1. Nasehat kai si bereken Rasul Petrus man kalak Kristen, janah engkai maka banci saja la siakap mungkin ngikutken nasehatna e?

LA SOAL arapenta ku surga ntah pe i doni, kerina kita banci dat manpaat arah nasehat Rasul Petrus man kalak Kristen si ipilih ku surga si lit bas abad pertama. Itulis Petrus bagenda, “Badia min kena bas kerina perbahanen kena, bagi Dibata si ndilo kena pe badia kap, perban lit tertulis, ‘Kena arus badia, sebap Aku pe badia.’” (1 Pet. 1:15, 16) Arah kata-kata e, banci siteh maka Jahwe e badia. Emaka, banci siusih Ia perban Ia kap usihen si mehulina i bas si e. Banci nge kita badia janah kerina perbahanenta arus “badia.” Banci saja la siakap mungkin ngelakoken si e perban kita la sempurna. Petrus pe piga-piga kali ngelakoken kesalahen, tapi usihenna ncidahken maka kerina kita banci badia.

2. Penungkunen kai saja kari sibahas bas artikel enda?

² Bas artikel enda, sibahas kari penungkunen-penungkunen enda: Kai ertina badia? Kai si ajarken Pustaka kerna Jahwe e badia? Uga carana gelah badia kita bas kerina perbahanenta? Gelah badia kita, engkai maka arus kita erteman ras Jahwe?

3. Kai si bayangken enterem kalak sanga begina kerna kalak si badia, tapi i ja banci sidat informasi si tepat?

³ Enterem kalak adi begina kerna kalak si badia, si bayangkenna eme kalak si lalap teridah serius, la pernah cirem, janah pakena baju-baju keagaman. Tapi, situhuna labo bage. Jahwe e badia janah ikataken bas Pustaka maka Ia “Dibata si ermeriah ukur.” (1 Tim. 1:11) Kalak si nembah Jahwe pe ikataken kalak si “ermeriah ukur.” (Ms. 144:15) Selain si e, la ngena ate Jesus ngidah kalak si make baju-baju keagaman ras lakokenna si mehuli gelah idah kalak saja ngenca atena. (Mat. 6:1; Mrk. 12:38) Selaku  kalak Kristen, siteh kai ertina badia perban sipelajari arah Pustaka. Tek kita maka Dibatata si badia ras perkeleng la mungkin mereken perentah si la kita ngasup matuhisa. Emaka sanga bere Jahwe perentah: “Kena arus badia,” siteh maka pasti banci sipatuhi perentah e. Memang, gelah banci kita badia bas kerina perbahanenta, arus siteh lebe kai ertina badia.

4. Kai ertina kata “badia”?

⁴ Kai ertina badia? Bas Pustaka kata “badia” ertina bersih ntah pe murni i bas perbahanen ras lagu langkah bage pe bas cara nembah Dibata. Istilah e pe ipake man kalak si ipisahken guna ngelayani Dibata. Emaka, adi bersih lagu langkahta, sisembah Jahwe alu cara si benar, janah adi rembak kita ras Ia, banci kita ikataken badia. Amin pe Jahwe tuhu-tuhu badia, nggit Ia rembak ras kita, jelma si la sempurna. Pasti luar biasa kel siakap kerna si e.

5. Kai si banci sipelajari kerna Jahwe arah malekat-malekat si setia?

⁵ Jahwe e bersih ras murni i bas kai pe. Bage me si ikataken serafim-serafim eme malekat-malekat si lit i deher tahta Jahwe. Nina, “Badia, badia, badia kap Jahwe penguasa malekat.” (Jes. 6:3) Malekat-malekat e banci rembak ras Dibata si badia perban malekat e pe badia. Sanga reh malekat Jahwe ku sada ingan bas doni, ingan e jadi badia. Bage me si terjadi sanga idah Musa peren duri si gara.​—Kel. 3:2-5; Jos. 5:15.

6-7. (a) Menurut Keluaren 15:1, 11, uga cara Musa njelasken maka Jahwe e badia? (b) Kai si banci nampati kalak Israel gelah lalap ingetna maka Jahwe e badia? (Nen gambar sampul.)

⁶ Kenca ipinpin Musa bangsa Israel ngelewati Laut Merah, katakenna man kalak e maka Jahwe Dibata kalak e eme Dibata si badia, janah e penting kel. (Baca Keluaren 15:1, 11.) Kalak Mesir labo kalak si badia perban sembahna dibata-dibata palsu. Kalak Kanaan pe labo badia perban sembahna dibata-dibata palsu. Sanga sembah kalak e dibatana, korbanken kalak e anak-anakna janah lakokenna perbahanen seks si salah. (Im. 18:3, 4, 21-24; Ul. 18:9, 10) Tapi, Jahwe la seri ras dibata-dibata palsu e. La pernah pindo Jahwe gelah lakoken umatNa perbahanen si erban ciga ate ntah pe si jahat. Jahwe tuhu-tuhu Dibata si badia. Gelah tetap inget kalak Israel kerna si e, iban tulisen si iukir bas lempengen emas si lit bas bagin arah lebe penutup takal Imam si Mbelin. Bas lempengen e, iukir kata-kata si isina bagenda: “Jahwe badia kap.”​—Kel. 28:36-38.

⁷ Ise pe si ngidah kata-kata si iukir bas lempengen e, pasti jelas tehna maka Jahwe tuhu-tuhu badia. Tapi uga kalak Israel si la banci idahna kata-kata e perban la ia banci jumpa ras Imam si Mbelin? Banci nge tehna maka Jahwe e badia? Banci. Perban kerina kalak Israel la soal dilaki, diberu, ras anak-anak ikut megiken sanga Undang-Undang Musa ibacaken i lebe-lebe kalak e. (Ul. 31:9-12) Bicara lit kam i je paksa si e, pasti begindu kata-kata enda ipeseh, “Aku kap Jahwe Dibata kena. Arus kena . . . badia sebap Aku pe badia.” “Kena arus badia, sebap Aku Jahwe badia kap.”​—Im. 11:44, 45; 20:7, 26.

8. Kai si banci sipelajari arah Imamat 19:2 ras 1 Petrus 1:14-16?

⁸ Mari sibahas kata-kata Jahwe bas Imamat 19:2 si ibacaken man kerina kalak Israel. Nina Jahwe man Musa,  “Bagendalah nindu man kalak Israel, ‘Kena arus badia, sebap Aku pe badia. Aku kap Jahwe Dibata kena.’” Banci saja kata-kata e me si ikutip Petrus sanga iahkenNa kalak Kristen gelah “badia.” (Baca 1 Petrus 1:14-16.) Memang gundari lanai arus sipatuhi Undang-Undang Musa. Tapi arah kata-kata Petrus e, banci siteh maka Imamat 19:2 ngajarken maka Jahwe e badia janah kalak si engkelengi Ia pe arus badia. Enda berlaku man kerina kalak, la soal arapenna nggeluh i surga ntah pe bas pardis i doni.​—1 Pet. 1:4; 2 Pet. 3:13.

9. Kai gunana adi sipelajari Imamat pasal 19?

⁹ Perban merhat kita erban meriah ukur Dibatata si badia, sipelajari ateta uga carana gelah banci kita badia. Enggo bere Jahwe man banta piga-piga nasehat guna ngelakokenca. Nasehat e banci sinen bas Imamat pasal 19. Sekalak pakar Heber si gelarna Marcus Kalisch, itulisna bagenda, “Banci saja pasal enda me si pentingna arah buku Imamat bage pe arah lima buku si pertama bas Pustaka.” Kata-kata pemena bas Imamat pasal 19 eme: “Kena arus badia.” Emaka gundari, mari sibahas piga-piga ayat arah pasal e si ngajari kita uga carana gelah banci kita badia tiap wari.

10-11. Menurut Imamat 19:3, kai si perlu silakoken janah engkai maka e penting?

¹⁰ Kenca ikataken Jahwe maka kalak Israel arus badia, nina ka, “Arus hamati kena mamak kena ras bapak kena. . . . Aku kap Jahwe Dibata kena.”​—Im. 19:2, 3.

¹¹ Jelas me, arus sipatuhi perentah Jahwe eme mehamat man orang tuata. Cuba perdiateken kai nina Jesus man sekalak dilaki si nungkun man bana, “Perbahanen si mehuli kai nge si arus kulakoken gelah kudat kegeluhen si rasa lalap?” Ikataken Jesus maka salah sada si arus ilakoken dilaki e eme mehamat man bapakna ras mamakna. (Mat. 19:16-19) Isalahken Jesus ka kalak Parisi ras ahli Undang-Undang Musa perban usahaken kalak e gelah la ngelakoken tanggung  jawapna guna ngurus orang tuana. Alu bage, ‘enggo ban kalak e kata Dibata la erguna.’ (Mat. 15:3-6) Si termasuk “kata Dibata” eme perentah si pelimaken arah Sepuluh Perentah bage pe perentah si enggo sibaca bas Imamat 19:3 ndai. (Kel. 20:12) Arus siinget maka perentah guna mehamat man orang tua si lit bas Imamat 19:3, itulis kenca kata-kata enda: “Kena arus badia, sebap Aku pe badia. Aku kap Jahwe Dibata kena.”

12. Uga carata matuhi perentah bas Imamat 19:3?

¹² Sanga siukuri perentah Jahwe si lit bas Imamat 19:3, banci siukuri penungkunen enda, ‘Mehamat nge aku man orang tuaku?’ Adi sedekah enda kurang ermediate kapndu kam man orang tuandu, robahlah kam gundari nari. Memang labo banci ubahndu kai si enggo terjadi, tapi gundari nari banci usahakenndu lebih ermediate man orang tuandu. Reh buenalah ban waktundu ras orang tuandu. Banci ka berendu keperlunna janah pegegehindu kinitekenna. Selain si e, banci ka sampatindu kalak e gelah semangat ras pegegehi ia. Adi lakokenndu si e ndai kerina, enggo patuhindu perentah si lit bas Imamat 19:3.

13. (a) Nasehat kai ka si lit bas Imamat 19:3? (b) Bagi si icatat bas Lukas 4:16-18, kai si banci silakoken guna ngusih Jesus?

¹³ Lit prinsip si deban bas Imamat 19:3 si banci nampati kita gelah badia. Bas ayat e, ikataken kerna ndalanken wari Sabat. Kalak Kristen lanai perlu matuhi Undang-Undang Musa, emaka lanai perlu sidalanken wari Sabat tiap minggu. Tapi, banci melala sidat pelajaren arah cara bangsa Israel ndalanken wari Sabat ras arah manpaat si dat kalak e. Bas wari Sabat, ise pe la banci erdahin janah i je me waktuna guna nembah Dibata. * E me sebapna sanga wari Sabat, biasana lawes Jesus ku ingan pulung kalak Jahudi si lit bas kutana, janah bacana kata Dibata i je. (Kel. 31:12-15; baca Lukas 4:16-18.) Kai si banci sipelajari arah perentah Jahwe guna ‘ndalanken wari Sabat’ si lit bas Imamat 19:3? Perlu siban waktuta tiap wari ngelakoken kegiaten rohani. Perlu denga nge akapndu lakokenndu terbuen guna matuhi perentah e? Adi banndu waktundu tiap wari ngelakoken kegiaten rohani, banci kam rembak ras Jahwe. Pertemanen ras Jahwe penting kel gelah banci badia.

14. Kai kebenaren penting si iulih-ulihi bas Imamat pasal 19?

¹⁴ Lit sada kebenaren si penting si iulih-ulihi bas Imamat pasal 19 si banci nampati kita gelah tetap badia. Bas pendungi ayat 4, lit kata-kata enda, “Aku kap Jahwe Dibata kena.” Lit 16 kali kata-kata e ras kata-kata si mirip iulih-ulihi bas pasal enda. E ngingetken kita nandangi perentah pertama arah sepuluh perentah si ngataken, “Aku kap Jahwe Dibata kena . . . Aku saja ngenca si arus sembah kena. Ula sembah kena dibata-dibata si deban.” (Kel. 20:2, 3) Tiap kalak Kristen si atena badia, arus pastikenna gelah la lit kai pe ntah ise pe si pentingen asangken pertemanenna ras Dibata. Selain si e, perban kita Saksi-Saksi Jahwe arus siusahaken la ngelakoken kai pe si erban gelar Dibata si badia ihina kalak.​—Im. 19:12; Jes. 57:15.

15. Kai si banci sipelajari arah ayat-ayat si lit bas Imamat pasal 19 kerna korban binatang si ipersembahken?

 ¹⁵ Adi ipatuhi kalak Israel undang-undang Jahwe, e buktina iakui kalak e Jahwe jadi Dibatana. Nina Imamat 18:4, “Dalankenlah undang-undangKu janah patuhilah peraturen-peraturenKu, ikutkenlah kerina e. Aku kap Jahwe Dibata kena.” Piga-piga peraturen si ibereken man kalak Israel, itulis bas Imamat pasal 19. Contohna, bas ayat 5-8, 21, 22 ibahas i je kerna korban binatang. Arus bereken kalak Israel korban-korban e alu cara si benar gelah la ‘hina kalak e kai si badia bas Jahwe.’ Kai si banci sipelajari arah ayat-ayat e? Arus siusahaken erban meriah ukur Jahwe janah sibereken korban pujin si ngena ateNa, bagi si ikataken bas Heber 13:15.

16. Prinsip kai si ngingetken kita maka arus kita beda ras kalak si la nembah Dibata?

¹⁶ Gelah banci kita badia, arus kita beda ras kalak si la nembah Dibata. Memang labo nukah ngelakoken si e. Mon-mon, teman sekolahta, temanta erdahin, ras keluargata si la sada kiniteken banci saja ipaksana kita ngelakoken kai si la sesuai ras carata nembah Jahwe. Adi bage ban kalak e man banta, kai si banci nampati kita erban keputusen si benar? Cuba ukuri prinsip si lit bas Imamat 19:19. I je lit ikataken, “Ula pake kena baju si iban arah dua benang si la seri jenisna.” Memang labo ilarang kita erban baju arah dua jenis kain si la seri, bagi arah katun si icampur ras linen. Tapi, la kita nggit seri ras kalak si kinitekenna ras perbahanenna la sesuai ras ajaren Pustaka, amin pe ia teman sekolahta, temanta erdahin, ntah pe keluargata. Memang keleng ateta keluargata ras keleng ateta teman-temanta. Tapi, sanga siban keputusen arus sipatuhi Jahwe amin pe e erban kita beda ras kalak si lit i sekelilingta. Penting kel enda perban adi badia ateta, arus kita ipisahken guna nembah Dibata.​—2 Kor. 6:14-16; 1 Pet. 4:3, 4.

17-18. Pelajaren penting kai si banci sidat arah Imamat 19:23-25?

¹⁷ Kata-kata “Aku kap Jahwe Dibata kena” ngingetken kalak Israel maka arus ipelebe kalak e pertemanenna ras Jahwe. Uga carana? Bas Imamat 19:23-25 ijelasken salah sada carana ngelakokenca. (Baca.) Menurut undang-undang e, kai si perlu ilakoken kalak Israel kenca tading kalak e bas Negri si Ijanjiken? Adi isuan kalak Israel batang kayu  si buahna banci ipan, bas telu tahun pertama la banci pan kalak e buahna. Bas tahun peempatken, arus persembahken kalak e buahna man Dibata. Bas tahun pelimaken maka banci pan kalak e buahna. Undang-undang e nampati kalak Israel gelah angkaina maka kalak e la banci mentingken bana. Ate Jahwe gelah tek kalak e maka pasti isikapken Jahwe keperlun kalak e adi ipelebe kalak e guna nembah Jahwe bas geluhna. Ipastiken Jahwe ka bias pangan kalak e. Ate Jahwe bere kalak e persembahenna arah ukurna nari bas ingan si enggo itetapken Jahwe guna nembah Ia.

¹⁸ Undang-undang si itulis bas Imamat 19:23-25, ngingetken kita man kata-kata Jesus si ipesehna bas Khotbah i Gunung. Nina, “Ula nai kena kuatir kerna . . . kai pagi si pan kena, [ras] kai pagi si inem kena.” Nina Jesus ka, “Teh Bapak kena si i surga maka iperluken kena kerina e.” Adi perik-perik pe ibereken Dibata man, pasti berekenNa ka keperlunta. (Mat. 6:25, 26, 32) Emaka, perlu tuhu-tuhu siandalken Jahwe. Adi lit kalak si merluken penampat, nggit min kita nampatisa arah pusuhta nari janah la perlu teh kalak. Nggit ka kita mere sumbangen guna nampati biaya pengeluaren runggun. Perdiateken Jahwe nge sipatta si nggit mere e janah pasti kita ipasu-pasuNa. (Mat. 6:2-4) Adi nggit kita mere, e ertina siangkai prinsip si lit bas Imamat 19:23-25.

19. Pelajaren kai si banci datndu kenca mbahas artikel enda?

¹⁹ Enggo sibahas piga-piga ayat arah Imamat pasal 19, si ngajari kita uga carana gelah banci siusih Dibatata si badia. Adi siusih Dibata, e buktina siusahaken gelah ‘badia kita bas kerina perbahanenta.’ (1 Pet. 1:15) Enterem kalak si labo Saksi Jahwe enggo idahna maka mehuli perbahanen umat Dibata. Piga-piga arah kalak e muliakenna Jahwe. (1 Pet. 2:12) Tapi, melala denga si banci sipelajari arah Imamat pasal 19. Bas artikel berikutna, sibahas kari piga-piga ayat si deban arah pasal e, janah sibahas ka cara-cara si deban si banci nampati kita ngikutken nasehat Petrus gelah banci kita “badia.”