1. Tanggung jawap kai si ibereken Jahwe man orang tua?

SANGA iciptaken Jahwe Adam ras Hawa, iban Jahwe lit sura-sura kalak e gelah lit anakna. Emaka nina Pustaka, “Anak-anak e, pasu-pasu i bas [Jahwe] nari.” (Msm. 127:3) Kai maksudna e? Umpamana, lit temanndu si melala kel senna, nca suruhna gelah isimpanndu. Uga nge perasanndu? Pasti meriah kel kapndu perban tek ia bandu. Tapi banci saja mbiar kam bene kari sen e. Jahwe pe, Temanta si mehulina, iberekenNa man orang tua erta si arus ijaga si ndauh ergan asangken sen. IbereNa kalak e tanggung jawap guna ngurus anakna janah erban anakna ermeriah ukur.

2. Penungkunen kai saja si man bahasenta?

² Ise nge si arus erban keputusen kerna lit ntah lang atena anakna janah ndigan atena lit anakna e? Kai si perlu ilakoken orang tua gelah banci ermeriah ukur anakna? Mari siperdiateken piga-piga pedah Pustaka si banci nampati perbulangen ras ndehara erban keputusen si mehuli.

3. (a) Ise nge si arus erban keputusen kerna lit ntah lang ate sekalak perbulangen ras ndeharana anakna? (b) Pedah Pustaka si apai nge si perlu iinget teman-teman bage pe keluarga arah kalak si mbaru denga erjabu e?

³ Bas piga-piga budaya, iarapken kalak gelah kalak si mbaru denga erjabu mis min lit anakna. Banci saja kalak e isuruh keluargana bage pe kalak si deban gelah ngikuti kebiasan e. Nina Jethro, sekalak turang seninanta i Asia, “Piga-piga kalak bas runggun si lit anakna isuruhna turang senina si la lit anakna gelah mis lit anakna.” Nina  Jefri, sekalak turang seninanta ka i Asia, “Lit si ngataken man kalak si la lit anakna, ‘Adi la lit anak kena, ise pagi si ngurus kena adi nggo metua?’” Tapi, tetap perbulangen ras ndeharana si erban keputusen kerna lit ntah lang anakna. Enda keputusen ras tanggung jawap kalak e. (Gal. 6:5) Pasti ate teman-teman ras keluargana, ermeriah ukur min kalak si mbaru denga erjabu e. Tapi, arus ka inget kalak e maka kalak si mbaru denga erjabu e me si arus erban keputusen lit ntah lang atena anakna.​—1 Tes. 4:11.

4-5. Kai si perlu icakapken kalak si lit atena anakna? Janah ndigan si mehulina e icakapken? Jelasken.

⁴ Perbulangen ras ndehara si lit atena anakna perlu icakapkenna dua penungkunen penting enda: Si pertama, ndigan nge ate kalak e lit anakna? Si peduaken, piga nge ate kalak e anakna? Ndigan nge si mehulina icakapken kalak e kerna si e? Janah ngkai maka seh kel pentingna penungkunen e ndai duana?

⁵ Enterem kalak ibahasna kerna si e duana sope kalak e erjabu. Engkai? Perban arus seri perukuren kalak e kerna si e. Perlu ka iukuri kalak e nggo siap ia ntah lang ndalanken tanggung jawap e. Lit piga-piga si lenga atena lit anakna sada ntah dua tahun kenca ia erjabu. Iteh kalak e maka pasti latih ngurus anak janah perlu melala waktu. Emaka lenga atena lit anakna gelah terbiasa lebe kalak e ras-ras selaku perbulangen ras ndehara. Alu bage, banci kalak e reh kompakna sope lit anakna.​—Ep. 5:33.

6. Perban kita nggeluh bas masa si sulit gundari, keputusen kai si iban piga-piga perbulangen ras ndehara?

⁶ Lit ka si iusihna atena telu anak Nuah bage pe ndehara-ndeharana. La ate kalak e mis lit anakna kenca erjabu. (Kej. 6:18; 9:18, 19; 10:1; 2 Pet. 2:5) Ikataken Jesus geluhta gundari bali bagi “jaman Nuah.” Janah nggo jelas ka siidah maka kita nggeluh bas “masa si sulit si dem kiniseran.” (Mat. 24:37; 2 Tim. 3:1) Emaka, lit piga-piga kalak lenga atena lit anakna gelah banci reh buena waktuna ngelayani Jahwe.

7. Kai si perlu ilakoken kalak si nggo erjabu bagi si ikataken bas Lukas 14:28, 29 ras Kuan-kuanen 21:5?

⁷ Sope iban kalak si nggo erjabu keputusen kerna lit ntah lang anakna janah  piga atena, arus ‘ikirana lebe biayana.’ (Baca Lukas 14:28, 29.) Orang tua si nggo lit pengalamenna itehna uga buena biaya, waktu, ras gegeh guna mpebelin anakna. Emaka, perlu iukuri kalak si nggo erjabu penungkunen enda: ‘Perlu nge kami duana erdahin guna ncukupi keperlun keluarga kami? Sada nge arih kami kerna kai si tuhu-tuhu iperluken keluarga kami? Adi erdahin kami duana, ise kari si njaga anak kami? Ise nge ate kami si mpengaruhi anak kami?’ Adi ibahas kalak si nggo erjabu penungkunen-penungkunen e, banci idalanken kalak e pedah bas Kuan-kuanen 21:5.​—Baca.

8. Tentangen kai si banci saja iadapi kalak si nggo erjabu? Janah, adi keleng ate perbulangen ndeharana, kai si banci ilakokenna guna nampatisa?

⁸ Perlu mbue waktu ras gegeh guna ngurus anak-anak. Engkai? Sebap anak-anak perlu iperdiateken orang tuana, janah bage kin arusna. Emaka adi lit kalak si nterem anakna janah la sidauhen umurna, banci saja mesera iakapna mperdiateken anakna e sekalak-sekalak. Iakui piga-piga kalak si kitik denga anakna maka latih kel iakapna. Banci saja sekalak pernanden rusur latih kel iakapna janah stres. Dungna lanai ia ratur erlajar, ertoto, bage pe erberita. Mesera ka iakapna konsentrasi bas perpulungen, dungna la lit datna gunana. Emaka, adi keleng ate perbulangen ndeharana, iusahakenna nampati ndeharana ngurus anak, ntah e bas perpulungen bage pe i rumah. Contohna, banci isampati perbulangen ndeharana ndahiken dahin rumah. Iusahakenna ka ratur erban Kebaktin Jabu gelah kerina anggota keluargana reh rembakna ras Dibata. Janah ratur ka ia erberita ras keluargana.

9-10. Kai si arus ilakoken orang tua bas mpebelin anakna?

⁹ Kai si banci ilakoken orang tua gelah keleng ate anakna Jahwe? Kai si banci ilakoken orang tua gelah anakna la terpengaruh doni si jahat enda? Mari siperdiateken kai saja si banci ilakoken orang tua.

¹⁰ Ertotolah mindo penampat Jahwe. Mari siperdiateken kai si ilakoken Manoah ras ndeharana, kalak e orang tua Simson. Kenca iteh Manoah nandangi lit anakna, ipindona man Jahwe gelah iajariNa ia uga carana mpebelin anakna e. 

11. Kai si ilakoken piga-piga orang tua i bas ngusih Manoah bagi si ikataken Hakim-Hakim 13:8?

¹¹ Iusih Nihad ras Alma me Manoah, kalak e arah Bosnia ras Herzegovina. Ning  kalak e, “Bali bagi Manoah, ipindo kami man Jahwe gelah iajariNa kami uga carana jadi orang tua si mehuli. Melala cara si iban Jahwe guna njawap toto kami, misalna arah Pustaka, publikasi, perpulungen, bage pe kebaktin.”​—Baca Hakim-Hakim 13:8.

12. Contoh kai si ibereken Jusup ras Maria man anak-anakna?

¹² Jadilah contoh man anakndu. Memang penting kai si ikatakenndu man anakndu sanga ngajari ia, tapi ndauh pentingen kai si ilakokenndu. E me si ilakoken Jusup ras Maria sanga ngajari anak-anakna, termasuk Jesus. Kerja keras Jusup guna ncukupi keperlun keluargana. Selain si e, iiahkenna ka keluargana gelah tutus ate kalak e nembah Dibata. (Ul. 4:9, 10) Menurut Undang-Undang Musa, labo arus ibaba Jusup keluargana “tiap tahun” ku Jerusalem guna ngerayaken Paskah. Tapi tetap ilakokenna e. (Luk. 2:41, 42) Banci saja repot iakap piga-piga perbapan bas jaman Jusup adi arus ibabana keluargana, mpekeri-keri waktu saja akapna, janah nambahi uang keluar ka. Tapi, Jusup la bage, penting iakapna nembah Dibata janah bage ka min atena anak-anakna. Maria pe mbue itehna kerna Kitap si Badia. Pasti iajarina ka anak-anakna gelah meriah iakap kalak e mpelajari Kata Dibata, janah teridah e arah ranan bage pe perbahanenna.

13. Kai si ilakoken Nihad ras Alma bas ngusih Jusup ras Maria?

¹³ Nihad ras Alma, si nggo ituriken ndai, iusihna ka atena Jusup ras Maria. Kai si ilakoken kalak e guna ngajari anakna gelah keleng atena Dibata janah nggit ngelayani Ia? Ning kalak e, “Arah perbahanen kami tiap wari ibuktiken kami man anak kami maka mbelin kel gunana adi sidalanken pedah Jahwe.” Nina Nihad ka, “Adi ndeher atendu anakndu ras Dibata, arus kam leben si ndeher ras Dibata.”

14. Engkai maka penting iteh orang tua ise saja teman anakna?

¹⁴ Sampatilah anakndu milih teman si mehuli. Kam perbapan ras pernanden arus itehndu ise saja teman anakndu janah kai si ilakoken kalak e. Arus ka itehndu ise saja teman anakndu ngerana-ngerana arah HP bage pe bas media sosial. Teman-teman anakndu banci mpengaruhi cara anakndu rukur bage pe perbahanenna.​—1 Kor. 15:33.

15. Kai si banci ipelajari orang tua arah Jessie?

¹⁵ Uga adi la beluhsa orang tua e make komputer, HP, ntah pe tablet? Nina Jessie, sekalak perbapan i Filipina, “Labo angkai kami kel alat-alat elektronik e. Tapi tetap iajari kami anak-anak kami kerna bahaya kai si lit i je.” Aminna pe la beluhsa Jessie make alat-alat elektronik, la ilarangna anak-anakna nggunakenca. Nina ka, “Kukataken man kalak e gelah ipakena alat-alat elektronik e guna mpelajari bahasa si mbaru, persiapen perpulungen, bage pe mbaca Pustaka tiap wari.” Bas jw.org^® bagin “Anak Muda” lit pedah si mejile kerna ngirim SMS bage pe nama foto bas Internet. Enggo nge ibacandu janah ibahasndu pedah e ras anakndu? Bas situs jw.org, lit ka video Candu nge Kam Make Alat Elektronik? ras video Pentarlah Nggunaken Media Sosial. Pernah nge itontonndu janah ibahasndu video-video e ras anakndu? * Erguna kel si e kerina i bas ngajari anakndu  gelah hati-hati nggunaken alat-alat elektronik.​—Kua. 13:20.

16. Kai si iusahaken nterem orang tua? Janah kai hasilna?

¹⁶ Enterem orang tua iusahakenna gelah banci anak-anakna ergaul ras kalak si jadi contoh bas ngelayani Dibata. Contohna Deni ras Bella, perbulangen ras ndehara arah Pantai Gading. Rusur iundang kalak e pertua keliling erberngi i rumahna. Nina Deni, “Mehuli kel hasilna. Merintis dungna anak kami janah gundari nggo ngelayani jadi pertua keliling pengganti.” Kam orang tua, iusahakenndu nge gelah banci ka igejapken anak-anakndu bage?

17-18. Ndigan nge arusna mulai iajari orang tua anakna?

¹⁷ Ajarilah anakndu kitik-kitikna nari. Adi kitik-kitik nari nggo iajari orang tua anakna, biasana mehuli kel hasilna. (Kua. 22:6) Contohna Timotius. Kenca nggo galang ia, ikut ia ngelayani ras Rasul Paulus. ‘Mulai kin Timotius lahir’ nggo iajari mamakna ia eme Enike bage pe ninina Lois.​—2 Tim. 1:5; 3:15.

¹⁸ Lit ka perbulangen ras ndeharana i Pantai Gading si gelarna John ras Paula. Berhasil kalak e nampati enemna anakna gelah keleng atena Jahwe janah nggit ngelayani Ia. Kai si erbanca kalak e berhasil? Iusih kalak e Enike ras Lois. Nina, “Kenca lahir anak kami, mis ajari kami ia Kata Dibata.”​—Ul. 6:6, 7.

19. Kai nge maksudna ngajari anak kerna Kata Dibata?

¹⁹ Kai nge maksudna ‘ngajari’ anak kerna Kata Dibata? Bas bahasa Heber, kata “ajarkenlah” si lit bas Ulangen 6:7 maksudna “mulih-ulih ngingetkenca ras ngajarkenca.” Emaka perlu rusur iban orang tua waktuna ras anakna. Mon-mon, banci saja latih iakap orang tua perban arus mulih-ulih iajarina anakna. Tapi banci ibanna e jadi kesempaten guna nampati anakna ngangkai Kata Dibata janah ndalankenca.

20. Kai si banci ipelajari orang tua arah Masmur 127:4 kerna cara mpebelin anak?

²⁰ Usahakenlah nandai anakndu. Bas Masmur 127 ikataken maka anak-anak bali ras anak panah. (Baca Masmur 127: 4.) Biasana anak panah e la seri bahanna janah ukurenna pe beda-beda. Bage ka pe, tiap anak labo seri. Emaka perlu iukuri orang tua uga carana ngajari tiap anak. Bas Israel si gundari, lit sekalak perbulangen ras ndeharana si nggo berhasil mpebelin dua anakna ngelayani Jahwe. Ikataken kalak e uga carana, nina, “Sanga erlajar Pustaka kami ras anak-anak kami, labo sekaligus iajari kami kalak e. Sada sada iajari kami.” Banci iukuri kepala keluarga perlu ntah lang ibanna bage.

21. Uga cara Jahwe nampati orang tua?

²¹ Mon-mon mesera iakap orang tua ngajari anakna. Tapi, perban anak-anak pemere Jahwe, pasti nggit Jahwe nampati orang tua. IbegikenNa pertoton kalak e, janah ijawapNa arah Pustaka, publikasi, bage pe arah usihen ras nasehat orang tua si deban si nggo erpengalamen.

22. Kai saja si mehergana si banci ibereken orang tua man anakna?

²² Lit si ngatakenca maka mpebelin anak proyek 20 tahun. Tapi situhuna, nggo pe lewat 20 tahun labo ertina orang tua e ngadi jadi orang tua. Lit piga-piga si mehergana si banci ibereken orang tua man anakna, misalna kekelengen, waktu, janah arus ka iajarina ia kerna Pustaka. Tapi labo seri tanggapen kerina anak. Amin gia bage, nterem turang seninanta si orang tuana ngkelengi Jahwe seri perasanna ras Joanna Mae, sekalak turang seninanta i Asia. Nina Joanna, “Adi kuinget mulihi kerina si nggo iajarken orang tuaku, ngata bujur kel aku perban nggo iajarina aku ngkelengi Jahwe. Labo kegeluhen saja si ibereken kalak e bangku, tapi kegeluhen si seh kel riahna.” (Kua. 23:24, 25) Gundari pe, nterem turang seninanta si bage penggejapenna.