1. Cita-cita rohani kai nge si banci siban?

 PERBAN kita kalak Kristen, keleng kel ateta Jahwe. Pasti sibereken ateta si mehulina bas ngelayani Jahwe. Guna ngelakoken si e, perlu siban cita-cita rohani. Contohna, banci sipebelin sipat-sipatta selaku kalak Kristen, sipelajari keahlin si erguna, janah sidarami uga carana nampati kalak si deban. b

2. Engkai maka perlu siban cita-cita rohani ras siusahaken ndatkenca?

² Engkai maka nggit kita erban kemajun secara rohani? Alasen si pentingna eme perban meriah ateta siban ukur Bapakta si perkeleng si lit i surga. Meriah ukur Jahwe sanga sigunaken bakatta ras keahlinta bas ngelayani Ia. Selain si e, siban ateta kemajun rohani gelah reh buena si banci silakoken guna nampati turang seninata. (1 Tes. 4:9, 10) La soal enggo ndekah ntah mbaru denga kita jadi Saksi Jahwe, kerina kita banci erban kemajun secara rohani. Mari sibahas uga cara ngelakokenca.

3. Iahken Rasul Paulus Timotius ngelakoken kai? (1 Timotius 4:12-16)

³ Sanga tulis Rasul Paulus suratna si pertama man Timotius, Timotius enggo jadi sekalak pertua si erpengalamen amin pe ia nguda denga. Tapi tetap iahken Paulus ia erban kemajun secara rohani. (Baca 1 Timotius 4:12-16.) Janahndu ngukuri kata-kata Paulus, tehndu me kari maka ate Paulus iban Timotius min kemajun secara rohani bas dua bagin. Si pertama, mpebelin sipat-sipat selaku  kalak Kristen bagi kekelengen, kiniteken, ras lagu langkah si bersih. Si peduaken, mpebelin kengasupen i bas mbaca i lebe-lebe jelma si enterem, mereken nasehat, ras ngajar. Sibahas kari uga usihen arah Timotius banci nampati kita erban cita-cita rohani si masuk akal gelah banci reh ulina bas ngelayani Jahwe. Sibahas ka kari piga-piga cara si banci silakoken guna mereken terbuen bas pelayanen.

4. Bagi si ikataken bas Pilipi 2:19-22, kai si erban Timotius erguna kel bas ngelayani Jahwe?

⁴ Kai si erban Timotius erguna kel bas ngelayani Jahwe? Perban mejile sipat-sipatna selaku kalak Kristen. (Baca Pilipi 2:19-22.) Arah keterangen Paulus kerna Timotius, banci siteh maka Timotius e kalakna meteruk ukur, setia, rajin, ras banci iandalken. Keleng kel atena turang senina janah ermediate kel ia man kalak e. Emaka, keleng ate Paulus man Timotius, janah tek ia mereken tugas si mesera man bana. (1 Kor. 4:17) Kita pe, adi reh ulina siban sipat-sipatta, keleng ate Jahwe kita, janah erguna kel kita man runggun.​—Ms. 25:9; 138:6.

5. (a) Uga carata nentuken sipat Kristen si apai si ateta sipebelin? (b) Bagi si lit bas gambar, uga turang senina si nguda e mpebelin sipat ermediate?

⁵ Pilihlah sada sipat si atendu pebelinndu. Siukuri ras sitotokenlah lebe gelah siteh sipat si apai ateta sipebelin. Pilihlah salah sada sipat si ateta sipebelin. Contohna, banci sipebelin sipat si ermediate, ntah pe siusahaken gelah reh belinna sura-surata nampati turang senina. Banci siusahaken gelah reh nggitna kita erban dame ras ngampuni. Banci ka sisungkun temanta gelah siteh sipat kai saja si perlu sipebelin.​—Kua. 27:6.

6. Kai si perlu silakoken bas mpebelin salah sada sipatta selaku kalak Kristen?

⁶ Usahakenlah ndatken cita-citandu. Uga carana? Salah sada carana eme mpelajari kerna sipat si ateta sipebelin. Katakenlah, sipebelin ateta sipat nggit ngampuni. Banci sibenaken alu mbaca ras ngukuri usihen si lit bas Pustaka kerna kalak si nggit ngampuni ras si lang. Contohna, cuba ukuri usihen Jesus. Nggit ia ngampuni. (Luk. 7:47, 48) Labo lalap ingetna kesalahen kalak, tapi tek ia banci  nge lakoken kalak e si mehuli. Beda kel Jesus ras kalak Parisi paksa si e. Kalak Parisi “erpengakap maka kalak si deban la lit ergana.” (Luk. 18:9) Kenca siukuri contoh-contoh e, cuba siukuri ka penungkunen enda: ‘Kai nge si kunen arah kalak si deban? Sipat-sipatna si mehuli nge si kuperdiateken?’ Adi mesera siakap ngampuni sekalak jelma, cuba situlis kerina sipat-sipatna si mehuli. Kenca si e, siukurilah penungkunen enda: ‘Uga nge perukuren Jesus kerna ia? Nggit nge Jesus ngampuni ia?’ Adi silakoken bage, cara rukurta banci berubah. Tangtangna, banci saja mesera siakap ngampuni kalak si erban kitik ukurta. Tapi adi terus siusahaken ngampuni, dungna banci reh nukahna siakap ngampuni.

7. Uga Jahwe nggunaken kalak si beluh bas dahinna gundari? (Kuan-kuanen 22:29)

⁷ Cita-cita rohani si deban si banci siban eme mpelajari keahlin si erguna man organisasi Jahwe. Cuba ukuri uga teremna kalak si iperluken guna mbangun bangunen Betel, Bale Pertemuan, ras Bale Kerajan. Enterem arah kalak e ndatken keahlinna alu kerja sama ras turang senina si erpengalamen. Bagi si lit bas gambar, turang senina e mpelajari keahlin si iperluken guna ngerawat Bale Pertemuan ras Bale Kerajan. Dibata Jahwe, “Raja si rasa lalap” ras Jesus Kristus, “Raja kerina . . . raja” enggo ngelakoken melala pendahin si luar biasa arah kalak si beluh bas pendahinna. (1 Tim. 1:17; 6:15; baca Kuan-kuanen 22:29.) Pasti nggit kita kerja keras nggunaken keahlinta guna kemulian Jahwe, labo guna kemulianta.​—Joh. 8:54.

8. Uga carata milih keahlin kai si ateta sipelajari?

⁸ Pilihlah sada keahlin si pelajarindu atendu. Keahlin kai nge si pelajarindu atendu? Banci sungkunndu pertua-pertua bas runggunndu ntah pe pertua kelilingndu. Adi kataken kalak e maka perlu kam reh beluhna bas ngerana bage pe ngajar, pindolah gelah sampati kalak e kam meteh bas bagin si apai khususna kam perlu reh beluhna. Kenca si e, usahakenlah ngelakokenca. Uga carana?

9. Uga carata ndatken cita-citata guna mpelajari sada keahlin?

⁹ Usahakenlah ndatken cita-citandu. Katakenlah reh beluhna atendu bas ngajar. Adi bage, banci pelajarindu brosur Tutuslah Atendu i bas Mbaca ras Ngajar. Sanga ibereken man bandu sada tugas bas perpulungen tengah pekan, pindolah gelah kalak si erpengalamen megiken kam latihen sope pesehndu bas perpulungen. Banci ka pindondu saran gelah reh ulina bagin si pesehndu e. Sikapkenlah baginndu e ndauh-ndauh wari nari, alu bage banci idah kalak maka kam kalak si rajin ras banci iandalken.​—Kua. 21:5; 2 Kor. 8:22.

10. Kai si banci pelajarindu arah pengalamen Garry si usahakenna reh ulina bas sada keahlin?

¹⁰ Uga adi keahlin si ateta sidatken e mesera siakap ndatkenca? Ula nyerah! Cuba ukuri pengalamen arah turang seninata si gelarna Garry. c Mesera kapna mbaca. Ingetna denga maka mela kel kapna sanga arus ia mbaca bas perpulungen. Tapi, kerja keras ia gelah banci reh beluhna bas mbaca. Gundari, enggo banci pesehna khotbah-khotbah bas Bale Kerajan, pertemuan wilayah ras regional.  Si e perban pelatihen si alokenna arah turang senina si erpengalamen bage pe arah publikasi.

11. Bali bagi Timotius, uga carana gelah banci sialoken terbuen tugas tambahen?

¹¹ Payo nge Timotius dungna jadi kalak si beluh kel ngerana ras ngajar? La lit ikataken Pustaka kerna si e. Tapi tek kita, Timotius pasti reh ulina bas ngelakoken tugasna perban dalankenna nasehat Paulus. (2 Tim. 3:10) Bage ka pe, adi siusahaken gelah reh ulina keahlinta, banci reh buena si dat tugas tambahen.

12. Penampat si uga nge si pernah alokenndu arah turang senina?

¹² Kerina kita ndatken manpaat arah penampat turang senina. Contohna, sanga bas rumah sakit kita, meriah ukurta sanga reh pertua-pertua arah Panitia Penghubung Rumah Sakit ntah pe arah Kelompok Pengunjung Pasien. Sanga mberat kel masalahta, meriah ukurta sanga lit pertua si nggit megiken kita ras mereken pengapul man banta. Sanga perlu kita penampat guna mandu pelajaren Pustaka, meriah ukurta sanga lit perintis si nggit nampati kita ras mereken saran man banta. Kerina turang seninata meriah kapna nampati kita. Kita pe banci meriah ukurta adi nggit kita nampati turang seninata. Bagi nina Jesus, “Riahen kap mere asangken ngalo.” (Perb. 20:35) Adi sibereken ateta terbuen bas ngelayani Jahwe alu cara-cara si ndai ntah pe si debanna, kai si perlu siinget?

13. Sanga erban cita-cita, kai si perlu siinget?

¹³ Sibanlah sada cita-citata si jelas. Contohna, katakenlah cita-citata ngelakoken terbuen bas runggun. Tapi perban cita-cita e kurang jelas, bingung kita uga cara ndatkenca. Janah la siteh enggo sidat ntah lenga cita-citata e. Emaka sibanlah sada cita-cita si jelas. Banci situlis cita-cita e janah siban rencana guna ndatkenca.

14. Engkai maka mon-mon perlu sisesuaiken cita-cita rohanita?

¹⁴ Mon-mon perlu ka sisesuaiken cita-cita rohanita. Engkai? Perban la banci sikendaliken keadanta. Contohna, Rasul  Paulus ikut erban runggun si mbaru i Tesalonika. Pasti lit cita-citana guna tetap tading i je ras nampati runggun si mbaru e. Tapi, arus tadingkenna kota e perban mbelin kel tentangen i je. (Perb. 17:1-5, 10) Adi tetap Paulus bas kota e, turang seninana banci kena bahaya. Tapi tetap usahaken Paulus nampati kalak e. Isesuaikenna cita-citana ras keadanna. La ndekah kenca si e, iutusna Timotius guna nampati turang senina bas runggun si mbaru e. (1 Tes. 3:1-3) Pasti meriah kel ukur turang senina bas Tesalonika perban nggit Timotius nampati bas ingan si merluken.

15. Kai si banci silakoken adi berubah keadanta? Ban contohna.

¹⁵ Banci kita erlajar arah pengalamen Paulus sanga ia i Tesalonika. Banci saja enggo siban cita-cita rohani, tapi perban berubah keadanta, la banci sidat cita-citata e. (Peng. 9:11) Adi bage si terjadi man bandu, daramilah cita-cita rohani si deban si banci datkenndu. Bage me si ilakoken Tedi ras diberuna Hiedi. Perban masalah kesehaten, arus tadingken kalak e Betel. Tapi, perban keleng ate kalak e Jahwe, darami kalak e cara gelah banci mereken terbuen bas pelayanen. Tangtangna, jadi perintis biasa kalak e. Dungna, ilantik me kalak e jadi perintis istimewa. Tedi ilatih ka jadi pertua keliling pengganti. Tapi, dungna lit perubahen pengaturen kerna umur sekalak pertua keliling. Iteh Tedi ras Hiedi maka enggo metuasa kalak e ngelayani bas dahin keliling. Amin pe sempat kalak e kecewa, iteh kalak e maka banci nge ilayani kalak e Jahwe alu cara si deban. Bagenda nina Tedi, “Enggo teh kami maka labo sada ngenca carana mereken terbuen bas ngelayani Jahwe.”

16. Kai si banci sipelajari arah Galati 6:4?

¹⁶ Labo banci sikendaliken kerina si terjadi bas geluhta. Emaka perlu siinget, labo perban tugasta maka keleng ate Jahwe kita. Janah, ula sibandingken tugasta ras tugas kalak si deban. Bagenda nina Hiedi, “Adi sibandingken geluhta ras geluh kalak si deban, bene me keriahen ukurta.” (Baca Galati 6:4.) Si penting eme sidarami cara guna ngelayani Jahwe ras nampati kalak si deban. d

17. Kai si banci lakokenndu gelah banci datndu tugas tambahen?

¹⁷ Gelah banci lakokenndu terbuen bas ngelayani Jahwe, usahakenlah geluhndu  tetap sederhana janah ula ban utang adi la penting. Banlah cita-cita jangka pendek si banci nampati kam ndatken cita-cita jangka panjang. Contohna, adi jadi perintis biasa atendu, banci kam merintis ekstra tiap bulan mulai gundari nari. Adi jadi sekalak sinampati runggun atendu, banci banndu terbuen waktundu bas erberita bage pe ndahi turang senina si sakit ras si enggo metua si lit bas runggunndu. Pengalamenndu e banci nampati kam ndatken tugas tambahen bas wari si pepagi. Lakokenlah si mehulina la soal tugas kai pe si alokenndu.​—Rom. 12:11.

18. Bagi si lit bas gambar, kai si banci sipelajari arah pengalamen Beverley?

¹⁸ Kerina kita banci erban cita-cita rohani, la soal asa kai umurta. Cuba ukuri contoh arah turang seninata Beverley si umurna enggo 75 tahun. Mekelek penakitna janah e erban mesera kapna erdalan. Tapi, merhat ia mereken terbuen guna ndukung kampanye acara Peringet-ingeten. Emaka banna piga-piga cita-cita rohani si jelas. Sanga datna cita-cita rohanina e, meriah kel ukurna. Kai si ilakokenna e ngiahken turang senina si deban gelah kerja keras bas pelayanen. Ergai Jahwe kel kerja keras turang seninata si enggo metua, amin pe la mbue si banci ilakoken kalak e.​—Ms. 71:17, 18.

19. Uga kita banci ndatken cita-cita rohanita?

¹⁹ Banlah cita-cita rohani si banci datkenndu. Pebelinlah sipat-sipat si banci erban meriah ukur Jahwe. Pelajarilah keahlin si banci erban kam mereken terbuen man Dibatata ras organisasiNa. Daramilah cara-cara mereken terbuen bas nampati turang seninandu. e Bali bagi Timotius, alu penampat Jahwe, ‘kerina kalak banci ngidah kemajunndu alu jelas.’​—1 Tim. 4:15.