1. Kai nge si erban meriah kel ukurta?

 ATE Jahwe meriah min ukurta. Enda banci siteh perban keriahen ukur eme salah sada sipat si ihasilken kesah si badia. (Gal. 5:22) Perban siteh riahen kap mere asangken ngalo, meriah kel ukurta sanga kerja keras kita bas pelayanen bage pe sanga sisampati turang seninata alu erbage-bage cara.​—Perb. 20:35.

2-3. (a) Bagi si ikataken bas Galati 6:4, lit dua si banci nampati kita tetap ermeriah ukur bas ngelayani Jahwe, kai e? (b) Kai kari sibahas bas artikel enda?

² Baca Galati 6:4. Bagi si icatat bas ayat e, ikataken Rasul Paulus lit dua cara si banci nampati kita tetap ermeriah ukur. Si pertama, sibereken min si mehulina man Jahwe sesuai ras kengasupenta. Adi bage siban, pasti meriah ukurta. (Mat. 22:36-38) Si peduaken, ula min sibandingken kita ras kalak si deban. Banci saja, melala si banci silakoken perban kesehatenta, pelatihen si enggo sidat, ntah pe bakatta. Tapi arus siinget maka kerina e rehna arah Jahwe nari, emaka arus sikataken bujur man baNa. Uga adi beluhen kalak si deban asangken kita bas pelayanen? Meriah min ukurta perban gunakenna kengasupenna guna muji Jahwe, labo guna kepentingenna ntah pe gelah ganjangen ia asangken kalak si deban. Emaka, asangken ersaing kita ras kalak e, padin kita erlajar arah kalak e nari.

³ Bas artikel enda, sibahas kari uga carana gelah la kitik ukurta amin pe lanai banci melala silakoken bas pelayanen. Sibahas ka kari uga carata nggunaken kengasupenta alu cara si mehulina, ras kai si banci sipelajari arah kalak si deban.

4. Kai saja si banci erban kitik ukurta? Ban contohna.

⁴ Piga-piga arah kita mesera siakap ngelakoken kerina si ateta silakoken man Jahwe perban kita reh tuana ntah pe perban penakit. Bage me si igejapken Carol. Mbarenda, ngelayani ia bas daerah si merluken terbuen perberita. Paksa si e, lit 35 kalak si isampatina erlajar Pustaka janah lit piga-piga kalak si dungna iperidiken. Dungna, mekelek penakitna janah arus ia dekahen istrahat i rumah. Bagenda nina Carol, “Kuteh nge perban penakitku e, lanai banci kulakoken bagi si ilakoken kalak. Tapi, adi bandingken ras kalak e, la kuakap aku kalak Kristen si mehuli. Kitik kel ukurku, perban melala sura-suraku tapi lanai banci kulakoken.” Ate Carol ilakokenna min kerina si banci ilakokenna guna Jahwe. Semangatna e seh kel ulina! Tek kita Dibatata si perkuah pasti meriah ukurNa ngidah semangat Carol.

5. (a) Kai si arus siinget adi kitik ukurta perban lanai banci silakoken kerina si ateta silakoken? (b) Bagi si lit bas gambar, uga turang senina e terus mereken si mehulina bas ngelayani Jahwe?

⁵ Adi mon-mon kitik ukurta perban lanai banci silakoken bagi si mbarenda, ukurilah penungkunen enda: ‘Kai kin si arapken Jahwe arah aku?’ Ate Jahwe silakoken min si mehulina sesuai ras keadanta. Cuba ukuri contoh enda: Lit sekalak turang seninata si umurna 80-en. Kitik ukurna perban lanai banci mbue si lakokenna bas pelayanen bagi sanga umurna 40-en. Amin pe enggo iberekenna si mehulina, si e lenga kapna erban meriah ukur Jahwe. Tapi, tuhu kin bage? Cuba ukuri enda: Adi bereken turang senina e si mehulina sanga umurna 40-en janah tetap berena si mehulina sanga umurna 80-en, e ertina lalap berena si mehulina man Jahwe. Adi kurang denga lalap siakap kai si enggo silakoken, perlu siinget maka Jahwe nge si nentukenca uga buena si perlu silakoken gelah meriah ukurNa. Adi sibereken si mehulina, pasti bagenda nina Jahwe man banta, ‘Merandal kel kam!’​—Bandingken Matius 25:20-23.

6. Kai si banci sipelajari arah Maria?

⁶ Reh nukahna siakap ermeriah ukur adi fokus kita man kai si banci silakoken, labo man kai si la banci silakoken. Cuba ukuri pengalamen arah Maria. Lanai banci ilakokenna bagi si mbarenda perban sakit ia. Tangtangna, sedih ia janah lanai kapna erguna bana. Tapi kenca si e, ukuri Maria kerna sekalak turang senina bas runggun si arus lalap bas ingan medem. Emaka, isampati Maria atena ia. Bagenda nina Maria, “Kuaturken waktuku gelah banci erberita ras ia arah telepon ras surat. Tiap kerja sama aku ras ia, meriah janah puas kuakap perban banci kusampati seninaku e.” Kita pe banci reh belinna keriahen ukurta adi fokus kita man kai si banci silakoken, labo man kai si la banci silakoken. Tapi uga adi banci denga silakoken terbuen ntah pe lit keahlinta si banci sigunaken bas pelayanen?

7. Nasehat kai si ibereken Rasul Petrus man kalak Kristen?

⁷ Bas surat Rasul Petrus si pertama, nasehatina turang seninana gelah gunaken kalak e keahlinna ntah pe kengasupenna guna mpegegehi turang seninana.  Bagenda itulis Petrus, “Sesuai ras pemere si aloken kena masing-masing selaku pengurus si mehuli arah kiniulin Dibata si luar biasa, gunakenlah e guna ngelayani kalak si deban.” (1 Pet. 4:10) Ula min sitanggungi nggunaken keahlinta ntah pe kengasupenta perban mbiar kita cian ate kalak ntah pe kitik ukur kalak ngidah kita. Adi sitanggungi, e ertina la sibereken si mehulina man Jahwe.

8. Menurut 1 Korinti 4:6, 7, engkai maka la banci kita sombong perban lit keahlinta?

⁸ La sitanggungi nggunaken keahlinta. Tapi arus ka kita hati-hati gelah ula kita sombong perban si e. (Baca 1 Korinti 4:6, 7.) Contohna, banci saja beluh kam bas mbenaken pelajaren Pustaka, la tanggungindu nggunaken keahlinndu e. Tapi perlu ingetndu gelah ula kam sombong perban si e. Katakenlah mbaru-mbaru enda berhasil kam mbenaken pelajaren Pustaka. Merhat kel kam nuriken pengalamenndu e man temanndu sada kelompok bas erberita. Sanga jumpa kam ras sada kelompokndu e, lit sekalak turang senina si nceritaken maka berhasil ia nawarken sada majalah. Kai nge si lakokenndu? Itehndu maka pasti kari meriah ukur temanndu sada kelompok e megi pengalamenndu, tapi la ceritakenndu. Timaindu kesempaten si deban guna nceritakenca gelah la akap turang senina e jilen pengalamenndu asangken pengalamenna. Enda perbahanen si mehuli. Tapi teruslah gunaken keahlinndu guna mbenaken pelajaren Pustaka. Ula sia-siaken e!

9. Uga arusna carata nggunaken bakatta?

⁹ Perlu siinget maka kerina bakatta eme pemere arah Dibata nari. Sigunaken min bakatta e guna nampati turang senina bas runggun, labo gelah hebat akap kalak kita. (Pil. 2:3) Pasti meriah ukurta perban enggo sipuji Jahwe sanga sigunaken gegehta ras kengasupenta ngelakoken kai si ngena ateNa, labo perban buen ntah pe ulin si enggo silakoken asangken kalak si deban.

10. Engkai maka la cocok adi sibandingken kelebihenta ras kelemahen kalak si deban?

¹⁰ Adi la kita hati-hati, banci saja sibandingken kelebihenta ras kelemahen kalak si deban. Contohna, lit sekalak turang senina si beluh mpeseh khotbah man jelma si enterem. Memang e kelebihenna. Tapi bas pusuhna banci saja ganjangen  kapna ia asangken turang senina si deban, si kurang beluh erkhotbah. Tapi banci saja turang senina si kurang beluh erkhotbah e, beluh ngajari anak-anakna, nggit mere, janah semangat erberita. Enterem turang seninata si gunakenna keahlinna guna ngelayani Jahwe ras nampati kalak si deban. Pasti meriah kel ukurta ngidah turang seninata si bage!

11. Engkai maka perlu siusahaken ngusih Jesus?

¹¹ Memang la mehuli adi sibandingken kita ras turang senina si deban, tapi melala si banci sipelajari arah kalak e. Usihen si mehulina eme Jesus. Amin pe kita la sempurna bagi Jesus, melala si banci sipelajari kerna sipat-sipatna bage pe perbahanenna si luar biasa. (1 Pet. 2:21) Adi siusahaken asa ngasupta ngusih Jesus, banci kita reh ulina selaku umat Jahwe janah reh beluhna kita bas pelayanen.

12-13. Kai si banci sipelajari arah Raja Daud?

¹² Bas Pustaka, melala contoh-contoh kalak si setia si banci siusih amin pe kalak e la sempurna. (Heb. 6:12) Contohna Raja Daud. Ikataken Jahwe maka ia me ‘kalak si erban meriah ukurNa.’ (Perb. 13:22) Tapi Daud labo sempurna. Pernah ka ilakokenna piga-piga kesalahen si serius. Amin pe bage, ia jadi usihen man banta. Engkai? Perban sanga ipersingeti ia, labo ibelana dirina tapi alokenna persinget si tegas e janah mindo maap ia arah ukurna nari. Emaka, iampuni Jahwe me ia.​—Ms. 51:3, 4, 10-12.

¹³ Banci kita erlajar arah Daud alu ngukuri penungkunen enda: ‘Uga nge tanggapenku sanga aku inasehati? Mis nge kuakui salahku, ntah kubela bangku? Kusalahken nge kalak si deban? Kuusahaken nge gelah lanai kuulihi kesalahenku e?’ Ukurilah penungkunen-penungkunen e sanga bacandu cerita kerna umat Jahwe si lit bas Pustaka. Seri nge masalah si adapi kalak e ras masalahku? Sipat-sipat si mehuli kai nge si cidahken kalak e? Tiap bacandu kerna cerita umat Dibata bas Pustaka, ukurilah penungkunen enda: ‘Kai nge si perlu kulakoken gelah reh miripna sipat-sipatku ras ia?’

14. Kai gunana adi erlajar kita arah turang seninata?

¹⁴ Lit gunana adi erlajar kita arah turang seninata si nguda denga ntah pe si  enggo metua. Contohna, lit nge idahndu bas runggunndu turang senina si enggo setia ngadapi tentangen arah teman sebaya, arah keluarga, ntah pe tentangen perban penakit? Idahndu nge sipat-sipatna si mehuli si usihndu atendu? Alu ngukuri usihen kalak e, banci saja datndu cara-cara guna ngadapi masalahndu. Ngata bujur kel kita perban banci siusih kiniteken turang seninata e!​—Heb. 13:7; Jak. 1:2, 3.

15. Kai nasehat si bereken Rasul Paulus gelah banci ermeriah ukur bas ngelayani Jahwe?

¹⁵ Gelah runggun dame ras ersada, tiap kalak arus mereken si mehulina. Cuba ukuri contoh arah kalak Kristen bas abad pertama. Erbage-bage keahlin ras tugas kalak e. (1 Kor. 12:4, 7-11) Tapi si e labo erban kalak e ersaing ras rubati. Iahken Paulus tiap kalak gelah mereken kai si iperluken guna “mbangun daging Kristus.” Itulis Paulus bagenda man turang senina i Epesus, “Adi kerina anggota daging e erdahin alu mehuli, daging e reh belinna janah ibangun alu kekelengen.” (Ep. 4:1-3, 11, 12, 16) Kalak si ndalanken nasehat Paulus e erban runggun dame ras ersada. Bage me gundari sigejapken bas runggun.

16. Kai tekadta? (Heber 6:10)

¹⁶ Ertekad kita gelah ula sibandingken kita ras kalak si deban. Tapi erlajarlah kita arah Jesus, janah siusahaken kel ngusih sipat-sipatna. Siusihlah kiniteken kalak si lit bas jaman Pustaka bage pe turang seninata bas jaman gundari. Adi lalap sibereken si mehulina, teklah kita maka Jahwe ‘labo la adil, emaka labo lupakenNa perbahanenta.’ (Baca Heber 6:10.) Teruslah silayani Jahwe alu ermeriah ukur. Tek kita maka pasti meriah ukurNa adi sibereken si mehulina bas ngelayani Ia.