1-2. Kai si enggo sibahas bas artikel sebelumna, janah kai kari sibahas bas artikel enda?

BAS artikel sebelumna, enggo sibahas piga-piga nasehat bas Imamat pasal 19. Misalna bas ayat 3, iperentahken Jahwe bangsa Israel gelah mehamat man orang tuana. Banci sipakeken nasehat e alu nikapken keperlun orang tuata, mpegegehi ia, ras nampati ia tetap rembak ras Jahwe. Bas ayat e pe iperentahken Dibata umatNa gelah ndalanken wari Sabat. Amin pe gundari lanai sidalanken wari Sabat, banci sipakeken prinsipna e alu erban waktu tiap wari ngelakoken kegiaten rohani. Alu ngelakoken si e, sibuktiken maka siusahaken gelah badia bagi nasehat si lit bas Imamat 19:2 ras 1 Petrus 1:15.

² Bas artikel enda, sibahas kari ayat-ayat si deban arah Imamat pasal 19. Ayat-ayat e banci nampati kita gelah ermediate man kalak si cacat, jujur sanga erbinaga ntah pe erbisnis, ras engkelengi kalak si deban. Mari sipelajari si e kerina gelah banci kita badia bagi Dibatata.

3-4. Menurut Imamat 19:14, uga arusna perbahanen kalak Israel man kalak si pasek ras pentang?

³ Baca Imamat 19:14. Ate Jahwe ermediate min umatNa man kalak si cacat. Contohna, kalak Israel la banci numpahi kalak si pasek. Kata ‘numpahi’ banci ka ertina ngancam kalak si pasek e. Perbahanen si bage tuhu-tuhu  kejam kel! Kalak si pasek la banci begina kai si ikataken kalak kerna ia, emaka la banci belana dirina.

⁴ I bas ayat 14 e pe, ikataken Jahwe man umatNa maka la banci itama kalak e “kai pe si banci ngambati i lebe-lebe kalak si pentang.” Lit sada buku si ngataken, “Bas Timur Tengah mbarenda, biasana la adil perbahanen kalak man [kalak si cacat] janah kejam kalak man bana.” Banci saja lit kalak si seh kel ukurna namaken kai si banci ngambati i lebe-lebe kalak si pentang, gelah suin ia ntah pe gelah banci jadi pertawan. Kejam kel perbahanenna e! Arah undang-undang si lit bas ayat e, cidahken Jahwe man umatNa maka arus mekuah ate kalak e man kalak si cacat.

5. Kai buktina mekuah ateta kalak si cacat?

⁵ Mekuah ate Jesus man kalak si cacat. Ingetlah berita si ipeseh Jesus man Johanes Peridiken. Nina, “Kalak pentang gundari erpengidah, si lumpuh erdalan, si sakit kusta ipepalem, si pasek erpemegi, [janah] si mate ipekeke.” Sanga idah kalak mukjizat Jesus e, ‘kerina kalak e muji Dibata.’ (Luk. 7:20-22; 18:43) Kalak Kristen pe nggit ngusih Jesus i bas si e. Mekuah ate kalak e man kalak si cacat. Emaka mehuli, ermediate, ras sabar kita man kalak si cacat. Memang labo bereken Jahwe kengasupen man banta guna erban mukjizat. Tapi, lit tugasta si istimewa eme mberitaken berita si meriah man kalak si pentang bage pe man kalak si pentang secara rohani. Sikataken ka man kalak e maka bas wari si pepagi, kerina jelma tading bas pardis i doni janah sehat kalak e secara jasmani ras rohani. (Luk. 4:18) Kenca megi berita si meriah enda, enterem kalak nggit muji Dibata.

6. Uga Imamat pasal 19 nampati kita gelah reh jelasna siangkai Sepuluh Perentah?

⁶ Piga-piga ayat bas Imamat pasal 19 nampati kita gelah reh jelasna siangkai Sepuluh Perentah. Misalna, perentah si  pewaluhken ngataken, “Ula kena nangko.” (Kel. 20:15) Banci saja lit kalak si erpengakap maka enggo patuhina perentah e perban labo ibuatna jang kalak. Tapi, banci saja nangko denga ia alu cara si deban.

7. Kai si banci saja ilakoken sekalak perbinaga si erban ia la patuh man perentah si pewaluhken?

⁷ Banci saja sekalak perbinaga la kapna ia pernah nangko perban la pernah buatna jang kalak. Tapi jujur nge ia sanga erbisnis? Bas Imamat 19:35, 36, ikataken Jahwe bagenda, “Ula gunaken kena alat pengukur, timbangen, ras sukat-sukat si la pas. Arus gunaken kena alat pengukur si pas, batu timbangen si pas, sukat-sukat si pas guna nukati bahan-bahan si kerah ras si cair.” Sekalak perbinaga si make timbangen ntah pe sukat-sukat si la pas, e ertina nangko ia arah kalak si nukur barangna. Ayat-ayat si deban arah Imamat pasal 19 pe njelasken kerna si e terdauhen.

8. Uga keterangen si lit bas Imamat 19:11-13 nampati kalak Jahudi ngangkai prinsip si jadi dasar arah perentah si pewaluhken, janah kai gunana man banta?

⁸ Baca Imamat 19:11-13. Bas Imamat 19:11 ibenaken alu kata-kata: “Ula kena nangko.” Ayat 13 ngataken, “Ula tipu kena kalak si deban.” Emaka, adi lit kalak si la jujur sanga erbisnis, e seri saja ras nangko. Arah perentah si pewaluhken, siteh maka nangko e salah. Tapi, keterangen si lit bas buku Imamat nampati kalak Jahudi ngangkai prinsip arah undang-undang e. Perlu siukuri uga perukuren Jahwe kerna kalak si la jujur ras si nangko. Banci ka siukuri penungkunen enda: ‘Kenca kupelajari Imamat 19:11-13, lit nge si perlu kuperobahi, terlebih ka bas urusen bisnis bage pe pendahinku?’

9. Menurut undang-undang si lit bas Imamat 19:13, kai ka si perlu iperdiateken kalak Kristen sanga erbisnis?

⁹ Lit denga si perlu iperdiateken kalak Kristen si erbisnis. Kata-kata pendungi arah Imamat 19:13 ngataken, “Ula tahan kena gaji sierdahin kena seh ngasa paginna.” Bas Israel, kalak si ngemo bas juma igalari gajina tiap karaben. Adi la ibere gajina e, la kari bias senna ncukupi keperlun keluargana bas wari e. Nina Jahwe, “Susah akapna janah arapkenna kel upahna e.”​—Ul. 24:14, 15; Mat. 20:8.

10. Kai si banci sipelajari arah Imamat 19:13?

¹⁰ Gundari, biasana karyawan igaji sekali ntah pe dua kali bas sada bulan, labo tiap wari. Tapi, prinsip bas Imamat 19:13 berlaku denga. Piga-piga bos la adil perbahanenna man karyawanna perban sitiksa gaji si berekenna. Teh kalak e maka banci saja labo melala dahin si banci ipilih karyawanna e, janah terus nge kari karyawan e erdahin amin pe sitik kel gajina. Bos si bage banci ikataken ‘itahanna gaji sierdahinna.’ Emaka perlu ipastiken kalak Kristen si erbisnis maka perbahanenna adil man kerina karyawanna. Gundari mari sibahas kai deba nari si banci sipelajari arah Imamat pasal 19.

11-12. Kai si penting akap Jesus sanga ikutipna Imamat 19:17, 18?

¹¹ Meriah ukur Dibata adi la sisakiti kalak si deban. Tapi labo e ngenca si arapkenNa arah kita. Si e teridah arah perentahNa si lit bas Imamat 19:17, 18. (Baca.) Alu jelas ikataken Jahwe, “Arus kelengi kena kalak si deban bagi kena engkelengi diri kena.” Kalak Kristen arus  ngelakoken si e adi ibanna atena meriah ukur Dibata.

¹² Ikataken Jesus maka perentah si icatat bas Imamat 19:18 seh kel pentingna. Lit sekalak Parisi si pernah nungkun man Jesus, nina, “Perentah si apai nge si mbelinna bas Undang-Undang Musa?” Ikataken Jesus maka “perentah si mbelinna ras si pentingna” eme engkelengi Jahwe alu kerina pusuhta, kegeluhenta, ras perukurenta. Kenca si e, ikutip Jesus Imamat 19:18 si ngataken, “Si peduaken si bali ras si ndai eme, ‘Arus kelengindu kalak si deban bagi kam engkelengi dirindu.’” (Mat. 22:35-40) Melala cara si banci silakoken guna engkelengi kalak si deban. Banci siteh piga-piga carana arah Imamat pasal 19.

13. Uga maka perbahanen Jusup sesuai ras Imamat 19:18?

¹³ Salah sada carana engkelengi kalak si deban eme alu ndalanken nasehat bas Imamat 19:18, si ngataken, “Ula kena balas dendam ntah pe dendam.” Buen arah kita banci saja lit sitandai kalak si dendam man temanna erdahin, teman sekolahna, kade-kadena, ntah pe keluargana, banci ka lit si ertahun-tahun dekahna! Sepuluh abang tiri Jusup dendam man Jusup, emaka jahat perbahanen kalak e man bana. (Kej. 37:2-8, 25-28) Tapi Jusup beda kel ras kalak e. Amin pe lit kesempatenna guna balas dendam man abang-abangna, la lakokenna bage, tapi mekuah atena kalak e. Kai si ilakokenna e sesuai ras nasehat si lit bas Imamat 19:18.​—Kej. 50:19-21.

14. Kai buktina prinsip si lit bas Imamat 19:18 berlaku denga gundari?

¹⁴ Kalak Kristen si atena erban meriah ukur Dibata, perlu ngusih Jusup si ngampuni abang-abangna ras la balas dendam. E sesuai ras toto si ajarken Jesus. Ikataken Jesus maka arus siampuni kalak si ersalah man banta. (Mat. 6:9, 12) Rasul Petrus pe berekenna nasehat si bage man kalak Kristen, nina, “O turang senina si kukelengi, ula kena balas dendam.” (Rom. 12:19) Nina ka, “Bicara lit pe alasen kena megelut, kena arus tetap sabar  janah alu bulat ukur ampunilah sada ras si debanna.” (Kol. 3:13) Prinsip Jahwe la pernah berubah. Emaka, prinsip si lit bas Imamat 19:18 berlaku denga seh ngasa gundari.

15. Perumpaman kai si banci nampati kita meteh maka penting kel ngampuni kalak ras la dendam?

¹⁵ Cuba ukuri perumpaman enda. Perasan sakit hati banci ipeseri ras luka. Lit luka si parah, lit si lang. Contohna, sanga erdakan kita, banci saja kena piso sitik tanta. Tangtangna mungkin ngilas siakap, tapi luka e meter malem. Kenca sada wari ntah pe dua wari, banci saja lanai teridah lukata e. Bage ka pe, mon-mon, lit sitik salah kalak man banta. Contohna, banci saja lit temanta si erban kitik ukurta, tapi banci mis si maapken ia. Tapi, uga adi parah luka e? Kenca ijait dokter luka e, ras ibalutina, la banci lalap sikuit ntah pe si kurik-kurik. Sebap adi bage siban, reh parahna lukata e. Sayangna, lit kalak si tempa-tempa bage perbahanenna sanga kitik kel ukurna. Banci saja lalap ukurina perbahanen kalak si erban ia kitik ukur ndai. Tapi adi dendam ia, e ngerugiken ia saja ngenca. Ndauh ulin adi ikutkenna nasehat si lit bas Imamat 19:18!

16. Menurut Imamat 19:33, 34, uga arusna perbahanen kalak Israel man kalak asing, janah kai pelajarenna man banta?

¹⁶ Sanga perentahken Jahwe kalak Israel guna engkelengi kalak si deban, labo saja kalak Israel ngenca si arus ikelengi kalak e. Iperentahken ka kalak e engkelengi kalak asing si tading i daerah kalak e. Jelas kel ikataken kerna si e bas Imamat 19:33, 34. (Baca.) Kalak Israel arus nganggap kalak asing bali “bagi kalak Israel,” janah iperentahken ka man kalak Israel gelah ‘kelengina kalak asing bagi engkelengi dirina.’ Contohna, menurut Undang-Undang Musa, arus ipediat kalak Israel kalak asing ras kalak mesera mpepulung sisa peranin. (Im. 19:9, 10) Prinsip si lit bas Imamat 19:33, 34 pe berlaku man kalak Kristen si gundari. (Luk. 10:30-37) Engkai? Perban gundari pe lit jutan kalak si ngungsi ku negri si deban, janah piga-piga arah kalak e banci saja tading i daerahta. Emaka, perlu mehuli perbahanenta ras mehamat kita man kalak e, la soal dilaki, diberu, ntah pe anak-anak.

17-18. (a) Menurut Imamat 19:2 ras 1 Petrus 1:15, kai si arus silakoken? (b) Bagi nasehat Rasul Petrus, kai dahin si penting si arus silakoken?

¹⁷ Bas Imamat 19:2 ras 1 Petrus 1:15 ikataken maka umat Dibata arus badia. Bas Imamat pasal 19, melala ayat si banci nampati kita meteh uga carana erban meriah ukur Jahwe. Enggo ka sibahas piga-piga ayat si ncidahken kai si arus silakoken ras si la banci silakoken. * Selain si e, Kitap-Kitap Junani Kristen pe ncidahken maka prinsip si lit bas Imamat pasal 19 perlu denga siikutken seh ngasa gundari. Tapi, lit sada nari si itambahi Rasul Petrus.

¹⁸ Banci saja enggo ratur sisembah Jahwe ras silakoken melala perbahanen si mehuli man kalak si deban. Tapi, kalak Kristen khususna inasehati Petrus guna ngelakoken sada hal si penting. Sope nasehati Petrus kita gelah badia bas kerina perbahanenta, bagenda nina, “Sikapkenlah ukur kena gelah banci tutus ate kena erdahin.” (1 Pet. 1:13, 15) Kai nge si perlu tutus ateta ngelakokenca? Ikataken Petrus maka senina-senina Kristus ‘“beritaken kalak e pagi kemulian” Dibata, si enggo maba’ kalak e. (1 Pet. 2:9) Gundari, kerina kalak Kristen pe lit tugasna si istimewa guna ngelakoken dahin si penting enda. Adi sibandingken ras kerina dahinta si deban, enda me dahin si mbelinna gunana man kalak si deban. Meriah kel ukurta perban banci jadi bagin arah umat si badia si terus erberita ras ngajar alu tutus ras semangat! (Mrk. 13:10) Adi siusahaken asa ngasupta ngikutken prinsip-prinsip si lit bas Imamat pasal 19, sibuktiken maka keleng ateta Dibata ras kalak si deban. Selain si e, sibuktiken ka maka merhat kita “badia” bas kerina perbahanenta.