Engkai maka ikutip Jesus kata-kata Daud si itulis bas Masmur 22:1 sope ia mate?

Sope Jesus mate ibelaskenna kata-kata si lit bas Matius 27:46 ras Markus 15:34, nina, “O Dibataku, o Dibataku, engkai maka tadingkenNdu aku?” Alu bage, terjadi me kata-kata Daud si icatat bas Masmur 22:1. Ikutip Jesus kata-kata e labo perban ia kecewa ntah pe lanai ia tek man Dibata. Angkai Jesus engkai maka arus ia mate janah nggit ia mate. (Mat. 16:21; 20:28) Tehna ka maka sope ia mate lanai ‘lindungi’ Jahwe ia. (Jop 1:10) Alu bage, banci buktiken Jesus maka ia tetap setia man Jahwe amin pe arus ia mate alu cara si seh kel suina.​—Mrk. 14:35, 36.

Adi bage, engkai maka ikutip Jesus kata-kata bas Masmur ndai? Amin pe la siteh uga situhuna, banci jadi lit piga-piga alasen engkai maka bage nina Jesus. Mari sibahas. *

Alu mbelasken kata-kata enda banci saja ibuktiken Jesus maka la isampati Jahwe ia paksa si e. Perlu igalari Jesus tebusen tapi labo alu penampat Jahwe. Arus ia mate gelah banci “nanamina kematen guna kerina kalak.”​—Heb. 2:9.

Alu mbelasken piga-piga kata arah Masmur 22, banci saja merhat Jesus gelah inget kalak kerina isi masmur e. Bas jaman Jesus, biasana inget kalak Jahudi  melala masmur. Sanga begi kalak e sada ayat arah sada masmur, mis inget kalak e kerina isi masmur e. Adi e kin tujun Jesus sanga kutipna Masmur 22:1, banci inget kalak Jahudi melala nubuat bas masmur e kerna kai saja si terjadi sope ras kenca Jesus mate. (Ms. 22:7, 8, 15, 16, 18, 24) Selain si e, banci inget kalak e piga-piga ayat terakhir bas masmur e si nceritaken kerna pujin man Jahwe bage pe kerna kerajanNa si nandangi merentah i belang-belang doni.​—Ms. 22:27-31.

Alu mbelasken kata-kata Daud enda, banci saja buktiken Jesus atena maka ia la ersalah. Sope Jesus ibunuh, iadili Pengadilen Agama Jahudi ia alu cara si la sah janah ituduh kalak e enggo ihinana Dibata. (Mat. 26:65, 66) Pengadilen e iban alu merudu-rudu, iban tengah berngi, janah la ngikutken undang-undang. (Mat. 26:59; Mrk. 14:56-59) Emaka, sanga sungkun Jesus, “O Dibataku, o Dibataku, engkai maka tadingkenNdu aku?” banci jadi ibuktiken Jesus atena maka labo ia ersalah janah la lit alasenna ia ibunuh.

Banci saja ingetken Jesus atena kalak si deban maka amin pe Daud penulis Masmur e ipediat ngenanami kiniseran, labo ertina maka lanai jadi ate Dibata ngidah ia. Penungkunen Daud bas Masmur 22:1 labo ncidahken maka la ia tek man Dibata. Kenca sungkunna bage, katakenna maka tek ia ngasup Jahwe nelamatken umatNa janah terus pasu-pasu Jahwe Daud. (Ms. 22:23, 24, 27) Jesus pe bage ka, amin pe Jesus “Anak Daud” ngenanami kiniseran bas tiang siksan, labo ertina lanai jadi ate Dibata ngidah ia.​—Mat. 21:9.

Banci saja sedih kel akap Jesus perban lanai lindungi Jahwe ia gelah banci buktikenna kesetianna. Labo lit sura-sura Jahwe gelah anakNa e ngenanami kiniseran ras mate. Enda terjadi perban Adam ras Hawa mberontak man Dibata. Labo lit salah Jesus tapi perlu inanamina kiniseran ras kematen guna njawap tuduhen Setan ras nikapken tebusen guna nukur mulihi kai si enggo bene ban Adam. (Mrk. 8:31; 1 Pet. 2:21-24) Enda banci terjadi adi Jesus la ilindungi Jahwe janah paksa si e me ngenca Jesus la ilindungi Jahwe.

Banci saja isampati Jesus atena pengikutna gelah angkai kalak e engkai maka pediat Jahwe ia mate bas tiang siksan. * Teh Jesus maka kematenna selaku penjahat bas tiang siksan banci erban kalak tertuktuk. (1 Kor. 1:23) Adi angkai pengikutna engkai maka Jesus arus mate, labo ianggap kalak e Jesus penjahat tapi Juru Selamat.​—Gal. 3:13, 14.

La soal kai pe alasen Jesus ngutip kata-kata bas Masmur 22:1, tehna maka kai si terjadi man bana eme bagin arah sura-sura Jahwe. La ndekah kenca ikutip Jesus kata-kata bas Masmur e, bagenda nina, “Enggo dung!” (Joh. 19:30; Luk. 22:37) Jelas me, sanga Jesus la ilindungi Jahwe, banci idungi Jesus kerina tugasna i doni. Selain si e, banci ka terjadi kerina si tertulis kerna ia bas “Undang-Undang Musa, Ajaren Nabi-Nabi, ras Masmur.”​—Luk. 24:44.