ENGGO lebih 80 tahun umur Diana, janah piga-piga tahun enda sakit ia. Perbulangenna sakit Alzheimer janah irawat bas panti jompo, tapi gundari nggo mate. Dua anakna si dilaki pe nggo mate. Ia pe kena kanker payudara. Tapi sanga jumpa turang senina ras Diana bas perpulungen ntah pe sanga erberita, lalap ia ermeriah ukur.

Nggo lebih 43 tahun John jadi pertua keliling. Meriah kel akapna bas tugasna e janah la pernah ibayangkenna ia ndahiken tugas si deban. Tapi arus ngadi ia bas tugasna e nari perban arus iurusna keluargana si sakit. Sanga jumpa turang senina ras John bas kebaktin, idah kalak e ia tetap ermeriah ukur bagi si mbarenda.

Engkai maka Diana ras John banci ermeriah ukur? Kai si erbanca kalak si melala masalahna banci ermeriah ukur? Kai si erbanca kalak si arus nadingken tugas si meriah akapna banci ermeriah ukur? Jawapenna lit i bas Pustaka. Nina, ‘Kerina kalak benar ermeriah ukur i bas Jahwe.’ (Masmur 64:11) Banci lebih siangkai kari kerna si enda adi siteh kai si erbanca kita terus ermeriah ukur ras kai si lang.

Biasana, lit piga-piga si banci erban meriah ukurta. Contohna, lit dilaki ras diberu singenan janah dungna erjabu. Ntah pe lit si nandangi jadi orang tua, ntah lit ka si dat tugas si mbaru bas ngelayani Jahwe. Kerina enda erban meriah ukurta perban Jahwe si merekenca. IbanNa kita banci erjabu, banci lit anakta, janah banci erdahin bas organisasiNa.​—Kejadin 2:18, 22; Masmur 127:3; 1 Timotius 3:1.

Tapi, si erban meriah ukurta e banci saja sementara ngenca. Pasti sedih kel siakap sanga teman geluhta la setia ntah pe mate. (Esekiel 24:18; Hosea 3:1) Anak-anak banci saja la patuh man orang tuana bage pe man Dibata, janah banci ka ia ipecat. Contohna, anak-anak Samuel la ngelayani Jahwe bagi si ngena ateNa, janah melala masalah Daud bas keluargana perban dosana ras Batseba.  (1 Samuel 8:1-3; 2 Samuel 12:11) Adi terjadi si e, la meriah ukurta, tapi ceda kel ateta janah mesui kel siakap.

Bage ka pe, mon-mon arus ngadi kita ngelakoken tugasta bas ngelayani Jahwe perban kita sakit, arus siurus keluargata, ntah pe perban lit perubahen i bas organisasi. Enterem kalak si mbarenda arus nadingken tugasna ngataken maka merhat ka ia nggejapken mulihi keriahen ukurna paksa si e.

Nggo jelas siidah maka kai si erban meriah ukurta e sementara ngenca. Tapi lit nge si banci erban kita tetap ermeriah ukur aminna pe melala masalahta? Pasti lit, perban Samuel, Daud, ras si debanna tetap ermeriah ukur sanga melala masalah kalak e.

Iteh Jesus kai situhuna keriahen ukur e. Sope reh ia ku doni, ikataken Pustaka maka ia “dem keriahen i bas adep-adepen [Jahwe].” (Kuan-kuanen 8:30) Tapi, sanga reh ia ku doni, mon-mon mberat kel tentangen si arus iadapina. Aminna pe bage, meriah ukur Jesus ngelakoken peraten Bapakna. (Johanes 4:34) Tapi uga sanga nandangi mate ia bas tiang siksan? Nina Pustaka, “Erkiteken keriahen ukur si itama i lebe-lebena, ngasup ia megenggeng i tiang siksan.” (Heber 12:2) Emaka melala si banci sipelajari arah dua hal si ikataken Jesus kerna keriahen ukur situhu-tuhu.

Bas sada waktu kenca dung erberita, idahi 70 murid Jesus ia. Meriah kel ukur kalak e kerna kerina si nggo ilakokenna, termasuk mpelawes malekat-malekat jahat. Tapi nina Jesus man kalak e, “Ula ermeriah ukur perban malekat-malekat jahat e patuh man kena, tapi ermeriah ukurlah perban gelar kena nggo itulis i surga.” (Lukas 10:1-9, 17, 20) Payo, penting kel erban senang ukur Jahwe. Janah ndauh riahen adi ngena ate Jahwe kita asangken tugas istimewa kai pe.

Bas kesempaten si deban, sanga ngerana Jesus man jelma si nterem, lit sekalak diberu Jahudi si meriah kel kapna megiken pengajaren  Jesus, janah nina pasti meriah kel ukur nande Jesus erkiteken anakna e. Tapi nina Jesus ngaloi, “Lang, tapi ermeriah ukur me kalak si megiken kata Dibata ras ndalankenca!” (Lukas 11:27, 28) Memang, adi bangga kita ernin anakta, meriah ukurta. Tapi si banci erban kita terus ermeriah ukur eme patuh man Jahwe janah rembak ras Ia.

Meriah kel siakap sanga siteh ngena ate Jahwe kita. Amin pe mberat siakap sanga lit masalahta, keriahen ukurta la banci bene. Situhuna, adi tetap kita setia sanga lit masalahta, reh bagesna keriahen ukurta. (Roma 5:3-5) Selain si e, ibereken Jahwe ka kesah si badia man kalak si tek man baNa. Salah sada sipat si ihasilken kesah si badia eme keriahen ukur. (Galati 5:22) E me sebapna ngkai maka ikataken Masmur 64:11, ‘Kerina kalak benar ermeriah ukur i bas Jahwe.’

Enda ka nge si erban Diana ras John banci tetap ermeriah ukur aminna pe ngadapi masalah. Nina Diana, “Kupindo penampat Jahwe janah tek aku man baNa, bagi anak man orang tuana.” Nina ka, “Kugejapken maka nggo pasu-pasuNa aku. Ngasup aku ratur erberita janah banci aku cirem.” Kai si erbanca maka tetap John ermeriah ukur janah banci tetap sibuk bas pelayanen amin gia arus nadingken tugasna? Nina, “Mulai tahun 1998 sanga itugasken aku ngajar bas Sekolah Pelatihan Pelayanan, reh rusurna aku erlajar pribadi.” Ijelaskenna maka reh nukahna iakapna ras ndeharana ngikutken perubahen perban lalap kalak e nggit ngelakoken kai pe si itugasken Jahwe. Nina ka, “Sitik pe la kami nyesal.”

Enterem ka si nggejapken maka payo kai si ikataken Masmur 64:11. Contohna, sekalak perbulangen ras ndeharana si nggo lebih 30 tahun ngelayani i Betel Amerika Serikat. Itugasken kalak e jadi perintis istimewa. Nina kalak e, “Biasa nge sedih siakap adi arus sitadingken kai si meriah siakap. Tapi ula ndekahsa.” Kenca seh kalak e bas daerah tugasna, mis kalak e erberita ras turang senina. Janah ning kalak e ka, “Itotoken kami ka kai saja keperlun kami. Sanga ijawap Jahwe, terpegegehi kel kami janah meriah kel ukur kami. La ndekah kenca kami bas runggun e, lit turang senina si mulai ikut merintis, janah ipasu-pasu kami perban lit dua si erlajar Pustaka ras kami maju.”

Memang labo banci lalap kita ermeriah ukur. Mon-mon lit ka masana kita sedih. Tapi, ipetetap Jahwe ukurta arah kata-kata bas Masmur 64:11. Sanga kitik ukurta pe, banci kita tek maka adi tetap kita setia la soal kai si terjadi, tetap kita ‘ermeriah ukur i bas Jahwe.’ Banci ka siarapken seh me pagi waktuna janji Jahwe terjadi kerna ‘langit si mbaru ras doni si mbaru.’ Kerina manusia jadi sempurna janah ‘ersurak ras ermeriah ukur seh rasa lalap’ erkiteken kai si nandangi ilakoken Jahwe.​—Jesaya 65:17, 18.

Bayangkenlah kai si terjadi pagi. Tuhu-tuhu kita sehat janah medak kenca kita reh gegehna tiap wari. Kerina si erban kita sedih mbarenda, lanai pagi lit. Erjanji Jahwe maka “kejadin-kejadin si enggo lepas ilupaken kerina.” Sialo-alo me kerina kalak si keleng ateta si nggo mate. Sigejapken me perasan orang tua anak diberu si umurna 12 tahun si ipekeke Jesus, “Lanai tanggung riahna ukur kalak si i je.” (Markus 5:42) Dungna, kerina manusia tuhu-tuhu jadi kalak benar janah ‘ermeriah ukur i bas Jahwe’ rasa lalap.