1, 2. Engkai maka pertemanen Jonatan ras Daud jadi contoh kesetian si luar biasa?

PASTI meriah dingen megah iakap Jonatan ngidah Daud si nguda denga si perpang. Kenca Daud munuh Goliat, ibabana ’takalna’ kempak Raja Saul, bapa Jonatan. (1 Sam. 17:57) Jonatan la sangsi maka Dibata ras Daud, jenari Jonatan ras Daud jadi teman meriah. Kalak enda erjanji maka ia setia sapih-sapih ia. (1 Sam. 18:1-3) Segedang geluhna, Jonatan setia man Daud.

² Jonatan tetap setia man Daud, amin gia Jahwe milih Daud labo Jonatan si jadi raja Israel. Janah paksa ibunuh Saul atena Daud, gulut ukur Jonatan nandangi temanna e. Ietehna maka Daud paksana i bas taneh mesawang i Hores, emaka reh Jonatan ndahi ia guna mpegegehi ia gelah terus ernalem man Jahwe. Nina Jonatan man Daud, ”Ola kam mbiar. Bapangku Saul labo ngasup nehken si jahat man bandu. Ietehna tuhu-tuhu maka kam nge pagi jadi  raja Israel janah maka aku me teruhenndu.”​—1 Sam. 23:16, 17.

3. Kai si pentingen iakap Jonatan asangken kesetianna man Daud, janah janari banci sieteh? (Nehen gambar pemena artikel.)

³ Biasana meriah ukurta ngidah kalak si setia, termasuk Jonatan. Tapi, si erbahanca meriah ukurta labo erkiteken kesetianna saja man Daud tapi erkiteken kesetian Jonatan man Jahwe jadi sada hal si pentingna kal bas geluhna. Enda me si erbanca ia setia man Daud janah la cian man bana, amin pe Daud si jadi raja. Jonatan pe nampati Daud gelah ernalem man Jahwe. Kalak enda duana tetap setia man Jahwe bage pe sada ras si debanna. Kalak enda nepati janji si ibahanna, ”TUHANlah si petetapsa maka kam ras aku, bage pe kesusurenndu ras kesusurenku, ngasup nepati padan si ibahan kita pekepar i lebe-lebe TUHAN seh rasa lalap.”​—1 Sam. 20:42.

4. (a) Kai si banci erbahan kita tuhu-tuhu ngejapken keriahen ukur ras kepuasen? (b) Kai si man bahasenta i bas artikel enda?

⁴ Kita pe arus setia man keluarganta, teman-temanta, bage pe turang senina bas runggun. (1 Tes. 2:10, 11) Tapi si ndauh pentingen asangken si e kerina, kita arus setia man Jahwe. Ia me si mereken kegeluhen banta! (Ket. 4:11) Adi setia kita man baNa, tuhu-tuhu sigejapken keriahen ukur ras kepuasen. Tapi kita pe arus tetap setia man Dibata termasuk i bas situasi si sulit. Bas artikel enda, sibahas uga usihen Jonatan banci nampati kita tetap setia man Jahwe i bas empat situasi: (1) paksa lit sekalak si erkuasa si la metunggung siakap sihamati, (2) paksa arus sipilih man ise kita setia, (3) paksa sekalak turang seninanta si lit tanggung jabapna i bas runggun salah paham ntah pe la adil man banta, ras (4) paksa mesera siakap nepati janji.

5. Engkai maka mesera iakap kalak Israel setia man Dibata paksa Saul jadi raja?

⁵ Jonatan ras kalak Israel lit i bas situasi si sulit. Raja Saul, bapa Jonatan lanai patuh man Jahwe janah Jahwe pe nulak ia. (1 Sam. 15:17-23) Tapi, Dibata ngijinken Saul tetap merentah piga-piga tahun dekahna. Emaka mesera iakap rayat setia man Jahwe paksa raja si ipilih guna kundul ’bas kursi kinirajan Jahwe’ ngelakoken kai si la mehuli.​—1 Kro. 29:23.

6. Kai buktina maka Jonatan tetap setia man Jahwe?

⁶ Amin gia Saul lanai patuh man Dibata, Jonatan tetap setia man Jahwe. (1 Sam. 13:13, 14) Paksa si e, reh me pasuken Pilistin si mbelin ras 30.000 gereta perangna nerang Israel. Tentera Saul 600 kalak ngenca, janah ia ras Jonatan ngenca si erpedang. Tapi Jonatan la mbiar. Niingetna kata-kata nabi Samuel, ”Erkiteken gelarNa si mbelin, e maka labo kam itadingkenNa.” (1 Sam. 12:22) Nina Jonatan man sekalak tenterana, ”La lit kai pe si banci ngambati Ia mereken kemenangen man banta aminna gia la kita nterem.” Emaka ia ras tentera e nerang sada terpuk kalak Pilistin janah ibunuhna 20 kalak. Jonatan erkiniteken man Jahwe janah Jahwe pe masu-masu ia. Jahwe erbahan linur janah kalak Pilistin pe mbiar. Kenca e, kalak enda sibunuhen sapih-sapih ia. Dungna kalak Israel menang i bas pertempuren e.​—1 Sam. 13:5, 15, 22; 14:1, 2, 6, 14, 15, 20.

7. Uga perbahanen Jonatan man bapana?

⁷ Amin gia Saul tetap la patuh man  Jahwe, tapi Jonatan tetap patuh man bapana asa bancina. Contohna, kalak enda ras-ras lawes erperang guna mbela umat Jahwe.​—1 Sam. 31:1, 2.

8, 9. Engkai maka adi sihamati kalak si lit wewenangna ncidahken maka kita setia man Jahwe?

⁸ Bagi Jonatan, kita pe banci tetap setia man Jahwe alu patuh man pemerentah i bas negara inganta tading sedekah e la ertentangen ras peraten Dibata. Jahwe ngijinken ”pemerentah si erkuasa” enda merentah kita, janah iarapken Jahwe gelah kita nghamati kalak e. (Oge Roma 13:1, 2.) Enda me alasenna ngkai maka perlu sihamati pemerentah amin pe banci saja ia la jujur janah la metunggung siakap nghamati ia. Situhuna, arus sihamati kerina kalak si ndatken wewenang i bas Jahwe nari.​—1 Kor. 11:3; Heb. 13:17.

⁹ Rita, sekalak turang seninanta i Amerika Selatan, ncidahken maka ia setia man Jahwe alu nghamati perbulangenna amin gia ia iperlakoken alu la mehuli. ^[1][2] Maun-maun perbulangenna la nggit ngerana ras ia ntah pe kasar pengeranana erkiteken ia jadi sekalak Saksi-Saksi Jahwe. Iancamna ka maka itadingkenna ia kari janah ibabana anak-anakna. Tapi Rita la ’mbalas alu kejahaten’ iusahakenna gelah jadi ndehara si mehuli. Erdakan Ia man perbulangenna, icucina uisna, janah iperdiatekenna keluarga perbulangenna. (Rom. 12:17) Adi banci ia, itemanina perbula ngenna njumpai keluarga ras temanna. Contohna, paksa perbulangenna lawes ku kuta guna ndahi acara penguburen bapana, ipesikap Rita kerina si iperluken kalak enda bas perdalanen. Kenca si e, bas acara penguburen itimaina perbulangenna bas darat gereja. Ertahun-tahun kenca e, perbulangen Rita mulai mehuli man bana erkiteken ia sabar janah lalap nghamati perbulangenna. Gundari perbulangenna ndukung ia gelah reh ku perpulungen janah itaruhkenna. Maun-maun ia pe ikut pulung ras ndeharana.​—1 Pet. 3:1.

10. Engkai maka Jonatan setia man Daud labo man Saul?

¹⁰ Paksa ikataken Saul maka ibunuhna atena Daud, Jonatan arus erbahan sada keputusen si sulit. Setia atena man bapana tapi setia ka min atena man Daud. Ieteh Jonatan maka Dibata masu-masu Daud labo Saul, emaka ipilihna gelah setia man Daud. Isuruhna Daud cebuni janah ikatakenna man Saul gelah ula ibunuhna Daud.​—Oge 1 Samuel 19:1-6.

11, 12. Uga kekelengenta man Dibata banci nampati kita gelah setia man baNa? Bereken contohna.

¹¹ Alice, sekalak turang seninanta i Australia, arus erban keputusen, man ise ia arus setia. Paksa erlajar Pustaka, iturikenna man keluargana kerna kai si ipelajarina. Ipebetehkenna ka maka lanai ia ngerayaken natal ras keluargana janah ijelaskenna alasenna. Tangtangna anggota keluargana kecewa saja, tapi dungna merawa kal ia man bana. Iakap kalak enda lanai ia iperdiateken Alice. Kenca si e, kataken nandena maka lanai atena ngidah Alice. Nina Alice, ”Sengget aku janah megogo kal kuakap erkiteken keleng kal ateku keluargangku. Amin gia bage, ertekad aku guna lebih ngkelengi Jahwe ras Jesus, janah aku iperidiken i bas kebaktin si reh.”​—Mat. 10:37.

¹² Adi la kita metenget, banci kita lebih setia man tim olah raga, sekolah, ntah pe negara, asangken man Jahwe. Contohna, meriah ukur Henry main catur ras tim sekolahna janah atena sekolahna menang i bas pertandingen. Tapi, erkiteken main catur tiap minggu, lanai lit waktuna erberita ras perpulungen. Tapi sedar Henry maka kesetianna man sekolah nggo pentingen akapna asangken kesetianna man Dibata. Emaka iputuskenna lanai ikut i bas tim catur i sekolahna.​—Mat. 6:33.

13. Uga kesetianta man Dibata nampati kita paksa lit masalah bas keluarga?

¹³ Maun-maun mesera setia man dua anggota keluarga sekaligus. Contohna Ken. Nina, ”Kudahi ateku nandeku alu ratur janah mindo gelah ia tading ras kami sekali-sekali. Tapi nandeku ras ndeharangku la sicocoken.” Nina ka, ”Adi sisenangken sada pihak pasti pihak si deban la senang.” Iukuri Ken kai siikataken Pustaka si Badia janah isedarina maka selaku perbulangen, arus lebih isenangkenna ndeharana janah setia man bana. Emaka datna sada cara si isetujui ndeharana. Kenca si e, ijelaskenna man ndeharana maka ia arus mehuli man nandena. Janah ijelaskenna ka man nandena gelah iergaina ndeharana.​—Oge Kejadin 2:24; 1 Korinti 13:4, 5.

14. Uga Saul mperlakoken Jonatan alu la adil?

¹⁴ Kita pe banci tetap setia man Jahwe paksa lit sekalak si ertanggung jabap bas runggun mperlakoken kita alu la adil. Raja Saul si itangkuhken Dibata mperlakoken anakna alu la mehuli. La iangkaina ngkai maka keleng ate Jonatan man Daud. Emaka paksa icubaken Jonatan nampati Daud, merawa kal Saul janah ipermelakenna anakna e i lebe-lebe jelma si nterem. Tapi Jonatan tetap ngergai bapana janah tetap setia man Jahwe, bage pe man Daud.​—1 Sam. 20:30-41.

15. Adi lit sekalak turang seninanta si la adil man banta, uga arusna tanggapenta?

¹⁵ I bas runggun Kristen si gundari, turang senina si lit tanggung jabapna  erusaha mperlakoken kerina kalak alu adil. Tapi turang seninanta enda la sempurna. Emaka, banci saja kalak enda salah paham ntah pe la adil man banta. (1 Sam. 1:13-17) Emaka, amin gia pernah siakap kalak enda salah paham nandangi kita, tetaplah kita setia man Jahwe.

16. I bas situasi kai kita arus setia man Dibata janah la mentingken bana?

¹⁶ Ate Saul Jonatan min si jadi raja seterusna labo Daud. (1 Sam. 20:31) Tapi Jonatan ngkelengi Jahwe janah setia man baNa. La ia mentingken bana, itepatina janjina man Daud janah jadi temanna. Situhuna ise pe si ngkelengi Jahwe janah setia man baNa arus ”ngkunduli padan si iberekenna, aminna pe arus rugi ia” (Msm. 15:4) Erkiteken kita setia man Dibata, arus sitepati janjinta. Contohna, adi sibahan sada perjanjin bisnis, arus silakoken kai si nggo sisetujui amin gia e mesera. Janah adi lit masalah i bas perjabunta, sicidahken maka keleng ateta Jahwe alu tetap setia man perbulangen ntah pe ndeharanta.​—Oge Maleaki 2:13-16.

17. Pelajaren kai si banci sidatken i bas artikel enda?

¹⁷ Ateta min setia man Dibata amin gia i bas situasi si sulit, bali bagi Jonatan. Emaka tetaplah kita setia man turang ras seninanta, sanga kitik ukurta ibahanna. Alu bage banci sibahan meriah ukur Jahwe janah kita pe ermeriah ukur. (Kua. 27:11) Kita pe banci tek maka iberekenNa kai si mehulina man banta janah iperdiatekenNa kita. I bas artikel seterusna, sibahas contoh piga-piga kalak si setia bage pe si la setia i bas jaman Daud.