I BAS tahun 1930-en, pendahin erberita i Brasil kurang mehuli perkembangenna. Tapi, tahun 1935, pasangen perintis Nathaniel ras Maud Yuille nulis surat man Joseph F. Rutherford, si paksa e minpin pendahin erberita si meriah. Kalak e nggit mereken dirina ngelayani janah ”nggit i tugasken ku japa pe”.

Nathaniel, sekalak pensiunen insinyur, paksa si e umurna 62 tahun. Ia direktur dinas bas sada runggun Saksi Jahwe i San Francisco, Kalifornia, AS. I jah, ia ngaturken pendahin erberita ras nggunaken perlengkapen tata sora guna mbarken berita Kinirajan. Pengalamen ras kerelanna tuhu-tuhu erguna bas tugasna si mbaru selaku hamba cabang i Brasil, negara si mbelang janah lit erbage-bage cakap!

Nathaniel ras Maud seh i Brasil tahun 1936 radu ras Antonio P. Andrade, sekalak perintis sekaligus penerjemah. Kalak e maba barang si meherga: 35 mesin pemutar rekamen ras sada motor si ermomo. Paksa si e, 60 ngenca perberita i Brasil, negara si mbelangna nomor lima i doni! Tapi, i bas piga-piga tahun saja, peralaten e nampati kalak enda mbarken berita si meriah man jutan kalak.

Sada bulan kenca pasangen Yuille seh, kantor cabang ngaturken kebaktin dinas si pemena i kota São Paulo, Brasil. Mis ibaba Maud motor si ermomo e guna ngiklanken khotbah umum kebaktin. Asilna, lit 110 kalak si reh! Kenca kebaktin, perberita e ersemangatna ras ertutusna erberita. Kalak e erlajar carana erberita alu nggunaken oge-ogen, kartu kesaksin, bage pe rekamen khotbah i bas cakap Hungaria, Inggris, Jerman, Polandia, Spanyol, bage pe, Portugis.

Telu kebaktin dinas si ibahan i São Paulo, Rio de Janeiro, bage pe Curitiba bas tahun 1937  erbahan si pulung ersemangatna erberita. Paksa kalak e erberita arah rumah ku rumah, motor si ermomo enda pe ipake. José Maglovsky, si paksa e anak perana denga, nuratken, ”Tama kami oge-ogen Pustaka si Badia i rak, janah paksa rekamen khotbah i putarken i motor, kami pe ngerana man kalak si ndarat rumahna nari perban merincuh meteh kerna berita e.”

Acara peridin ibahan i lau mbelin janah lit wisatawan si sangana cilas-cilas i deher lau e. Enda kesempaten si mehuli guna mbarken berita si meriah nggunaken motor si ermomo! Khotbah peridin si ipeseh seninanta Rutherford jelas kal terbegi i daerah e. Kalak si merincuh meteh, reh ku motor e guna megiken rekamen khotbah si iterjemahken ku cakap Portugis. Kenca si e, kerina calon si iperidiken ngendeken ende-enden Kinirajan janah ngikuti rekamenna i bas cakap Polandia. Turang-seninanta si deban pe ikut rende i bas erbage-bage cakap. Nina Yearbook tahun 1938, ”Siinget wari Pentakosta, paksa kerina kalak banci ngangkai kebenaren i bas cakapna sendiri.”

Kenca kebaktin-kebaktin e, tiap wari Minggu, melas ntah pe udan, rekamen khotbah tetap iputarken i taman, perumahen, bage pe i pabrik-pabrik i pusat São Paulo ras kota-kota i deherna. Tiap bulan, motor enda igunaken erberita man 3000 kalak si gadamen i sada kuta, kira-kira 97 kilometer i sebelah barat laut São Paulo. Dungna, iban sada runggun. Amin gia kalak e gadamen, tapi perberita i runggun e ergiah-giah kal erberita. Kalak e pe ndatken ijin guna mpeseh berita i bas Pustaka si Badia nari si mereken pengapul man kalak gadamen i bas kuta si deban.

Akhir tahun 1938, reh me rekamen berita si meriah kerna Kinirajan i bas cakap Portugis. Paksa All Souls’ Day (Wari Tendi), motor e lawes ku sada kuburen ku kuburen si debanna janah mutarken rekamen ”I ja kin Kalak si Nggo Mate?”, ”Jahwe”, ras ”Kinibayaken” si ibegiken 40.000 kalak si paksana jiarah!

Segat kal ate pendeta erkiteken kebenaren Pustaka iembarken alu terang-terangen man jelma si nterem. Rusur itekanna pihak si erwenang gelah ngelarang motor si ermomo. Iinget Yuille maka i bas sada paksa sekalak pendeta ngajuk-ngajuk jelma si nterem guna ngepung motor si ermomo. Tapi, paksa reh walikota ras polisi, malahen ibegiken kalak e rekamen seh ngasa dung. Janah ibaba walikota ka sada oge-ogen Pustaka si Badia. Emaka, i bas wari e la terjadi kerusuhen. Amin gia lit tentangen, Yearbook tahun 1940 ngelaporken maka tahun 1939 eme ”masa-masa si mehulina kal i Brasil guna ngelayani Jahwe, Teokrat Agung, janah mpebetehken gelarNa”.

Kenca igunaken ”motor si ermomo Watch Tower”, dahin erberita i Brasil seh kal majuna. Motor enda erguna kal i bas mbarken berita Kinirajan man jutan jelma. Amin gia bas tahun 1941 motor e idayaken, tapi ratusen ribu Saksi Jahwe i Brasil terus erberita man kalak si meteruk rukur i bas negeri si seh kal belangna enda.​—I bas arsipta nari i Brasil.