“Man biangku pe mehuli Saksi Jahwe e. Bas sada wari, Elaine si cinder deher gerai e. Berekenna biskuit man duana biangku. Mulai je nari tiap lewat kami arah ingan gerai e, tarik-tarik biangku aku ndeheri ingan gerai, dat biskuit ka atena.

“Bage me si terjadi erbulan-bulan dekahna. Meriah akap biangku e dat biskuit, janah aku pe meriah kuakap banci ngerana ras Saksi Jahwe e. Tapi labo aku nggit ndekahsa ngerana ras kalak e. Paksa si e umurku enggo lewat 70 tahun. Janah labo melala kuteh kerna kiniteken kalak e. Enggo kecewa aku man piga-piga gereja Protestan, emaka pangen kuakap sisada mpelajari Pustaka.

“Lit ka kuidah Saksi Jahwe si njaga gerai bas piga-piga ingan bas kotaku. Kalak e pe mbacar. Lalap jawap kalak e penungkunenku arah Pustaka. Emaka reh tekna aku man kalak e.

“Bas sada wari, isungkun Elaine aku, ‘Tek nge kam maka asuh-asuhen enda pemere arah Dibata?’ Ningku ngaloi, ‘Teklah!’ Kenca si e, ibacaken Elaine Jesaya 11:6-9. Mulai je nari nggit aku erlajar Pustaka, tapi lenga aku nggit ngaloken bacan kalak e.

“Piga-piga wari kenca si e, mbahas Pustaka aku ras Elaine bage pe dilakina Brent. Kentisik ngenca bahas kami, tapi meriah kuakap. Isuruh kalak e gelah kubaca buku Matius seh ku Perbahanen Rasul-Rasul, gelahna kuteh kai situhuna si arus ilakoken pengikut Kristus. Emaka kubaca me buku e. La ndekah kenca si e, bas pertengahen tahun 2016, nggit aku erlajar Pustaka ras Brent bage pe Elaine.

“Tiap minggu, tertima-tima kel aku erlajar Pustaka bage pe perpulungen bas Bale Kerajan. Meriah kel kuakap, janah ngata bujur aku perban banci kupelajari kai kin situhuna si ajarken Pustaka. Kira-kira setahun kenca si e, iperidiken me aku. Gundari umurku enggo 79 tahun. Tek aku maka aku enggo erdalan bas dalan si benar. Itarik Jahwe aku jadi bagin arah keluargaNa. Enda buktina enggo pasu-pasu Jahwe aku.”