1. Uga Jahwe ngaturken umatNa bas abad pertama?

 SANGA bereken Jahwe pendahin guna ilakoken umatNa, ateNa ilakoken min alu cara si teratur. (1 Kor. 14:33) Contohna, ate Jahwe gelah berita si meriah ipeseh ku sebelang doni. (Mat. 24:14) Enggo ibereken Jahwe man Jesus tanggung jawap guna ngaturken pendahin e. Sikap kel iaturken Jesus pendahin e. Bas abad pertama i Jerusalem, lit badan pinpinen si anggotana rasul-rasul ras piga-piga pertua si erpengalamen. Iban kalak e keputusen si perlu iikutken kerina runggun. (Perb. 14:23) Sanga runggun enggo ibentuk bas erbage-bage ingan, pertua-pertua bas tiap runggun e, mpeseh keputusen si enggo iban man turang senina. (Perb. 15:2; 16:4) Perban patuh kalak e man petunjuk si alokenna, ‘reh paguhna kiniteken runggun-runggun janah reh teremna jumlah kalak e.’—Perb. 16:5.

2. Mulai tahun 1919, uga Jahwe mereken petunjuk ras pangan rohani man umatNa?

² Terus aturken Jahwe umatNa seh ngasa gundari. Mulai tahun 1919, igunaken Jesus sada kelompok si kitik eme kalak Kristen si arapenna ku surga. Iaturken kalak e pendahin erberita ras mereken pangan rohani man pengikut Jesus. a (Luk. 12:42) Jelas me ipasu-pasu Jahwe pendahin kalak e.—Jes. 60:22; 65:​13, 14.

3-4. (a) Kai nge gunana lit pengaturen? Ban contohna. (b) Kai kari sibahas bas artikel enda?

³ Adi la lit pengaturen, la banci sidungi pendahin si ibereken Jesus. (Mat. 28:​19, 20) Contohna, bicara la lit pengaturen daerah, kerina turang senina ate-atena erberita  ku japa pe. Banci saja lit daerah si enggo rusur kel idahi. Tapi lit ka daerah si la pernah idahi. Menurutndu, lit denga nge manpaat si deban perban kita iaturken alu mehuli?

⁴ Sanga Jesus i doni, iaturkenna pengikutna. Gundari pe, terus iaturkenna umat Dibata. Bas artikel enda, sibahas kari kai si ilakoken Jesus mbarenda janah uga organisasita ngikutken usihenna. Sibahas ka kari uga carata mbuktiken maka tek kita man organisasi Jahwe.

ORGANISASITA NGIKUTKEN USIHEN JESUS

5. Kai salah sada cara organisasita ngikutken usihen Jesus? (Johanes 8:28)

⁵ Kerina si ilakoken ras si ikataken Jesus ipelajarina arah Bapakna. Organisasi Jahwe ngikutken usihen Jesus alu nggunaken Kata Dibata guna nampati kita meteh kai si benar ras si salah, bage pe mereken petunjuk bas geluhta. (Baca Johanes 8:28; 2 Tim. 3:​16, 17) Rusur kita iingetken guna mbaca ras ndalanken Kata Dibata. Kai nge gunana adi sidalanken nasehat e?

6. Uga carana gelah reh belinna sidat gunana sanga erlajar Pustaka?

⁶ Banci reh belinna sidat gunana sanga erlajar Pustaka adi sigunaken publikasita. Contohna, banci sibandingken ajaren-ajaren Pustaka ras petunjuk si ibereken organisasi. Sanga siidah maka petunjuk si enggo sialoken e erpalasken Pustaka, reh tekna me kita man organisasi Jahwe.—Rom. 12:2.

7. Berita kai nge si iberitaken Jesus, janah uga organisasi Jahwe ngikutken usihenna?

⁷ Iberitaken Jesus “berita si meriah kerna Kerajan Dibata.” (Luk. 4:​43, 44) Isuruh Jesus ka gelah murid-muridna pe mberitaken Kerajan Dibata. (Luk. 9:​1, 2; 10:​8, 9) Gundari, kerina kalak si lit bas organisasi Jahwe mberitaken Kerajan Dibata. La soal i ja pe kalak e tading, ntah uga buena tanggung jawap kalak e bas organisasi, tetap kalak e erberita.

8. Tugas penting kai nge si ibereken man banta?

⁸ Sada kehamaten man banta banci ikut mberitaken Kerajan Dibata. Labo kerina kalak banci ndatken tugas e. Contohna, sanga Jesus i doni, la pediatna malekat-malekat jahat nuriken kerna ia. (Luk. 4:41) Gundari pe, sope sekalak jelma ikut erberita ras Saksi Jahwe, arus cukupina lebe syarat guna jadi sekalak perberita. Adi nggit kita erberita i japa pe ras katawari pe, e buktina siergai tugasta e. Bali bagi Jesus, tujunta eme nuan ras niram benih kebenaren bas pusuh kalak.—Mat. 13:​3, 23; 1 Kor. 3:6.

9. Uga nge cara organisasi Jahwe mpebetehken gelar Dibata?

⁹ Iban Jesus gelar Dibata itandai kalak. Sanga ertoto ia man Bapakna, nina, ‘Enggo kuban tandai kalak gelarNdu.’ (Joh. 17:26) Organisasi Jahwe ngusih Jesus. Usahaken organisasita asa ngasupna nampati kalak nandai gelar Dibata. Salah sada carana eme arah Pustaka si Badia Terjemahen Doni si Mbaru. Bas terjemahen e, gelar Dibata mulihi itamaken ku inganna, bagi si lit bas bahasa aslina. Gundari, terjemahen Pustaka e si lengkap ras si la lengkap, lit bas lebih 270 bahasa. Adi nenndu Keterangen Tambahen A4 ras A5 bas terjemahen e, idahndu me kai alasenna janah uga carana gelar Dibata mulihi itamaken bas terjemahen e. Adi nenndu Lampiran C bas Kitab Suci Terjemahan Dunia Baru (Edisi Pelajaran), banci idahndu buktina engkai  maka lit 237 kali gelar Dibata itamaken mulihi bas Kitap-Kitap Junani Kristen.

10. Kai si banci sipelajari arah sekalak diberu i Myanmar?

¹⁰ Bali bagi Jesus, kita pe merhat nampati kalak meteh gelar Dibata. Lit sekalak diberu i Myanmar si umurna 67 tahun. Sanga tehna gelar Dibata, ngandung ia. Nina man si ngajari ia Pustaka, “Enda me tangtangna kuteh gelar Dibata e Jahwe. . . . Penting kel si ajarkenndu e man bangku, lebihen asangken kai pe.” Arah pengalamen enda, banci siteh maka sanga sekalak jelma meteh gelar Dibata, mbelin kel pengaruhna bas geluhna.

TERUSLAH TEK MAN ORGANISASITA

11. Uga nge cara pertua mbuktiken tek kalak e man organisasi Jahwe? (Nen ka gambar.)

¹¹ Uga nge cara pertua mbuktiken tek kalak e man organisasi Jahwe? Sanga aloken kalak e petunjuk, tutus ate kalak e mbacasa. Kenca si e, dalankenna alu mehuli. Contohna, aloken kalak e petunjuk kerna cara mpeseh pertoton ras tugasna bas perpulungen. Alokenna ka petunjuk kerna uga cara ngurus biri-biri Kristus. Adi dalanken pertua petunjuk arah organisasi, banci gejapken turang senina maka keleng ate Jahwe kalak e ras ermediate Ia man kalak e.

12. (a) Engkai maka perlu sipatuhi pertua? (Heber 13:​7, 17) (b) Kai akibatna adi lalap sinen kekurangen pertua?

¹² Sanga sialoken petunjuk arah pertua-pertua, meriah min ukurta ndalankenca. Adi bage siban, reh nukahna akap kalak e ngelakoken tugasna. Bas Pustaka, isuruh kita matuhi ras ngikutken petunjuk arah kalak si minpin kita. (Baca Heber 13:​7, 17.) Memang mon-mon mesera ngelakokenca. Engkai? Perban kalak e la sempurna. Tapi adi lalap kelemahenna sinen, meriah me ukur musuh-musuhta. Engkai? Perban ate musuh-musuhta ragu kita man organisasi Jahwe. Emaka, adi kekurangen pertua saja ngenca rusur sinen, dungna banci kita lanai tek man organisasi Jahwe. Adi bage, uga carata meteh kai bual musuh-musuh e, ras uga carana gelah la kita terpengaruh?

ULA PEDIAT MUSUHTA ERBAN KITA RAGU

13. Kai nge si ilakoken musuh-musuh Dibata gelah negatip perukurenta man organisasi Dibata?

¹³ Situhuna, kerina si ajarken organisasi Jahwe mehuli man banta. Contohna, sipelajari arah Pustaka maka ipindo Jahwe gelah sijaga dagingta tetap bersih, mehuli lagu langkahta, janah sisembah Dibata sesuai ras peratenNa. Ikataken Jahwe ka maka kalak si ngelakoken kesalahen si serius ras la nggit ertobat, arus ipedarat arah runggun. (1 Kor. 5:​11-13; 6:​9, 10) Nggit kita matuhi perentah Jahwe e. Tapi musuhta meriah ukurna adi negatip perukurenta nandangi kai si ajarken organisasi Jahwe. Emaka, adi sidalanken perentah Jahwe e, ikataken musuh-musuhta me kita la perkeleng ras kaku.

14. Ise nge situhuna erban berita si la tuhu kerna organisasi Jahwe?

¹⁴ Ingetlah ise kin situhuna musuhta. Setan si Iblis nge si erban berita si la tuhu kerna organisasi Jahwe. Ikataken bas Pustaka, ia me “bapak kalak si perbual.” (Joh. 8:44; Kej. 3:​1-5) Emaka labo ateta mamang ipengaruhina jelma si enterem gelah isebarkenna berita si salah kerna organisasi Jahwe. Si enda pernah terjadi bas abad pertama.

15. Kai nge si ilakoken peminpin agama man Jesus ras pengikutna?

 ¹⁵ Jesus e Anak Dibata. Sempurna ia janah melala mukjizat si ibanna. Tapi ipengaruhi Setan peminpin-peminpin agama gelah ikataken kalak e kai si la tuhu kerna Jesus. Contohna, ikataken peminpin agama maka si mereken kuasa man Jesus guna mpelawes malekat-malekat jahat eme “penguasa malekat jahat.” (Mrk. 3:22) Sanga Jesus iadili, ikataken peminpin agama ka maka enggo ihina Jesus Dibata. Ipengaruhi kalak e ka enterem kalak gelah Jesus ihukum mate. (Mat. 27:20) Bas pudi wari, ‘ipengaruhi peminpin agama ka kalak arah bangsa si deban’ gelah siksana kalak Kristen si mberitaken berita si meriah. (Perb. 14:​2, 19) Pernah ituriken bas Menara Pengawal 1 Desember 1998 kerna Perbahanen Rasul-Rasul 14:2. Ikataken i je, “La puas musuh-musuh e nulak berita si meriah. Usahaken kalak e ka mpengaruhi jelma si enterem gelah segat atena man kalak Kristen bage pe man berita si meriah.”

16. Kai nge si perlu siinget adi sibegi berita-berita si negatip kerna organisasita?

¹⁶ Mulai abad pertama seh ngasa gundari, Setan lalap erbual. Ikataken bas Pustaka, lalap denga ‘itipuna kerina kalak si tading i doni.’ (Ket. 12:9) Adi begindu berita-berita si negatip kerna organisasita ntah pe kerna kalak si lit tanggung jawapna bas organisasi, ingetlah maka bage ka nge mbarenda iban musuh Dibata man Jesus ras kalak Kristen bas abad pertama. Enggo ikataken Jesus maka umat Dibata ianiaya ras ipitnah pagi. Emaka la ateta mamang si e terjadi gundari. (Mat. 5:​11, 12) Tapi enggo jelas  siteh ise nge situhuna si erban bual kerna kita. Pasti la kita tek man bual e janah ula kita nggit megikenca.

17. Kai nge si perlu silakoken adi sibegi berita si la tuhu? (2 Timotius 1:13) (Nen ka kotak “ Si Perlu Silakoken Adi Sibegi Berita si La Tuhu.”)

¹⁷ Ula begiken berita-berita si la tuhu. Jelas kel ikataken Rasul Paulus kai si arus silakoken adi sibegi berita si la tuhu. Ikatakenna man Timotius gelah ‘persingetina kalak si mperdiateken cerita-cerita si la tuhu’ janah gelah ‘ula begiken kalak e cerita-cerita si la tuhu si hinana Dibata.’ (1 Tim. 1:​3, 4; 4:7) Cuba ukuri contoh enda. Anak-anak nggit ia man pangan si ndabuh ku lante. Tapi kalak si enggo galang, la ia nggit mansa perban tehna enggo kotor pangan e. Itehna adi panna, banci kari mesui beltekna. Bage ka me kita, la kita nggit tek man berita-berita si la tuhu. Perban enggo siteh ise situhuna si erban berita e. “Kata-kata si benar” arah kebenaren ngenca nggit kita megikenca.—Baca 2 Timotius 1:13.

18. Uga nge carata mbuktiken maka tek kita man organisasi Jahwe?

¹⁸ Enggo sibahas ndai telu cara organisasi Dibata ngusih Jesus. Sanga pelajaren pribadi kam, cuba darami cara-cara si deban si ipake organisasita guna ngusih Jesus. Sampatilah turang senina bas runggun gelah reh tekna man organisasita. Teruslah sibuktiken maka tek kita man organisasi alu setia ngelayani Jahwe ras ndukung organisasiNa si ipakeNa guna ngelakoken peratenNa. (Ms. 37:28) Mbera-mbera terus siergai organisasi Jahwe perban banci kita ersada ras umatNa si setia ras sikeleng-kelengen.