1. Uga nge perasan piga-piga turang senina sanga erberita si meriah? (Nen ka gambar.)

 ENGKAI maka nggit kita erberita si meriah? Perban keleng ateta Jahwe. Selain si e, merhat ka kita gelah kalak si deban pe nandai Ia. Enterem umat Jahwe meriah kapna erberita si meriah. Tapi, lit ka si labo kapna meriahsa. Engkai? Banci saja perban ia permela janah la kapna ia beluh ngajar. Lit ka si mbiar ia ndahi rumah kalak si la itandaina. Lit ka si mbiar ia irawai kalak. Selain si e, lit ka si mulai kitik-kitik nari enggo ajari orang tuana ia gelah ula erdebat ras kalak si deban. Tapi, perban keleng kel ate kalak e Jahwe, tetap usahakenna erberita. Teh kalak e maka penting kel tugas e. Janah terus kalak e teratur erberita si meriah. Pasti meriah ukur Jahwe ngidah kalak e!

2. Engkai maka la perlu kitik ukurndu adi mesera kapndu erberita?

² Mesera nge kapndu erberita? Adi ue, ula kitik ukurndu. Adi la kapndu kam beluh ngajari kalak, e buktina kam meteruk ukur. Janah la atendu kam saja si iperdiateken kalak. Si e pe mbuktiken maka la atendu erdebat ras kalak si deban. Memang, labo lit si meriah ukurna adi la aloken kalak, apai ka adi silakoken si mehuli man bana. Iteh Jahwe nge uga perasanndu janah sampatiNa nge kam. (Jes. 41:13) Bas artikel enda, sibahas kari lima cara si banci silakoken gelah ula lalap bage perasanta janah gelah meriah ukurta erberita.

 UKURILAH KATA DIBATA

3. Kai nge si ilakoken Nabi Jeremia gelah pang ia erberita?

³ Mbarenda nari, enterem umat Dibata si ndalanken tugas si mesera. Tapi, perban Kata Dibata, tetap ukur kalak e janah berhasil ngelakoken tugas e. Contohna, Nabi Jeremia. Kuatir ia sanga suruh Jahwe erberita, nina, “Aku la beluh ngerana, sebap aku nguda denga.” (Jer. 1:6) Kai nge si ilakoken Jeremia gelah pang ia? Ukurina Kata Dibata, nina, “Kata-kataNa gara bas pusuhku bagi api si terkurung bas tulan-tulanku, latih kuakap nggengkenca.” (Jer. 20:​8, 9) Amin pe melala tentangen si adapi Jeremia, pang ia ngelakoken tugasna perban ukurina Kata Dibata.

4. Kai nge manpaatna adi sibaca Pustaka ras siukuri? (Kolose 1:​9, 10)

⁴ Kita pe banci sidatken pergegeh arah Kata Dibata si lit bas Pustaka. Sanga itulis Rasul Paulus surat ku runggun Kolose, ikatakenna maka pemeteh si mbages kerna peraten Dibata, banci ngiahken ukur turang senina. Teriahken kalak e ngelakoken kai si “ngena ate Jahwe” janah terus ngelakoken ‘perbahanen si mehuli si ngasilken buah.’ (Baca Kolose 1:​9, 10.) Perbahanen si mehuli si imaksud Paulus i je termasuk dahin erberita si meriah. Emaka, adi sibaca Pustaka ras siukuri, reh paguhna kinitekenta man Jahwe. Selain si e, reh jelasna siangkai maka penting kel mberitaken Kerajan Dibata.

5. Uga nge carana gelah sidat manpaatna sanga mbaca Pustaka?

⁵ Gelah banci sidatken manpaat sanga kita mbaca Pustaka, ula kita merudu-rudu. Tapi, sibanlah waktuta guna mbaca, mpelajarisa, ras ngukurisa alu mbages. Adi mesera siakap ngangkai isi Pustaka, ula lewatken saja. Pakelah Indeks Publikasi Menara Pengawal ntah Penampat guna Riset man Saksi-Saksi Jahwe guna ngangkaisa. Adi banndu waktundu guna riset, reh tekna me kam nandangi kai si ikataken Pustaka. (1 Tes. 5:21) Adi reh tekna kam nandangi isi Pustaka, reh semangatna me kam nurikenca man kalak si deban.

BANLAH PERSIAPEN SI MEHULI

6. Engkai maka perlu siban persiapen sope kita erberita?

⁶ Adi mehuli siban persiapenta sope erberita, lanai kari kita bet-beten sanga  ngerana-ngerana ras kalak si deban. Mbarenda, isampati Jesus murid-muridna erban persiapen sope kalak e lawes erberita. (Luk. 10:​1-11) Perban lakoken kalak e si ajarken Jesus, banci dat kalak e hasil si mehuli janah meriah kel ukur kalak e.—Luk. 10:17.

7. Kai nge si banci sipersiapken sope kita erberita? (Nen ka gambar.)

⁷ Kai nge si banci sipersiapken sope erberita? Siukurilah kai si nandangi sikataken ras uga cara mpesehsa alu mehuli. Selain si e, siukuri ka kai kari tanggapen kalak ras jawapenna. Kenca si e, sanga kita ngerana-ngerana ras kalak, siusahakenlah tenang, cirem, janah mekacar man kalak e.

8. Engkai maka ipeseri Rasul Paulus kalak Kristen bagi kudin taneh?

⁸ Ikataken Rasul Paulus bagenda, “Kami bagi kudin taneh ngenca, tapi erta e itama bas kami.” (2 Kor. 4:7) Kai kin erta e? Erta e eme tugas guna mberitaken berita si meriah kerna Kerajan Dibata si banci nelamatken kegeluhen kalak. (2 Kor. 4:1) Kai kin kudin taneh e? Kudin e nggambarken umat Jahwe si mpeseh berita si meriah. Mbarenda bas jaman Paulus, ipake perbinaga me kudin taneh guna ngirim barang-barang si merga bagi pangan, anggur, bage pe sen. Bage ka pe, ipake Jahwe kita guna erberita, e mbuktiken tek kel Ia man banta. Emaka, teklah kita alu penampat Jahwe pasti ngasup kita erberita si meriah.

ERTOTOLAH GELAH PANG

9. Uga carana gelah la kita mbiar man kalak? (Nen ka gambar.)

⁹ Mon-mon, mbiar kita la aloken kalak sanga erberita. Uga carana ngatasi perasan si bage? Siingetlah contoh rasul-rasul. Sanga kalak e ilarang erberita, ertoto kalak e. Dungna, lanai kalak e mbiar janah banci kalak e tetap erberita. Ipindo kalak e man Jahwe gelah ‘pang mberitaken kataNa.’ Mis ijawap Jahwe toto kalak e. (Perb. 4:​18, 29, 31) Emaka, adi mbiar kita erberita, banci kita ertoto man Jahwe. Sipindolah man Jahwe gelah reh bagesna kekelengenta man kalak si deban. Alu bage, lanai kita mbiar erberita.

10. Uga cara Jahwe nampati kita erberita? (Jesaya 43:​10-12)

 ¹⁰ Enggo ipilih Jahwe kita jadi SaksiNa, janah erjanji Ia nampati kita gelah pang. (Baca Jesaya 43:​10-12.) Lit empat carana. Si pertama, lalap kita itemani Jesus i ja pe kita erberita. (Mat. 28:​18-20) Si peduaken, isuruh Jahwe malekat-malekatNa nampati kita. (Ket. 14:6) Si peteluken, ibereken Jahwe kesah si badia guna nampati kita gelah siinget kai si enggo sipelajari. (Joh. 14:​25, 26) Si peempatken, ibereken Jahwe turang senina guna nampati kita. Jelas me, alu penampat Jahwe bage pe turang senina, banci kita pang janah terus erberita.

BANLAH PENYESUAIEN, TETAPLAH POSITIP

11. Ndigan nge banci kita jumpa ras enterem kalak? (Nen ka gambar.)

¹¹ Pernah nge lanai meriah ukurndu erberita perban enterem kalak si la i rumah? Adi pernah, cuba ukurindu enda, ‘I ja nge sangana kalak si lit bas daerah enda?’ (Perb. 16:13) ‘Sangana nge kalak e erdahin ntah belanja?’ Adi bage situasina, banci kam erberita bas ingan si lit jelma. Sekalak turang seninata si gelarna Joshua ngataken, “Erberita aku man kalak si lit bas pajak bage pe bas ingan si enterem jelma. Engkai? Perban bas ingan si bage banci aku jumpa ras enterem kalak.” Joshua ras ndeharana Bridget pe, banci jumpa ras enterem kalak adi erberita kalak e sanga karaben, ntah pe bas wari Minggu ciger.—Ep. 5:​15, 16.

12. Kai si banci silakoken gelah siteh kai si ukuri kalak ntah pe si itekina?

¹² Sanga kita erberita, tangtangna banci saja la kalak berminat. Adi bage situasina, usahakenlah meteh kai si ukurina ntah kai si itekina. Cuba perdiateken contoh Joshua ras Bridget ndai. Guna mbenaken percakapen, igunaken kalak e penungkunen si lit bas halamen pertama risalahta. Contohna, sanga nggunaken risalah Buku Kai kin Pustaka si Badia e? ning kalak e, “Piga-piga kalak ngataken Pustaka e Kata Dibata, si debanna labo bage nina. Uga menurutndu?”  Penungkunen si bage, biasana banci mbenaken percakapen.

13. Engkai maka banci sikataken enggo berhasil kita erberita amin pe la lit kalak si megiken beritata? (Kuan-kuanen 27:11)

¹³ Amin pe la lit kalak si megiken beritata, enggom kita berhasil. Engkai? Perban enggo sidalanken perentah Jahwe bage pe Jesus, eme erberita si meriah. (Perb. 10:42) Emaka, amin pe la lit kalak si banci sijumpai ntah pe la aloken kalak beritata, tetap kita banci ermeriah ukur perban siteh enggo siban meriah ukur Jahwe.—Baca Kuan-kuanen 27:11.

14. Engkai maka ikut kita ermeriah ukur adi lit turang seninata si jumpa ras kalak si berminat?

¹⁴ Adi jumpa turang seninata ras kalak si berminat, ikut kita ermeriah ukur. Bas Sora Ermomo, dahin erberita ipeseri ras dahin ndarami sada anak-anak si bene. Enterem kalak si ndarami anak-anak e. Serser darami kalak e ku kerina ingan. Sanga dat kalak e anak e, labo kalak si ndatca saja si ermeriah ukur. Kerina kalak si ndarami anak e ikut ermeriah ukur. Dahin erberita pe bage, kita bali bagi sada tim si nampati kalak jadi murid Jesus. Kerina kita bas runggun ikut erberita. Adi lit kalak si berminat si reh ku perpulungen, kerina kita ermeriah ukur.

INGETLAH KEKELENGENNDU MAN JAHWE RAS KALAK SI DEBAN

15. Kai gunana adi siinget Matius 22:​37-39 sanga kita erberita? (Nen ka gambar.)

¹⁵ Adi siinget kekelengenta man Jahwe ras kalak si deban, banci reh riahna ukurta sanga erberita. (Baca Matius 22:​37-39.) Bayangkenlah uga riahna ukur Jahwe sanga idahNa kita erberita, ras uga riahna ukur sekalak jelma sanga mulai ia erlajar Pustaka. Bayangken ka kalak si nggit ngaloken beritata banci nggeluh seh rasa lalap.—Joh. 6:40; 1 Tim. 4:16.

16. Uga carana gelah tetap meriah ukurta sanga erberita amin pe la kita banci ndarat rumah nari? Ban contohna.

¹⁶ Uga adi la kam banci ndarat rumah nari guna erberita? Adi bage situasindu, usahakenlah asa ngasupndu guna ncidahken kekelengenndu man Jahwe bage pe man kalak si deban. Bage me si ilakoken Samuel ras diberuna, Dania, sanga pandemi COVID-19. La kalak e banci  ndarat arah rumahna nari. Amin pe mesera situasina, tetap kalak e ratur erberita arah telepon, erban surat, bage pe nampati kalak erlajar Pustaka arah Zoom. Perban Samuel sakit kanker, arus ia ertambar ku rumah sakit. Emaka banci ia erberita man kalak si lit i je. Nina, “Perban mesera situasina, mon-mon kuatir kami, latih akap kami, janah iuji kiniteken kami. Emaka arus idarami kami cara gelah banci tetap meriah ukur kami nembah Jahwe.” Lenga pe dung masalah Samuel, reh ka masalah si deban. Ndabuh me Dania janah la ia banci miser arah ingan medemna nari telu bulan dekahna. Arus ka ia make kursi roda enem bulan dekahna. Tapi nina Dania, “Kuusahaken asa ngasupku erberita. Contohna, erberita aku man perawat si ndahi aku. Erberita ka aku man kalak si naruhken paket ku rumah kami. Ngerana-ngerana ka aku arah telepon ras sekalak diberu si erdahin bas perusahan si ndayaken alat kesehaten.” Memang, la mbue si banci ilakoken Samuel ras Dania, tapi usahaken kalak e asa ngasupna guna erberita janah meriah ukur kalak e.

17. Kenca sibahas artikel enda, kai nge tekadndu?

¹⁷ Siusahakenlah ndalanken kerina saran si lit bas artikel enda. Kerina saran si lit i jenda, ipeseri ras bumbu sanga erdakan. Adi sitama kerina bumbuna, entabeh nanamna. Bage ka me, adi sidalanken kerina saran si lit i jenda, reh semangatna me kita erberita janah reh riahna ukurta.