1-2. Engkai maka banci siikutken dalan-dalan Jesus? Ban perumpamanna.

BAYANGKEN kam ikut bas sada kelompok si erdalan ngelewati daerah si berbahaya janah melala kersikna. Lit kalak si meteh dalan si mabai kena. Sanga ia erdalan lit bekas tapak-tapak nahena bas kersik e. Rempet lanai idahndu ia, tapi la kam mbiar. Sebalikna, kam ras kalak si lit bas kelompok e terus ngikutken bekas tapak-tapak nahena alu megermet.

² Doni si jahat enda banci ipeseri ras daerah si berbahaya ndai, janah kalak Kristen situhu-tuhu banci ipeseri ras kelompok kalak si erdalan ndai. Bujur kel sikataken man Jahwe perban enggo iberekenNa AnakNa Jesus Kristus guna mabai dalan man banta. Ia sempurna janah banci siikutken dalan-dalanna alu megermet. (1 Pet. 2:21) Menurut sada keterangen kerna Pustaka, ipeseri Petrus Jesus ras kalak si mabai dalan. Bali bagi kalak si mabai dalan si nadingken bekas tapak-tapak nahena, Jesus pe enggo itadingkenna bekas tapak-tapak nahena ntah pe dalan-dalanna gelah banci siikutken. Mari sibahas telu penungkunen kerna ngikutken dalan-dalanna. Kai ertina ngikutken dalan-dalan Jesus? Engkai maka arus siikutken? Janah uga kita banci ngikutkenca?

3. Kai ertina ngikutken dalan-dalan sekalak jelma?

³ Kai ertina ngikutken dalan-dalan sekalak jelma? Bas Pustaka kata “erdalan” ras kata ‘nahe’ mon-mon banci ertina kai si ilakoken sekalak jelma bas kegeluhenna. (Kej. 6:9; Kua. 3:23) Cara sekalak jelma ndalani kegeluhenna banci ipeseri ras bekas tapak-tapak nahe ntah pe dalan-dalanna.  Emaka, ngikutken dalan-dalan sekalak jelma ertina ngusih kai si ilakokenna.

4. Kai ertina ngikutken dalan-dalan Jesus?

⁴ Adi bage, kai ertina ngikutken dalan-dalan Jesus? Ertina siusih kai si enggo ilakokenna. Bas ayat tema artikel enda, ikataken Rasul Petrus kerna usihen si mehuli si enggo ibereken Jesus perban ia setia bas ngadapi kiniseran, tapi melala denga si ilakoken Jesus si banci siusih. (1 Pet. 2:18-25) Situhuna, kerina si ikataken ras si ilakoken Jesus bas geluhna perlu siusih.

5. Banci nge manusia si la sempurna ngusih Jesus si sempurna? Jelasken.

⁵ Perban kita la sempurna, banci nge siusih Jesus? Banci. Ingetlah maka iahken Petrus kita guna ‘ngikutken dalan-dalan Jesus alu megermet’ labo alu sempurna. Adi tutus ateta ngikutken dalan-dalanna janah silakoken asa ngasupta, enggo sipatuhi kata-kata Rasul Johanes enda: ‘Ikutkenlah dalan geluh Jesus.’​—1 Joh. 2:6.

6-7. Adi siikutken dalan-dalan Jesus, engkai maka banci kita reh rembakna ras Jahwe?

⁶ Ngikutken dalan-dalan Jesus erban kita rembak ras Jahwe. Engkai maka banci bage ninta? Si pertama, perban lalap iban Jesus meriah ukur Dibata segedang geluhna. (Joh. 8:29) Emaka alu ngikutken dalan-dalan Jesus, banci siban meriah ukur Jahwe. Tek kita maka Bapakta si i surga pasti nggit rembak ras kalak si erusaha jadi temanNa.​—Jak. 4:8.

⁷ Si peduaken, usih Jesus Bapakna alu sempurna. E me sebapna maka banci bagenda nina, “Ise si enggo ngidah aku, enggo idahna Bapak.” (Joh. 14:9) Banci siusih sipat-sipat Jesus ras perbahanenna man kalak si deban. Contohna, mekuah  atena sekalak dilaki si kena kusta, sepenggejapen ia ras sekalak diberu si mekelek kel pinakitna, janah mekuah ka atena kalak si erceda ate perban kematen. Sanga siusih Jesus, e ertina enggo siusih Jahwe. (Mrk. 1:40, 41; 5:25-34; Joh. 11:33-35) Adi terus siusih sipat-sipat Jahwe, reh rembakna me kita ras Ia.

8. Engkai maka banci ‘sitaluken’ doni enda adi siikutken dalan-dalan Jesus?

⁸ Adi siikutken dalan-dalan Jesus la sipediat doni si jahat enda erban kita lanai ngutamaken pelayanenta man Jahwe. Bas berngi terakhir sope Jesus mate bagenda nina, “Enggo kap kutaluken doni enda.” (Joh. 16:33) Enda ertina la ia nggit ipengaruhi perukuren, sura-sura, ras perbahanen doni enda. Lalap inget Jesus kai tujunna reh ku doni, eme mpebadia gelar Jahwe. Kita uga? Bas doni enda melala si banci erban kita lanai ngutamaken pelayanenta man Jahwe. Tapi, adi siusih Jesus alu terus ngutamaken peraten Jahwe, banci ka ‘sitaluken’ doni enda.​—1 Joh. 5:5.

9. Kai si arus silakoken gelah banci kita nggeluh rasa lalap?

⁹ Adi siikutken dalan-dalan Jesus banci kita nggeluh si rasa lalap. Sanga sekalak anak muda si bayak nungkun kerna kai si perlu ilakokenna guna ndatken kegeluhen si rasa lalap, bagenda nina Jesus, “Mari jadilah pengikutku.” (Mat. 19:16-21) Bagenda nina Jesus man piga-piga kalak Jahudi si la tek maka ia Kristus, “Biri-biriku . . . ikutkenna aku. Kubereken man biri-biri e kegeluhen si rasa lalap.” (Joh. 10:24-29) Selain si e, man Nikodemus sekalak anggota Pengadilen Agama Jahudi si merhat meteh terbuen kerna pengajarenna ikataken Jesus maka kalak si “erkiniteken man bana” banci “ndatken kegeluhen si rasa lalap.” (Joh. 3:16) Sibuktiken kita erkiniteken man Jesus alu ndalanken kai si iajarkenna janah ngusih kai si ilakokenna. Adi bage siban banci kita nggeluh rasa lalap.​—Mat. 7:14.

10. Menurut Johanes 17:3, kai si arus silakoken gelah reh bagesna ‘sitandai’ Jesus?

¹⁰ Gelah banci siikutken dalan-dalan Jesus alu megermet arus lebe sitandai ia. (Baca Johanes 17:3.) Banci ‘sitandai’ Jesus adi terus sipelajari terbuen kerna ia, sipat-sipatna, carana rukur, bage pe patoken-patokenna. La soal asa dekahna kita enggo bas kebenaren, arus terus siusahaken nandai Jahwe ras AnakNa.

11. Kai nge si iceritaken bas empat Injil?

¹¹ Perban keleng ate Jahwe kita, isampatiNa kita guna nandai AnakNa. Uga carana? IberekenNa empat Injil bas Pustaka.  I je lit iceritaken kerna kegeluhen ras pelayanen Jesus, kerna kai si ikatakenna, si ilakokenna, ras uga perasanna. Alu mpelajari si e kerina, banci ‘siukuri alu mbages’ usihen si iban Jesus. (Heb. 12:3) Alu bage, reh bagesna me sitandai Jesus janah banci siikutken dalan-dalanna alu megermet, perban bas Injil e lit bekas tapak-tapak nahe Jesus.

12. Uga carana gelah tuhu-tuhu erguna Injil e man banta?

¹² Gelah tuhu-tuhu erguna Injil e man banta labo bias terjeng sibaca, arus tutus ateta mpelajarisa janah siukuri alu mbages. (Bandingken Josua 1:8.) Mari sibahas dua cara si banci nampati kita ngukuri Injil ras ndalanken kai si enggo sipelajari.

13. Uga carana gelah banci bayangkenndu kai si ibacandu bas Injil?

¹³ Si pertama, bayangken kejadin si sangana bacandu bas Injil. Bayangken kai si terjadi i je, kai si idahndu, si ibegindu, ras kai si igejapken kalak si lit bas kejadin e. Gelah tersampati kam ngelakokenca, banlah riset arah publikasi si isikapken organisasi Jahwe. Sanga bacandu sada kejadin, periksalah kai si terjadi sope kejadin e bage pe kenca kejadin e. Darami ka terbuen informasi kerna kalak ras ingan si iceritaken i je. Bandingken kai si sangana ibacandu ras kai si itulis penulis Injil si deban. Mon-mon, kai si itulis sada penulis Injil kerna kai si menarik la itulis penulis Injil si deban.

14-15. Kai si arus silakoken gelah banci sidalanken si enggo sipelajari arah cataten kerna Jesus?

¹⁴ Si peduaken, dalanken kai si ipelajarindu arah cataten Injil. (Joh. 13:17) Kenca ipelajarindu cataten bas buku Injil, sungkunlah bandu, ‘Lit nge pelajaren si banci kudalanken bas kegeluhenku? Uga carana nggunaken kai si kupelajari e guna nampati kalak si deban?’ Ukurilah ise si banci isampatindu. Kenca si e, bas waktu si  cocok turiken man bana pelajaren kai si enggo idatndu alu cara si perkeleng ras mehuli.

¹⁵ Gundari, sibahas kejadin kerna sekalak janda si mesera si iperdiateken Jesus bas rumah pertoton. Sipelajari kari kerna si e alu nggunaken dua cara ndai.

16. Jelasken kejadin si icatat bas Markus 12:41.

¹⁶ Bayangken kam lit bas kejadin e. (Baca Markus 12:41.) Bayangken kejadinna. Paksa si e tanggal 11 Nisan 33 Masehi piga-piga wari sope Jesus mate. Bas wari e, melala kel igunaken Jesus waktuna guna ngajar bas rumah pertoton, tapi peminpin agama Jahudi terus nentang ia. Piga-piga arah kalak e nungkun ia kerna ja nari datna kuasa guna ngelakoken pendahinna. Si debanna ka erban penungkunen si iakapna la banci ijawap Jesus. (Mrk. 11:27-33; 12:13-34) Kenca si e, lawes Jesus ku bagin si deban arah rumah pertoton. Gundari banci saja ia lit bas ingan si igelari Halamen Diberu, i je banci idahna kotak-kotak sumbangen si itama i deher dinding halamen e. Kundul ia janah mulai iperdiatekenna kalak si namaken sumbangen ku bas kotak e. Idahna melala kalak bayak namaken melala sen logam ku bas kotak e. Banci saja ia kundul ndeher ras kotak sumbangen e. Emaka, banci ibegina sora sen logam si idabuhken ku bas kotak e.

17. Kai si ilakoken janda si mesera si icatat bas Markus 12:42?

¹⁷ Baca Markus 12:42. La ndekah kenca si e iperdiateken Jesus sekalak diberu. Diberu e, “sekalak janda si mesera.” (Luk. 21:2) Mesera kel pergeluhna, nukur keperlunna saja pe la bias senna. Amin pe bage, tetap denga atena mere sumbangen ku rumah pertoton. Ideherina kotak sumbangen janah alu manjar-anjar imasukkenna dua sen logam. Banci saja la terbegi sora sen logam si tamana ku bas kotak e. Iteh Jesus sekai si isumbangkenna, dua lepton ngenca eme sen logam si kitikna paksa si e. Nukur sada perik cipcip pe la bias sen e, padahal perik e me pangan si murahna paksa si e.

18. Menurut Markus 12:43, 44, kai si ikataken Jesus kerna sumbangen sekalak janda si mesera?

¹⁸ Baca Markus 12:43, 44. Luar biasa kel akap Jesus ngidah diberu e. Emaka, ilebuhna murid-muridna janah isuruhna iperdiateken kalak e diberu e. Nina, “Buen nge si tamaken diberu mbalu si mesera enda asangken sen si tamaken kerina kalak.” Kenca si e, nina ka, “Kerina kalak e [khususna kalak bayak] mere arah kelebihen ertana, tapi diberu e amin gia mesera, tamana kerina si lit bas ia, kerina si lit bas geluhna.” Sanga ibereken diberu si setia enda kerina senna bas wari e, enda ncidahken maka tek kel ia pasti icukupi Jahwe kari keperlunna.​—Ms. 26:3.

19. Pelajaren kai si banci sidat arah kata-kata Jesus kerna janda si mesera?

¹⁹ Dalanken kai si ipelajarindu. Sungkunlah bandu, ‘Pelajaren kai si kudat arah kata-kata Jesus kerna janda si mesera?’ Ukuri kerna janda e. Pasti merhat ia mereken terbuen man Jahwe tapi ilakokenna kai si banci ilakokenna. Iberekenna si mehulina man Jahwe. Iteh Jesus maka meherga kel iakap Jahwe sumbangenna e. Arah cerita e lit sada pelajaren si penting man banta: Meriah ukur Jahwe adi sibereken si mehulina man baNa, silayani Ia alu bulat ukur, janah sibereken geluhta man baNa. (Mat. 22:37; Kol. 3: 23) Meriah ukur Jahwe adi silayani Ia asa ngasupta. Enda termasuk waktu ras gegehta si enggo sipake guna nembah Jahwe, misalna erberita ras reh ku perpulungen.

20. Uga kam banci ndalanken pelajaren si idatndu arah cataten kerna sekalak janda si mesera? Bereken contohna.

²⁰ Uga kam banci ndalanken pelajaren si idatndu arah cataten kerna sekalak janda si mesera? Cuba ukurindu ise saja si banci jadi perlu ipetetap ukurna maka iergai Jahwe nge pelayanenna. Contohna, lit nge itandaindu sekalak turang senina si enggo metua si banci saja salah iakapna bana ntah pe la erguna iakapna ia perban lanai bagi mbarenda ia rusurna erberita, erkiteken enggo kurang kesehatenna ntah pe lanai lit gegehna? Lit nge tandaindu sekalak turang senina si sangana mekelek kel pinakitna janah kitik kel ukurna perban lanai ia banci reh ku Bale Kerajan guna pulung? Sampatilah kalak si bage alu mpeseh ranan “si mehuli guna mpegegehi.” (Ep. 4:29) Turiken man kalak e kerna pelajaren si mpegegehi si idatndu arah cataten kerna sekalak janda si mesera ndai. Kata-katandu si mpegegehi banci mpetetap ukurna maka meriah nge iakap Jahwe ngidah kai si enggo iberekenna asa ngasupna. (Kua. 15:23; 1 Tes. 5:11) Adi pujindu kalak e perban enggo berena si mehulina man Jahwe, la soal mbue ntah pe sitik si iberekenna, enggo ikutkenndu dalan-dalan Jesus alu megermet.

21. Kai si jadi tekadndu?

²¹ Ngata bujur kel kita perban melala kel ituriken kerna kegeluhen Jesus bas Injil. E erbanca banci siusih ia janah siikutken dalan-dalanna alu megermet. Emaka usahakenlah mpelajari Injil bas pelajaren pribadindu ntah pe ibadah keluargandu. Ingetlah, gelah banci erguna si ipelajarindu e perlu bayangkenndu kai si sangana bacandu janah dalankenlah pelajaren si idatndu. Selain si e, gelah banci usihndu kai si ilakoken Jesus, perlu begikenndu kai si ikatakenna. Bas artikel seterusna sibahas kari kai si banci sipelajari arah kata-kata terakhir si ibelasken Jesus sanga ia jadi manusia.