Lang, cataten Pustaka bage pe buku-buku sejarah la pernah mbuktiken kerna si e.

I bas melala Pustaka, terjemahen man ayat enda erban kalak rukur maka bas jaman Paulus lit kalak si iperidiken guna kalak mate. Misalna, lit terjemahen si ngataken bagenda, “Adi tuhu kin la lit kekeken i bas si mate nari, engkai dage maka kalak iperidiken guna kalak si enggo mate?”​—Terjemahan Baru (Terbiten LAI).

Tapi tepat nge terjemahen e? Cuba perdiateken kai nina dua pakar Pustaka enda. Gregory Lockwood, doktor bas bidang teologi ngataken maka seh asa gundari “la lit bukti arah cataten sejarah ntah pe arah Pustaka maka peridin man kalak si enggo mate pernah ilakoken.” Bagenda ka nina Profesor Gordon D. Fee, “I bas cataten sejarah bage pe i bas Pustaka la lit cerita kerna peridin si bage. I bas Padan si Mbaru pe la pernah ituriken kerna si e.” Ikatakenna ka maka la lit bukti adi peridin si bage pernah ilakoken bas jaman si mbarenda ntah e bas kalak Kristen bage pe bas gereja-gereja si iban la ndekah kenca kematen rasul-rasul.

Ikataken Pustaka maka pengikut Jesus arus erban ‘kerina bangsa jadi murid Jesus, mperidiken kalak e, janah ngajari kalak e ndalanken kerina si enggo iperentahken Jesus.’ (Mat. 28:19, 20) Emaka, ope sekalak jelma iperidiken jadi murid Jesus, perlu ipelajarina kerna Jahwe ras anakNa, erkiniteken man baNa janah matuhisa. Jelas me, kalak si enggo mate janah si lit bas kuburen la banci ngelakoken si e ndai kerina. Kalak Kristen si nggeluh denga pe la banci ngelakoken si e man kalak si enggo mate.​—Peng. 9:5, 10; Joh. 4:1; 1 Kor. 1:14-16.

Adi bage, kai situhuna maksud Paulus?

Sanga itulis Paulus surat 1 Korinti, lit kalak si tading i Korinti ngataken maka kalak mate la ipekeke. (1 Kor. 15:12) Emaka icidahken Paulus atena maka pendapat kalak e salah. Ikatakenna maka tiap wari ‘menam ia mate.’ Tapi tek ia adi mate ia pasti ia ipekeke janah nggeluh i surga bali bagi Jesus.​—1 Kor. 15:30-32, 42-44.

Kalak Kristen si erpengarapen ku surga si lit bas Korinti pe perlu iangkaina maka terus kari kalak e ngadapi tentangen janah mate sope lenga ipekeke guna nggeluh i surga. Engkai maka bage? Perban kalak e “iperidiken i bas Kristus Jesus” janah e ertina kalak e “iperidiken ka ku bas kematenna.” (Rom. 6:3) Alu peridin si bage iadapi kalak e kegeluhen si dem alu tentangen janah dungna mate. Kenca si e, ipekeke guna nggeluh i surga.

Lebih dua tahun kenca Jesus iperidiken bas lau, pernah ka icakapkenna kerna peridin ku bas kematen. Nina man dua rasulna, ‘Alu peridin si kualoken, kena iperidiken.’ (Mrk. 10:38, 39) Maksud Jesus i jenda labo kerna peridinna si enggo ilakoken bas lau. Tapi maksudna, perban tetap ia setia man Dibata, pasti ia mate. Kalak Kristen si erpengarapen ku surga pe bage ka me kari si iadapina. Bagi si itulis Paulus, ‘inanami kalak e kiniseran ras Jesus gelah banci imuliaken radu ras Jesus.’ (Rom. 8:16, 17; 2 Kor. 4:17) Jadi, kalak e arus mate lebe gelah banci ipekeke guna nggeluh i surga.

Kai kesimpulenna? Kata-kata Paulus bas 1 Korinti 15:29 lebih cocok iterjemahken, “Adi tuhu kin kalak mate labo ipekeke, uga kerna kalak si iperidiken, guna jadi kalak mate nge ia maka iperidiken? Man kai kalak e iperidiken alu tujun si bage?”