Sanga Jesus i surga, pelajarina sipat-sipat si banci erban ia jadi teman erdahin si mehuli. Paksa ia i doni, ia jadi usihen sanga erdahin ras kalak si deban. Kai gunana adi siusih Jesus? Adi sipelajari usihenna, banci sidat telu prinsip si nampati kita jadi teman erdahin si mehuli. Prinsip-prinsip e banci nampati kita gelah reh kompakna ras kerina turang seninata.

Teman erdahin si mehuli eme kalak si meteruk ukur. Ergaina kalak si erdahin ras ia janah labo kapna ia si pentingna. Sipat meteruk ukur ipelajari Jesus arah Bapakna. Amin pe Jahwe ngenca si patut igelari Pencipta, ateNa gelah teh kalak maka tugas Jesus penting sanga nampati Ia nciptaken kerinana. Si e teridah arah kata-kata Dibata enda: “Mari siban manusia si mirip ras kita.” (Kej. 1:26) Sanga ikataken Jahwe bage, pasti teh Jesus maka Bapakna e tuhu-tuhu meteruk ukur.​—Ms. 18:35.

Sanga Jesus i doni, ia pe meteruk ukur. Sanga puji kalak ia perban lakokenna perbahanen si luar biasa, katakenna maka kerina pujin e arusna ibereken man Dibata. (Mrk. 10:17, 18; Joh. 7:15, 16) Selain si e, usahaken Jesus gelah tetap mehuli man murid-muridna ras anggapna kalak e bagi teman kompakna, labo budakna. (Joh. 15:15) Pernah ka icucina nahe kalak e sanga ajarkenna kerna  sipat meteruk ukur. (Joh. 13:5, 12-14) Bali bagi Jesus, perlu siergai kalak si erdahin ras kita, janah sipelebe kepentingen kalak e asangken kepentingenta. Adi ‘mehamat kita man kalak si deban,’ reh buena dahin si banci sidungi ras-ras.​—Rom. 12:10.

Kalak si meteruk ukur tehna maka “rencana berhasil adi mbue penasehat.” (Kua. 15:22) La soal uga buena pengalamenta ras uga beluhna kita, arus siinget maka labo lit kalak si tehna kerinana. Jesus pe akuina maka lit si la tehna. (Mat. 24:36) Selain si e, merhat ka Jesus meteh uga perukuren murid-muridna amin pe kalak e la sempurna. (Mat. 16:13-16) E me sebapna meriah akap kalak erdahin ras Jesus. Bage ka pe, adi meteruk ukur kita ngakui maka lit si la siteh ras nggit kita megiken pendapat kalak, banci kita reh kompakna ras kalak si deban, janah “berhasil” me kai si enggo silakoken.

Terlebih ka pertua-pertua arus ngusih sipat Jesus si meteruk ukur sanga kalak e kerja sama ras pertua si deban. Arus inget kalak e maka kesah si badia banci nggunaken pertua si apai pe mpeseh pendapat si erguna. Sanga kalak e rapat, kerina pertua arus usahakenna gelah rapat e erdalan alu mehuli, gelah tiap pertua bebas mereken pendapatna. Alu bage, banci ban kalak e keputusen si erguna man runggun.

Teman erdahin si mehuli eme kalak si masuk akal sanga erdahin ras kalak si deban. Nggit ia erban perubahen ras nggit ia megiken pendapat kalak. Pasti rusur idah Jesus perbahanen Bapakna si masuk akal. Salah sada contohna eme sanga suruh Jahwe AnakNa ku doni guna mbebasken manusia arah hukumen mate, padahal situhuna patut nge aloken manusia hukumen e.​—Joh. 3:16.

Nggit Jesus erban perubahen adi memang e cocok ras perlu ilakoken. Contohna, nggit ia nampati diberu arah Punike nari, amin pe situhuna ia isuruh guna nampati kalak Israel. (Mat. 15:22-28) Jesus pe masuk akal man murid-muridna. Sanga persoken Petrus Jesus i lebe-lebe jelma si enterem, nggit Jesus ngampuni ia. Bas pudi wari, bereken Jesus tugas si penting man Petrus. (Luk. 22:32; Joh. 21:17; Perb. 2:14; 8:14-17; 10:44, 45) Arah usihen Jesus, banci sipelajari maka adi nggit kita erban perubahen,  ‘sibuktiken perukurenta masuk akal man kerina kalak.’​—Pil. 4:5.

Adi masuk akal kita, nggit kita erban perubahen gelah banci kerja sama ras erbage-bage jelma. Jesus pe mehuli kel perbahanenna man kalak si deban, termasuk man pemungut pajak ras kalak perdosa si nggit megiken ia. E me sebapna ituduh musuh-musuhna ia ‘teman pemungut pajak ras kalak perdosa.’ (Mat. 11:19) Banci nge kita kerja sama ras erbage-bage jelma bagi si ilakoken Jesus? Cuba perdiateken pengalamen Turang Seninata Louis. Sanga ia jadi pertua keliling ras erdahin bas Betel, erbage-bage temanna kerja sama. Bagenda nina, “Kerja sama ras kalak si la sempurna, bali bagi mbangun sada tembok alu batu-batu si la seri galangna. Perban la seri galangna batu e, perlu melala usaha si ilakoken gelah banci pinter perpajekna tembok e. Aku pe arus melala si kuusahaken gelah banci aku kerja sama ras kalak si deban alu mehuli. Alu bage, banci dungi kami dahin e.” Enda tuhu-tuhu perukuren si seh kel ulina.

Bas runggun, ndigan nge banci sicidahken maka kita masuk akal? E banci silakoken sanga kita kerja sama ras turang senina si lit bas kelompokta erberita. Banci saja kerja sama kita ras perberita si erbage-bage umurna ras tanggung jawapna bas keluargana. Gelah meriah ukur kalak e, ula kita meter-meter ngelakoken pelayanenta sanga kerja sama ras kalak e, janah nggit kita ngikutken cara erberita si cocok ras kalak e.

Teman erdahin si mehuli ‘nggit erbagi.’ (1 Tim. 6:18) Sanga ‘sikapken Jahwe langit,’ Jesus “enggo lit i je” janah banci ia erlajar arah Bapakna. Pasti banci idahna maka la buniken Jahwe kai si sangana lakokenNa. (Kua. 8:27) Bas pudi wari, Jesus pe meriah kapna nceritaken man murid-muridna ‘si enggo begina’ arah Bapakna. (Joh. 15:15) Kita pe arus nggit mbagiken pemetehta ras pengalamenta man kalak si kerja sama ras kita. Teman erdahin si mehuli, la kendalikenna temanna erdahin alu la mereken informasi si erguna. Meriah kapna mbagiken kai si pelajarina man kalak si deban.

Kita pe banci sipegegehi kalak si kerja sama ras kita. Adi lit kalak si perdiatekenna kerja kerasta ras katakenna bujur man banta arah ukurna nari, pasti meriah kel ukurta. Mbarenda pe inen Jesus kai si mehuli arah kalak si kerja sama ras ia, janah la ia ragu muji kalak e. (Bandingken Matius 25:19-23; Lukas 10:17-20.) Ikataken Jesus ka maka ‘lakoken kalak e pagi pendahin si terbelinen’ asangken si ilakokenna. (Joh. 14:12) Bas berngi sope Jesus mate, pujina rasul-rasulna si setia. Bagenda nina, “Kena me si lalap ras aku sanga kuadapi percuban.” (Luk. 22:28) Kata-kata Jesus e pasti kena kel ku pusuh kalak e ras ngiahken kalak e ngelakoken kai si benar. Kita pe, adi nggit muji kalak si kerja sama ras kita, pasti reh riahna ukur kalak e janah reh ulina me pendahin si ilakoken kalak e.

Sekalak turang seninata si gelarna Kayode ngataken, “Teman erdahin si mehuli e labo arus sempurna. Tapi, banci banna kalak si kerja sama ras ia ermeriah ukur ras banna reh nukahna kap kalak e ndahiken dahinna.” Teman erdahin si mehuli nge kam? Gelah tehndu jawapenna, perlu sungkunndu piga-piga pendapat kalak si kerja sama ras kam. Adi meriah kap kalak e erdahin ras kam, bali bagi murid-murid Jesus meriah kapna erdahin ras Jesus, banci katakenndu bagi si itulis Rasul Paulus enda: “Kami teman erdahin kena guna keriahen ukur kena.”​—2 Kor. 1:24.