1. Kai nge pardis rohani e, ras kai tekadta?

 GUNDARI PE, lit pardis bas doni enda. Bas pardis e, enterem kalak si sibuk ngelakoken si mehuli. Kalak si lit bas pardis e pe banci nggejapken kedamen. Kalak si enggo masuk ku bas pardis e, lanai nggit ndarat je nari. Selain si e, ate kalak e reh teremna min kalak si masuk ku bas pardis e. Kai e? E me pardis rohani! a

2. Engkai maka pardis rohani e luar biasa?

² Doni si ikuasai Setan enda jahat janah bahaya. Kalak si tading i je pe sisegat-segaten. (1 Joh. 5:19; Ket. 12:12) Tapi luar biasa kel, iban Jahwe sada ingan si dem kedamen ras persadan man umatNa. Iteh Dibata uga latihna akap manusia perban pengaruh doni enda. Emaka ibanNa umatNa aman gelah banci kalak e tetap ngelayani Ia alu ermeriah ukur. Bas Pustaka, ikataken maka pardis rohani e, bagi “ingan erlindung” ras “kebun si isirami alu mehuli.” (Jes. 4:6; 58:11) Perban ipasu-pasu Jahwe, kalak si tading bas pardis e banci ermeriah ukur janah aman bas wari-wari pendungi si sulit ras bahaya.—Jes. 54:14; 2 Tim. 3:1.

3. Uga nubuat bas Jesaya 65 terjadi mbarenda?

³ Igunaken Jahwe Nabi Jesaya nuriken uga kegeluhen kalak si tading bas pardis rohani. Banci siteh kerna si e bas Jesaya 65. Nubuat bas ayat e tangtangna terjadi bas tahun 537 SM. Paksa si e, kalak Jahudi si ertobat ibebasken arah penabanen i Babilon, janah mulihken kalak e ku  kutana. Ipasu-pasu Jahwe kalak e, janah sampatiNa kalak e erban kota Jerusalem si hancur jadi mejile mulihi. Isampati Jahwe ka kalak e mbangun mulihi rumah pertoton. Kenca si e, rumah pertoton e mulihi jadi ingan nembah Jahwe alu cara si benar bas Israel.—Jes. 51:11; Sak. 8:3.

4. Uga nubuat bas Jesaya 65 terjadi gundari?

⁴ Nubuat Jesaya e sekali nari terjadi bas tahun 1919. Bas tahun e, umat Jahwe ibebasken arah Babilon si Mbelin. Kenca si e, pardis rohani terus reh belangna seh ku ujung doni. Perberita Kerajan si semangat e mbentuk melala runggun janah ncidahken sipat-sipat Kristen. Dilaki ras diberu si mbarenda kejam ras ngelakoken perbahanen seks si salah, dungna ‘pakena sipat-sipat si mbaru si iban menurut peraten Dibata.’ (Ep. 4:24) Mbue pasu-pasu bas nubuat Jesaya e si terjadi pagi secara jasmani bas doni si mbaru. Tapi gundari pe, enggo melala sigejapken manpaat arah pardis rohani e. Sibahas kari kai pengaruh pardis rohani e man banta, janah engkai maka ula min kita ndarat je nari.

KAI NGE SI IGEJAPKEN KALAK SI LIT BAS PARDIS ROHANI?

5. Bagi janji si lit bas Jesaya 65:​13, kai nge si igejapken kalak si lit bas pardis rohani?

⁵ Sehat ras isegarken secara rohani. Bas nubuat Jesaya, ikataken maka beda kel kegeluhen kalak si lit bas pardis rohani ras si lang. (Baca Jesaya 65:13.) Man kalak si lit bas pardis rohani, ibereken Jahwe kai pe si iperluken kalak e gelah tetap rembak ras Ia. Ibereken Jahwe kesah si badia, Pustaka, ras melala kel pangan rohani. Alu bage, banci kita ‘man, minem, ras ermeriah ukur.’ (Bandingken Ketangkasen 22:17.) Tapi kalak si la bas pardis rohani ‘kelihen, muas, ras ipermelaken,’ perban la tandai kalak e Dibata.—Amos 8:11.

6. Uga Joel 2:​21-24 nggambarken kerina pemere Jahwe, janah kai gunana man banta?

⁶ Bas nubuat Joel, igunakenna kata biji-bijin, anggur, ras minak saitun guna ncidahken maka melala kel pangan rohani si ibereken Jahwe man banta. (Joel 2:​21-24) Contohna, ibereken Jahwe man banta Pustaka, erbage-bage publikasi, situs web, perpulungen tiap minggu, pertemuan wilayah bage pe regional. Arah kerina pangan rohani e, banci sidat manpaat tiap wari. Emaka reh segarna ras reh sehatna kita secara rohani.

7. Kai nge si erban ‘meriah ukurta’? (Jesaya 65:14)

⁷ Ermeriah ukur janah puas. Meriah ukur umat Dibata perban ergai kalak e kerina si ibereken Jahwe. (Baca Jesaya 65:14.) Perban siteh kebenaren si lit bas Pustaka, reh paguhna kinitekenta. Selain si e, malem pusuhta perban siteh janji bas Pustaka. Tek kita maka janji Dibata pasti terjadi perban enggo bere Dibata AnakNa jadi tebusen. Kerina e erban ‘meriah ukurta.’ Pasti meriah siakap ncakapken kerna si e kerina radu ras turang senina.—Ms. 34:8; 133:​1-3.

8. Kai nge dua sipat utama si icidahken kalak si lit bas pardis rohani?

⁸ Dua sipat utama si icidahken kalak si lit bas pardis rohani eme nggit ersada ras sikeleng-kelengen. E me si nampati kita mbayangken uga kegeluhenta bas doni si mbaru. I je pagi reh kelengna me ateta sada ras si debanna, janah reh ersadana kita kerina. (Kol. 3:14) Bagenda pengalamen sekalak turang seninata  si tangtangna jumpa ras Saksi Jahwe. Nina, “La kuteh uga carana gelah meriah ukurku. Keluargaku pe la ermeriah ukur. Tapi sanga kuidah kekelengen si icidahken Saksi Jahwe, i je me tangtangna kuteh uga kekelengen situhu-tuhu e.” Ise pe si atena ermeriah ukur ras puas geluhna, arus masuk ku pardis rohani. Memang lit kalak si megi berita si la tuhu kerna Saksi Jahwe. Tapi arus ia masuk lebe ku pardis rohani gelah banci idahna uga umat Jahwe ersada ras sikeleng-kelengen.—Jes. 65:15.

9. Kai nge janji si lit bas Jesaya 65:​16, 17?

⁹ Dame ras tenang. Bas Jesaya 65:14 ikataken maka kalak si la bas pardis rohani, ‘ngandung pagi perban latih ukurna, ceda pusuhna, ras getem pusuhna.’ Tapi uga kerna kalak si lit bas pardis rohani? Kerina si erban kalak e rate mesui ras susah, ‘ilupaken pagi, kerina e lanai pagi idah Dibata.’ (Baca Jesaya 65:​16, 17.) Pasti imasapken Jahwe pagi kerina kesusahenta janah siinget pe lanai.

10. Engkai maka sada pasu-pasu man banta banci jadi bagin arah organisasi Jahwe? (Nen ka gambar.)

¹⁰ Amin pe kita nggeluh bas doni si ikuasai Setan enda, banci sigejapken kedamen sanga perpulungen. Banci ka sisampati turang senina nggejapken kedamen. Uga carana? Sicidahkenlah sipat-sipat si ihasilken kesah si badia bagi kekelengen, keriahen ukur, kedamen, kiniulin, ras lembut. (Gal. 5:​22, 23) Sada pasu-pasu man banta banci jadi bagin arah organisasi Jahwe. Adi tetap kita bas pardis rohani, siidah me pagi “langit si mbaru ras doni si mbaru.”

11. Kai nge si ikataken Jesaya 65:​18, 19 kerna perasanta perban iban Jahwe pardis rohani?

¹¹ Ngata bujur kel kita. Ikataken Jesaya kai alasenna kita ‘ersurak ras ermeriah ukur’ bas pardis rohani. Jahwe kap si erban pardis rohani e. (Baca Jesaya 65:​18, 19.) Emaka, igunaken Jahwe kita nampati kalak si deban gelah ndarat arah organisasi si lit bas doni enda, si la ngajarken kebenaren kerna Dibata. Ipake Jahwe ka kita nampati kalak e gelah masuk ku pardis rohani. Melala pasu-pasu si enggo sigejapken perban siteh kebenaren. Pasti ngata bujur kel kita man Jahwe, janah teriahken kita nurikenca man kalak si deban.—Jer. 31:12.

12. Uga nge perasanndu meteh janji si lit bas Jesaya 65:​20-24?

 ¹² Ngata bujur kel kita man Jahwe perban bereNa janji man kerina kalak si lit bas pardis rohani. Bayangkenlah kai saja pagi si banci silakoken ras siidah bas doni si mbaru. Nina Pustaka, “Lanai pagi lit anak bayi si nggeluh piga-piga wari saja, lanai pagi lit kalak si metua si gendek umurna.” ‘Sibangun pagi rumah janah kita si ngianisa, sisuan pagi batang anggur janah kita si man buahna.’ ‘Labo pagi sia-sia kerja kerasta’ perban “ipasu-pasu Jahwe.” Aman pagi geluhta, puas, janah lit tujunna. ‘Lenga pe silebuh Jahwe’ enggo tehNa kai keperlunta, janah ‘sehkenNa sura-sura kerina si nggeluh seh asa puas.’—Jes. 65:​20-24; Ms. 145:16.

13. Uga Jesaya 65:25 nggambarken perubahen sekalak jelma kenca nembah Jahwe?

¹³ Ersada janah aman. Perban isampati kesah si badia, enterem kalak si mbarenda kejam, kasar, ras la jujur dungna berubah. (Baca Jesaya 65:25.) Tutus kel ate kalak e gelah banci robah. (Rom. 12:2; Ep. 4:​22-24) Memang umat Dibata lenga bo sempurna. Rusur denga siban kesalahen. Amin pe bage, ipersada Jahwe “erbage-bage jelma” si engkelengi Ia, janah kalak e pe sikeleng-kelengen. Dungna banci kita erdame janah ersada. (Tit. 2:11) Dibata Si Madakuasa ngenca si banci erban si e kerina terjadi.

14. Uga kata-kata bas Jesaya 65:25 terjadi man sekalak turang seninata?

¹⁴ Perbahanen sekalak jelma tuhu-tuhu banci berubah. Si e teridah arah pengalamen sekalak dilaki si rusur keluar masuk penjara mulai kin umurna 20 tahun. Kasar kel ia janah la rorat perbahanenna. Ipenjaraken ia perban nangko motor, ngerampok, janah ngelakoken kejahaten si debanna. Agat-agatina kalak gelahna rubat. Tapi sanga tangtangna tehna kebenaren janah reh ia ku perpulungen, tek ia enggo tehna kai tujun geluhna eme nembah Jahwe bas pardis rohani. Kenca iperidiken, rusur ukurina maka kata-kata si lit bas Jesaya 65:25 enggo terjadi man bana. Sipatna si kasar bagi singa berubah jadi lembut bagi biri-biri.

15. Engkai maka meriah ukurta ngundang kalak masuk ku pardis rohani, janah uga carata ngelakokenca?

¹⁵ Jesaya 65:13 bas bagin awal ayat e ngataken: “Bagenda nina Jahwe Tuhan Si Meganjangna.” Bas akhir ayat 25 ngataken: “Nina Jahwe.” E ertina kai pe si ijanjiken Jahwe pasti terjadi. (Jes. 55:​10, 11) Gundari pe, enggo sigejapken uga nanamna bas pardis rohani. Iban Jahwe kerina kita jadi sada keluarga, janah luar biasa kel si e. Banci sigejapken kedamen bas pusuhta, ersada kita, janah aman siakap amin pe nggeluh bas doni si jahat enda. (Ms. 72:7) Perban si e, meriah ukurta nampati enterem kalak gelah banci jadi keluarga Jahwe. Uga carana? Tutuslah ateta erban murid.—Mat. 28:​19, 20.

NAMPATI KALAK GELAH MASUK KU PARDIS ROHANI

16. Uga nge kalak si masuk ku pardis rohani?

¹⁶ Penting kel tugasta nampati kalak masuk ku pardis rohani. Banci kita berhasil adi siusih Jahwe. Labo ipaksa Jahwe kalak gelah masuk ku organisasiNa. Tapi alu lembut, tarikNa kalak e. (Joh. 6:44; Jer. 31:3) Adi meteruk ukur  kalak e, janah merhat kalak e nandai Jahwe ras meteh sipat-sipatNa, pasti nggit kalak e itarik Jahwe. Uga nge carata nampati kalak e gelah banci masuk ku pardis rohani? Sicidahkenlah perbahanen si mehuli.

17. Uga nge carata nampati kalak gelah masuk ku pardis rohani?

¹⁷ Sikelengilah turang seninata janah mehuli perbahanenta man kalak e. Sanga sekalak jelma tangtangna reh ku perpulungen, meriah ukurta adi seri penggejapenna ras kalak si reh ku perpulungen bas Korinti si mbarenda. Ikataken kalak e, “Tuhu-tuhu kepe Dibata lit i tengah-tengah kena.” (1 Kor. 14:​24, 25; Sak. 8:23) Emaka teruslah sidalanken nasehat si ngataken, “Usahakenlah gelah erdame sada ras si debanna.”—1 Tes. 5:13.

18. Kai nge si erban kalak tertarik masuk ku pardis rohani?

¹⁸ Arus siusahaken ngenen turang seninata bagi cara Jahwe ngenen kalak e. Uga carana? Siusahakenlah ngenen kai si mehuli si lit bas kalak e, ula kekurangenna. Adi enggo sempurna pagi kalak e, lanai bo lit kekurangenna e. Memang labo seri kerina sipatta. Tapi perbedan e labo jadi masalah man banta adi ‘mehuli janah mekuah ateta man sada ras si debanna, ras nggit kita ngampuni.’ (Ep. 4:32) Adi bage siban, tertarik me kalak masuk ku pardis rohani perban kalak e pe pasti meriah ukurna adi bage perbahanenta. b

 ULA NDIGAN PE TADINGKEN PARDIS ROHANI

19. (a) Arah kotak “ Ndarat Nce Mulihken Ka,” kai nge si ikataken kalak si mulih ku pardis rohani? (b) Kai nge tekadta? (Nen ka gambar.)

¹⁹ Sada kehamaten man banta banci masuk ku pardis rohani. Pardis rohani reh dekahna terus reh ulina. Reh teremna ka kalak si masuk ku je. Emaka siergailah pardis rohani si enggo iban Jahwe. Ise pe si atena isegarken, puas, ras tenang, arus masuk ia ku pardis rohani, janah ula ndigan pe ndarat je nari. Tapi perlu kita hati-hati perban lalap usahaken Setan ngelakoken kai pe gelah ndarat kita je nari. (1 Pet. 5:8; Ket. 12:9) Ula sipediat ia menang! Sijagalah pardis rohani e gelah tetap mejile, badia, ras dame.