Bas contoh si lit bas Ulangen 22:25-27, nggo jelas dilaki e salah perban iperkosana kalak. Emaka, tujun undang-undang e labo mbuktiken salah ntah lang dilaki e, tujunna mbuktiken maka singuda-nguda e la salah. Mari siperdiateken lebe ayat 23 ras 24.

Bas ayat e ijelasken kerna sekalak dilaki si erhubungen seks “bas sada kuta” ras sekalak singuda-nguda si nggo tunangen. Perban nggo tunangen ia, banci ikataken ia nggo erjabu. Emaka dilaki e nggo erlua-lua. Adi singuda-nguda e uga? “La ia serko mindo penampat, aminna gia ia lit i bas kuta.” Seumpama serko min ndai ia, pasti ibegi kalak janah isampatina. Tapi perban la ia serko, ia pe nggo ikut erlua-lua. Emaka salah kalak e duana.​—Ul. 22:23, 24.

Tapi bas Ulangen 22:25-27, lain ka situasina, “Umpamakenlah lit sekalak dilaki mperkosa sekalak singuda-nguda si enggo ertunangen i darat kuta. Adi bage si dilaki ngenca ibunuh. Si diberu la banci ikekai pe, sabap si diberu e la erbahan dosa si patut iukum mate. Soal enda seri kap ras sekalak si ngerigep dingen munuh kalak si deban. Dilaki e mperkosa diberu si enggo ertunangen e ndauh i bas ingan jelma nari, e maka adi serko pe ia mindo penampat labo lit si nampatisa.”

Adi bage situasina, pasti menurut hakim diberu e ‘nggo serko mindo penampat, tapi la lit si nampatisa.’ Emaka la banci ikataken ia nggo erlua-lua. Tapi, dilaki e nggo erlua-lua sebap nggo ‘iperkosana’ singuda-nguda si nggo tunangen.

Amin gia tujun utama undang-undang e mbuktiken maka singuda-nguda e la ersalah, tapi arah undang-undang e siteh ka maka dilaki e salah perban nggo iperkosana kalak janah nggo erlua-lua ia. Emaka, banci kita tek pasti iselidiki hakim lebe adi lit masalah si bage, bagi petunjuk si nggo rusur ikataken Jahwe.​—Ul. 13:14; 17:4; Kel. 20:14.