1. Kai nge si ipindo Jahwe arah kita?

 MERIAH ukur perbulangen ras ndehara adi lahir anakna. Tapi reh riahna ukur kalak e adi anakna e reh galangna, labo lalap anak bayi. Pasti mbiar kalak e adi anakna e la galang-galang. Jahwe pe bage, meriah ukurNa sanga siban keputusen guna ngikutken Jesus. Tapi labo ateNa kita lalap jadi anak bayi secara rohani, siban min kemajun. (1 Kor. 3:1) Pindo Dibata gelah perukurenta bali “bagi kalak dewasa.”​—1 Kor. 14:20.

2. Kai saja kari sibahas bas artikel enda?

² Bas artikel enda, sibahas kari: Kai nge maksudna jadi kalak Kristen si dewasa? Kai nge si arus silakoken gelah banci kita jadi kalak Kristen si dewasa? Engkai maka adi sipelajari pangan rohani si keras banci kita reh dewasana secara rohani? Janah, engkai maka ula min kita percaya dirisa?

KAI NGE MAKSUDNA JADI KALAK KRISTEN SI DEWASA?

3. Kai nge maksudna jadi kalak Kristen si dewasa?

³ Bas Pustaka, kata Junani si iterjemahken “paguh kinitekenna” banci ka ertina “dewasa,” “sempurna,” ras “lengkap.” a (1 Kor. 2:6) Bali bagi anak bayi si reh dekahna reh galangna, kita pe arusna terus reh dewasana secara rohani. Bage me carana gelah banci kita jadi kalak Kristen si dewasa. Memang, amin pe enggo kita dewasa secara rohani, arus terus siban kemajun. (1 Tim. 4:​15) Kerina kita, la soal si nguda ntah pe si enggo metua, pasti banci jadi kalak Kristen si dewasa. Tapi, uga nge kalak Kristen si dewasa secara rohani?

4. Uga nge kalak Kristen si dewasa secara rohani?

 ⁴ Kalak Kristen si dewasa secara rohani, ilakokenna kerina perentah Dibata, labo pilih-pilihina apai si atena dalankenna. Memang, perban lenga sempurna, ilakokenna denga kesalahen. Tapi, lalap usahakenna gelah perukurenna ras perbahanenna sesuai ras peraten Dibata. Pakena sipat-sipat si mbaru, janah usahakenna gelah perukurenna reh miripna ras perukuren Dibata. (Ep. 4:​22-​24) Enggo tehna erban keputusen si mehuli, si sesuai ras undang-undang ras prinsip Pustaka. Emaka la perlu ia daftar peraturen. Sanga ibanna sada keputusen, usahakenna ndalanken keputusen e.​—1 Kor. 9:​26, 27.

5. Uga nge kalak Kristen si la dewasa secara rohani? (Epesus 4:​14, 15)

⁵ Kalak Kristen si la dewasa secara rohani, nukah tek man kerina berita, man cerita-cerita si la tuhu bas media, bage pe man kalak murtad. b (Baca Epesus 4:​14, 15.) Kalak Kristen si la dewasa secara rohani banci saja percian, perubat-rubat, pergelut, ntah pe nukah tergoda ngelakoken si salah.​—1 Kor. 3:3.

6. Engkai maka kalak si reh dewasana secara rohani, ipeseri ras anak-anak si reh dewasana? (Nen ka gambar.)

⁶ Bagi si enggo sibahas ndai, ipeseri Pustaka kalak si reh dewasana secara rohani ras anak-anak si reh dewasana. Adi anak-anak, lenga melala pemetehna, emaka perlu denga ia ijaga ras isampati kalak si enggo dewasa. Contohna, lit sekalak pernanden si katakenna man anakna gelah cikepna tanna sanga kalak e nyebrang dalan. Tapi, adi enggo reh galangna anakna e, pediatna ia nyebrang sisada. Amin pe bage, lalap nge iingetken mamakna ia gelah sope nyebrang nenna lebe ku kanan ras ku kiri. Kenca enggo dewasa anakna e, lanai ia perlu isampati nyebrang, perban enggo tehna kai si banci mbahayaken ia. Bali bagi anak-anak si perlu isampati kalak si enggo dewasa, bage ka me kalak si lenga dewasa secara rohani. Perlu ia isampati guna erban  keputusen si mehuli bage pe gelah la kena bahaya secara rohani. Tapi kalak Kristen si dewasa la bage. Ukuri kalak e lebe prinsip-prinsip Pustaka sope erban keputusen gelah banci usih kalak e perukuren Jahwe. Kenca si e, lakoken kalak e keputusenna e.

7. Perlu nge kalak si dewasa secara rohani penampat arah kalak si deban?

⁷ Payo nge kalak si dewasa secara rohani lanai perlu penampat arah kalak si deban? Lang. Kalak Kristen si dewasa pe mon-mon perlu penampat. Tapi kalak si lenga dewasa secara rohani banci saja arapkenna kalak si deban si erban keputusen man bana. Adi kalak si dewasa secara rohani la bage. Sanga erban keputusen, sungkunna lebe kalak si erpengalamen. Tapi tehna ia me si arus ertanggung jawap man keputusen si ibanna, janah tehna maka tiap kalak “maba babanna masing-masing.”​—Gal. 6:5.

8. Seri nge kerina sipat kalak si enggo dewasa secara rohani? Jelasken.

⁸ Kerina kalak si enggo dewasa, labo seri penampilenna. Bage ka pe kalak Kristen si dewasa secara rohani labo seri kerina sipatna. Contohna, lit si pentar kel, lit ka si perpang kel. Lit ka si nggit mere. Lit ka si perkuah jelmana. Emaka, sanga lit dua kalak Kristen si dewasa ngadapi situasi si seri, banci saja la seri keputusenna, tapi tetap sesuai ras prinsip-prinsip Pustaka. Biasana, enda terjadi sanga keputusen si perlu iban erpalasken pusuh peraten. Amin pe la seri keputusen kalak e, labo ihakimina kalak si deban, tapi tetap kalak e ersada.​—Rom. 14:10; 1 Kor. 1:​10.

CARA JADI KALAK KRISTEN SI DEWASA

9. Banci nge otomatis kita dewasa secara rohani? Jelasken.

⁹ Adi anak-anak, otomatis nge ia reh galangna. Tapi adi kalak Kristen, la banci otomatis dewasa secara rohani. Contohna, kalak Kristen i Korinti. Enggo aloken kalak e berita si meriah, kenca si e iperidiken. Enggo aloken kalak e kesah si badia, janah melala datna manpaat arah ajaren Paulus. (Perb. 18:​8-​11) Amin pe enggo ertahun-tahun kalak e iperidiken, tapi melala denga si lenga dewasa secara rohani. (1 Kor. 3:2) Emaka, uga nge carana gelah ula kita bagi kalak e?

10. Kai si arus silakoken gelah dewasa secara rohani? (Judas 20)

¹⁰ Gelah banci kita dewasa secara rohani, arus lit lebe sura-surata jadi kalak si dewasa secara rohani. Kalak si ‘meriah kapna ngidah keadanna si la erpengalamen,’ maksudna kalak si tetap atena jadi anak-anak secara rohani, ndigan pe labo banci dewasa. (Kua. 1:​22) Pasti la ateta jadi kalak si enggo galang tapi orang tuata lalap si erban keputusen man banta. Tapi nggit kita ertanggung jawap nandangi hubungenta ras Jahwe. (Baca Judas 20.) Adi erjuang denga kam jadi kalak Kristen si dewasa, ertotolah man Jahwe gelah bereNa man bandu “sura-sura ras gegeh guna ngelakokenca.”​—Pil. 2:​13.

11. Kai saja si enggo sikapken Jahwe guna nampati kita dewasa secara rohani? (Epesus 4:​11-​13)

¹¹ Labo pediat Jahwe kita erjuang sisada gelah “dewasa” secara rohani. BerekenNa pertua ras guru bas runggun guna nampati kita. “Dungna seh kita ku tingkat kedewasan Kristus.” (Baca Epesus 4:​11-​13.) Bereken Jahwe ka kesah si  badiaNa guna nampati kita ngusih “perukuren Kristus.” (1 Kor. 2:​14-​16) Selain si e, bereken Dibata ka man banta empat Injil si nuriken kerna uga perukuren Jesus, kai si ikatakenna, ras kai si ilakokenna sanga ia i doni. Adi siusih Jesus, dewasa me kita secara rohani.

MANPAAT PANGAN ROHANI SI KERAS

12. Kai saja nge “ajaren dasar kerna Kristus”?

¹² Sanga siban kemajun, arus sipelajari “ajaren dasar kerna Kristus.” Contohna ajaren kerna pertobaten, kiniteken, peridin, ras kekeken. (Heb. 6:​1, 2) Enda me piga-piga ajaren dasar si iteki kerina kalak Kristen. Emaka sanga erberita Rasul Petrus man enterem kalak bas wari Pentakosta, ajaren e me si iturikenna. (Perb. 2:​32-​35, 38) Arus sialoken ajaren dasar e gelah banci kita jadi murid Kristus. E me sebapna ikataken Paulus maka adi la kita tek man kekeken, la kita banci jadi kalak Kristen situhu-tuhu. (1 Kor. 15:​12-​14) Tapi, labo bias ajaren dasar saja ngenca sipelajari gelah banci jadi kalak Kristen si dewasa.

13. Kai si arus silakoken gelah sidat gunana arah pangan si keras si ikataken bas Heber 5:​14? (Nen ka gambar.)

¹³ La bagi ajaren dasar, pangan si keras labo saja maksudna undang-undang Jahwe, tapi termasuk prinsip-prinsipna si banci nampati kita ngangkai perukuren Jahwe. Gelah sidat manpaat arah prinsip-prinsip e, arus sipelajari Pustaka, siukuri alu mbages kai si enggo sibaca, janah siusahaken ngelakoken kai si enggo sipelajari. Alu bage, terlatih me kita erban keputusen si erban meriah ukur Jahwe. c​—Baca Heber 5:​14.

14. Kai si ilakoken Paulus guna nampati kalak Korinti reh dewasana secara rohani?

¹⁴ Kalak Kristen si la dewasa mesera akapna erban keputusen sanga la lit peraturen si jelas bas Pustaka. Adi la lit peraturen si jelas bas Pustaka, lit kalak si erpengakap maka bebas ia ngelakoken kai pe. Lit ka si ndarami peraturen amin pe situhuna labo perlu lit peraturen. Contohna, kalak Kristen i Korinti sungkunna  peraturen man Paulus kerna man pangan si enggo ipersembahken man berhala. Labo ikataken Paulus man kalak e kai si arus ilakokenna. Iteh Paulus maka si e bergantung pusuh peraten janah tiap kalak lit ‘kebebasenna bas milih.’ Ikataken Paulus piga-piga prinsip Pustaka si banci nampati kalak e erban keputusen si erban pusuh peraten kalak e tetap bersih janah la erban kalak si deban tertuktuk. (1 Kor. 8:​4, 7-9) Ajari Paulus kalak si lit bas Korinti gelah beluh erban keputusen sendiri, alu bage dewasa kalak e secara rohani.

15. Kai si ilakoken Paulus guna nampati kalak Kristen i Heber erban kemajun?

¹⁵ Lit ka si banci sipelajari arah surat si itulis Paulus man kalak Kristen i Heber. Piga-piga kalak la banna kemajun, ‘mulihken kalak e merluken susu, labo pangan rohani si keras.’ (Heb. 5:​12) La kalak e nggit erlajar ras ngaloken ajaren si mbaru si ipeseh Jahwe alu manjar-anjar arah runggun. (Kua. 4:​18) Contohna, enterem kalak Kristen Jahudi si tetap ndalanken Undang-Undang Musa. Padahal kira-kira 30 tahun sope si e, enggo korbanken Jesus dirina. Emaka mulai je nari Undang-Undang Musa lanai perlu idalanken. (Rom. 10:4; Tit. 1:​10) Situhuna enggom bias 30 tahun guna ngangkai engkai maka lanai perlu ndalanken Undang-Undang Musa. Emaka, usahaken Paulus nampati kalak e ngaloken perubahen e. Arah suratna, ikataken Paulus maka enggo iban Jahwe cara si mbaru i bas nembah Ia eme erkelangken Jesus Kristus. Sampati Paulus kalak e guna meteh maka ulin nge cara si mbaru e asangken ndalanken Undang-Undang Musa. Sampatina ka kalak e gelah pang erberita amin pe lit tentangen arah kalak Jahudi.​—Heb. 10:​19-​23.

ULA MIN KITA PERCAYA DIRISA

16. Gelah banci terus siban kemajun, kai si arus silakoken?

¹⁶ Amin pe kita enggo dewasa secara rohani, perlu denga lalap siban kemajun. Emaka ula min kita percaya dirisa. (1 Kor. 10:12) Arus ‘terus sipereksa’ dirita guna mastiken tetap denga nge siban kemajun ntah lang.​—2 Kor. 13:5.

17. Kai nge si ikataken Paulus bas suratna man kalak Kristen i Kolose?

 ¹⁷ Bas surat Paulus man kalak Kristen i Kolose, ikatakenna mulihi maka kalak e perlu tetap dewasa secara rohani. Ikataken Paulus maka arus kalak e hati-hati gelah ula tertipu perukuren kalak si lit bas doni enda. (Kol. 2:​6-​10) Selain si e, Epapras, situhu-tuhu nandai kalak Kristen bas runggun e, terus ertoto gelah kalak e paguh ntah pe dewasa secara rohani. (Kol. 4:​12) Kai si banci sipelajari? Iteh Paulus ras Epapras maka gelah banci tetap dewasa secara rohani, perlu penampat Dibata tapi perlu ka usahata. Ate kalak e gelah kalak Kristen i Kolose, tetap dewasa secara rohani amin pe ngadapi tentangen.

18. Kai nge si banci terjadi man kalak Kristen si dewasa secara rohani? (Nen ka gambar.)

¹⁸ Ipersingeti Paulus kalak Kristen i Heber maka kalak Kristen si dewasa secara rohani pe banci lanai ndatken ngena ate Jahwe seh rasa lalap. Adi lit kalak Kristen si la patuh man Jahwe, banci ia reh dauhna arah Jahwe janah mesera kapna ertobat. Dungna lanai ia iampuni Dibata. Tapi situasi kalak Heber labo bage. (Heb. 6:​4-9) Uga adi gundari lit kalak si la aktip ntah pe ipedarat arah runggun, tapi dungna ertobat? Adi tuhu-tuhu kalak e ertobat, kalak e labo bagi si ikataken Paulus bas suratna. Tapi sanga mulihken kalak e man Jahwe, perlu ia penampat. (Esek. 34:​15, 16) Iaturken pertua-pertua me gelah lit Saksi Jahwe guna nampati ia rembak mulihi ras Jahwe.

19. Kai nge tekadta?

¹⁹ Teklah kam, pasti kam banci jadi kalak Kristen si dewasa. Emaka, teruslah pelajari pangan si keras bas Pustaka, janah usahakenlah gelah perukurenndu reh miripna ras perukuren Jahwe. Adi enggo dewasa kam secara rohani, pertahankenlah e seh rasa lalap.