, seh me kami bas Dili, ibu kota negara e.

Beda kel kegeluhen kami bas negara e ras kegeluhen kami sebelumna. Emaka arus sesuaiken kami kegeluhen kami ras kebudayanna, bahasana, panganna, ras situasi si lit i je. Sanga erberita rusur idah kami kalak si mesera kel pergeluhna,  si la tamat sekolahna, si la lit sekolahna, ras kalak si itindas. Enterem ka idah kami kalak si ngenanami kiniseran perban perang ras kejahaten. *

Luar biasa kel kuakap pelayanen kami! Contohna, pernah aku jumpa ras sekalak anak diberu si umurna 13 tahun si gelarna Maria. * Paksa si e, mamakna enggo mate piga-piga tahun si lewat janah jarang kel idahna bapakna. Bali bagi anak-anak si sebaya ras ia, la tehna kai tujunna nggeluh. Pernah ia ngandung janah turikenna kerina isi pusuhna man bangku.Tapi la kuangkai kai si katakenna perban la aku beluhsa ngerana bas bahasana. Emaka ertoto aku man Jahwe gelah kuteh uga carana mpegegehi ia. Kenca si e, mulai me kubacaken piga-piga ayat si mpegegehi ia. Piga-piga tahun kenca si e, kuidah kebenaren ngubah perbahanen, penampilen, ras kegeluhenna. Maria enggo iperidiken, janah gundari lit piga-piga kalak si sampatina erlajar Pustaka. Gundari, kerina umat Jahwe enggo jadi keluargana janah melala si engkelengi ia.

Ipasu-pasu Jahwe pendahin erberita bas Timor-Leste. Amin pe teremen perberita si lit i je iperidiken bas sepuluh tahun terakhir enda, enterem arah kalak e ngelayani jadi perintis, sinampati runggun, ntah pe pertua. Si debanna ka erdahin bas kantor penerjemahen ras nampati nerjemahken publikasi si erpalasken Pustaka bas bahasa si lit i je. Meriah kel ukurku megi kalak e rende bas perpulungen, ngidah ciremna, ras ngidah kalak e jadi teman Jahwe.

Kegeluhen kami bas Timor-Leste beda kel ras kegeluhen kami bas Australia. Tapi meriah kel kuakap tading i je. Mon-mon inangkihi kami motor si kitik si dem penumpangna. Bas motor e lit ka ikan asin ras gule-gulen si itukur pajak nari. Bas wari-wari tertentu, lit sampati kami si erlajar Pustaka bas rumahna. Rumahna e kitik, melas ka bas, lantena melket, janah manuk pe kiam-kiam bas rumah e. Amin pe ngadapi tentangen si bage, rusur ningku bas pusuhku, ‘Enda luar biasa!’

Adi kuinget mulihi kai si terjadi mbarenda, ngata bujur kel aku man orang tuaku perban enggo ilakokenna asa ngasupna ngajari aku kerna Jahwe ras enggo ndukung aku amin pe lemah kinitekenku man Jahwe. Payo kel kuakap kai si kataken Kuan-kuanen 22:6. Meriah kel ukur mamak ras bapak ngidah aku ras Alex perban gunaken kami geluh kami ngelayani Jahwe. Mulai tahun 2016 Alex ngelayani jadi pertua keliling bas daerah cabang Australasia.

Mbarenda la kuakap meriah erberita. Gundari meriah kuakap erberita! Enggo sadar aku maka la soal kai pe si terjadi bas geluhta, banci sidat keriahen ukur situhu-tuhu adi bulat ukurta ngelayani Dibata. Bas 18 tahun terakhir enda me si meriahna kuakap bas geluhku sanga kulayani Jahwe radu ras Alex. Gundari kuangkai maka tuhu kai si kataken Daud man Jahwe bas buku Masmur, nina, “Kerina kalak si erlindung man baNdu pasti ermeriah ukur, lalap kalak e ermeriah ukur. . . . Kalak si keleng atena gelarNdu pasti ermeriah ukur perban Kam.”​—Ms. 5:11.