1. Uga nge perukuren kalak kerna dahin?

UGA nge perukuren kalak bas kutandu kerna dahin? Adi ibandingken ras kalak si mbarenda, ndauh kel sibuken kalak si gundari. Perban sibuksa erdahin, lanai lit waktuna istirahat, pulung ras keluargana, ntah pe erlajar kerna Dibata. (Peng. 2:23) Tapi lit ka si la atena ia erdahin, lalap idaramina alasen gelah la erdahin.​—Kua. 26:13, 14.

2-3. Engkai maka cocok siusih Jahwe ras Jesus kerna pendahin?

² Kurang pas perukuren kalak bas doni enda kerna pendahin. Tapi perukuren Jahwe ras Jesus la bage. Siteh maka meriah kel iakap Jahwe erdahin. Nina Jesus, “Bapakku terus erdahin ngayak gundari, emaka aku pe terus erdahin.” (Joh. 5:17) Cuba ukuri kai saja si ilakoken Jahwe sanga iciptakenNa malekat-malekat, bintang-bintang, bage pe planet-planet. Banci ka siidah erbage ciptan Jahwe si mejile bas doni enda. Nina sekalak penulis masmur, “O [Jahwe], enggo melala kal si ilakokenNdu, doni enda dem alu tinepaNdu. Kerinana e ijadikenNdu alu dem kepentaren.”​—Msm. 104:24.

³ Jesus pe tutus atena erdahin, bali bagi Bapakna. Beluh kel ia erdahin janah ikut ia erdahin ras Dibata sanga nciptaken langit. (Kua. 8:27-31) Sanga i doni pe ia, luar biasa kel pendahinna. Seri iakapna pendahinna e bagi pangan, janah kerina si ilakokenna bukti maka ia isuruh Dibata.​—Joh. 4:34; 5:36; 14:10.

4. Kai si banci sipelajari arah Jahwe ras Jesus kerna istirahat?

⁴ Tutus kel ate Jahwe ras Jesus erdahin, emaka cocok kel adi siusih. Tapi labo maksudna la kita perlu istirahat. Memang la pernah latih iakap Jahwe, emaka labo Ia perlu istirahat. Tapi lit ikataken bas Pustaka ‘ngadi Jahwe erdahin’ kenca iciptakenNa langit ras doni. (Kel.  31:17) ‘Ngadi erdahin’ maksudna lanai lit si iciptaken Jahwe janah ibanNa waktuNa guna ngenen kai si nggo iciptakenNa janah puas iakapNa. Sanga Jesus i doni, ia pe tutus kel atena erdahin. Tapi, isempatkenna ka ngadi-ngadi janah man ras teman-temanna.​—Mat. 14:13; Luk. 7:34.

5. Tentangen kai si iadapi umat Dibata?

⁵ Ikataken bas Pustaka maka umat Dibata arus semangat erdahin. Umat Dibata ula min perkisat, tapi arus rajin ntah pe mejingkat. (Kua. 15:19) Banci saja cari makan kita guna ncukupi keperlun keluarganta. Perban kita pengikut Kristus, lit ka tanggung jawapta mberitaken berita si meriah. Tapi perlu kang kita istirahat. Pernah nge mesera akapndu mbagi waktundu guna pendahin, pelayanen, bage pe istirahat? Uga carana gelah banci kam seimbang bas pendahin bage pe istirahat?

6. Menurut Markus 6:30-34, kai nge buktina benar cara Jesus rukur kerna erdahin ras istirahat?

⁶ Seh kel pentingna benar caranta rukur kerna pendahin. Isuruh Dibata gelah itulis Raja Salomo, “Sinasa lit i bas pertibi enda jadi i bas paksana.” Ikatakenna lit paksa nuan, mbangun, ngandung, tawa, landek, ras si debanna. (Peng. 3:1-8) Jelas me, erdahin ras istirahat seh kel pentingna. Jesus pe benar carana rukur kerna erdahin ras istirahat. Bas sada wari, sibuk kel rasul-rasul erberita. Kenca nggo dung pe kalak e erberita, ‘la lit waktuna ngadi-ngadi janah man pe la sempat.’ Nina Jesus, “Ota kita ku ingan si melungen, ngadi kita kentisik.” (Baca Markus 6:30-34.) Amin gia sibuk kel Jesus ras murid-muridna janah la sempat istirahat, iteh Jesus maka seh kel pentingna istirahat e.

7. Kai nge gunana sipelajari kerna Sabat?

⁷ Kerina kita perlu istirahat, emaka mon-mon perlu ka nge sisesuaiken pendahinta. Banci siteh kerna si e arah sada pengaturen penting si iban Dibata man umatNa mbarenda eme Sabat sekali seminggu. Gundari lanai sidalanken Undang-Undang Musa, tapi adi sipelajari kerna Sabat, banci siteh uga cara rukur si benar kerna erdahin ras istirahat.

8. Menurut Keluaren 31:12-15, kai nge maksudna wari Sabat e?

⁸ Ikataken Pustaka maka kenca enem “wari” Dibata erdahin, istirahat Ia i bas wari si pepituken janah lanai lit si iciptakenNa i doni. (Kej. 2:2) Tapi meriah kel iakap Jahwe erdahin, janah ‘terus Ia erdahin’ ndahiken si debanna. (Joh. 5:17) Perban Jahwe pe istirahat bas wari si pepituken, iperentahkenNa ka bangsa Israel istirahat bas wari si pepituken, eme wari Sabat. Ikataken Dibata maka Sabat e tanda antara Ia ras bangsa Israel. Wari si pepituken ntah pe wari Sabat eme ‘wari pengadi-ngadin si badia si ikhususken man Jahwe.’ (Baca Keluaren 31:12-15.) La lit ise pe si banci erdahin, termasuk anak-anak, budak, ntah pe binatang-binatang. (Kel. 20:10) Alu bage, kerina kalak banci bulat ukurna nembah Dibata.

9. Engkai maka salah cara rukur peminpin agama bas jaman Jesus kerna Sabat?

⁹ Situhuna wari Sabat e erguna man umat Dibata. Tapi bas jaman Jesus, melala iban peminpin-peminpin agama  peraturen kerna kai si la banci ilakoken bas wari Sabat. Mesera kel ndalankenca. Misalna, la banci mutikken gandum guna ipan ntah pe mpepalem kalak sakit. (Mrk. 2:23-27; 3:2-5) Ikataken Jesus man pengikutna maka labo bage si ipindoken Dibata.

10. Kai si banci sipelajari arah Matius 12:9-12 kerna perukuren Jesus nandangi Sabat?

¹⁰ Perban Jesus ras murid-muridna kalak Jahudi, patuh kalak e man Undang-Undang Musa emaka idalankenna Sabat. * Tapi arus masuk akal ndalankenca, janah si e teridah arah ranan ras perbahanen Jesus. Labo ilarangna kalak ngelakoken si mehuli janah nampati kalak si deban bas wari Sabat. Nina Jesus, “Banci silakoken kai si mehuli i bas wari Sabat.” (Baca Matius 12:9-12.) Emaka menurut Jesus labo salah ngelakoken si e. Arah perbahanen Jesus teridah maka iangkaina ngkai maka isuruh Dibata umatNa ndalanken Sabat. Bas wari e, la lit umat Dibata si erdahin gelah banci bulat ukurna nembah Dibata Jahwe. Pasti igunaken keluarga Jesus wari Sabat guna nembah Dibata. Ikataken Pustaka maka sanga Jesus bas kutana eme Nasaret, masuk ia ku ingan pulung kalak Jahudi janah tedis ia guna mbaca “bagi kebiasanna i bas wari Sabat.”​—Luk. 4:15-19.

11. Ise nge si ngajari Jesus kerna pentingna kerja keras?

¹¹ Iajari Jusup Jesus jadi tukang kayu. Pasti iajarina ka Jesus uga perukuren Dibata kerna pendahin. (Mat. 13:55, 56) Banci ka idah Jesus uga bapakna kerja keras tiap wari guna ncukupi keperlun keluargana, sebap nterem agi Jesus. Bas pudi wari ikataken Jesus man murid-muridna, “Kalak si erdahin patut ndatken upahna.” (Luk. 10:7) Emaka penting kel iakap Jesus kerja keras.

12. Ayat-ayat si apai si mbuktiken maka penting iakap Paulus kerja keras?

¹² Rasul Paulus pe penting kel akapna kerja keras. Tugas utamana mberitaken kerna Jesus ras ajarenna. Tapi erdahin ka Paulus guna ncukupi keperlunna. Iteh kalak Tesalonika maka Paulus e ‘kerja keras janah tutus atena erdahin suari ras berngi’ gelah la ia “jadi tanggungen si mberat” man kalak si deban. (2 Tes. 3:8; Perb. 20:34, 35) Bas ayat-ayat e, banci saja si icakapken Paulus kerna pendahinna erban kemah. Sanga Paulus i Korinti, tading ia ras Akuila bage pe Persila janah radu ras kalak e erdahin “perban seri pendahinna, eme erban kemah.” Sanga ikataken Paulus erdahin ia “suari ras berngi,” labo ertina lalap ia erdahin. Istirahat kang ia, misalna bas wari Sabat. Janah erberita ka ia man kalak Jahudi si la erdahin bas wari Sabat.​—Perb. 13:14-16, 42-44; 16:13; 18:1-4.

13. Kai si banci sipelajari arah Paulus?

¹³ Rasul Paulus contoh si mehuli. Amin gia arus cari makan, tetap denga ia ratur “meritaken berita si meriah kerna Dibata.” (Rom. 15:16; 2 Kor. 11:23) Iiahkenna ka kalak si deban gelah ratur erberita. Emaka, Akuila ras Persila jadi ‘teman Paulus i bas ngelayani Kristus Jesus.’ (Rom. 12:11; 16:3) Ikataken Paulus ka man kalak Korinti maka arus kalak e “sibuk i bas ndahiken dahin Tuhan.” (1 Kor. 15:58; 2 Kor. 9:8) Janah isuruh Jahwe Paulus gelah itulisna, “Ise pe si la nggit erdahin, ula ia man.”​—2 Tes. 3:10.

14. Kai maksud kata-kata Jesus si lit bas Johanes 14:12?

¹⁴ Dahin si pentingna si arus silakoken bas wari-wari pendungi enda eme erberita ras erban murid. Ikataken Jesus ka maka ndauh belinen pendahin murid-muridna asangken ia. (Baca Johanes 14:12.) Labo maksudna banci kita erban mukjizat bagi Jesus. Tapi maksudna adi ibandingken ras Jesus, buen daerah si banci idahi pengikutna guna erberita ras ngajar, teremen ka jelma si banci idahi kalak e, janah buen ka waktu kalak e erberita.

15. Penungkunen kai saja si perlu siukuri? Janah ngkai?

¹⁵ Adi erdahin kam, cuba ukuri penungkunen-penungkunen enda: ‘Menurut kalak, kerja keras nge aku bas pendahinku? Tutus nge ateku ndahiken dahinku janah tepat waktu nge kudungi dahinku e?’ Adi kerja keras kam janah tutus atendu erdahin, banci tek bosndu bandu. Janah temanndu erdahin pe banci dungna nggit ia megiken berita si meriah. Kerna erberita ras ngajar, cuba ukuri penungkunen-penungkunen enda: ‘Menurut kalak, rajin nge aku erberita? Sikap nge kuban persiapenku guna erberita? Adi lit kalak si nggit megikenca, mis nge kudahi mulihi? Ratur nge aku ikut i bas erbage-bage pelayanen?’ Adi  nggo ilakokenndu kerina e pasti meriah kapndu ngelayani.

16. Uga pendapat Jesus ras rasul-rasulna kerna istirahat? Janah uga pendapat nterem kalak gundari?

¹⁶ Iteh Jesus maka perlu nge sekali-sekali ia ras rasul-rasulna istirahat. Tapi nterem kalak bas jaman Jesus bage pe bas jamanta gundari seri perukurenna ras dilaki si bayak bas perumpaman Jesus. Nina dilaki e bas pusuhna, “Pesenanglah bandu, man, minem, janah ermeriah-meriahlah.” (Luk. 12:19; 2 Tim. 3:4) Si pentingna kel iakapna bas geluhna santai-santai saja ras ermeriah-riah. Tapi Jesus ras rasul-rasulna la bage.

17. Sanga la pe kita erdahin, kai si ula min silupaken?

¹⁷ Siusih ateta Jesus. Sanga la pe kita erdahin, labo kita istirahat saja, tapi lawes ka kita erberita ras perpulungen perban penting kel e siakap. Emaka siusahaken kel asa ngasupta terus ngelakokenca man Jahwe. (Heb. 10:24, 25) Janah sanga gawah-gawah pe kita, ula sempat la kita reh ku perpulungen, janah siusahakenlah erberita lit kenca kesempaten.​—2 Tim. 4:2.

18. Kai ate Jesus Kristus selaku Rajanta gelah silakoken?

¹⁸ Ngata bujur kel kita perban Jesus Kristus Rajanta. La ipindona gelah silakoken kai si la ngasup kita ngelakokenca. (Heb. 4:15) Isampatina ka kita gelah benar caranta rukur kerna pendahin ras istirahat. Ate Jesus cukup min kita istirahat. Kerja keras ka ate Jesus kita sanga cari makan bage pe sanga ndalanken tugas guna erban murid, sebap dahin e erban meriah ukurta. I bas artikel seterusna, sibahas kari kai si ilakoken Jesus gelah ula nai kita jadi budak.