1. Ise si erban kita banci ngerana?

 SANGA ciptaken Dibata kita, banNa kita banci ngerana. La ndekah kenca Adam iciptaken, banci ia ngerana ras Bapakna si i surga, banci ka ibanna kata-kata si mbaru. Perban si e, banci dahikenna tugasna guna erban gelar kerina binatang. (Kej. 2:19) Selain si e, seh kel riahna ukur Adam sanga tangtangna ngerana ia ras jelma si deban eme Hawa, diberuna si seh kel jilena!​—Kej. 2:22, 23.

2. Uga kalak bas jaman si nai ras si gundari nalahgunaken kengasupenna ngerana?

² Dungna, pemere e lanai igunaken bagi si iarapken Jahwe. Setan si Iblis erbual man Hawa. Bual e me si erban jelma erdosa ras dungna lanai sempurna. (Kej. 3:1-4) Kenca Adam erdosa, salahkenna Hawa bage pe Jahwe. (Kej. 3:12) Kenca bunuh Kain adekna Abil, erbual ia man Jahwe. (Kej. 4:9) Bas pudi wari, keturunen Kain si igelari Lameh erban puisi si nuriken kerna uga kekerasen bas jaman e. (Kej. 4:23, 24) Adi gundari uga? Peminpin-peminpin politik rusur cakap kotor sanga ngerana i lebe-lebe jelma si enterem. Melala film si gundari make cakap kotor. Bas sekolah ras bas ingan erdahin, rusur ka sibegi kalak cakap kotor. E buktina doni enda enggo reh jahatna.

3. Nandangi kai nge perlu kita hati-hati, janah kai kari sibahas bas artikel enda?

³ Perban rusur sibegi cakap kotor, banci saja enggo biasa siakap megisa. Adi la kita hati-hati, dungna banci terbelasken kita. Jelas me selaku kalak Kristen meriah ateta siban ukur Jahwe janah la kita nggit cakap kotor. Tapi labo bias terjeng bage saja. Perlu ka sigunaken pemere  e alu cara si mehuli eme guna muji Jahwe. Bas artikel enda, sibahas kari uga carana ngelakoken si e (1) bas pelayanen, (2) bas perpulungen, ras (3) sanga ngerana ras kalak si deban. Si pertama, mari sibahas engkai maka perdiateken Jahwe rananta.

4. Menurut Maleaki 3:16, engkai maka perdiateken Jahwe rananta?

⁴ Baca Maleaki 3:16. Menurut ayat enda, sanga ercakap-cakap kalak si mbiar man Jahwe ras si ngukuri gelarNa, perdiateken Jahwe kalak e janah tulisNa gelar kalak e bas “buku peringet-ingeten.” Engkai maka perdiateken Jahwe ranan kalak e? Perban isi pusuh kalak e banci teridah arah rananna. Nina Jesus, “Kai si ibelasken rehna bas pusuh nari.” (Mat. 12:34) Emaka, arah rananta banci teridah uga belinna kekelengenta man Jahwe. Sura-sura Jahwe, gelah kalak si engkelengi Ia nggeluh rasa lalap alu ermeriah ukur bas doni si mbaru.

5. (a) Kai hubungenna rananta ras pelayanenta? (b) Bagi si lit bas gambar, katawari saja nge perlu siukuri lebe sope ngerana?

⁵ Rananta banci nentuken meriah ntah lang ukur Jahwe ngidah pelayanenta. (Jak. 1:26) Piga-piga kalak si la engkelengi Dibata kasar rananna, nukah merawa, ras tual ngerana. (2 Tim. 3:1-5) Pasti la kita nggit bagi kalak e. Ateta meriah min ukur Jahwe ngidah rananta. Uga adi bas perpulungen ras erberita ngenca mehuli rananta, tapi man keluargata kasar kita ngerana sanga la lit si ngidahsa? Adi bage siban, pasti la meriah ukur Jahwe.​—1 Pet. 3:7.

6. Kai hasilna perban mehuli ranan Kimberly?

⁶ Adi mehuli rananta, banci sibuktiken maka kita kalak si nembah Jahwe. Banci sisampati kalak si lit i sekelilingta guna meteh alu jelas kai bedana “kalak si ngelayani Dibata ras si lang.” (Mal. 3:18) Enda teridah arah pengalamen turang seninata si gelarna Kimberly. b Bas  sekolah, isuruh ia ngerjaken tugas kelompok ras sekalak teman sekelasna. Sanga kalak e kerja sama, iperdiateken temanna ndai maka Kimberly beda kel ras teman-temanna si deban. La ia nggit cikurak, mehuli rananna, janah la ia nggit ngisakken. Dungna, tertarik teman Kimberly e, ras nggit ia erlajar Pustaka. Pasti meriah ukur Jahwe adi tertarik kalak erlajar kebenaren perban carata ngerana!

7. Uga nge ateta siban kengasupenta ngerana?

⁷ Kerina kita pasti ateta gelah rananta erban Jahwe imuliaken bage pe erban kita reh rembakna ras turang seninata. Emaka mari sibahas piga-piga carana gelah banci kita terus ‘jadi usihen bas ranan.’

8. Usihen kai si iban Jesus bas pelayanen?

⁸ Tetaplah mehuli ngerana amin pe lit si kasar ngerana man banta. Sanga Jesus ngelayani bas doni, ikataken kalak ia pemabuk, kalak rangap, dat kuasa arah Iblis, la ndalanken wari Sabat, ras la ngergai Dibata. (Mat. 11:19; 26:65; Luk. 11:15; Joh. 9:16) Amin pe bage, labo kasar ranan Jesus ngaloi kalak e. Bali bagi Jesus, ula kasar rananta man kalak amin pe kasar ia ngerana man banta. (1 Pet. 2:21-23) Memang labo nukah ngelakoken si e. (Jak. 3:2) Kai si banci nampati kita?

9. Kai si banci nampati kita gelah tetap mehuli rananta sanga erberita?

⁹ Adi lit kalak si kasar rananna man banta sanga erberita, ula min nembeh ateta. Sekalak turang senina si gelarna Sam ngataken, “Kuusahaken gelah kuinget lalap maka perlu kel teh si mpuna rumah e kebenaren kerna Dibata, janah banci nge ia robah.” Mon-mon, kasar si mpuna rumah ngerana man banta perban la cocok waktuna kita reh. Adi bage si terjadi, banci kita erlajar arah pengalamen Turang Seninata Lucia. Sanga lit kalak si merawa man bana paksa erberita, mis ia ertoto. Pindona penampat Jahwe gelah tetap ia tenang ras gelah la belaskenna ranan si la mehuli.

10. Menurut 1 Timotius 4:13, kai arusna tujunta?

¹⁰ Reh beluhna ngajar. Timotius sekalak perberita si erpengalamen. Tapi perlu denga usahakenna gelah reh beluhna ia ngajar. (Baca 1 Timotius 4:13.) Uga carana gelah reh beluhna kita ngajar bas pelayanen? Arus siban persiapen si mehuli. Ngata bujur kel kita perban lit erbage-bage publikasi si banci nampati kita reh beluhna i bas ngajar. Banci datndu informasi e arah brosur Tutuslah Atendu i bas Mbaca ras Ngajar bage pe arah bagin “Ergiah-giahlah bas Pelayanen” bas Pelayanen ras Kegeluhen Kristen​—Agenda  Perpulungen. Gunakenndu nge kerina publikasi e? Adi siban persiapen si mehuli, banci kita lanai gugupsa janah reh pangna kita ngerana bas pelayanen.

11. Kai si ilakoken piga-piga turang senina gelah reh beluhna ngajar?

¹¹ Kita pe banci reh beluhna ngajar adi siperdiateken turang senina si deban bas runggun. Sam si iceritaken ndai, ukurina engkai maka piga-piga turang senina beluh ngajar. Tutus atena mperdiateken cara kalak e ngajar, janah dungna usihna kalak e. Sekalak turang seninata si gelarna Talia, erlajar arah piga-piga pengkhotbah si erpengalamen bas mpeseh khotbah man jelma si enterem. Alu bage, tehna uga carana mbahas topik-topik si rusur sungkun kalak sanga erberita.

12. Kai saja nge si mesera akap piga-piga turang senina ngelakokenca?

¹² Kerina kita banci ikut muat bagin bas perpulungen adi ikut kita rende ras mereken komentar si enggo sipersiapken. (Ms. 22:22) Piga-piga turang senina mesera kapna rende ras mereken komentar bas perpulungen. Bage nge si gejapkenndu? Adi bage, banci saja merhat kam metehsa kai si nampati piga-piga turang senina gelah lanai ia mbiar rende ras mereken komentar.

13. Kai si banci nampati kita gelah rende alu bulat ukur bas perpulungen?

¹³ Rendelah alu bulat ukur. Sanga siendeken lagu Kerajan, tujunta si utama eme guna muji Jahwe. Sekalak turang senina si gelarna Sara ngataken maka labo kapna beluh ia rende. Tapi pujina atena Jahwe alu ende-enden. Emaka sanga persiapen bahan perpulungen ia, persiapkenna ka lagu-lagu Kerajan. Endekenna lagu-lagu e janah cubakenna ndarami kai hubungenna isi lagu e ras bahan si ibahas bas perpulungen. Bagenda nina Sara, “Adi kuukuri kerna isi lagu e, lanai kuakap penting beluh ntah lang aku rende.”

14. Adi gugup kam sanga mere komentar, kai nge si banci nampati kam?

¹⁴ Raturlah mereken komentar. Ngelakoken si e banci saja mesera kel akap piga-piga kalak. Bagenda nina Talia si enggo iceritaken ndai, “Gugup kel aku adi ngerana i lebe-lebe kalak, tapi labo teh kalak kerna si e perban labo nggirgir soraku. Emaka mesera kel kuakap mereken komentar.” Tapi si e labo erban Talia lanai nggit mereken komentar. Sanga persiapen ia, ingetna maka komentar si pertama arusna gendek ras  langsung njawap penungkunenna. Nina Talia ka, “Labo dalih amin pe komentarku gendek, sederhana, ras langsung njawap penungkunenna, perban komentar si bage nge si arapken si mandu.”

15. Kai si perlu siinget kerna mere komentar?

¹⁵ Lit turang senina si labo permela, tapi mon-mon ragu ia mere komentar. Engkai? Bagenda nina sekalak turang seninata si gelarna Juliet, “Mon-mon, ragu aku mere komentar perban mbiar aku komentarku kurang jilena.” Tapi, perlu siinget maka ate Jahwe sibereken komentar si mehulina asa ngasupta. c Meriah kel ukurNa adi sibereken si mehulina sanga mere komentar bas perpulungen amin pe mon-mon gugup kita.

16. Ranan si uga nge si la cocok sibelasken?

¹⁶ Ula belasken ranan si “ngisakken.” (Ep. 4:31) Bali bagi si enggo ibahas ndai, kalak Kristen la cocok kasar rananna. Perlu ka kita hati-hati gelah la sibelasken ranan si tempa-tempa la kasar tapi situhuna nokohi kalak. Contohna, perlu kita hati-hati gelah ula sicakapken kai si la mehuli kerna budaya, suku, ntah pe bangsa kalak si deban. Selain si e, ula min sikataken kai pe si erban kalak si deban la kapna ia iergai. Sekalak turang senina ngataken, “Mon-mon kubelasken ranan si lucu kuakap, tapi kepeken e enggo erban kalak sakit hati. Sedekah enda, melala kel aku isampati diberuku. Adi lit rananku si erban ia ntah pe kalak si deban sakit hati, mis katakenna man bangku sanga kami dua-dua saja.”

17. Bagi si ikataken bas Epesus 4:29, uga carata mpegegehi kalak si deban?

¹⁷ Belaskenlah ranan si mpegegehi. Siusahakenlah gelah rusur sipuji kalak, labo sipandangi ntah pe sijunguti. (Baca Epesus 4:29.) Melala kel alasen kalak Israel ngata bujur, tapi rusur kalak e jungut-jungut. Adi rusur kita jungut-jungut, e banci mpengaruhi kalak. Ingetlah, laporen si la mehuli arah sepuluh mata-mata erban “jungut-jungut kerina kalak Israel man Musa.” (Bil. 13:31–14:4) Tapi, adi sipuji kalak si deban, e banci erban kerina kalak ermeriah ukur. Bage me si igejapken anak Jepta. Perban rusur reh teman-temanna guna muji ia, ngasup ia ndalanken tugasna. (Hak. 11:40) Sara, si iceritaken ndai ngataken, “Adi sipuji kalak si deban, e erban ia nggejapken kekelengen Jahwe bage pe  turang seninana.” Emaka, sidaramilah carana guna muji turang seninata.

18. Menurut Masmur 15:1, 2, engkai maka arus sikataken kai si benar, janah kai saja si termasuk i bas si e?

¹⁸ Jujurlah sanga ngerana. Adi sikataken kai si la benar, la banci siban meriah ukur Jahwe. Segat ate Jahwe kerina bual. (Kua. 6:16, 17) Amin pe gundari enterem kalak la kapna salah erbual, tapi la kita nggit ngelakoken si e perban e salah akap Jahwe. (Baca Masmur 15:1, 2.) Pasti la kita nggit erbual bage pe sengaja mereken informasi si la lengkap si banci erban salah kesimpulen kalak.

19. Kai deba nari si la banci silakoken?

¹⁹ Ula cikurak. (Kua. 25:23; 2 Tes. 3:11) Juliet, si enggo iceritaken ndai njelasken uga pengaruhna sanga begina kalak cikurak. Nina, “Sanga kubegiken kalak cikurak, la aku terpegegehi. E erban aku lanai tek man kalak si sangana cikurak e. Banci saja cikurakkenna kang kari aku man kalak si deban.” Adi percakapenta enggo mulai ncikuraki kalak, mislah cakapken si deban si banci mpegegehi.​—Kol. 4:6.

20. Kai nge tekadta?

²⁰ Bas doni enda, enterem kalak si la mehuli rananna. Emaka, arus siusahaken gelah rananta erban meriah ukur Jahwe. Perlu siinget maka kengasupen ngerana eme pemere arah Jahwe janah perdiatekenNa carata nggunakenca. Ipasu-pasuNa kita adi siusahaken gelah rananta tetap mehuli sanga bas pelayanen, bas perpulungen, bage pe sanga ngerana ras kalak si deban. Kenca ikernepken Jahwe pagi doni si jahat enda, pasti reh nukahna siakap erban Jahwe imuliaken alu rananta. (Jud. 15) Emaka gundari nari, teruslah siusahaken erban meriah ukur Jahwe alu ‘kata-katata.’​—Ms. 19:14.