1-2. (a) Bas piga-piga negeri, kai si rusur irayaken kalak? (Nen kotak “Kai kin Tahun Pembebasen e?”) (b) Kai si ibahas Jesus bas Lukas 4:16-18?

BAS piga-piga negeri, adi nggo 50 tahun sekalak raja ntah pe ratu merentah, biasana iban perayan si istimewa. Banci saja sada wari dekahna, seminggu, ntah pe lebih, janah seh kel riahna. Tapi kenca nggo lewat perayan e, lupa nge kalak dungna.

² Mbarenda pe, iban bangsa Israel ka sada perayan bas tiap tahun si pelima puluhken, janah irayaken sada tahun dekahna. Perayan e igelari tahun Pembebasen, eme pembebasen man kalak Israel. Engkai maka perlu sipelajari perayan e? Perban arah perayan e banci siteh kerna pengaturen si iban Jahwe guna mbebasken kita. Bas artikel enda, sibahas kari kerna pengaturen e si ndauh ulin asangken tahun Pembebasen bas Israel mbarenda. Kebebasen si ibereken Jahwe e tahan rasa lalap janah gundari pe nggo sigejapken. Jesus pe pernah ibahasna kerna si e.​—Baca Lukas 4:16-18..

3. Menurut Imamat 25:8-12, kai gunana tahun Pembebasen man kalak Israel?

³ Kai maksud Jesus sanga ikatakenna kerna kalak si ibebasken pagi? Banci lebih siangkai e adi sibahas lebe tahun Pembebasen si nggo itetapken Dibata man umatNa mbarenda. Ikataken Jahwe man bangsa Israel, “Alu bage iserapkenndu tahun pelima puluhken janah ermomo kerna kebebasen man kerina penduduk. I bas tahun e, kerina erta si enggo idayaken arus maka iulihken man empuna si gelgel, ntah man kesusurenna. Asa kai kalak si enggo idayaken jadi budak arus maka iulihken man keluargana.” (Baca Imamat 25:8-12.) Bas artikel si nggo lewat, nggo sibahas kai gunana Sabat si idalanken kalak Israel sekali seminggu. Kai dage gunana tahun Pembebasen man kalak e? Misalna, lit kalak Israel si terpaksa  idayakenna tanehna guna nggalari utangna. Tapi bas tahun Pembebasen, taneh e arus iulihken man bana. Perban taneh e nggo “iulihken man empuna si gelgel,” banci iwariskenna pagi taneh e man anak-anakna. Contoh si deban, lit kalak Israel si terpaksa idayakenna bana ntah pe anakna gelah jadi budak guna nggalari utangna si seh kel buena. Tapi bas tahun Pembebasen, kalak si jadi budak e arus “iulihken man keluargana.” Emaka la lit kalak Israel si jadi budak segedang geluhna. Arah pengaturen e, banci siteh maka keleng kel ate Jahwe umatNa.

4-5. Engkai maka perlu denga sipelajari tahun Pembebasen?

⁴ Kai ka gunana tahun Pembebasen e? Ipeseh Musa kai si ikataken Jahwe, nina, “[Jahwe] si masu-masu kam i negeri si iberekenNa man bandu, e maka sada pe la lit kam kalak musil.” (Ul. 15:4) Seh kel bedana ras keadanta si gundari, perban kalak bayak reh bayakna, kalak mesera reh serana!

⁵ Perban kita kalak Kristen, lanai sidalanken Undang-Undang Musa. Emaka, la sidalanken undang-undang kerna tahun Pembebasen mbarenda, misalna kerna mbebasken budak, nasapken utang, bage pe ngulihken taneh warisen. (Rom. 7:4; 10:4; Ep. 2:15) Tapi, perlu denga sipelajari kerna tahun Pembebasen. Engkai? Perban arah pengaturen Jahwe man bangsa Israel e banci siteh maka kita pe banci ibebasken.

6. Arah kai nge manusia perlu ibebasken?

⁶ Kita pe perlu ibebasken perban kerina kita nggo jadi budak dosa si seh kel kejamna. Perban nggo erdosa, sakit me kita, metua, janah dungna mate. Enterem kalak nggo igejapkenna e sanga ercermin ia ntah pe sanga lawes ia ertambar ku dokter. Banci ka kitik ukurta sanga lit kesalahenta. Nina Rasul Paulus, “I bas dagingku, lit undang-undang dosa si njadiken aku tabanen.” Nina ka,  “Andiko, uga narilah pe aku enda! Ise nge si nelamatken aku arah daging si maba ku kematen enda?”​—Rom. 7:23, 24.

7. Kai si itulis Jesaya kerna pembebasen?

⁷ Ngata bujur kel kita perban nggo iban Dibata pengaturen gelah banci kita iselamatken ntah pe ibebasken arah dosa. Arah Jesus ngenca banci sidat kebebasen e. Lebih 700 tahun sope reh Jesus ku doni, nggo ikataken Nabi Jesaya kerna pembebasen e. Janah ndauh belinen e asangken pembebasen si igejapken kalak Israel bas tahun Pembebasen. Itulis Jesaya, “Kesah [Jahwe] si Erdolat lit i babongku. Enggo ipilihNa aku, lako maba berita si mehuli man kalak musil. IsuruhNa aku pepalem kalak si getem pusuhna, meritaken kebebasen man kalak si tertaban.” (Jes. 61:1) Ise nge si imaksudken Nabi Jesaya e?

8. Ise maksud Jesaya sanga itulisna kerna pembebasen?

⁸ Si ikataken Jesaya ndai terjadi sanga imulai Jesus pelayanenna i doni. Sanga lawes Jesus ku ingan pulung kalak Jahudi bas kutana i Nasaret, ibacakenna kata-kata si itulis Jesaya i lebe-lebe kalak Jahudi si sangana pulung. Nina Jesus, “Kesah Jahwe lit i bas aku, erkiteken ipilihNa aku guna mberitaken berita si meriah man kalak si mesera. IsuruhNa aku guna mberitaken kebebasen man kalak tabanen, erban kalak pentang erpengidah, mbebasken kalak si itindas, janah mpebetehken kerna waktuna ipasu-pasu Jahwe kari kalak e mulihi.” (Luk. 4:16-19) Kai buktina kata-kata Jesaya e terjadi man Jesus?

9. Pembebasen si uga nge si iarapken kalak arah Jesus?

⁹ Bas jaman Jesus, mulai igejapken kalak kebebasen si ibacaken Jesus arah buku Jesaya. Banci kita tek kerna si e perban nina Jesus, “Gundari terjadi me ayat si edenga ibegi kena.” (Luk. 4:21) Megi si e, nterem si iarapkenna gelah ibebasken Jesus pagi kalak e arah pemerentahen Roma. Banci saja seri perukuren kalak e ras dua dilaki si ngataken, “Iarapken kami maka ia me si mbebasken Israel.” (Luk. 24:13, 21) Tapi labo isuruh Jesus pengikutna gelah ngelawan pemerentahen Roma si kejam. Isuruhna pengikutna gelah ‘ibereken kalak e man Kaisar kai si memang jadi bagin Kaisar.’ (Mat. 22:21) Emaka, kai nge si ilakoken Jesus guna mbebasken kalak paksa si e?

10. Arah kai manusia ibebasken Jesus?

¹⁰ Reh Jesus, Anak Dibata, ku doni guna mbebasken manusia arah dua perbudaken.  Si pertama, ibebaskenna kalak arah ajaren si salah si iajarken peminpin agama. Paksa si e, nterem kalak Jahudi ipaksa gelah ikutina adat manusia bage pe ajaren si salah. (Mat. 5:31-37; 15:1-11) Tempa-tempa pentang peminpin agama e. Ikatakenna isampatina kalak ngelayani Dibata, tapi ia sendiri pe salah carana ngelayani Dibata. Itulakna Mesias ras ajarenna, emaka tetap kalak e pentang janah dosana e la banci iampuni. (Joh. 9:1, 14-16, 35-41) Perban iajarken Jesus kebenaren janah mehuli ia man kalak si deban, ibuktikenna maka kalak si meteruk ukur banci bebas arah ajaren-ajaren palsu.​—Mrk. 1:22; 2:23–3:5.

11. Arah kai ka manusia ibebasken Jesus?

¹¹ Si peduaken, ibebasken Jesus manusia arah dosa. Uga carana? Iberekenna geluhna jadi korban tebusen. Erkiteken e, banci iampuni Jahwe dosa kalak si erkiniteken nandangi korban e janah si mbuktiken kinitekenna arah perbahanenna. (Heb. 10:12-18) Nina Jesus, “Adi ibebasken Anak e kena, kena tuhu-tuhu bebas.” (Joh. 8:36) Pasti ndauh belinen pembebasen e asangken si pernah terjadi man bangsa Israel bas tahun Pembebasen! Misalna, sekalak budak si ibebasken bas tahun Pembebasen banci saja jadi budak ka ia mulihi janah dungna mate me ia. Tapi, kebebasen si ibereken Jesus erguna rasa lalap.

12. Ise nge si tangtangna dat kebebasen si iumumken Jesus?

¹² Bas wari Pentakosta tahun 33 Masehi, ilantik Jahwe rasul-rasul bage pe dilaki ras diberu si setia alu kesah si badia. Iban Dibata kalak e jadi anakNa gelah banci kalak e ipekeke pagi ku surga janah merentah ras Jesus. (Rom. 8:2, 15-17) Kalak e me si tangtangna dat kebebasen si iumumken Jesus bas ingan pulung kalak Jahudi i Nasaret. Lanai kalak e jadi budak ajaren palsu bage pe lanai jadi budak arah kerina adat si iajarken peminpin-peminpin agama Jahudi si la lit iajarken bas Pustaka. Selain si e, nggo bebas kalak e iakap Jahwe arah dosa si maba kematen. Tahun Pembebasen man kalak Kristen imulai bas wari Pentakosta 33 Masehi, sanga ilantik Jahwe pengikut Jesus guna merentah i surga, janah dung pagi tahun Pembebasen e bas pendungi Pemerentahen Seribu Tahun Jesus. Pasu-pasu kai saja si banci  sidat gundari nari ngasa pendungi Pemerentahen Seribu Tahun pagi?

13-14. Selain kalak Kristen si ipilih ku surga, ise ka si ibebasken Jesus?

¹³ Gundari, nterem kel kalak si meteruk ukur arah erbage bangsa jadi ‘biri-biri si deban.’ (Joh. 10:16) Kalak e la ipilih Jahwe guna merentah ras Jesus i surga. Tapi, nina Pustaka lit arapen kalak e nggeluh rasa lalap i doni.

¹⁴ Adi arapenndu nggeluh rasa lalap i doni, situhuna gundari pe nggo idatndu pasu-pasu si igejapken teman Jesus merentah pagi i surga. Misalna, perban erkiniteken kam nandangi korban tebusen Jesus, banci ipindondu gelah iampuni Jahwe dosa-dosandu. Dungna, banci malem akapndu perban bersih pusuh peratenndu i lebe-lebe Jahwe. (Ep. 1:7; Ket. 7:14, 15) Selain si e, nggo ka kam bebas arah ajaren palsu. Nina Jesus, “Iteh kena me kebenaren e, janah kebenaren e si mbebasken kena.” (Joh. 8:32) Pasti la tanggung siakap riahna perban nggo ibebasken kita!

15. Kebebasen ras pasu-pasu kai nge si banci sidat pagi?

¹⁵ Teklah kam maka lit pagi pembebasen si seh kel belinna. Lanai ndekah, ikernepken Jesus me agama palsu ras pemerentahen manusia si jahat. Tapi pasti  ilindungi Dibata “kelompok jelma si nterem” si ngelayani Ia janah ipasu-pasuNa pagi kalak e bas doni si jadi pardis. (Ket. 7:9, 14) Enterem kel pagi si ipekeke janah ibebasken arah kerina akibat dosa Adam.​—Perb. 24:15.

16. Kebebasen si luar biasa kai ka si banci sidat pagi?

¹⁶ Bas Pemerentahen Seribu Tahun pagi, iban Jesus ras teman-temanna merentah gelah kerina manusia lanai sakit-sakit janah rembak kel ras Dibata. Bali bagi kalak Israel si ibebasken bas tahun Pembebasen, kerina manusia pe tuhu-tuhu bebas pagi bas Pemerentahen Seribu Tahun. Dungna, kerina kalak si setia man Jahwe jadi sempurna janah lanai erdosa.

17. Menurut Jesaya 65:21-23, uga pagi keadan manusia? (Nen gambar bas sampul majalah enda.)

¹⁷ Banci siteh uga keadan doni enda pagi arah Jesaya 65:21-23. (Baca.) Lit si erpengakap maka bas pardis pagi lanai kita perlu erdahin janah banci santai-santai saja. Tapi nina Pustaka, erdahin nge pagi manusia janah pasti puas kel iakapna. Bas pendungi Pemerentahen Seribu Tahun, tek kita maka “kerina si ijadiken Dibata ibebasken me arah perbudaken dosa ras kematen, janah ngenanami kebebasen si mulia si bali bagi si inanami anak-anak Dibata.”​—Rom. 8:21.

18. Engkai maka tek kita banci meriah geluhta pagi?

¹⁸ Mbarenda, iaturken Jahwe gelah lit waktu bangsa Israel erdahin bage pe istirahat. Bas Pemerentahen Seribu Tahun pe pagi, lit waktunta erdahin ras istirahat. Janah, lit ka pagi waktunta nembah Dibata. Gundari saja pe gelah meriah geluhta arus sisembah Dibata. Bas doni si mbaru pe pagi arus ka bage. Pasti puas kel siakap ngidah pendahinta janah lit ka waktunta ngelayani Dibata. Seh kel riahna siakap nggeluh bas Pemerentahen Seribu Tahun Jesus pagi!