MENURUTNDU, rusur nge kam ngata bujur? Kerina kita perlu siukuri penungkunen e. Nina Pustaka, nterem kalak bas jamanta gundari “la meteh ngata bujur.” (2 Tim. 3:2) Banci saja pernah kam jumpa ras kalak si nggo wajar akapna ia isampati. La kapna perlu ngata bujur nandangi kai si nggo ilakoken kalak man bana. Pasti la atendu ndeher ras kalak si bage.

Tapi, umat Jahwe iajari gelah ‘terus ngata bujur.’ Arus kita ‘ngataken bujur i bas kai pe.’ (Kol. 3:15; 1 Tes. 5:18) Situhuna, adi rusur kita ngata bujur, lit gunana banta. Kai saja e?

Alasen si pertama nggit kita rusur ngata bujur perban banci sigejapken maka meherga kita iakap kalak. Cuba ukuri: Adi isampati kalak kam, e ertina iperdiatekenna kam janah cocok akapna kam isampati. Adi igejapkenndu e janah ngata bujur kam, iergai kalak kapndu kam. Bage ka me si igejapken Rut sanga isampati Boas ia. Pasti meriah kel iakap Rut janah iergai iakapna ia perban mehuli Boas man bana. (Rut 2:10-13) Jelas me, adi rusur kita ngata bujur, banci sigejapken maka meherga kita iakap kalak. Janah, adi ngata bujur kita man kalak si deban, ia pe meriah kang ukurna.

Si pentingna arus kita ngata bujur man Dibata. Pasti nggo rusur igejapkenndu pasu-pasu Dibata man bandu janah terus kam ipasu-pasuNa asa gundari. (Ul. 8:17, 18; Perb. 14:17) Cuba ukurindu pasu-pasu kai saja si nggo ibereken Dibata man bandu bage pe man keluarga ras teman-temanndu. Tapi, ula min gelah nggo iukurindu saja, perlu mbages iukurindu. Adi mbages siukuri uga ulina Dibata man banta, reh kelengna ateta Ia janah reh tekna kita maka keleng kel ateNa kita janah meherga kita iakapNa.​—1 Joh. 4:9.

Kenca siukuri uga ulina Dibata bage pe kerina si nggo iberekenNa banta, sikatakenlah bujur man baNa. (Msm. 100:4, 5) Menurut penelitian, “adi ngata bujur kita banci reh riahna ukurta.”

Alasen si peduaken nggit kita ngata bujur perban banci kita reh kompakna. Kerina kalak iergai min atena ia. (Rom. 16:3, 4) Janah biasana, kalak si rusur ngata bujur meriah akapna nampati kalak si deban. Sanga igejapkenna mehuli kalak man bana, ia pe teriahken ka gelah mehuli man kalak. Janah, adi isampatina kalak, meriah kel ukurna. Nina Jesus, “Riahen kap i bas mere asangken i bas ngalo.”​—Perb. 20:35.

Iban Robert Emmons arah University of California sada penelitian kerna ngata bujur. Nina, “Gelah banci kita ngata bujur, arus siakui maka perlu kita penampat kalak. Mon-mon kita si mere, mon-mon kita ka si ngalo.” Gelah banci sidalani geluhta janah banci kita ermeriah ukur, perlu kita kalak si deban. Banci isampatina kita gelah lit panganta ntah pe gelah banci kita ertambar. (1 Kor. 12:21) Kalak si rusur ngata bujur pasti iergaina kai si ilakoken kalak man bana. Emaka, ngata bujur nge kam sanga lit si nampati kam?

Alasen si peteluken, adi rusur kita ngata bujur banci dungna positif perukurenta. Banci ikataken, pikirenta e lit penyaringna. Ertina banci sipilih kai si ateta siukuri  ras si lang. Emaka, banci si positif saja siukuri janah la siukuri kel kai si negatif. Adi rusur kita ngata bujur, reh rusurna sigejapken kai si mehuli, dungna reh rusurna ka kita ngata bujur. Adi terus siukuri kai si banci erban kita ngata bujur, reh nukahna siakap ndalanken nasehat Paulus, nina, “Teruslah ermeriah ukur erkiteken Tuhan.”​—Pil. 4:4.

Adi rusur kita ngata bujur la negatif perukurenta, la kita percian, la menukah kitik ukurta, janah la menukah merawa. Biasana, kalak si ngata bujur la ngayaki sen ras erta, janah puas iakapna nandangi kai si lit bas ia.​—Pil. 4:12.

Perban kita kalak Kristen, nggo siteh maka ate Setan kitik ukurta janah putus asa kita sanga ngadapi erbage-bage masalah bas wari-wari pendungi enda. Meriah kel ukur Setan adi negatif perukurenta janah lalap jungut-jungut. Adi negatif perukurenta banci mesera siakap ndalanken dahinta selaku perberita si meriah. Situhuna, lit hubungen ngata bujur ras sifat-sifat si ihasilken kesah si badia. Misalna, meriah ukurta sanga sigejapken penampat Dibata janah tek kita nandangi janji-janjiNa.​—Gal. 5:22, 23.

Perban kita umat Jahwe, banci saja setuju kita kerna pentingna rusur ngata bujur bagi si ibahas bas artikel enda. Tapi, siteh maka la menukah gelah tetap positif perukurenta. Amin gia bage, ula kitik ukurta. Pasti banci nge siusahaken gelah tetap positif perukurenta. Uga carana? Cuba ban waktundu tiap wari guna ngukuri kai si mehuli si nggo igejapkenndu. Reh rusurna lakokenndu e, dungna terbiasa kam ngata bujur. Pasti riahen ukurndu asangken kalak si masalahna saja lalap iukurina. Cuba ukuri kai saja si nggo ilakoken Dibata bage pe kalak si deban, si mpegegehi kam janah erban meriah ukurndu. Banci ka ituliskenndu e bas sada buku. Tiap wari, tulislah dua ntah pe telu si erban meriah ukurndu janah ngata bujur kam kerna si e.

Menurut penelitian, adi rusur kita ngata bujur, banci berubah cara kerja otakta janah banci lebih positif perukurenta. Pasti meriah kel geluhta adi rusur kita ngata bujur. Emaka, cuba ingetndu mulihi kai saja pasu-pasu si nggo igejapkenndu, puaslah kam nandangi kai si mehuli bas geluhndu, janah teruslah ngata bujur! Ula kapndu biasa-biasa saja kai si mehuli si igejapkenndu. Tapi, “kataken bujur man [Jahwe], erkiteken kiniulinNa.” Janah, “katakenlah bujur i bas kai pe.”​—1 Kro. 16:34; 1 Tes. 5:18.