PERASAN kuatir bali bagi baban si mberat. (Kua. 12:25) Pernah nge putus asa tena kam perban kuatirna? Pernah nge lanai kapndu kam ngasup ngadapisa? Adi bage si gejapkenndu, labo kam sisada. Enterem arah kita pernah latih kel siakap, kuatir, ras stres perban piga-piga situasi. Contohna, lit si arus ngurus anggota keluargana si sakit, lit si mate kalak si keleng atena, ras lit ka si susah kapna perban bencana alam. Kai nge si banci nampati kita ngadapi perasan kuatir e? a

Melala si banci sipelajari arah pengalamen Raja Daud kerna uga carana ngadapi perasan kuatir. Melala situasi si sulit si arus adapina, janah mon-mon terancam geluhna. (1 Sam. 17:34, 35; 18:10, 11) Uga cara Daud tetap megenggeng sanga kuatir? Uga carata ngusih ia?

Melala masalah Daud si radu terjadi. Contohna, arus ia kiam arah Raja Saul perban bunuh Saul tena ia. Sanga mulih Daud ras anak buahna ku Siklak, enggo itangko musuh-musuh erta kalak e, itutungna ingan kalak e tading, janah itabanna keluarga kalak e. Uga tanggapen Daud? “Ngandung Daud ras anak buahna, la erngadi-ngadi kalak e ngandung seh asa lanai lit gegehna ngandung.” Selain si e, reh latihna ka ukur Daud perban ‘benteri anak buahna tena ia alu batu.’ (1 Sam. 30:1-6) Lit telu masalah Daud si radu terjadi: Keluargana lit bas bahaya, mbiar ia ibunuh anak buahna, janah ayak-ayak Raja Saul ka ia. Cuba bayangken uga perasan Daud paksa si e!

Kai si ilakoken Daud? Mis pindona gegeh man Jahwe Dibatana. Uga carana ngelakokenca? Banci saja, bagi biasana, ertoto ia mindo penampat man Jahwe janah ukurina uga Jahwe enggo nampati ia sedekah enda. (1 Sam. 17:37; Ms. 18:2, 6) Iteh Daud maka perlu daramina petunjuk Jahwe. Emaka, pindona petunjuk Jahwe kerna kai si arus ilakokenna. Kenca idat Daud petunjuk Jahwe, mis dalankenna. Dungna, ipasu-pasu Jahwe ia ras anak buahna. Banci iselamatken kalak e keluargana, ras banci mulihi dat kalak e ertana. (1 Sam. 30:7-9, 18, 19) Adi siperdiateken, lit telu si ilakoken Daud eme: (1) Ertoto ia mindo penampat Jahwe, (2) ukurina uga Jahwe enggo nampati ia sedekah enda, ras (3) mis dalankenna petunjuk Jahwe. Uga carata ngusih Daud? Mari sibahas telu carana.

1. Ertoto. Tiap kuatir kita banci kita ertoto man Jahwe mindo penampatNa ras kepentarenNa. Adi siceritaken kerina man Jahwe kai si erban kita kuatir, banci kita reh tenangna. Adi situasina kurang cocok, banci kita ertoto bas pusuhta janah gendek siban totota. Tiap sipindo penampat Jahwe, sibuktiken maka tek kita man baNa, bali bagi Daud si ngataken, “O Jahwe, Kam kap tebing batuku, Kam bagi kota si erbenteng man bangku, Kam kap Si Nelamatken aku. O Dibataku, Kam kap gunung batuku, man baNdu kap aku erlindung.” (Ms. 18:2) Tuhu kin toto banci nampati kita?  Sekalak perintis si gelarna Kahlia ngataken, “Kenca ertoto aku, tenang kuakap. Toto banci nampati aku gelah ngusih cara rukur Jahwe janah reh tekna aku man baNa.” Jelas me, toto eme pemere si luar biasa arah Jahwe, si nampati kita ngadapi perasan kuatir.

2. Ukuri. Banci saja, pernah adapindu masalah si seh kel beratna. Adi la sange kam sampati Jahwe, labo kapndu kam ngasup ngadapisa. Adi siukuri uga Jahwe nampati kita bagi Ia nampati umatNa bas jaman si nai, banci reh tenangna ukurta janah reh tekna kita man Jahwe. (Ms. 18:17-19) Bagenda nina sekalak pertua si gelarna Joshua, “Lit kuban daftar totoku si enggo ijawap Jahwe. Enda nampati aku nginget uga Jahwe mereken kai si kupindo bage pe mereken keperlunku.” Emaka, adi rusur siukuri uga Jahwe nampati kita sedekah enda, reh ngasupna kita ngadapi perasan kuatir.

3. Dalanken. Gelah banci siban keputusen si mehuli, perlu siriset lebe petunjuk si terteki arah Kata Dibata. (Ms. 19:7, 11) Enterem si enggo nggejapken maka kenca riset kalak e kerna sada ayat, banci reh jelasna angkaina uga cara ngelakoken ayat e bas geluhna. Sekalak pertua si gelarna Jarrod ngataken, “Adi riset aku, e nampati aku erlajar terbuen kerna sada ayat. Banci ka kuangkai kai kin situhuna si arapken Jahwe arah aku nari. Enda nampati aku gelah tek nandangi kai si kubaca. Emaka, banci kudalanken petunjuk e.” Amin pe sangana kita kuatir, adi sidarami petunjuk Jahwe ras sidalanken, banci kita tetap megenggeng.

Iteh Daud maka gelah banci adapina perasan kuatir, perlu ia penampat Jahwe. Ergaina kel penampat Jahwe. Emaka bagenda nina, “Alu gegeh si bereken Dibata banci kulompati tembok. Dibata si benar kap si mpegegehi aku.” (Ms. 18:29, 32) Banci saja mberat kel siakap masalahta, tempa-tempa bagi tembok si la terturiken uga ganjangna. Tapi, alu penampat Jahwe, banci silompati tembok e. Emaka, gelah banci sidat gegeh ras kepentaren arah Jahwe guna ngadapi perasan kuatir, perlu kita ertoto man Jahwe mindo penampatNa, siukuri kai si enggo ilakokenNa man banta, ras sidalanken petunjuk-petunjukNa!