1-2. Kai si banci sipelajari arah pengalamen Angelito?

SAKSI JAHWE nge orang tuandu? Adi rembak orang tuandu ras Jahwe, labo ertina kam pe pasti rembak ras Jahwe. La soal orang tuandu Saksi ntah lang, arus kam sendiri si erjuang gelah banci kam jadi teman Jahwe.

² Lit pengalamen turang seninanta si gelarna Angelito. Amin gia keluargana Saksi, la kapna ia ndeher ras Dibata sanga ia nguda denga. Nina, “Kulayani Jahwe gelah nggo ikut saja ras keluargaku.” Tapi dungna reh rusurna ibacana Pustaka janah iukurina alu mbages. Reh rusurna ka ia ertoto man Jahwe. Kai hasilna? Nina Angelito, “Kuteh dungna maka gelah banci ndeher ras Bapakta Jahwe, aku sendiri si arus erusaha nandai Ia. La lit cara si deban.” Kenca sibaca pengalamen Angelito ndai, banci saja rukur kita, ‘Kai nge bedana nandai Jahwe ras tuhu-tuhu nandai Ia? Janah kai si perlu silakoken gelah banci tuhu-tuhu sitandai Jahwe?’

3. Kai nge bedana nandai Jahwe ras tuhu-tuhu nandai Ia?

³ Banci saja nggo sitandai siakap Jahwe perban nggo siteh gelarNa ntah pe siteh piga-piga si ilakokenNa ras si ikatakenNa. Tapi gelah tuhu-tuhu sitandai Jahwe, lit denga si perlu silakoken. Arus siban waktunta erlajar kerna Jahwe bage pe sifat-sifatNa si luar biasa. Alu bage, banci  siteh ngkai maka bage kata-kata Jahwe ras perbahanenNa bas sada peristiwa. Dungna banci siteh ngena ntah lang ate Jahwe perbahanenta ntah pe kai si lit i bas ukurta. Kenca nggo siteh kai si iarapken Jahwe bas kita nari, aruslah silakoken.

4. Kai nge gunana adi sipelajari kerna kalak si jadi usihen bas Pustaka?

⁴ Perban silayani ateta Jahwe, banci saja lit si nokohi kita. Janah sanga mulai kita reh ku perpulungen, reh segatna atena kita. Tapi, adi tek kita man Jahwe, labo kita pernah itadingkenNa. Adi nggo tek kita man baNa, mulai me kita jadi temanNa janah banci kita terus erteman ras Ia segedang geluhta. Banci nge rembak kel kita ras Jahwe? Banci! Bas Pustaka, lit ituriken kerna manusia si la sempurna tapi rembak kel ia ras Dibata. Contohna Musa ras Raja Daud. Sibahas kari kerna kalak e janah sibahas ka kari dua penungkunen enda: Engkai maka banci itandai kalak e Dibata? Janah kai si banci sipelajari arah kalak e?

5. Kai si ipilih Musa?

⁵ Ipilih Musa ngelayani Dibata. Sanga kira-kira 40 tahun umur Musa, ipilihna nampati umat Dibata eme kalak Israel. La ia nggit itandai kalak selaku “anak putri Paro.” (Heb. 11:24) La ka ia nggit jadi kalak penting. Iteh Musa maka pasti merawa kel Paro perban isampatina kalak Israel si jadi budak i Mesir. Paksa si e, erkuasa kel Paro janah ianggap kalak Mesir ia dewa. Emaka arah perbahanen Musa teridah maka tek kel ia man Jahwe! Erkiteken si e, banci ia jadi teman Jahwe segedang geluhna.​—Kua. 3:5.

6. Kai si banci sipelajari arah Musa?

⁶ Kai pelajarenna banta? Bali bagi Musa, perlu siukuri enda: Nggit nge kita ngelayani Jahwe janah jadi umatNa? Gelah banci ngelayani Dibata, banci saja arus melala pengorbanenta. Banci ka siadapi tentangen arah kalak si la nandai Jahwe. Tapi adi tek kita man Bapakta si i surga, la kita sangsi maka pasti kita isampatiNa!

7-8. Kai si terus ipelajari Musa?

⁷ Terus ipelajari Musa sifat-sifat Jahwe janah ilakokenna kai si ipindo Jahwe. Sanga ipindo Jahwe gelah ibaba Musa bangsa Israel ndarat arah Mesir, la iakapna ia ngasup janah mulih-ulih ikatakenna e man Jahwe. Arah jawapen Jahwe man Musa teridah maka mekuah kel ate Jahwe ia. IangkaiNa uga perasan Musa janah isampatiNa ia. (Kel. 4:10-16) Dungna, ngasup Musa mpeseh berita pengukumen si tegas arah Dibata man Paro. Kenca si e, idah Musa uga Jahwe nelamatken kalak Israel, tapi ikernepkenNa Paro radu ras pasukenna i Laut Merah. Arah si e, banci idah Musa uga belinna kuasa Jahwe.​—Kel. 14:26-31; Msm. 136:15.

⁸ Kenca ndarat bangsa Israel arah Mesir, lalap kalak e jungut-jungut. Tapi, idah Musa maka seh kel sabarna Jahwe man bangsa si nggo ibebaskenNa e janah lanai kalak e jadi budak. (Msm. 78:40-43) Idah Musa ka nggit Jahwe ngubah keputusenNa kenca ipindoken Musa. Je nari, banci idahna maka meteruk ukur kel Jahwe e.​—Kel. 32:9-14.

9. Menurut Heber 11:27, uga nge deherna Musa ras Jahwe?

 ⁹ Kenca ibaba Musa bangsa Israel ndarat arah Mesir, reh deherna ia ras Jahwe, tempa-tempa idahna Bapakna e. (Baca Heber 11:27.) Ijelasken Pustaka uga deherna Musa ras Jahwe, nina, ‘Jahwe langsung ngerana ras Musa, bagi sekalak jelma ngerana ras temanna.’​—Kel. 33:11.

10. Kai si arus silakoken gelah banci tuhu-tuhu sitandai Dibata?

¹⁰ Kai pelajarenna banta? Gelah banci tuhu-tuhu sitandai Dibata, arus sipelajari sifat-sifatNa. Tapi e saja lenga bo bias. Arus ka sidalanken sura-sura Dibata. Sura-suraNa gundari gelah “erbage-bage kalak iselamatken janah ndatken pemeteh si tepat kerna kebenaren.” (1 Tim. 2:3, 4) Emaka, salah sada cara ndalanken sura-sura Dibata eme siajari kalak kerna Ia.

11. Engkai maka banci tuhu-tuhu sitandai Jahwe adi siajari kalak kerna Ia?

¹¹ Biasana, banci tuhu-tuhu sitandai Jahwe adi siajari kalak kerna Ia. Misalna, sanga iban Jahwe kita jumpa ras kalak si nggit jadi temanNa, sigejapken maka seh kel belinna perkuah ate Jahwe e. (Joh. 6:44; Perb. 13:48) Sanga siidah kalak si erlajar Pustaka ras kita nggo robah janah itadingkenna kebiasanna si la mehuli, siidah maka kuasa Kata Dibata erdahin bas ia. (Kol. 3:9, 10) Janah siidah ka uga sabarna Dibata sanga mulih-ulih iberekenNa kesempaten man nterem jelma gelah erlajar kerna Ia janah banci iselamatken.​—Rom. 10:13-15.

12. Menurut Keluaren 33:13, kai si ipindo Musa? Engkai maka ipindona e?

¹² Penting kel iakap Musa hubungenna ras Jahwe. Rusur kel iban Jahwe Musa banci erban mukjizat, emaka nggo itandai Musa kel Jahwe. Amin gia bage, meteruk ukur Musa mindo penampat Jahwe gelah banci tuhu-tuhu itandaina Ia. (Baca Keluaren 33:13 si lit bas cataten i teruh.) * Paksa si e, nggo lebih 80 tahun umur Musa. Tapi itehna maka melala denga si arus ipelajarina kerna Bapakna si perkeleng.

13. Kai si perlu silakoken adi penting siakap hubungenta ras Dibata?

¹³ Kai pelajarenna banta? La soal uga dekahna kita nggo ngelayani Jahwe, lalap min siakap penting hubungenta ras Ia. Kai si perlu silakoken adi penting siakap hubungenta ras Dibata? Salah sadana eme ertoto.

14. Engkai maka perlu rusur ertoto adi tuhu-tuhu sitandai ateta Dibata?

¹⁴ Adi kompak ateta ras sekalak jelma, pasti rusur kita ngerana-ngerana ras ia. Emaka adi rembak atendu ras Dibata, rusurlah kam ertoto man baNa. Turiken kerina si lit bas pusuhndu bage pe si igejapkenndu. (Ep. 6:18) Nina Krista si tading i Turki, “Sanga kuceritaken perasanku man Jahwe janah kugejapken penampatNa, reh kelengna ateku Ia janah reh tekna aku man baNa. Janah sanga kugejapken ijawap Jahwe totoku, nggo bagi Bapakku ras Temanku kuakap Ia.”

15. Uga nge menurut Jahwe Daud e?

¹⁵ Sanga Daud lahir, orang tuana  nembah Jahwe bage pe kalak si lit i sekitarna. Tapi Daud labo ikut-ikuten saja. Iusahakenna gelah rembak ia ras Jahwe, janah Jahwe pe keleng kel atena ia. Ikataken Jahwe maka Daud e ‘kalak si ngena ateNa.’ (Perb. 13:22) Engkai maka banci rembak kel Daud ras Jahwe?

16. Sanga iperdiateken Daud ciptan Jahwe, kai si ipelajarina?

¹⁶ Erlajar Daud kerna Jahwe arah ciptan. Sanga Daud nguda denga, melala waktuna ngurus biri-biri bapakna i padang. Banci saja i je me mulai iukurina ciptan Jahwe. Misalna sanga nggo berngi, itatapna langit janah idahna seh kel buena bintang. Tapi labo terjeng itatapna saja, iukurina ka sifat-sifat Dibata si nciptaken kerina bintang e. Emaka nina Daud, “Langit encidahken kemulian Dibata, awang-awang erberita kerna perbahanenNa.” (Msm. 19:2, 3) Selain si e, luar biasa kel iakap Daud sanga iukurina cara Jahwe nciptaken manusia. Itehna maka seh kel pentarna Jahwe e. (Msm. 139:14) Sanga iukuri Daud kerina ciptan Dibata, sadar ia maka japahna pe ia lang adi ibandingken ras Jahwe.​—Msm. 139:6.

17. Kai si banci sipelajari adi siukuri kerna ciptan?

¹⁷ Kai pelajarenna banta? Banlah waktunta tiap wari mperdiateken ciptan Jahwe perban luar biasa kel kerina ciptanNa e. Misalna sinuan-sinuan, binatang, ras manusia. Cuba siukuri kai si banci sipelajari kerna Jahwe arah ciptanNa e. Adi silakoken e, banci tuhu-tuhu sitandai Bapakta si perkeleng. (Rom. 1:20) Dungna, reh dekahna reh kelengna ateta Jahwe.

18. Menurut Masmur 18, kai si iakui Daud?

¹⁸ Iteh Daud maka Jahwe si nampati ia. Misalna, sanga ijagai Daud biri-biri bapakna arah singa ras beruang, iteh Daud maka banci ibunuhna dua binatang buas e perban isampati Jahwe ia. Sanga talu iban Daud Goliat eme prajurit raksasa, iteh Daud maka Jahwe si nampatisa. (1 Sam. 17:37) Janah sanga kiam Daud arah Raja Saul si cian atena ia, ikataken Daud maka Jahwe me si nelamatken ia. (Msm. 18:1) Adi sombong min ndai Daud, banci saja perban gegehna iakapna maka banci ilakokenna si e kerina. Tapi, perban meteruk ukur ia, iakuina maka Jahwe nge si nampati ia.​—Msm. 138:6.

19. Kai si banci sipelajari arah Daud?

¹⁹ Kai pelajarenna banta? Labo bias adi sipindo saja penampat Jahwe. Arus ka sigejap-gejapken katawari ras uga Jahwe nampati kita. Adi meteruk ukur kita, siakui maka labo kita ngasup ngelakoken kai pe sisada perban perlu kita penampat Jahwe. Tiap isampati Jahwe kita, reh rembakna kita ras Ia. Bage me si igejapken sekalak turang seninanta i Fiji si gelarna Isaac, si nggo ertahun-tahun ngelayani Jahwe. Nina, “Adi kuinget-inget mulihi kerina si nggo terjadi bas geluhku, banci kugejapken penampat Jahwe mulai aku erlajar Pustaka ngasa gundari. Dungna ndeher kel kuakap aku ras Jahwe.”

20. Kai si banci sipelajari arah Daud si rembak kel ras Dibata?

²⁰ Iusih Daud sifat-sifat Jahwe. Sanga iciptaken Jahwe kita, ibanNa kita ngasup ngusih sifat-sifatNa. (Kej. 1:26) Adi  terus sipelajari sifat-sifat Jahwe, reh nukahna siakap ngusih Ia. Tuhu-tuhu itandai Daud Jahwe, emaka mekuah atena kalak si deban, bali bagi Jahwe. Erkiteken si e, Jahwe pe mekuah ateNa Daud. Sanga erlua-lua Daud ras Batseba janah iaturkenna gelah perbulangen Batseba ibunuh, erdosa Daud man Jahwe. Tapi nggit Jahwe ngampuni ia. (2 Sam. 11:1-4, 15) Perban rembak kel Daud ras Jahwe, jadi kel ate kalak Israel ngenen Daud, janah iban Jahwe ia jadi contoh man raja-raja Israel si debanna.​—1 Raj. 15:11; 2 Raj. 14:1-3.

21. Menurut Epesus 4:24 ras 5:1, kai nge gunana adi siusih Dibata?

²¹ Kai pelajarenna banta? Kita pe arus ‘siusih Dibata.’ Lit gunana adi siusih Dibata. Banci reh bagesna sitandai Ia janah sibuktiken ka maka kita anak-anakNa.​—Baca Epesus 4:24; 5:1.

22-23. Kai nge gunana adi sidalanken pemetehta kerna Jahwe?

²² Bagi si nggo sibahas bas artikel enda, banci sipelajari sifat-sifat Jahwe arah ciptanNa bage pe arah Pustaka. Bas Pustaka, melala ituriken kerna umat Dibata si banci siusih, contohna Musa ras Daud. Enggo isampati Jahwe kita nandai Ia, emaka baginta gundari terus erlajar kerna Ia.

²³ Erlajar kerna Jahwe labo lit tamat-tamatna. (Peng. 3:11) Memang penting mbue pemetehta kerna Jahwe, tapi si pentingna arus sidalanken. Adi sidalanken kai si nggo sipelajari janah siusih Bapakta si perkeleng, reh rembakna Ia ras kita. (Jak. 4:8) Teklah kita maka la kel pernah itadingken Jahwe kalak si erusaha nandai Ia, bagi si ijanjikenNa bas Pustaka.