1-2. (a) Kai perentah si arus ilakoken telu rasul Jesus, janah uga tanggapen kalak e? (b) Kai kari sibahas bas artikel enda?

KENCA perayan Paskah tahun 32 M, Rasul Petrus, Jakup, ras Johanes ngidah pengenehenen si luar biasa. Bas sada gunung si meganjang, banci saja Gunung Hermon, idah kalak e berubah rupa Jesus. “Ayona ersinar bagi matawari, janah uisna si arah darat jadi terang kel.” (Mat. 17:1-4) Bas pendungi pengenehenen e, ibegi kalak e sora Dibata si ngataken, “Enda me AnakKu si Kukelengi, ia me si ngena ateKu. Begikenlah ia.” (Mat. 17:5) Kenca kejadin e, teluna rasul ndai mbuktiken maka begikenna Jesus arah carana ndalani kegeluhenna. Pasti siusih ateta kalak e.

² Bas artikel sebelumna, enggo sibahas maka adi sibegiken ateta sora Jesus, arus lit piga-piga si ula nai silakoken. Bas artikel enda, sibahas kari lit dua si arus silakoken.

3. Menurut Matius 7:13, 14, kai si arus silakoken?

³ Baca Matius 7:13, 14. Lit dua dalan si ikataken Jesus eme dalan si “mbelang” ras dalan si “mesera.” La lit dalan si peteluken. Arus sipilih dalan si apai ateta silewati. Enda me keputusen si pentingna si arus siban, perban keputusen e si nentukenca banci kita nggeluh rasa lalap ntah lang.

4. Uga kin dalan si “mbelang” e?

⁴ Perlu siinget kai bedana dua dalan si ikataken Jesus ndai. Enterem kalak si ipilihna erdalan bas dalan si “mbelang” perban nukah ndalani dalan e. Ipilih kalak e tetap  bas dalan e ras ikutkenna kalak si erdalan i je. Tapi sayang kel, la teh kalak e maka Setan me si mpengaruhi kalak e erdalan bas dalan e, janah situhuna dalan e tujunna ku kematen.​—1 Kor. 6:9, 10; 1 Joh. 5:19.

5. Uga carana murid-murid Jesus banci ndatken dalan si “mesera” ras erdalan i je?

⁵ Dalan si sada nari eme dalan si “mesera” janah ikataken Jesus sitik ngenca kalak si ndatken dalan e. Engkai? Perban bagi persinget si ikataken Jesus bas ayat berikutna, melala nabi palsu si erban kalak dungna papak. (Mat. 7:15) Menurut piga-piga kalak, gundari lit ribun agama janah buen arah agama e ngaku-ngaku ngajarken kebenaren. Emaka lit jutan kalak si dungna bingung janah iakapna la lit agama si benar. Bagenda nina Jesus, “Adi terus inget kena kai si kuajarken, tuhu-tuhu kena murid-muridku, teh kena me kebenaren e, janah kebenaren e si mbebasken kena.” (Joh. 8:31, 32) Selaku murid Jesus, la kam nggit ngikutken jelma si enterem, tapi usahakenndu ndatken kebenaren. Mulai tutus atendu mpelajari Kata Dibata janah pelajarindu kai kin sura-sura Dibata man banta. Ibegikenndu ka ajaren Jesus. Misalna, enggo pelajarindu maka ate Jahwe situlak min ajaren agama palsu janah lanai siikutken perayan-perayan si rehna arah agama palsu. Enggo ka pelajarindu maka banci saja, labo nukah erban perubahen guna erban meriah ukur Jahwe. (Mat. 10:34-36) Banci saja bage me si gejapkenndu. Amin pe bage, la kam nyerah perban keleng atendu Bapakta si i surga, janah merhat kam erban meriah ukurNa. Pasti meriah kel ukur Jahwe ngidah kai si lakokenndu e!​—Kua. 27:11.

6. Menurut Masmur 119:9, 10, 45, 133, kai si banci nampati kita gelah tetap bas dalan si tujunna ku kegeluhen?

⁶ Adi enggo erdalan kita bas dalan si mesera, kai nge si banci nampati kita gelah tetap bas dalan e? Cuba ukuri perumpaman enda. Sanga sibaba motor bas dalan si sempit i daerah pegunungen, biasana lit pembatas dalan i je. Pembatas dalan e iban guna keselamaten gelah kalak si maba motor la ku durusa ntah pe lewatina batas dalan. Pasti labo kita terganggu perban lit pembatas dalan e. Bage ka me patoken si iban Jahwe si lit bas Pustaka bali ras pembatas dalan e. Ibereken Jahwe patoken-patoken e gelah banci kita tetap lit bas dalan si tujunna ku kegeluhen.​—Baca Masmur 119:9, 10, 45, 133.

7. Kai si arus iinget anak muda kerna dalan si mesera?

⁷ Kena anak muda, kurang bebas nge akap kena perban matuhi patoken Jahwe? Ate Setan bage min perukuren kena. Usahakenna gelah merhat kena ngikutken kalak si erdalan bas dalan si mbelang perban kegeluhen kalak e tempa-tempa ermeriah ukur. Atena rugi min akap kena adi la ikutken kena kai si ilakoken teman-teman kena bas sekolah ntah pe la ngikutken kai si idah kena bas Internet. Tempa-tempa ikataken Setan maka patoken Jahwe e erban kena la ermeriah ukur. * Tapi ingetlah, la lit ikataken Setan man kalak si erdalan bas dalan si mbelang e  maka dalan e ujungna kematen. Jahwe la bali bagi Setan, ikatakenNa alu jelas man kena maka lit masa depan si luar biasa adi tetap kena bas dalan si tujunna ku kegeluhen.​—Ms. 37:29; Jes. 35:5, 6; 65:21-23.

8. Kai si banci ipelajari anak muda arah pengalamen Olaf?

⁸ Banci kena erlajar arah pengalamen sekalak anak muda si gelarna Olaf. * Iajak teman-teman sekelasna ia erhubungen seks. Ijelaskenna man teman-temanna e maka Saksi-Saksi Jahwe la nggit erhubungen seks adi lenga erjabu perban ngikutken patoken Pustaka. Tapi kenca megi si e, piga-piga temanna si diberu, reh semangatna nggoda ia gelah nggit erhubungen seks ras kalak e. Amin pe bage, Olaf la nggit terpengaruh, terus atena ngelakoken kai si benar. Selain si e, lit ka tentangen arah guru-guruna i sekolah. Bagenda nina, “Isuruh guru-guruku aku kuliah gelah la isepeleken kalak aku. Ning kalak e labo aku banci sukses adi la kin  kuliah.” Kai si nampati Olaf ngadapi tentangen bas sekolahna e? Nina, “Kompak aku ras turang senina bas runggun. Kalak e enggo bali bagi keluargaku. Reh tutusna ka ateku mpelajari Pustaka. Reh buena aku erlajar, reh tekna aku maka enda me kebenaren. Dungna, nggit aku iperidiken.”

9. Kai si arus silakoken gelah tetap lit bas dalan si mesera?

⁹ Ate Setan sitadingken min dalan si tujunna ku kegeluhen. Atena siikutken min enterem kalak si lit bas dalan ‘si mbelang si tujunna ku kematen.’ (Mat. 7:13) Gelah banci kita tetap bas dalan si mesera e, arus terus sibegiken Jesus. Arus ka siinget maka situhuna banci kita aman adi tetap bas dalan e. Gundari mari sibahas nasehat Jesus si berikutna.

10. Menurut nasehat Jesus bas Matius 5:23, 24, kai si arus silakoken?

¹⁰ Baca Matius 5:23, 24. Bas ayat-ayat e ikataken Jesus kai si seh kel pentingna man kalak Jahudi si megiken ia, eme mpersembahken korban. Cuba bayangken situasi enda. Lit kalak Jahudi si reh ku rumah pertoton, janah enggo ersikap ia mereken sada binatang korban man imam. Tapi adi rempet ingetna maka lit turang seninana si la senang man bana, arus ‘lawes’ ia lebe janah tadingkenna binatang korban e. Engkai? Kai kin si pentingen asangken mpersembahken korban man Jahwe? Alu jelas ikataken Jesus bagenda, ‘Erdame kam lebe ras turang seninandu.’

11. Ceritaken kai saja si ilakoken Jakup gelah banci erdame ras Esau.

¹¹ Banci sipelajari uga carana erdame arah usihen si iban Jakup. Enggo lit kira-kira 20 tahun itadingkenna kuta kemulihenna. Bas sada wari, iutus Jahwe sada malekat guna nuruh ia mulih ku kutana. (Kej. 31:11, 13, 38) Tapi masalahna, abangna Esau, segat atena ia janah bunuhna atena ia. (Kej. 27:41) Emaka, “mbiar kel Jakup janah kuatir ia” merawa denga Esau man bana. (Kej. 32:7) Kai si ilakoken Jakup gelah banci erdame ras abangna? Si pertama, tutus atena ertoto man Jahwe. Selain si e, mbue ka ikirimna hadiah man Esau. (Kej. 32:9-15) Dungna, sanga jumpa kalak e, sujud Jakup i lebe-lebe Esau, labo saja sekali ntah pe dua kali, tapi seh pitu kali. Perban nggit Jakup mpeteruk bana janah ihamatina Esau, banci ia erdame ras abangna.​—Kej. 33:3, 4.

12. Kai si banci sipelajari arah Jakup?

¹² Banci sidat pelajaren penting arah kai si ilakoken Jakup sope lenga jumpa ras abangna bage pe arah kai si ilakokenna sanga jumpa ia ras abangna. Alu meteruk ukur pindo Jakup penampat Jahwe janah lakokenna sesuai ras totona. Lit ka piga-piga cara ilakokenna gelah banci erdame ras abangna. Sanga jumpa ras abangna, labo permasalahken Jakup ise si benar ras ise si salah. Si pentingna akap Jakup eme erdame ras abangna. Uga carata ngusih Jakup?

13-14. Adi sempat siban kitik ukur turang seninata, kai si arus silakoken?

¹³ Gelah banci kita tetap bas dalan si tujunna ku kegeluhen, arus kita erdame ras turang seninata. (Rom. 12:18) Adi enggo sempat siban kitik ukur turang seninata, kai si arus silakoken? Bali bagi Jakup, tutuslah ateta ertoto man Jahwe.  Sipindolah gelah ipasu-pasu Jahwe usahata guna erdame ras turang seninata.

¹⁴ Arus ka sipereksa dirita. Cuba ukuri penungkunen enda, ‘Kuanggap nge perasan kalak pentingen asangken erga diriku? Nggit nge aku mindo maap arah ukurku nari janah kuusahaken erdame ras kalak si deban? Uga nge perasan Jahwe ras Jesus adi aku si leben nggit erdame ras turang seninaku?’ Adi siukuri penungkunen-penungkunen si bage, e erban kita reh nggitna erdame ras turang seninata bagi si arapken Jesus. Uga carata ngusih Jakup i bas si e?

15. Menurut Epesus 4:2, 3, uga arusna perbahanenta sanga siusahaken erdame ras turang seninata?

¹⁵ Cuba bayangken kai si terjadi adi pentingen akap Jakup erga dirina sanga jumpa ras Esau. Pasti hasilna la mehuli. Sanga sijumpai ateta turang seninata guna erdame ras ia, arus kita meteruk ukur. (Baca Epesus 4:2, 3.) Kuan-kuanen 18:19 ngataken, “Nukahen naluken kota si erbenteng asangken muat ukur teman si sakit hati, lit perubaten si mesera ndungisa bali bagi mbuka gerbang si paguh palangna.” Tapi, adi mindo maap kita arah ukurta nari, banci sibuka ‘palang’ e.

16. Sanga erdame ateta ras turang seninata, kai si arus siukuri, ras engkai?

¹⁶ Sope lenga kita ngerana ras turang seninata si kitik ukurna e, perlu siukuri alu manjar-anjar kai ateta sikataken ras uga carata mpesehsa. Sanga ngerana kita ras ia, perlu siinget maka tujunta eme gelah ula nai kitik ukurna. Tangtangna, banci saja la mehuli rananna ntah pe isalahkenna kita. Enda banci erban kita merawa ntah pe sibela dirita. Tapi adi bage siban, banci nge kita erdame ras ia? Pasti lang. Ingetlah maka pentingen nge erdame ras turang seninata asangken mbuktiken ise si benar ras si salah.​—1 Kor. 6:7.

17. Kai si banci sipelajari arah pengalamen Gilbert?

¹⁷ Cuba perdiateken pengalamen arah Gilbert, si usahakenna kel erban dame. Bagenda nina, “Mbarenda la mehuli hubungenku ras anakku si diberu. Lebih dua tahun dekahna, kuusahaken asa ngasupku gelah banci kami kompak.” Kai  deba nari si ilakoken Gilbert? Nina, “Sope lenga aku ngerana ras ia, ertoto aku lebe janah kusikapken pusuhku gelah ula aku merawa adi katakenna kai si erban kitik ukurku. Nggit ka aku ngampuni ia. Kuusahaken gelah la kubuktiken maka aku si benar, janah kuteh maka arus kujaga perdamen bas keluargaku.” Kai hasilna? Bagenda nina Gilbert, “Gundari, meriah ukurku perban banci aku kompak ras kerina anggota keluargaku.”

18-19. Adi enggo sempat siban kitik ukur kalak si deban, kai si arus silakoken, janah engkai?

¹⁸ Emaka, kai pelajarenna man banta? Adi enggo sempat banndu kitik ukur turang seninandu, dalankenlah nasehat Jesus guna erdame. Ertotolah man Jahwe janah pindolah penampat kesah si badiaNa gelah banci kam erban dame. Alu bage, reh riahna me ukurndu janah banci buktikenndu maka enggo begikenndu Jesus.​—Mat. 5:9.

¹⁹ Ngata bujur kel kita perban keleng ate Jahwe kita, ibereNa kita petunjuk arah Jesus Kristus, ‘kepala runggunta.’ (Ep. 5:23) Mbera-mbera terus siusahaken ‘megiken’ Jesus bali bagi Rasul Petrus, Jakup, ras Johanes. (Mat. 17:5) Enggo sibahas ndai cara ngelakokenca, eme alu tetap bas dalan si mesera si tujunna ku kegeluhen, bage pe erdame ras turang senina si enggo sempat siban kitik ukurna. Alu bage, sidatken me melala pasu-pasu gundari janah banci kita nggeluh alu ermeriah ukur seh ras lalap bas wari si pepagi.